Ўзбекистон Республикаси Президентининг «Республика тиббиёт муассасалари фаолиятини ташкил этишни такомиллаштириш чора-тадбирлари тўғрисида» 2007 йил 2 октябрдаги ПҚ-700-сон қарорига мувофиқ ҳамда тиббий фаолиятни лицензиялаш тартибини такомиллаштириш мақсадида Вазирлар Маҳкамаси қарор қилади:

1. Қуйидагилар:

Тиббий фаолиятни лицензиялаш тўғрисидаги низом 1-иловага мувофиқ;

Ўзбекистон Республикаси Соғлиқни сақлаш вазирлигининг Лицензиялаш ва нодавлат тиббиёт муассасалари томонидан кўрсатилаётган тиббий хизматлар сифатини назорат қилиш бошқармаси тўғрисидаги низом 3-иловага мувофиқ тасдиқлансин.

2. Белгилаб қўйилсинки, тиббий фаолиятни амалга ошириш учун илгари берилган лицензиялар лицензиатлар ушбу қарорда белгиланган янги лицензия талаблари ва шартларига мувофиқ бўлган тақдирда ушбу қарор чиққан кундан бошлаб 5 йил мобайнида амал қилади.

3. Ўзбекистон Республикаси Соғлиқни сақлаш вазирлиги:

тиббий фаолиятни амалга ошириш ҳуқуқи учун лицензиялар қатъий равишда ушбу қарорга мувофиқ берилишини таъминласин;

илгари берилган лицензия эгаларининг ушбу қарорда белгиланган лицензия талаблари ва шартларига мувофиқлигини уч ой муддатда кўриб чиқсин ҳамда эгалари мазкур талаблар ва шартларга жавоб бермайдиган лицензияларнинг амал қилишини белгиланган тартибда тўхтатиш чора-тадбирларини кўрсин;

бир ой муддатда Ўзбекистон Республикаси Соғлиқни сақлаш вазирлигининг Лицензиялаш ва нодавлат тиббиёт муассасалари томонидан кўрсатилаётган тиббий хизматлар сифатини назорат қилиш бошқармаси аппаратини ҳамда соғлиқни сақлашни бошқариш ҳудудий органларидаги тегишли бўлинмаларни юқори малакали ва тажрибали мутахассислар билан бутласин;

уч ой муддатда лицензиатлар томонидан лицензия талаблари ва шартларининг, шу жумладан улар томонидан кўрсатилаётган хизматлар сифатига қўйиладиган талабларнинг бажарилиши тўғрисидаги ахборотларни ўз ичига оладиган марказлаштирилган маълумотлар базасини яратсин;

аҳолини оммавий ахборот воситалари, шу жумладан Интернет тармоғи орқали лицензия талаблари ва шартлари, шу жумладан кўрсатилаётган хизматлар сифатига қўйиладиган талаблар, шунингдек лицензиясининг амал қилиши тўхтатиб қўйилган, тўхтатилган ёхуд лицензияси бекор қилинган лицензиатлар тўғрисида мунтазам равишда хабардор қилиб борсин.

4. Ўзбекистон Республикаси Ҳукуматининг 4-иловага мувофиқ айрим қарорлари ўз кучини йўқотган деб ҳисоблансин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Қосимов зиммасига юклансин.

1. Мазкур Низом тиббий фаолиятни лицензиялаш тартибини белгилайди.

2. Тиббий фаолиятни лицензиялаш Ўзбекистон Республикаси Соғлиқни сақлаш вазирлиги (кейинги ўринларда лицензияловчи орган деб аталади) томонидан амалга оширилади.

Лицензияловчи органда лицензиялар бериш тўғрисидаги ҳужжатларни кўриб чиқиш, улар юзасидан хулосалар тайёрлаш Ўзбекистон Республикаси Соғлиқни сақлаш вазирлигининг Лицензиялаш ва нодавлат тиббиёт муассасалари томонидан кўрсатилаётган тиббий хизматлар сифатини назорат қилиш бошқармаси (кейинги ўринларда Лицензиялаш ва назорат қилиш бошқармаси деб аталади) томонидан амалга оширилади.

3. Касалликларни профилактика, диагностика қилиш ва даволашга, чалинган касаллик (касалликлар)дан кейин реабилитация қилишга йўналтирилган, махсус тиббий маълумотни ва кўникмаларни талаб қилувчи муайян тиббий ихтисослик (ихтисосликлар) бўйича фаолият лицензияланадиган тиббий фаолият ҳисобланади.

4. Ушбу Низомда назарда тутилган талаблар ва шартларга мувофиқ бўлган юридик шахслар лицензия талабгорлари бўлиши мумкин.

Давлат тиббиёт муассасалари, шунингдек Ўзбекистон Республикаси Вазирлар Маҳкамаси қарорларига мувофиқ ташкил этилган тиббиёт муассасалари тиббий фаолиятни амалга ошириши уларни ташкил этиш тўғрисидаги далолатномаларда назарда тутилган тақдирда тиббий фаолиятни лицензия олмасдан амалга оширишга ҳақлидир. Ушбу қоида кўрсатиб ўтилган муассасаларни мазкур Низомда назарда тутилган лицензия талаблари ва шартларини, шунингдек қонун ҳужжатларига мувофиқ қўйиладиган тиббий фаолиятни амалга ошириш билан боғлиқ бошқа талабларни бажаришдан озод қилмайди.

5. Тиббий фаолиятни амалга ошириш ҳуқуқи учун лицензиялар фақат муайян ихтисослик турлари бўйича берилади, уларнинг ягона рўйхати Ўзбекистон Республикаси Вазирлар Маҳкамаси томонидан тасдиқланади.

