Ўзбекистон Республикаси Ҳукумати билан Қозоғистон Республикаси Ҳукумати, бундан кейин «Томонлар» деб аталувчилар,

илмий-техникавий ҳамкорлик бутун икки томонлама муносабатлар комплексининг муҳим таркибий қисми эканига ишонч ҳосил қилиб,

илмий тадқиқотлар ва ишламаларнинг интернационаллаштириш шароитларида биргаликда ҳаракат қилиш заруратини эътироф этиб,

Томонлар давлатларининг мавжуд илмий-техникавий алоқаларини ҳисобга олиб,

бундай ҳамкорлик Томонлар давлатлари халқлари ўртасида икки томонлама муносабатларни мустаҳкамлашга, ва шунингдек ўзаро фойдали савдо-иқтисодий алоқаларни янада ривожлантиришга ёрдам беришини эътиборга олиб,

Томонлар Томонлар давлатлари фан ва техникасини ривожлантириш манфаатларини кўзлаб, тенг ҳуқуқлилик ва ўзаро манфаат тамойиллари асосида илмий-техникавий ҳамкорликка кўмаклашадилар.

Ушбу Битим доирасидаги икки томонлама ҳамкорлик йўналишлари Томонлар давлатлари манфаатлари билан белгиланади.

Илмий-техникавий ҳамкорлик икки мамлакатнинг вазирликлари, идоралари, фанлар академиялари, илмий ташкилотлари (миллий илмий марказлар, илмий-ишлаб чиқариш марказлари, илмий-тадқиқот институтлари), олий ўқув юртлари, айрим олимлари ва мутахассислари томонидан, уларнинг ваколатлари доирасида, Томонлар давлатлари миллий қонун ҳужжатларига мувофиқ бўладиган шартномалар ва контрактлар асосида амалга оширилади.

Ҳамкорликка умумий раҳбарлик ва мувофиқлаштиришни Ўзбекистон томонидан — Ўзбекистон Республикаси Вазирлар Маҳкамаси ҳузуридаги фан ва технологиялар маркази, Қозоғистон томонидан — Қозоғистон Республикаси Таълим ва фан вазирлиги амалга оширади.

Мазкур ваколатли органларнинг номлари ёки вазифалари ўзгарганда Томонлар дипломатик каналлар орқали ўз вақтида хабардор бўладилар.

Шартномалар ва контрактлар ҳамкорликни амалга ошириш масалаларини, унинг иқтисодий ва ташкилий шартларини, чунончи:

— ҳамкорликнинг мақсадлари ва мазмуни, вазифалари ва ундан кутилаётган натижалар, уларнинг муддатлари ва амалга ошириш шартлари;

— ўзаро молиявий мажбуриятлар;

— илмий-техник объектлардан биргаликда фойдаланиш тартиби, шунингдек биргаликдаги тадқиқотлар натижаларидан фойдаланиш ва биргаликдаги илмий фаолият давомида олинган интеллектуал мулк ҳуқуқларини тақсимлаш масалалари;

— низоли масалаларни ҳал қилиш тартиби ва ҳамкорликни амалга оширишда иштирок этаётган шахслар ҳамкорлик доирасида зиммаларидаги мажбуриятларини бевосита бажараётган вақтда шерикларга келтириши мумкин бўлган зарарларнинг ўрнини қоплаш тартиби;

— ҳамкорликда учинчи давлатлар ёки халқаро ташкилотлар шахсларининг иштирок этиши, бундай иштирокни молиявий таъминлаш ва ҳамкорлик натижаларидан фойдаланиш тартиби;

— ахборотнинг ишончлилиги ва ҳамкорлик жараёнида бир-бирига бериладиган материаллар ва ускунанинг сифати учун масъулиятни аниқлаб бериши керак.

