Бундан буён «Аҳдлашувчи Томонлар» деб аталувчи Ўзбекистон Республикаси Ҳукумати билан Болгария Республикаси Ҳукумати,

анъанавий ўзаро иқтисодий муносабатларни ривожлантиришга қатъий ниятларини тасдиқлаб,

ўзаро манфаатли ҳамкорликни ривожлантириш ва мустаҳкамлаш усуллари ва воситаларини топишга тайёрлигини билдириб,

Болгария Республикасининг 2007 йил 1 январдан Европа Иттифоқига қўшилишидан келиб чиқадиган ҳуқуқ ва мажбуриятларини инобатга олиб,

Ўзбекистон Республикаси Евроосиё иқтисодий ҳамкорлигини таъсис этиш тўғрисида 2000 йил 10 октябрдаги Шартномага қўшилиши тўғрисида 2006 йил 25 январда имзоланган Баённомадан келиб чиқадиган Ўзбекистон Республикасининг ҳуқуқ ва мажбуриятларини эътиборга олиб,

ушбу Битим улар ўртасидаги алоқаларни янги шароитларда ривожлантиришга ва, хусусан, ўзаро манфаатли иқтисодий, техник ҳамда технологик ҳамкорликни фаоллаштиришига ёрдам беришига ишонч билдириб,

Аҳдлашувчи Томонлар ўзларининг миллий қонунчилиги доирасида ўзаро манфаатли иқтисодий ва илмий-техникавий ҳамкорликни ривожлантиришга ва кенгайтиришга кўмаклашадилар.

Аҳдлашувчи Томонлар асосан қуйидаги соҳаларда икки томонлама кенг ҳамкорликни амалга ошириш учун кучларини берадилар:

1. Саноат, шу жумладан енгил саноат, машинасозлик, металлургия, қайта ишлаш соҳалари, электроника ва электромашинасозлик, кимё ва нефтни қайта ишлаш соҳалари;

2. Фармацевтика ишлаб чиқариши;

3. Қишлоқ хўжалиги, ўсимликшунослик ва чорвачилик, озиқ-овқат саноати;

4. Ўрмон хўжалиги;

5. Ҳарбий-иқтисодий ҳамкорлик;

6. Энергетика;

7. Илмий-тадқиқот ва тажриба-конструкторлик фаолияти;

8. Қурилиш ва қурилиш саноати;

9. Телекоммуникация ва ахборот технологиялари;

10. Транспорт ва логистика;

11. Туризм;

12. Атроф муҳитни муҳофаза қилиш;

13. Сармоялар жалб қилишда кўмаклашув;

14. Кичик ва ўрта тадбиркорлар ўртасида ҳамкорлик;

15. Таълим;

16. Соғлиқни сақлаш;

17. Илм-фан, техника ва технология, шу жумладан юқори технологиялар.

Аҳдлашувчи Томонлар қуйидаги йўллар билан икки мамлакат ўртасида ҳамкорликни ривожлантириш ва кенгайтириш учун кучларини берадилар:

ҳукумат органлари, ташкилотлари ва ишбилармон доиралари, палаталар ҳудудий ва маҳаллий органлар иқтисодиёт соҳасидаги ҳамкорликни мустаҳкамлаш, жумладан бир-бирини қизиқтирадиган иқтисодий ва илмий-техникавий ахборот, Аҳдлашувчи Томонлар давлатлари органлари, илмий-тадқиқот муассасалари ва бизнес вакиллари ташрифлари билан алмашиш;

ишбилармон доиралар ўртасидаги янги алоқалар ўрнатилишини рағбатлантириш ва мавжуд алоқаларни кенгайтириш, ўзаро алоқаларни амалга ошириш;

бизнес-ахборот алмашиш, халқаро ярмаркалар ва кўргазмаларда иштирок этиш, ишбилармон доиралар вакиллари учун тадбирларни (семинарлар, конференциялар, симпозиумлар ва давра суҳбатлари) ташкил этишда кўмаклашиш;