Ихтисослик турлари бўйича тиббий фаолият ҳажми Ўзбекистон Республикаси Соғлиқни сақлаш вазирлиги томонидан белгиланади.

6. Тиббий фаолиятни амалга ошириш учун намунавий (оддий) лицензиялар берилади.

7. Тиббий фаолиятни амалга ошириш ҳуқуқи учун лицензиялар 5 йил муддатга берилади. Лицензия 5 йилдан кам муддатга лицензия талабгорининг аризасига кўра берилиши мумкин.

8. Қуйидагилар тиббий фаолиятни амалга оширишда лицензия талаблари ва шартлари ҳисобланади:

фаолиятни қонун ҳужжатларига қатъий мувофиқ равишда амалга ошириш;

бош врач учун — олий тиббий маълумотга ва мутахассислиги бўйича камида 5 йил иш стажига, тегишли мутахассислик бўйича малака тоифасига, шунингдек бошқа мутахассис врачлар учун — олий тиббий маълумотга ва тегишли мутахассислик бўйича малака тоифасига эга бўлиши;

тиббиёт муассасасида ишлаётган мутахассис врачларнинг ва ўрта тиббиёт ходимларининг камида 5 йилда бир марта малака ошириш талабларига риоя этган ҳолда зарур касб даражасини таъминлаш;

лицензия талабгорида лицензияланаётган фаолият турини бажариш учун мўлжалланган, унга мулк ҳуқуқи билан ёки бошқа қонуний асосда тегишли бўлган, санитария қоидалари ва нормаларига мувофиқ биноларнинг мавжуд бўлиши;

тиббий фаолиятнинг лицензияланаётган тегишли турига мувофиқ бўлган ташкилий-техник шарт-шароитлар ва моддий-техника жиҳозларининг, шу жумладан:

а) лицензия талабгорига мулк ҳуқуқи билан ёки бошқа қонуний асосда тегишли бўлган, метрология нормаларига ва техника хавфсизлиги нормаларига мувофиқ бўлган замонавий диагностика ва даволаш асбоб-ускуналарининг мавжуд бўлиши;

б) Ўзбекистон Республикаси Соғлиқни сақлаш вазирлиги томонидан қўллашга рухсат берилган тиббий технологиялардан фойдаланишни таъминлайдиган асбоблар, қаттиқ ва юмшоқ махсус инвентарлар, транспорт воситалари ва ҳужжатларнинг мавжуд бўлиши;

Ўзбекистон Республикаси Соғлиқни сақлаш вазирлиги томонидан тасдиқланган намуналар ва шакллар бўйича дастлабки тиббий ҳужжатларни юритиш, шунингдек статистика маълумотларини қонун ҳужжатларида белгиланган тартибда тақдим этиш;

санитария-гигиена нормалари ва қоидаларига риоя қилиш;

Ўзбекистон Республикаси Соғлиқни сақлаш вазирлиги томонидан рухсат этилган диагностика, профилактика ва даволаш методларини, шунингдек дори-дармонларни қўллаш;

фаолиятни лицензияда кўрсатилган тур ва/ёки ихтисослик доирасида, шунингдек лицензия битимига мувофиқ манзил (манзиллар) бўйича амалга ошириш.

9. Тиббий фаолиятнинг тегишли турини амалга ошириш учун зарур бўлган моддий-техник базага, асбоб-ускуналарга ва бошқа техника воситаларига, шунингдек мутахассиснинг тиббиёт анжомларининг мажбурий тўплами билан таъминланганлигига минимал талаблар белгиланган тартибда Ўзбекистон Республикаси Соғлиқни сақлаш вазирлиги томонидан белгиланади.

Тиббий фаолиятни амалга оширишда маънавий эскирган ускуналардан фойдаланилишига йўл қўйилмайди. Замонавий ва маънавий эскирган тиббий ускуналар рўйхати белгиланган тартибда Ўзбекистон Республикаси Соғлиқни сақлаш вазирлиги томонидан белгиланади.

10. Лицензия талабгори лицензия олиш учун лицензияловчи органга қуйидаги ҳужжатларни тақдим этади:

а) лицензия бериш тўғрисида ариза, унда қуйидагилар кўрсатилади:

юридик шахснинг номи ва ташкилий-ҳуқуқий шакли, унинг жойлашган жойи (почта манзили) ва тиббий фаолиятни амалга ошириш манзили, банк муассасасининг номи ва банк муассасасидаги ҳисоб рақами;

юридик шахс амалга оширишни мўлжаллаётган тиббий фаолиятнинг лицензияланадиган тури ҳамда фаолиятнинг кўрсатилган тури амалга ошириладиган муддат;

б) юридик шахснинг давлат рўйхатидан ўтказилганлиги тўғрисидаги гувоҳноманинг нотариал тасдиқланган нусхаси;

в) ҳудудий санитария-эпидемиология назорати органининг аризада кўрсатилган тури бўйича амалга ошириш учун мўлжалланган биноларнинг санитария нормалари ва қоидаларига мувофиқлиги тўғрисидаги хулосаси;

г) лицензия талабгорида муайян ихтисослик бўйича тиббий фаолиятни амалга ошириш учун зарур бўлган мавжуд тиббиёт асбоб-ускуналари ва аппаратлари рўйхати ва уларнинг мавжудлигини тасдиқлайдиган бошқа ҳужжатлар;

д) «Ўзстандарт» агентлиги органлари ёки «Ўзстандарт» агентлигида тегишли хулосалар бериш ҳуқуқи учун аккредитация қилинган метрология хизматлари томонидан тиббиёт асбоб-ускуналари ва аппаратларининг метрология нормалари ва стандартларига мувофиқлиги тўғрисида берилган хулоса;

