Ўзбекистон Республикаси Бош прокуратураси ва Қирғиз Республикаси Бош прокуратураси, бундан кейин «Томонлар» деб аталувчилар,

халқаро ҳуқуқнинг умумэътироф этилган нормаларига асосланиб,

давлатларнинг суверенитети ва мустақиллиги, прокуратура органлари ўртасидаги ўзаро тушуниш ва ҳамкорликнинг фойдали принципларидан келиб чиқиб,

фуқароларнинг, жамият ва давлатнинг ҳуқуқ ва эркинликлари ишончли ҳимоясини таъминлаш заруриятига таяниб,

миллий хавфсизликка, конституциявий тузумни куч билан ўзгартиришга қаратилган жиноий тажовузларга барҳам бериш, уларнинг олдини олиш, аниқлаш, фош этиш ва тергов қилиш, халқаро терроризм, наркотик воситалар, психотроп моддалар ва прекурсорларнинг ноқонуний муомаласига ва жиноятларнинг бошқа хавфли турларига қарши курашишга доир масалаларда тезкор ҳамкорлик қилиш ҳамда касбий алоқаларни кенгайтириш мақсадида,

Қирғиз Республикаси ва Ўзбекистон Республикаси ўртасидаги 1996 йил 24 декабрь кунги фуқаролик, оилавий ва жиноий ишлар бўйича ҳуқуқий ёрдам ва ҳуқуқий муносабатлар тўғрисидаги Шартнома, Ўзбекистон Республикаси Ҳукумати ва Қирғиз Республикаси Ҳукумати ўртасидаги 1999 йил 9 июль кунги жиноятчиликка қарши курашишда ҳамкорлик тўғрисидаги Битим, Ўзбекистон Республикаси Ҳукумати ва Қирғиз Республикаси Ҳукумати ўртасидаги 1999 йил 9 июль кунги наркотик воситалар, психотроп моддалар ва прекурсорларнинг ноқонуний муомаласига қарши курашишда ҳамкорлик тўғрисидаги Битим, шунингдек, Ўзбекистон Республикаси ва Қирғиз Республикаси иштирокчи ҳисобланган бошқа халқаро шартномалардан келиб чиқиб,

1. Томонлар ушбу Битим талабларидан келиб чиқиб, ўз ваколатлари доирасида тенглик, шартномавий мажбуриятларга риоя қилиш, ўзаро ҳурмат принциплари асосида ҳамкорлик қиладилар.

2. Томонлар ушбу Битим асосида қуйидаги жиноятларнинг олдини олиш, барҳам бериш, аниқлаш, фош этиш ва тергов қилиш борасида ҳамкорликни амалга оширадилар:

терроризм, сепаратизм, экстремизм;

қурол, ўқ-дорилар, портловчи моддалар ва портлатиш қурилмалари, ядро ва радиоактив материаллари, наркотик воситалар, психотроп моддаларнинг ноқонуний муомаласи;

конституциявий тузумга тажовуз қилиш ва ҳокимиятни куч билан эгаллаш;

шахснинг ҳаёти, соғлиғи, эркинлиги, қадр-қимматига тажовуз қилиш;

ноқонуний миграцияни ташкил этиш;

учинчи шахслар томонидан одамлар савдоси ва фоҳишаликка ёллаш;

иқтисодиёт, ташқи иқтисодий фаолият соҳасида, шу жумладан, солиққа тортиш, жиноий фаолиятдан олинган даромадларни легаллаштириш, контрабанда, қалбаки пуллар ясаш ва қимматли қоғозларни қалбакилаштириш;

мулкка қарши, шу жумладан, автотранспорт воситаларини талон-торож қилиш ва мол ўғирлаш билан боғлиқ;

атроф муҳит ва табиатдан фойдаланиш соҳасида;

уюшган ва бошқа жиноятчиликнинг ўзга турлари.

Томонлар Битимда эришилган аҳдлашувларни амалга ошириш мақсадида:

тергов ҳаракатлари ва тезкор-қидирув тадбирларини ўтказиш тўғрисидаги топшириқларни бажариш;

жиноий таъқибдан ва жазони ўташдан яширинган, ҳамда бедарак йўқолган шахсларнинг қидирувини ташкил этиш;

талон-торож қилинган, рақами ёки махсус фарқлов белгиларига эга бўлган предметлар, шу жумладан автотранспорт ва ўқотар қуроли, шунингдек, рақамли қимматли қоғозлар, шахсни тасдиқловчи ҳужжатларни белгиланган тартибда қидириш ва қайтаришга кўмаклашиш;

шахслар ва жиноий уюшма(ташкилотлар)нинг жиноий фаолиятига барҳам бериш, шу жумладан жисмоний ва юридик шахсларнинг тайёрланаётган ёки содир этилган жиноятларга алоқадорлиги, айниқса, наркотик воситалар, психотроп моддалар ва прекурсорларнинг ноқонуний муомаласи, одамлар савдоси ҳамда мансабдор шахслар иштирокида гуруҳ бўлиб содир қилинган жиноятлар тўғрисида ахборот алмашиш;

Томонларнинг давлатига ноқонуний келаётган шахслар тўғрисида ахборот бериш.