икки томонлама иқтисодий муносабатларда кичик ва ўрта бизнеснинг ролини оширишда кўмаклашиш;

ўзаро манфаатли соҳаларда маркетинг, консалтинг ва эксперт хизматлари кўрсатишда ҳамкорлик қилиш;

молия институтлари ва банк тузилмалари ўртасида янада яқинроқ алоқалар ва ҳамкорликни ривожлантириш;

икки томонлама инвестицион ва туристик фаолиятни ривожлантиришга кўмаклашиш;

икки мамлакат компанияларининг ваколатхона ва филиалларини очишда ҳамда қўшма корхоналар тузишда кўмаклашиш;

халқаро ҳамкорликни рағбатлантириш;

учинчи мамлакатлар бозорларида ҳамкорликни кенгайтириш;

дастурлар ва лойиҳалар тўғрисида маълумотлар алмашиш ва уларни амалга оширишда тадбиркорларнинг иштирок этишига кўмаклашиш.

Ушбу Битимнинг 2-моддасида белгиланган соҳаларда ҳамкорликни таъминлаш мақсадида Аҳдлашувчи Томонлар иқтисодий ва илмий-техникавий ҳамкорлик бўйича Қўшма Ўзбек-Болгар Ҳукуматлараро Комиссиясини тузадилар (келгусида — Ҳукуматлараро Комиссия).

1. Ҳукуматлараро Комиссиянинг вазифалари:

— икки томонлама иқтисодий ва илмий-техникавий муносабатларни ривожлантириш масалаларини кўриб чиқиш;

— икки томонлама иқтисодий ва илмий-техникавий муносабатларни ривожлантиришнинг янги имкониятларини белгилаш;

— икки мамлакат ташкилотлари ўртасида иқтисодий ва илмий-техникавий муносабатларни яхшилаш бўйича таклифлар ишлаб чиқиш;

— бир-бирини қизиқтирадиган соҳаларда иқтисодий ва илмий-техникавий ҳамкорлик дастурларини ишлаб чиқиш;

— Ўзбекистон Республикаси ва Болгария Республикаси ўртасида иқтисодий ва илмий-техникавий соҳаларда имзоланган халқаро шартномалар ҳамда, бошқа икки томонлама келишувлар, шу жумладан, Ҳукуматлараро Комиссия қарорларининг ижросини кузатиб бориш;

— ушбу Битимни татбиқ қилиш бўйича таклифлар тақдим этиш;

— баҳамжиҳат ҳаракатнинг Аҳдлашувчи Томонлар ўртасида келишилган бошқа шакллари.

2. Ҳукуматлараро Комиссия ўзбек ва болгар томонларининг вакилларидан тузилади.

Ҳар бир Аҳдлашувчи Томон Ҳукуматлараро Комиссиянинг ўз қисмининг «Ҳамраис» деб аталувчи Раисини, унинг таркибини ва котибини белгилайди.

Айрим масалаларни муҳокама қилиш учун Ҳукуматлараро Комиссия ўз ваколати доирасида ишчи гуруҳларни тузиш ва шунингдек уларнинг вазифаларини ҳамда масалаларни амалга ошириш муддатларини белгилаши мумкин.

3. Ҳукуматлараро Комиссия йиғилишлари, одатда, бир йилда бир марта навбат билан Ўзбекистон Республикасида ва Болгария Республикасида ўтказилади.

Ҳукуматлараро Комиссия Ҳамраислари навбатдаги йиғилишгача кечи билан бир ой муддатда йиғилишни чақириш ва кун тартиби тўғрисида келишиб оладилар. Ҳамраисларнинг розилиги билан йиғилиш кун тартибига махсус киритилмаган масалалар ҳам муҳокама қилиниши мумкин. Ҳар бир Ҳамраиснинг таклифига кўра Ҳукуматлараро Комиссиянинг навбатдан ташқари йиғилишини чақириш ёки Ҳамраислар учрашувини ташкил этиш мумкин.