е) бош врач учун — меҳнат дафтарчаси ва тайинлаш тўғрисидаги буйруқнинг нусхаси, олий тиббий маълумот тўғрисидаги дипломнинг, малака тоифаси берилганлиги тўғрисидаги сертификатнинг, кейинги 5 йилда малака оширганлик ва/ёки ихтисослашувдан ўтганлик тўғрисидаги ҳужжатнинг нотариал тасдиқланган нусхалари, шунингдек мутахассис врачлар учун — олий тиббий маълумот тўғрисидаги дипломнинг, малака тоифаси берилганлиги тўғрисидаги сертификатнинг, кейинги 5 йилда малака оширганлик ва/ёки ихтисослашувдан ўтганлик тўғрисидаги ҳужжатнинг нотариал тасдиқланган нусхалари;

з) лицензия талабгори томонидан лицензия талабгорининг аризаси лицензияловчи орган томонидан кўриб чиқилганлиги учун йиғим тўланганлигини тасдиқловчи ҳужжат.

11. Лицензия талабгоридан мазкур Низомда назарда тутилмаган ҳужжатларнинг тақдим этилишини талаб қилишга йўл қўйилмайди.

12. Ҳужжатлар лицензия талабгори томонидан лицензияловчи органга чопар орқали ёхуд олинганлиги тўғрисидаги билдиришнома билан почта алоқаси воситаси орқали етказиб берилади.

Ҳужжатлар Ўзбекистон Республикаси Соғлиқни сақлаш вазирлигининг Лицензиялаш ва назорат қилиш бошқармасининг масъул шахси томонидан рўйхат бўйича қабул қилинади, рўйхатнинг нусхаси ҳужжатлар қабул қилиб олинган сана тўғрисида белги қўйилган ҳолда аризачига юборилади (топширилади).

13. Лицензия талабгори нотўғри ёки бузилган маълумотлар тақдим этилганлиги учун қонун ҳужжатларига мувофиқ жавоб беради.

14. Ариза кўриб чиқилганлиги учун лицензия талабгоридан қонун ҳужжатларида белгиланган энг кам ойлик иш ҳақининг беш баравари миқдорида йиғим ундирилади.

Ариза кўриб чиқилганлиги учун йиғим суммаси лицензияловчи органнинг ҳисоб рақамига ўтказилади. Лицензия талабгори берилган аризадан воз кечган тақдирда тўланган йиғим суммаси қайтарилмайди.

15. Тиббий фаолиятни лицензиялаш ушбу Низомга илова қилинаётган схемага мувофиқ амалга оширилади.

Лицензия бериш ёки лицензия беришни рад этиш тўғрисидаги қарор барча зарур ҳужжатлар билан биргаликда лицензия талабгорининг аризаси олинган кундан бошлаб йигирма кундан ортиқ бўлмаган муддатда лицензияловчи орган томонидан қабул қилинади.

16. Лицензия талабгорининг барча зарур ҳужжатлар илова қилинган аризаси ариза олинган кунда кўриб чиқиш учун Лицензиялаш ва назорат қилиш бошқармасига киритилади.

Лицензия талабгори томонидан тақдим этилган ҳужжатлар улар олинган кундан бошлаб ўн беш кун муддатда (зарурат бўлганда жойига бориб) экспертизадан ўтказилиши керак.

Зарурат бўлганда лицензияловчи орган ҳужжатларни экспертизадан ўтказиш учун қўшимча равишда тегишли ихтисосга эга бўлган юқори малакали мутахассисларни жалб қилишга ҳақлидир.

17. Лицензия талабгорининг лицензия талаблари ва шартларига мувофиқлигини аниқлаш учун лицензияловчи орган Лицензиялаш ва назорат қилиш бошқармасининг тақдимномаси бўйича ўз маблағлари ҳисобига:

лицензия талабгорида лицензияланадиган фаолият турини амалга ошириш учун мавжуд шароитларни жойига бориб баҳолаш;

тегишли хулосалар тайёрлаш учун шартнома асосида экспертларни жалб қилиш ҳуқуқига эга.

18. Тақдим этилган ҳужжатлар бўйича лицензия талабгорига лицензия бериш ёхуд лицензия беришни рад этиш тўғрисидаги таклиф билан хулоса тузилади.

19. Лицензияловчи орган уч кун муддатда Лицензиялаш ва назорат қилиш бошқармасининг хулосаси асосида лицензия бериш ёки лицензия беришни рад этиш тўғрисида қарор қабул қилади ҳамда қабул қилинган қарор тўғрисида лицензиатни икки кун муддатда хабардор қилади.

Лицензияловчи органнинг лицензия беришни рад этиш тўғрисидаги қарори юзасидан қонун ҳужжатларида белгиланган тартибда шикоят қилиниши мумкин.

20. Лицензия берилганлиги учун энг кам ойлик иш ҳақининг ўн баравари миқдорида давлат божи ундирилади. Давлат божи суммаси республика бюджетига ўтказилади.

Лицензия беришга қарор қилинганлиги тўғрисидаги билдиришнома лицензия талабгорига банк ҳисоб рақами реквизитлари, давлат божи тўлаш муддати кўрсатилган ҳолда ёзма шаклда юборилади (топширилади).

21. Лицензия лицензия талабгори томонидан давлат божи тўланганлигини тасдиқловчи ҳужжат тақдим этилгандан ва у лицензия битимини имзолагандан кейин икки кун муддатда берилади.