Томонлар ўзаро ҳуқуқий ёрдамни бошқа ўзаро мақбул шаклларда ҳам, аниқ вазиятлардан келиб чиққан ҳолда ва Томонлар давлатларининг миллий қонунчилигига мувофиқ амалга оширишлари мумкин.

Ушбу Битим доирасида ёрдам кўрсатиш тўлиқ ёки қисман рад қилиниши мумкин, агар бу инсон ҳуқуқларининг бузилишига олиб келса, давлат суверенитети ёки хавфсизлигига зарар етказса, ёхуд сўралаётган Томоннинг миллий қонунчилиги ҳамда унинг халқаро шартномаларига зид бўлса.

Бундай қарор қабул қилинган ҳолда сўраётган Томон бу ҳақда рад этишнинг сабабларини кўрсатиб, ёзма равишда хабардор қилинади.

Томонлар ушбу Битим талабларини бажариш мақсадида бир-бирлари билан бевосита алоқа қиладилар, шунингдек ўз давлатларининг ушбу Битим талабларига тўлиқ риоя қилган ҳолда ҳаракат қилувчи, чегара минтақаларининг ваколатли прокуратура органлари орқали ҳамкорликни амалга оширадилар, агар Ўзбекистон Республикаси ва Қирғиз Республикаси ўртасида тузилган давлатлараро шартномаларда бошқача тартиб ўрнатилмаган бўлса.

Чегара минтақалари прокуратуралари бўлиб қуйидагилар ҳисобланади:

Ўзбекистон Республикасида — Андижон, Фарғона ва Наманган вилоятлари.

Қирғиз Республикасида — Боткен, Ўш ва Жалолобод вилоятлари.

Чегара минтақалари прокуратуралари ушбу Битимнинг 2-моддасида кўрсатилган тадбирларни бажаришда минтақа даражасидаги бевосита алоқалар ёрдамида бир-бирларига ҳуқуқий ёрдам кўрсатадилар.

Ундан ташқари, чегара минтақалари прокуратураларининг ҳамкорлиги соҳасига минтақавий божхона органларининг фаолиятини назорат қилишда ҳуқуқий ёрдам кўрсатиш, шу жумладан:

контрабанда фаолиятининг олдини олиш;

мансабдор шахслар иштирокида гуруҳ бўлиб содир қилинган жиноятларнинг олдини олиш киради.

1. Ҳуқуқий ёрдам кўрсатиш тўғрисидаги илтимоснома ёзма равишда расмийлаштирилиши, прокуратуранинг раҳбари ёки прокуратура раҳбарининг ўринбосари томонидан имзоланиши, сўраётган муассасанинг гербли муҳри билан тасдиқланиши ва қуйидаги маълумотларни акс эттириши лозим:

Томонларнинг прокуратуралари ёки чегара минтақалари прокуратураларининг номи;

Мурожаатнинг мақсади, баёни ва сўралаётган ҳуқуқий ёрдам турининг тавсифи;

Жисмоний шахс тўғрисида маълумотлар: фамилияси, исми, отасининг исми, туғилган санаси ва жойи, фуқаролиги, меҳнат фаолияти тури, юридик шахс тўғрисида, номи, юридик манзилгоҳи ёки жойлашган жойи, банк реквизитлари ва фискал кодлари, қилмиш ёки воқеанинг тавсифи, сўраётган Томоннинг миллий қонунчилигига мувофиқ жиноий тажовузнинг малакаланиши, қўлланилаётган жиноий қонун нормаси матни ва зарар миқдори тўғрисида маълумотлар, агар у жиноят содир қилинганлиги оқибатида етказилган бўлса;

Жиноят иши доирасида бажарилиши зарур бўлган процессуал ҳаракатлар ёки тезкор-қидирув тадбирларининг батафсил рўйхати.

2. Илтимоснома бир ой муддатдан кечиктирилмай ижро қилинади. Уни ўз вақтида бажаришга монелик қилган ҳолларда, сўраётган Томон кечиктирмай, сабаблари кўрсатилиб, хабардор этилади.

Илтимосномани бажаришда сўралаётган прокуратура ўз давлатининг қонунчилигига таянади.

Махсус қарорлар ёки ваколатли прокурорларнинг санкцияси талаб қилинадиган ҳаракатларни бажариш учун, бундай қарорлар илтимоснома ташаббускори томонидан қабул қилинади. Сўралаётган томон кўрсатилган қарорларнинг асослилигини кўриб чиқмайди.