Ҳукуматлараро Комиссия йиғилишларига маслаҳатчилар ва экспертларни таклиф қилиш мумкин.

Ҳукуматлараро Комиссия йиғилишларида ишлатиладиган тиллар бўлиб болгар ва рус тиллари ҳисобланади.

Ҳар бир йиғилишда бўлиб ўтган муҳокама натижалари тўғрисида рус тилида баённома тузилади.

4. Ҳукуматлараро Комиссиянинг фаолияти билан боғлиқ масалалар йиғилишлар оралиғида иш вақтида Ҳукуматлараро Комиссия Ҳамраислари ёки уларнинг кўрсатмалари бўйича, котиблари ўртасида муҳокама қилинади.

5. Ҳукуматлараро Комиссия ўз иш регламентини белгилайди.

1. Ушбу Битим Ўзбекистон Республикаси ва Болгария Республикаси томонлар ҳисобланувчи бошқа халқаро шартномалардан ҳамда халқаро ташкилотларда иштирок этишидан келиб чиқувчи Аҳдлашувчи Томонларнинг ҳуқуқ ва мажбуриятларини чеклаб қўймайди.

2. Бир томондан, Ўзбекистон Республикаси ва, иккинчи томондан, Европа Ҳамжамиятлари ва уларнинг аъзо давлатлари ўртасидаги шерикчиликни таъсис этувчи шерикчилик ва ҳамкорлик тўғрисида 1996 йил 21 июнда имзоланган Битим билан тартибга солинувчи, ушбу Битим билан қамраб олинган масалаларга нисбатан Шерикчилик ва ҳамкорлик тўғрисидаги Битим қоидалари устуворлик қилади.

Ушбу Битим қоидаларининг қўлланиши ёки талқин этилиши билан боғлиқ баҳсли масалалар Аҳдлашувчи Томонлар ўртасида ўзаро маслаҳатлашувлар ва музокаралар ўтказиш йўли билан ҳал этилади.

Аҳдлашувчи Томонларнинг ўзаро келишуви асосида, ушбу Битимга унинг ажралмас қисми ҳисобланадиган ҳамда ушбу Битимнинг 9-моддасида баён қилинган тартибга мувофиқ кучга кирадиган алоҳида баённомалар билан расмийлаштириладиган ўзгартириш ва қўшимчалар киритилиши мумкин.

1. Ушбу Битим имзоланган кундан бошлаб кучга киради.

2. Ушбу Битим кучга кирган санадан бошлаб Ўзбекистон Республикаси Ҳукумати ва Болгария Республикаси Ҳукумати ўртасида савдо иқтисодий ҳамкорлик тўғрисида 1998 йил 24 июнда имзоланган Битим ўз кучини йўқотади.

3. Мазкур Битим номуайян муддатга тузилади.

4. Аҳдлашувчи Томонлардан ҳар бири бошқа Аҳдлашувчи Томонни ёзма равишда хабардор қилиш орқали ушбу Битим амал қилишини тўхтатиши мумкин. Битим иккинчи Аҳдлашувчи Томон шундай ёзма хабар олган санадан кейин келувчи олтинчи ойнинг биринчи кунида ўз кучини йўқотади.

Бунинг тасдиғи учун, қуйида қўл қўювчилар, ўз Ҳукуматларидан тегишли равишда ваколат олиб, ушбу Битимни имзоладилар.

Тошкент шаҳрида 2007 йил 4 апрелда икки асл нусхада, ҳар бири ўзбек, болгар ва рус тилларида тузилди, бунда барча матнлар бир хил кучга эга.

Ушбу Битим қоидаларини талқин қилишда келишмовчиликлар юзага келса, Аҳдлашувчи Томонлар рус тилидаги матнга амал қиладилар.