Лицензия битимида қуйидагилар мавжуд бўлади:

битимни имзолаган шахсларнинг фамилияси, исми, отасининг исми, лавозими;

томонларнинг реквизитлари;

амалга оширилишига лицензия берилаётган тиббий фаолият турининг номи;

лицензиатга қўйиладиган лицензия талаблари ва шартлари;

лицензиянинг амал қилиш муддати;

лицензияланадиган тиббий фаолият тури амалга ошириладиган манзил (манзиллар);

лицензия битими талаблари ва шартлари бузилганлиги учун томонларнинг жавобгарлиги;

лицензия битими талаблари ва шартлари бажарилишини лицензияловчи орган томонидан назорат қилиш тартиби;

тиббий фаолиятнинг муайян тури амалга ошириш хусусиятларига тааллуқли бошқа шартлар.

Лицензия қайта расмийлаштирилган ёки филиал очилган тақдирда лицензия битимига ўзгартириш ёки қўшимчалар киритилади ёхуд янги лицензия битими тузилади.

Лицензия битими икки нусхада — лицензиат ва лицензияловчи орган учун бир нусхадан тузилади.

22. Лицензиялар махсус бланкаларда расмийлаштирилади. Лицензия бланкаси намунаси Ўзбекистон Республикаси Вазирлар Маҳкамасининг 2000 йил 20 декабрдаги 488-сон қарорига мувофиқ лицензияловчи орган томонидан тасдиқланади.

Лицензиялар бланкалари қатъий ҳисобда турадиган ҳужжатлар ҳисобланади, ҳисобга олиш сериясига, тартиб рақамига ва ҳимояланганлик даражасига эга бўлади. Лицензиялар бланкалари лицензияловчи орган буюртмасига кўра «Давлат белгиси» давлат-ишлаб чиқариш бирлашмаси томонидан босмахона усулида тайёрланади. Лицензиялар бланкаларининг ҳисобга олиниши, сақланиши ва улардан мақсадли фойдаланилиши учун Лицензиялаш ва назорат қилиш бошқармаси раҳбари шахсан жавоб беради.

23. Агар лицензиат лицензия бериш тўғрисида қарор қабул қилинганлиги ҳақидаги билдиришнома юборилган (топширилган) вақтдан бошлаб уч ой мобайнида лицензияловчи органга лицензия берилганлиги учун давлат божи тўланганлигини тасдиқловчи ҳужжатни тақдим этмаса ёхуд лицензия битимини имзоламаса, лицензияловчи орган лицензияни бекор қилиш тўғрисида қарор қабул қилишга ҳақлидир.

24. Лицензия бериш «Фаолиятнинг айрим турларини лицензиялаш тўғрисида»ги Ўзбекистон Республикаси Қонунининг 17-моддасида белгиланган асослар бўйича рад этилиши мумкин.

Лицензия талабгори лицензияловчи органнинг лицензия беришни рад этиш тўғрисидаги қарори, шунингдек лицензияловчи орган мансабдор шахсининг хатти-ҳаракати (ҳаракатсизлиги) юзасидан қонун ҳужжатларида белгиланган тартибда шикоят қилиш ҳуқуқига эгадир.

25. Лицензия беришни рад этиш тўғрисида қарор қабул қилинган тақдирда рад этиш тўғрисидаги билдиришнома икки кун муддатда лицензия талабгорига рад этишнинг аниқ сабаблари ва лицензия талабгори кўрсатиб ўтилган сабабларни бартараф этиб, ҳужжатларни такроран кўриб чиқишга тақдим этиши учун етарли бўлган муддат кўрсатилган ҳолда ёзма шаклда юборилади (топширилади).

Лицензия бериш рад этилишига асос бўлган сабаблар лицензия талабгори томонидан бартараф этилган тақдирда, ҳужжатларни такроран кўриб чиқиш лицензияловчи орган томонидан лицензия талабгорининг аризаси барча зарур ҳужжатлар билан биргаликда олинган кундан бошлаб ўн кундан ортиқ бўлмаган муддатда амалга оширилади.

Бунда такроран тақдим этилган ҳужжатлар кўриб чиқиш учун лицензияловчи органга улар қабул қилинган кунда киритилади.

Лицензиялаш ва назорат қилиш бошқармаси тақдим этилган ҳужжатларни олти кундан ортиқ бўлмаган муддатда такроран кўриб чиқади ва улар бўйича лицензия бериш ёки лицензия беришни рад этиш тўғрисида эксперт хулосаси тайёрлайди.

Лицензияловчи орган уч кун муддатда Лицензиялаш ва назорат қилиш бошқармасининг хулосаси асосида лицензия бериш ёки лицензия беришни рад этиш тўғрисида қарор қабул қилади ва лицензия талабгорини қабул қилинган қарор ҳақида икки кун муддатда хабардор қилади.

Лицензия талабгорларининг аризалари такроран кўриб чиқилганлиги учун йиғим ундирилмайди. Лицензия бериш рад этилганлиги тўғрисидаги билдиришномада кўрсатилган муддат ўтгандан кейин берилган ариза янгидан берилган ариза ҳисобланади.

26. Лицензиат қайта ташкил этилганда, унинг номи ёки почта манзили ва тиббий фаолиятни амалга ошириш жойи ўзгарганда, лицензиат ёки унинг ҳуқуқий вориси қайта рўйхатдан ўтказилгандан кейин бир ҳафта муддатда лицензияловчи органга кўрсатиб ўтилган маълумотларни тасдиқловчи тегишли ҳужжатларни илова қилган ҳолда лицензияни қайта расмийлаштириш тўғрисида ариза бериши шарт.

27. Лицензиат лицензия қайта расмийлаштирилгунга қадар унда кўрсатилган фаолият турини илгари берилган лицензия асосида амалга оширади.