Ушбу Битим доирасидаги ҳамкорлик қуйидаги шаклларда амалга оширилиши мумкин:

— чуқур илм талаб қиладиган ва ресурсларни тежайдиган технологияларни яратиш ва ўзлаштириш бўйича қўшма илмий-тадқиқот дастурларини, лойиҳаларини амалга ошириш;

— Томонлар давлатларининг илмий-тадқиқот ташкилотларида, олий ўқув юртларида, технопаркларида, архив, кутубхона ва музейларида илмий ишлар, шу жумладан қўшма дала тадқиқотлари ва экспедициялар ўтказиш;

— Томонлар давлатлари қонун ҳужжатлари белгилаган тартибда фан-техника ахбороти, ҳужжатларини алмашиш, адабий ва библиографик нашрлар ўртасида контрактлар тузиш;

— қўшма семинарлар, илмий конференциялар ва хизмат учрашувларини ўтказиш;

— олимлар ва мутахассисларнинг малакаларини ошириш, стажировкалар ташкил қилиш;

— илмий ва илмий-техникавий дастурлар ва лойиҳаларнинг экспертизасини ўтказиш.

Ҳамкорлик ушбу Битимнинг бажарилишини таъминловчи бошқа келишилган шаклларда ҳам амалга оширилиши мумкин.

Муайян қўшма тадқиқотлар шаклларини танлашда ва аниқлашда Томонлар Томонлар давлатларининг илмий-техникавий сиёсати устуворлигига амал қиладилар.

Томонлар давлатлари олимлари ва мутахассисларининг иш шароитлари ҳамкорлик қилувчи ташкилотлар ўртасида ушбу Битимнинг 3 ва 4-моддаларида кўзда тутилган шартнома ва контрактлар асосида келишилади.

Томонлар ушбу Битим доирасидаги ҳамкорлик натижасида юзага келиши мумкин бўлган интеллектуал мулк ҳуқуқларини, Томонлар давлатлари миллий қонун ҳужжатларига мувофиқ, ҳимоя қилишга кўмаклашадилар. Интеллектуал мулк ҳуқуқларини ҳимоя қилишнинг аниқ масалалари ушбу Битимнинг 4-моддасида кўзда тутилган шартномалар ва контрактлардан келиб чиқади.

Иккала Томоннинг ҳамкорлик қилувчи ташкилотлари ўртасида келишилган ҳолда, ушбу Битим доирасида амалга оширилаётган илмий ва илмий-техникавий дастур ва лойиҳаларни бажаришда иштирок этиш учун учинчи томонларнинг олимлари, техника экспертлари, давлат ташкилотлари ва корхоналари, ва шунингдек халқаро ташкилотлар мутахассислари таклиф қилиниши мумкин.

Ушбу Битим Томонларнинг ўзлари иштирок этаётиб тузган бошқа халқаро шартномалардан келиб чиқадиган ҳуқуқ ва мажбуриятларига дахл қилмайди.

Томонларнинг ўзаро розилиги бўйича ушбу Битимга алоҳида баённомалар билан расмийлаштириладиган ушбу Битимнинг ажралмас қисмлари ҳисобланадиган ўзгартиш ва қўшимчалар киритилиши мумкин.

Ушбу Битимнинг қоидаларини талқин қилишда баҳс ва келишмовчиликлар пайдо бўлса, Томонлар уларни маслаҳатлашув ва музокаралар йўли билан ҳал қиладилар.

Ушбу Битим ноаниқ муддатга тузилади ва Томонлардан бири бошқа Томонни Битимнинг амалини тўхтатиш нияти тўғрисида ёзма равишда хабардор қилган санадан эътиборан олти ой ўтгунга қадар ўз кучида қолаверади.

Ушбу Битим унинг кучга кириши учун зарур бўлган давлат ички процедураларини Томонлар бажаргани тўғрисида охирги ёзма хабар олинган санадан эътиборан кучга киради.

Ушбу Битимнинг қоидалари ўзгариши ёки тўхтатилиши ушбу Битим доирасида тузилган ва Томонлар охирига етказмаган, бевосита шартномалар бажарилишига дахл қилмайди.

Тошкент шаҳрида 2006 йил 20 мартда икки асл нусхада, ҳар бири ўзбек, қозоқ ва рус тилларида тузилди, бунда барча матнлар бир хил кучга эга.

Ушбу Битим қоидаларини талқин қилишда келишмовчиликлар пайдо бўлса, Томонлар рус тилидаги матнга мурожаат қиладилар.