Ўзбекистон Стандартлаштириш, метрология ва сертификатлаштириш агентлиги билан Миср Араб Республикаси Стандартлаштириш ва сифат ташкилоти, бундан кейин «Томонлар» деб аталувчилар,

халқаро ҳуқуқ нормаларига асосланиб, стандартлаштириш, метрология ва сертификатлаштириш соҳасида ҳамкорликни ривожлантириш истагида, савдо ҳамда саноатдаги тўсиқларни бартараф этиш мақсадида;

атроф-муҳитни муҳофаза қилиш, инсон ҳаёти ва соғлиғи учун хавфсизликнинг муҳимлигини англаб;

икки Томоннинг иқтисодий манфаатларига амал қилиб;

икки мамлакатнинг қонун ҳужжатлари доирасида;

Томонлар, мазкур Англашув Меморандуми ва ўз давлатлари қонун ҳужжатларига асосан, қуйидагилар назарда тутиладиган қўшимча битим, баённома ва дастурлардан келиб чиқиб стандартлаштириш, метрология, мувофиқликни баҳолаш ҳамда аккредитация соҳасида ҳамкорлик қилишга аҳдлашиб олдилар:

— миллий стандартларни, савдодаги тўсиқларни бартараф этишга кўмаклашиш, шунингдек илмий ва техникавий ҳамкорликни ривожлантириш мақсадига мўлжалланган халқаро нормалар билан уйғунлаштириш;

— Томонларнинг стандартлаштириш, метрология ва сертификатлаштириш бўйича илмий ва тадқиқот институтлари ўртасида тўғридан-тўғри алоқаларни ўрнатиш ва ривожлантиришга кўмаклашиш;

— давлатлараро етказиб берилаётган маҳсулотга меъёрий ҳужжатларни уйғунлаштириш бўйича биргаликда фаолият кўрсатиш;

— метрология бўйича Миллий идора томонидан бажарилган ўлчов воситаларининг синов натижалари ва аккредитация қилинган калибрлаш лабораторияларда бажарилган калибрлаш натижаларини ўзаро эътироф этиш;

— физик катталиклар учун миллий ва ишчи эталонларни ишлаб чиқиш, такомиллаштириш ва солиштириш бўйича биргаликда фаолият кўрсатиш;

— мувофиқликни баҳолаш натижаларини ўзаро тан олиш бўйича фаолиятни амалга ошириш.

Томонлар, меъёрий ҳужжатлар, даврий нашрлар, миллий стандартлар идоралари томонидан нашр этилган ахборотларни,

миллий стандартлар каталоглари ва миллий стандартларни ишлаб чиқиш меъёрларини ва услубларини,

сертификатлаштириш ва аккредитациялаш бўйича умумий ахборот ва нашрларни,

стандартлаштириш, метрология ва сертификатлаштириш соҳасида мутахассисларни ўқитиш ва малакасини ошириш дастури бўйича маълумот ҳамда материалларни ўзаро алмашишга аҳдлашиб олдилар.

Маҳсулотни сертификатлаштириш ва сифат тизимини жорий этиш бўйича биргаликда фаолият кўрсатиш мақсадида, Томонлар тарафидан ўзаро тан олинган процедураларга асосан уларнинг мамлакатларида амал қилаётган, мажбурий сертификатлаштириш лозим бўлган маҳсулотлар рўйхати тўғрисида, Томонлар бир-бирларини ўз вақтида хабардор қиладилар.

Томонларнинг импорт маҳсулотларига сертификатлар беришга асос бўладиган синов ишлари Томонларнинг миллий аккредитациялаш тизимларида халқаро стандартлар талабларига мувофиқ аккредитация қилинган синов лабораторияларида ўтказилади.

Агар маълумот бераётган Томон, ҳужжат ва маълумот махфийлиги тўғрисида огоҳлантирса, ушбу Англашув Меморандуми доирасида Томонлар олинаётган ҳужжат ҳамда маълумотларнинг махфийлигини таъминлайдилар.

Агар махфийлик бошқа Томондан белгиланмаган бўлса, ҳар бир Томон ҳамкорлик қилиш натижасида олинаётган илмий ва техникавий маълумотдан эркин фойдаланиши мумкин. Ушбу маълумот фақат уни бераётган Томоннинг розилиги билан учинчи томонга берилиши мумкин.

Махфий маълумот, Томонларнинг қонун ҳужжатларида назарда тутилган ҳолларда Томонларнинг ҳуқуқни муҳофаза қилиш органларига тақдим этилади.

Томонлар стандартлаштириш, метрология ва сертификатлаштириш бўйича турли халқаро ташкилотлар билан ҳамкорлик қиладилар, Томонлардан бири аъзоси ҳисобланадиган халқаро ташкилотларда қатнашиш ёки уларга аъзо бўлишда бир-бирларини қўллаб-қувватлайдилар.

Томонлар, стандартлаштириш соҳасида ўзларининг вазиятларини бирлаштириш ва иккала Томоннинг халқаро фаолиятдаги ролини ошириш учун ISO ва IEC халқаро ташкилотлар доирасида яқин муносабатда ишлашга аҳдлашиб олдилар.

Томонлар стандартлаштириш, метрология ва сертификатлаштириш соҳасида тажриба алмашиш мақсадида маслаҳат бериш ва ўқитиш бўйича мутахассислардан иборат делегациялар ҳамда мутахассислар алмашинувини ташкил қиладилар.

Мазкур Англашув Меморандумида ифодаланганларни қўллаш ва талқин қилишда келишмовчиликлар ўзаро маслаҳатлашув ва музокаралар орқали ҳал қилинади.

Томонларнинг ўзаро келишувларига кўра мазкур Англашув Меморандумига, алоҳида баённомалар билан расмийлаштириладиган ўзгартириш ва тўлдиришлар киритилиши мумкин.

Ушбу баённомалар Англашув Меморандумининг ажралмас қисми ҳисобланади ва унинг 13-моддасига асосан кучга киради.

Мазкур Англашув Меморандуми, учинчи мамлакатларнинг Томонлари имзолаган стандартлаштириш, метрология ва сертификатлаштириш соҳасидаги бошқа битимларга дахл қилмайди.

Мазкур Англашув Меморандумини бажаришнинг молиявий шартлари, Томонларнинг ўзаро келишувларига кўра амалга оширилади.

Мазкур Англашув Меморандуми имзолаган кундан бошлаб кучга киради. Ушбу Англашув Меморандуми беш йил муддатга тузилади ва Томонлардан бири ёзма равишда унинг амал қилишини тўхтатиш тўғрисида ўз нияти ҳақида бошқа Томонни хабардор қилмагунига қадар ўз-ўзидан кейинги бир йиллик муддатга узаяверади. Бундай хабарнома мазкур Англашув Меморандумининг амал қилиш муддати тугашидан камида 6 (олти) ой илгари юборилади.

Қоҳира шаҳрида 2007 йил 18 апрелда, икки асл нусхада, ҳар бири ўзбек, араб ва инглиз тилларида тузилди, бунда барча матнлар бир хил кучга эга.

Ушбу Англашув Меморандуми қоидаларини талқин қилишда келишмовчиликлар юзага келганда, инглиз тилидаги матн асос сифатида қабул қилинади.