28. Лицензияни қайта расмийлаштиришда лицензияловчи орган лицензиялар реестрига тегишли ўзгартиришлар киритади. Лицензияни қайта расмийлаштириш лицензияловчи орган томонидан тегишли ҳужжатлар илова қилинган ҳолда лицензияни қайта расмийлаштириш тўғрисида ариза олинган кундан бошлаб ўн кун мобайнида амалга оширилади.

Лицензияни қайта расмийлаштиришда лицензия талабгорининг лицензия бериш тўғрисидаги аризаси кўриб чиқилганлиги учун тўланадиган сумманинг ярми миқдорида йиғим ундирилади. Йиғим суммаси лицензияловчи органнинг ҳисоб рақамига ўтказилади.

29. Лицензиянинг амал қилиш муддатини узайтириш лицензиатнинг аризасига кўра амалга оширилади.

Лицензиянинг амал қилиш муддатини узайтириш тўғрисидаги ариза лицензияловчи органга лицензиянинг амал қилиш муддати ўтгунга қадар икки ойдан кечикмай берилиши керак.

Лицензиянинг амал қилиш муддатини узайтириш лицензия бериш учун назарда тутилган тартибда амалга оширилади.

30. Амал қилиш муддати ўтмаган йўқолган ёки яроқсиз ҳолга келган лицензия ўрнига лицензиатнинг аризасига кўра унинг дубликати берилиши мумкин.

Лицензиялар дубликатларини беришда лицензия талабгорининг лицензия бериш тўғрисидаги аризаси кўриб чиқилганлиги учун тўланадиган сумманинг ярми миқдорида йиғим ундирилади. Йиғим суммаси лицензияловчи органнинг ҳисоб рақамига ўтказилади.

31. Лицензиат томонидан лицензия талаблари ва шартларига риоя этилиши устидан назорат қонун ҳужжатларига мувофиқ лицензияловчи орган томонидан амалга оширилади.

32. Лицензия талаблари ва шартларига риоя этилиши устидан назоратни амалга оширишда лицензияловчи орган ўз ваколатлари доирасида қуйидаги ҳуқуқларга эга:

лицензиат томонидан лицензия талаблари ва шартларига риоя этилишини қонун ҳужжатларида белгиланган тартибда режали текшириш;

лицензиат томонидан лицензия талаблари ва шартларининг бузилганлигидан далолат берувчи ҳолатлар мавжуд бўлганда лицензиатнинг уларга риоя қилишини қонун ҳужжатларида белгиланган тартибда режадан ташқари текшириш;

лицензия талаблари ва шартларига риоя этилишини текшириш чоғида пайдо бўладиган масалалар юзасидан лицензиатдан зарур ахборотни сўраш ва олиш;

текширишлар натижалари асосида, лицензиат томонидан лицензия талаблари ва шартларининг аниқ бузилишларини кўрсатган ҳолда далолатномалар (маълумотномалар) тузиш;

лицензиатга аниқланган бузилишларни бартараф этиш мажбуриятини юкловчи қарорлар чиқариш, бундай бузилишларни бартараф этиш муддатларини белгилаш;

лицензияларнинг амал қилишини тўхтатиб туриш, тўхтатиш ёки уларни бекор қилиш тўғрисида қонун ҳужжатларида белгиланган тартибда қарорлар чиқариш ва тақдимнома билан судга мурожаат қилиш;

хўжалик юритувчи субъектлар томонидан тиббий фаолиятни лицензия олмасдан амалга оширишнинг аниқланган ҳоллари тўғрисидаги материалларни қонун ҳужжатларида назарда тутилган чоралар кўриш учун белгиланган тартибда давлат солиқ хизмати органларига юбориш.

33. Лицензия талаблари ва шартларига риоя этилишини текширишда лицензияловчи орган ходимлари томонидан икки нусхада далолатнома тузилади, уларнинг биттаси лицензиатга берилади, иккинчи нусхаси лицензияловчи органда қолади.

34. Лицензияловчи орган шунингдек:

аҳоли ўртасида, шу жумладан саволнома-сўровномалардан фойдаланган ҳолда сўров ўтказиш;

фуқароларни белгиланган тартибда қабул қилиш ва уларнинг мурожаатларини ўрганиш;

Ўзбекистон Республикаси Соғлиқни сақлаш вазирлигининг марказий аппаратида ва соғлиқни сақлашни бошқариш ҳудудий органларида ўрнатилган «ишонч телефони» бўйича ахборот олиш;

бошқа назорат органлари томонидан нодавлат муассасаларида ўтказилган лицензиатларни текширишлар якунлари бўйича тушадиган ахборотларни тўплаш, умумлаштириш ва таҳлил қилиш йўли билан лицензиатлар томонидан лицензия талаблари ва шартларига риоя қилиниши устидан мониторинг олиб бориши мумкин;

жойнинг ўзида, молиявий-хўжалик фаолиятга аралашмасдан, лицензияланадиган фаолиятни амалга оширишнинг ҳолати ва шарт-шароитлари билан танишиш.

35. Лицензиянинг амал қилишини тўхтатиб туриш ва тўхтатиш, уни бекор қилиш «Фаолиятнинг айрим турларини лицензиялаш тўғрисида»ги Ўзбекистон Республикаси Қонунининг 22—24-моддаларида назарда тутилган ҳолларда ва тартибда амалга оширилади.

Лицензияловчи органнинг лицензиянинг амал қилишини тўхтатиб туриш тўғрисидаги қарори юзасидан судга шикоят қилиш мумкин. Лицензияловчи орган қарорининг асоссиз эканлиги суд томонидан эътироф этилган тақдирда лицензияловчи орган лицензиат олдида лицензиат кўрган зарар миқдорида жавоб беради.