Томонларнинг бири ҳудудида жиноят содир этиб, бошқа Томоннинг ҳудудида бўлган шахсларни ушлаб бериш ва уларнинг жиноий таъқиби доираси бу давлатларнинг миллий қонунчилигига мувофиқ ҳамда давлатлараро шартномаларда ўрнатилган тартибда амалга оширилади.

Бир нечта давлатлар ҳудудида содир қилинган жиноятларни тергов қилиш тўғрисида, шунингдек, бу ишларнинг тергови устидан назорат тўғрисидаги масала Томонларнинг раҳбарлари келишуви бўйича ҳал қилинади.

Зарур ҳолларда, жиноятларни тез ва ҳар томонлама тергов қилиш учун биргаликдаги тергов-тезкор гуруҳлари тузилиши мумкин.

Биргаликдаги тергов-тезкор гуруҳлари аъзолари бевосита бир-бирлари билан ҳамкорлик қиладилар, терговнинг асосий йўналишлари, тергов ҳаракатларини келишиб оладилар, олинган ахборот билан алмашадилар. Улар фаолиятини мувофиқлаштириш келишув бўйича биргаликдаги тергов гуруҳини тузиш ташаббускори ёки унинг аъзоларидан бири томонидан амалга оширилади.

Тергов ҳаракатлари улар ўтказилаётган Томон ҳудудидаги биргаликдаги тергов гуруҳи томонидан амалга оширилади.

Ҳуқуқий ёрдам кўрсатиш масалалари бўйича ўзаро муносабатларда Томонлар матнни рус тилига мажбурий таржима қилган ҳолда давлат тилидан фойдаланадилар. Таржима ваколатли шахснинг имзоси ва муҳр билан гувоҳлантирилиши лозим.

Ҳуқуқий ёрдам кўрсатиш билан боғлиқ харажатлар аниқ ҳаракатлар амалга оширилаётган ҳудуддаги Томон зиммасига юклатилади.

Томонлар бир-бирларига жиноят иши қўзғатилганлиги тўғрисида ва зарур бўлганида тегишли Томон фуқароларига нисбатан қонуний кучга кирган ҳукм тўғрисида маълумот тақдим этадилар.

Томонлар идоравий статистик ахборот, методик қўлланмалар, миллий қонунчилик тўғрисида маълумотлар ва ишлаб чиқилаётган қонун лойиҳалари, ўзаро қизиқтираётган бошқа ахборот билан алмашадилар, бир-бирларига моддий-техникавий таъминот масалаларини ҳал қилишда кўмаклашадилар.

Томонларнинг ўзаро аҳдлашуви бўйича ушбу Битимга ўзгартиш ва қўшимчалар киритилиши мумкин, улар баённома билан расмийлаштирилади ва мазкур Битимнинг ажралмас қисми ҳисобланади.

Ушбу Битимнинг кучга кириши билан Ўзбекистон Республикаси Прокуратураси ва Қирғиз Республикаси Бош прокуратураси ўртасидаги 1994 йил 10 ноябрь кунги ҳуқуқий ёрдам ва ҳамкорлик тўғрисидаги Битим ўз кучини йўқотади.

Ҳар бир Томон бошқа Томон берган конфиденциал маълумотларни сақлаш бўйича зарур чораларни кўради, агар улар ёпиқ характерга эга бўлса ёки бераётган Томон унинг мазмунини ошкор қилиш керак эмас деб ҳисобласа.

Томонларнинг бири мазкур Битим доирасида олган маълумот ва хабарларни учинчи Томонга бериш зарурияти бўлса, ушбу маълумот ва хабарларни бераётган Томоннинг розилиги талаб қилинади.

Ушбу Битимни қўллашда ёки изоҳлашда низолар ва келишмовчиликлар пайдо бўлса, Томонлар уларни маслаҳат ва музокара ўтказиш йўли билан ҳал қиладилар.

Ушбу Битим имзоланган санадан кучга киради ва 5 йил муддатга тузилади. Ушбу Битим автоматик равишда кейинги беш йиллик даврларга узайтирилади, агар Томонларнинг ҳеч қайсиси навбатдаги беш йиллик муддатнинг тугашига камида олти ой қолганида унинг ҳаракатини тўхтатиш тўғрисида бошқа Томонни ёзма равишда хабардор этмаса.

Ушбу Битим ўз ҳаракатини Томонларнинг биридан унинг ҳаракатини тўхтатиш тўғрисидаги бошқа Томонга юборилган хабарнома олингач, олти ойдан кейин тўхтатади.

2006 йил 3 октябрда Тошкент шаҳрида икки асл нусхада, ҳар бири ўзбек, қирғиз ва рус тилларида тузилди, бунда барча матнлар бир хил кучга эга.

Ушбу Битимни изоҳлашда тушунмовчиликлар юзага келган ҳолда Томонлар рус тилидаги матнга таянадилар.