36. Лицензияловчи орган лицензиялар реестрини юритади.

Лицензиялар реестрида қуйидагилар кўрсатилади:

а) юридик шахснинг номи ва солиқ тўловчининг идентификация рақами, мулкчилик шакли, филиаллар тўғрисидаги маълумотлар, юридик шахс раҳбарининг фамилияси, исми, отасининг исми;

б) лицензиянинг берилган санаси ва тартиб рақами;

в) лицензия бланкасининг серияси ва тартиб рақами;

г) лицензиянинг амал қилиш муддати;

д) лицензияланадиган фаолият тури;

е) лицензияланадиган фаолият тури амалга ошириладиган манзил, иш телефони, факс;

е) лицензияланадиган фаолият тури амалга ошириладиган манзил, иш телефони, факс;

з) лицензиянинг амал қилишини тўхтатиш ёки уни бекор қилишнинг асослари ва санаси.

37. Лицензиялар реестридаги маълумотлар улар билан юридик ва жисмоний шахсларнинг танишиши учун очиқ ҳисобланади, улар тўлов асосида лицензияловчи органдан аниқ лицензиатлар тўғрисида лицензиялар реестридан кўчирма тарзида маълумот олишга ҳақлидир.

Лицензиялар реестридан маълумот берилганлиги учун энг кам ойлик иш ҳақининг ярми миқдорида тўлов ундирилади, тўлов лицензияловчи органнинг ҳисоб рақамига ўтказилади.

Лицензиялар реестридан давлат ҳокимияти ва бошқаруви органларига маълумотлар текин берилади.

38. Ушбу Низомнинг бузилишида айбдор бўлган шахслар қонун ҳужжатларида белгиланган тартибда жавоб берадилар.

1. Ушбу Низом Ўзбекистон Республикаси Президентининг «Соғлиқни сақлаш тизимини ислоҳ қилишни янада чуқурлаштириш ва уни ривожлантириш Давлат дастурини амалга оширишнинг асосий йўналишлари тўғрисида» 2007 йил 19 сентябрдаги ПФ-3923-сон Фармонига ҳамда Ўзбекистон Республикаси Президентининг «Республика тиббиёт муассасалари фаолиятини ташкил этишни такомиллаштириш чора-тадбирлари тўғрисида» 2007 йил 2 октябрдаги ПҚ-700-сон қарорига мувофиқ ишлаб чиқилган ва Ўзбекистон Республикаси Соғлиқни сақлаш вазирлигининг Лицензиялаш ва нодавлат тиббиёт муассасалари томонидан кўрсатилаётган тиббий хизматлар сифатини назорат қилиш бошқармасининг (кейинги ўринларда Лицензиялаш ва назорат қилиш бошқармаси деб аталади) вазифалари, функциялари, ҳуқуқлари ва жавобгарлигини белгилайди.

2. Лицензиялаш ва назорат қилиш бошқармаси Ўзбекистон Республикаси Соғлиқни сақлаш вазирлиги марказий аппаратининг таркибий бўлинмаси ҳисобланади.

3. Лицензиялаш ва назорат қилиш бошқармаси ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Низомга, бошқа қонун ҳужжатларига, шунингдек Ўзбекистон Республикаси Соғлиқни сақлаш вазирлигининг буйруқлари ва фармойишларига амал қилади.

4. Қуйидагилар Лицензиялаш ва назорат қилиш бошқармасининг асосий вазифалари ҳисобланади:

тиббий фаолиятни лицензиялаш ишларини ташкил этиш;

лицензиялар талабгорларининг лицензия талаблари ва шартларига мувофиқлигини чуқур ўрганиб чиқиш;

лицензиатлар томонидан кўрсатиладиган тиббий хизматларнинг қонун ҳужжатларида белгиланган тартибда қўлланишга рухсат этилган профилактика, диагностика ва даволаш воситаларига мувофиқлигини назорат қилиш;

мониторинг олиб бориш давомида ва текширишлар натижалари бўйича олинган лицензиатларнинг лицензия талаблари ва шартларига риоя қилиши, лицензиатларнинг тиббий хизматлари сифати ҳақидаги ахборотларни умумлаштириш ва таҳлил қилиш;

қоида бузилишлари аниқланган тақдирда Ўзбекистон Республикаси Соғлиқни сақлаш вазирлиги раҳбариятига лицензиянинг амал қилишини тўхтатиб туриш, тўхтатиш ёхуд лицензияни бекор қилиш тўғрисида белгиланган тартибда таклифлар киритиш.

5. Лицензиялаш ва назорат қилиш бошқармаси ўзига юкланган вазифаларга мувофиқ қуйидаги функцияларни амалга оширади:

талабгорлар томонидан тиббий фаолиятни амалга ошириш ҳуқуқига лицензия олиш учун тақдим этилган ҳужжатларни экспертизадан ўтказади;

экспертлар гуруҳини шакллантиради, лицензиялар талабгорлари томонидан тиббий фаолиятни амалга ошириш шароитларининг дастлабки, зарурат бўлганда эса қўшимча экспертизасини ташкил қилади;

ўз ваколатлари доирасида лицензиялар талабгорларига зарур ахборотларни тақдим этади, уларга консультатив-методик ёрдам кўрсатади;

лицензиялар бланкаларини расмийлаштиради, лицензия талабгорларини Ўзбекистон Республикаси Соғлиқни сақлаш вазирлиги томонидан лицензиялар бериш билан боғлиқ масалалар бўйича қабул қилинадиган қарорлар тўғрисида хабардор қилади, лицензия битимларини расмийлаштиради, лицензиатларга лицензиялар беради, лицензияларни белгиланган тартибда қайта расмийлаштиради ёки уларнинг дубликатларини беради;

лицензиатлар томонидан лицензия талаблари ва шартларининг, шу жумладан улар томонидан кўрсатиладиган хизматлар сифатига қўйиладиган талабларнинг бажарилиши тўғрисидаги ахборотлардан иборат бўлган реестрни ва марказлаштирилган маълумотлар базасини юритади;

Ўзбекистон Республикаси Соғлиқни сақлаш вазирлиги томонидан лицензиатларнинг лицензия талаблари ва шартларига риоя этишларини текширишларда (назорат тартибидаги текширишларда) белгиланган тартибда қатнашади;

лицензиатлар томонидан лицензия талаблари ва шартларининг, шунингдек улар томонидан кўрсатиладиган хизматлар сифатига қўйиладиган талабларнинг бузилиши ҳоллари аниқланган ҳолларда бажарилиши мажбурий бўлган кўрсатмалар беради;

қонун ҳужжатларида белгиланган тартибда тиббий фаолиятни амалга ошириш ҳуқуқи учун лицензияларнинг амал қилишини тўхтатиб туриш, тўхтатиш ёхуд лицензияларни бекор қилиш ҳақида тақдимнома тақдим этган ҳолда қарор қабул қилиш ёки судга мурожаат қилиш учун зарур ҳужжатларни расмийлаштиради;

тиббий фаолиятни лицензиялаш соҳасидаги норматив-ҳуқуқий ҳужжатлар лойиҳаларини ишлаб чиқишда қатнашади;

лицензиатлар томонидан кўрсатиладиган тиббий хизматларнинг сифати тўғрисида мониторинг ўтказиш давомида ва текширишлар натижалари бўйича олинган ахборотларни умумлаштиради ва таҳлил қилади;

Ўзбекистон Республикаси Соғлиқни сақлаш вазирлигининг тегишли бўлинмалари билан биргаликда диагностика ва даволаш стандартларини, клиник протоколлар ва тавсияларни ишлаб чиқишда ҳамда тиббий амалиётга жорий қилишда қатнашади.

6. Лицензиялаш ва назорат қилиш бошқармаси лицензиатлар томонидан лицензия талаблари ва шартларига риоя қилиниши юзасидан қуйидаги йўллар билан доимий мониторингни амалга оширади:

аҳоли ўртасида, шу жумладан саволнома-анкеталардан фойдаланган ҳолда сўровлар ўтказиш;

фуқароларни белгиланган тартибда қабул қилиш ва уларнинг мурожаатларини ўрганиш;

Ўзбекистон Республикаси Соғлиқни сақлаш вазирлигининг марказий аппаратида ва соғлиқни сақлашни бошқариш ҳудудий органларида ўрнатилган «ишонч телефонлари» орқали ахборотлар олиш;

бошқа назорат қилувчи органлар томонидан ўтказилган лицензиатлар фаолиятини текширишлар якунлари бўйича тушадиган ахборотларни тўплаш, умумлаштириш ва таҳлил қилиш;

жойнинг ўзида, молиявий-хўжалик фаолиятга аралашмасдан, лицензияланадиган фаолиятни амалга оширишнинг ҳолати ва шарт-шароитлари билан танишиш.

7. Лицензиялаш ва назорат қилиш бошқармаси ўзига юкланган вазифалар ва функцияларни бажариш учун ўз ваколатлари доирасида қуйидаги ҳуқуқларга эга:

лицензиатлардан текширишлар ўтказиш чоғида зарур ҳужжатларни ва текшириш билан бевосита боғлиқ бўлган бошқа ахборотларни сўраш ва олиш;

лицензиатларга аниқланган қоида бузилишларини бартараф этиш тўғрисида бажарилиши мажбурий бўлган кўрсатмалар бериш, бундай қоида бузишларни бартараф этиш зарур бўлган муддатларни белгилаш;

бошқа назорат қилувчи органлардан улар томонидан ўтказилган лицензиатлар фаолиятини текширишлар натижалари тўғрисидаги улар томонидан кўрсатиладиган тиббий хизматлар сифати масалаларига тааллуқли ахборотларни сўраш ва олиш;

Ўзбекистон Республикаси Соғлиқни сақлаш вазирлиги раҳбариятига тиббий фаолиятни лицензиялаш, лицензиатлар томонидан лицензия талаблари ва шартларига, шунингдек тиббий хизматлар сифатига риоя қилинишини назорат қилиш билан боғлиқ бўлган ишларни такомиллаштириш бўйича таклифлар киритиш.

8. Лицензиялаш ва назорат қилиш бошқармаси ўзига юкланган вазифалар ва функцияларнинг самарали бажарилиши, тақдим этиладиган таҳлилий ҳужжатларнинг холисоналиги ва тўлиқлиги учун жавоб беради.

9. Лицензиялаш ва назорат қилиш бошқармаси олий тиббий, фармацевтика ва юридик маълумотга эга бўлган юқори малакали мутахассислар билан бутланади.

Лицензиялаш ва назорат қилиш бошқармаси бевосита Ўзбекистон Республикаси Соғлиқни сақлаш вазирига бўйсунади.

10. Лицензиялаш ва назорат қилиш бошқармасига Ўзбекистон Республикаси Соғлиқни сақлаш вазири томонидан лавозимга тайинланадиган ва лавозимдан озод қилинадиган бошлиқ раҳбарлик қилади.

Лицензиялаш ва назорат қилиш бошқармаси бошлиғининг бир нафар ўринбосари бўлади. Лицензиялаш ва назорат қилиш бошқармаси бошлиғи бўлмаган тақдирда унинг функциясини бошлиқнинг ўринбосари бажаради.

11. Лицензиялаш ва назорат қилиш бошқармаси бошлиғи:

Лицензиялаш ва назорат қилиш бошқармасига умумий раҳбарликни амалга оширади, бошқарма ишларини ташкил этади ва назорат қилади;

Лицензиялаш ва назорат қилиш бошқармасига юкланган вазифалар ва функцияларнинг самарали бажарилиши, тақдим этиладиган таҳлилий материаллар ва ҳужжатларнинг тўлиқлиги учун шахсан жавоб беради;

Лицензиялаш ва назорат қилиш бошқармаси бўлимлари фаолиятини мувофиқлаштиради, бўлимлар ходимлари ўртасида функционал вазифаларни тақсимлайди, ҳар бир ходимнинг аниқ топшириқларнинг бажарилиши учун жавобгарлиги даражасини белгилайди;

Ўзбекистон Республикаси Соғлиқни сақлаш вазирига бошқарма ходимларини лавозимга тайинлаш ва лавозимдан озод қилиш, шунингдек Лицензиялаш ва назорат қилиш бошқармаси ходимларини рағбатлантириш ёки уларни интизомий жавобгарликка тортиш тўғрисида таклифлар киритади;

Лицензиялаш ва назорат қилиш бошқармаси фаолиятини такомиллаштириш бўйича таклифларни ишлаб чиқади ва вазирлик раҳбариятига киритади;

Ўзбекистон Республикаси Соғлиқни сақлаш вазирини Лицензиялаш ва назорат қилиш бошқармаси фаолияти тўғрисида мунтазам равишда хабардор қилади.

12. Лицензиялаш ва назорат қилиш бошқармаси қуйидаги иккита бўлимдан иборат бўлади:

тиббий фаолиятни лицензиялаш бўлими;

Хусусий тиббий фаолият билан шуғулланувчи нодавлат тиббиёт муассасалари томонидан кўрсатиладиган тиббий хизматлар сифатини назорат қилиш бўлими.

13. Лицензиялаш ва назорат қилиш бошқармаси ходимлари Лицензиялаш ва назорат қилиш бошқармаси бошлиғи тақдимномасига биноан Ўзбекистон Республикаси Соғлиқни сақлаш вазири томонидан лавозимга тайинланади ва лавозимдан озод қилинади.

Лицензиялаш ва назорат қилиш бошқармаси ходимлари ўз фаолиятини бошқарма бошлиғи томонидан тасдиқланадиган функционал вазифаларга мувофиқ амалга оширадилар.

14. Соғлиқни сақлашни бошқариш ҳудудий органларида лицензиатлар томонидан кўрсатиладиган тиббий хизматлар сифати устидан назорат Қорақалпоғистон Республикаси Соғлиқни сақлаш вазирлиги, вилоятлар ва Тошкент шаҳар соғлиқни сақлаш бошқармаларининг тиббиёт хизматлари сифатини назорат қилиш бўйича бош мутахассислар (кейинги ўринларда бош мутахассислар деб аталади) томонидан амалга оширилади.

Бош мутахассислар Қорақалпоғистон Республикаси Соғлиқни сақлаш вазири, вилоятлар ва Тошкент шаҳар соғлиқни сақлаш бошқармалари бошлиқлари томонидан, Ўзбекистон Республикаси Соғлиқни сақлаш вазирлигининг Лицензиялаш ва назорат қилиш бошқармаси билан келишган ҳолда лавозимга тайинланади ва лавозимдан озод қилинади.

15. Лицензиялаш ва назорат қилиш бошқармаси ходимларини, шунингдек бош мутахассисларни аттестациядан ўтказиш қонун ҳужжатларида белгиланган тартибда амалга оширилади.

1. Вазирлар Маҳкамасининг «Тиббий фаолиятни ва фармацевтика фаолиятини лицензиялаш тўғрисидаги низомларни тасдиқлаш ҳақида» 2003 йил 31 октябрдаги 477-сон қарори 1-бандининг иккинчи хатбоши ва ушбу қарорга 1-илова (Ўзбекистон Республикаси ҚТ, 2003 й., 10-сон, 106-модда).

2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида» (Ўзбекистон Республикаси Президентининг «Тадбиркорлик фаолияти юритиш учун рухсатнома турларини қисқартириш ва уларни бериш тартиб-қоидаларини соддалаштириш тўғрисида» 2005 йил 21 сентябрдаги ПҚ-186-сон қарори) 2006 йил 22 майдаги 92-сон қарорига илова 28-бандининг «а» кичик банди (Ўзбекистон Республикаси ҚТ, 2006 й., 5-сон, 34-модда).

3. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек баъзиларини ўз кучини йўқотган деб ҳисоблаш тўғрисида» («Тадбиркорлик субъектларини ҳуқуқий ҳимоя қилиш тизими такомиллаштирилганлиги ҳамда уларнинг молиявий жавобгарлиги эркинлаштирилганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида» Ўзбекистон Республикасининг 2006 йил 10 октябрдаги ЎРҚ-59-сон Қонуни) 2006 йил 10 ноябрдаги 235-сон қарорига 1-илова 50-бандининг «а» кичик банди (Ўзбекистон Республикаси ҚТ, 2006 й., 11-сон, 86-модда).

4. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида» 2007 йил 18 майдаги 104-сон қарорига илованинг 1-банди (Ўзбекистон Республикаси ҚТ, 2007 й., 5-сон, 30-модда).