Ўзбекистон Республикаси Ҳукумати билан Чехия Республикаси Ҳукумати, бундан буён «Томонлар» деб аталувчилар,

1996 йил 21 июндаги бир томондан Ўзбекистон Республикаси ва иккинчи томондан Европа ҳамжамиятлари ва уларнинг аъзо давлатлари ўртасида шерикчиликни ўрнатувчи Шерикчилик ва ҳамкорлик тўғрисида Битим қоидаларига асосланиб,

узоқ муддатли анъанавий иқтисодий муносабатларни инобатга олиб,

иқтисодий, саноат ва илмий-техникавий ҳамкорликни мустаҳкамлаш ва қўллаб-қувватлашга интилиб,

тенг ҳуқуқлилик, ўзаро манфаат, ўзаро фойда ва халқаро ҳуқуқ принципларига амал қилган ҳолда,

Томонлар икки мамлакат манфаатларида иқтисодий, саноат ва илмий-техникавий ҳамкорликни ривожлантиришга, мустаҳкамлашга ва чуқурлаштиришга интиладилар.

Эришилган иқтисодий, саноат ва илмий-техникавий ҳамкорлик даражасини инобатга олиб, Томонлар асосан қуйидаги соҳаларда ҳамкорлик қиладилар:

енгил саноат,

транспорт, шу жумладан транспорт воситалари,

энергетика, шу жумладан учинчи мамлакатлар бозорида ҳамкорлик қилиш,

соғлиқни сақлаш ва фармацевтика саноати,

кимё ва нефть-кимё саноати,

газ саноати,

целлюлоза-қоғоз саноати,

электр ускуналари ва электр маиший мосламалари,

электрон ва электротехника саноати,

қишлоқ хўжалиги техникаси,

озиқ-овқат саноати ускуналари, шу жумладан қайта ишлаш саноати ускуналари,

юқорида кўрсатилмаган бошқа ускуналар,

экологик машинасозлик,

тоғ-кон саноати,

қурилиш материаллари ва ускуналарини ишлаб чиқариш,

электростанцияларни, шу жумладан ўтказувчан электр тармоқларини замонавийлаштириш ва қайта тиклаш,

газ ва нефть қувурларини кенгайтириш ва қайта тиклаш,

саноат ва фуқаролик қурилишидаги қурилиш ишлари,

саноатнинг турли соҳаларидаги мутахассисларни ўқитиш ва таълим бериш.

Ушбу Битимнинг 2-моддасида белгиланган соҳалардаги ҳамкорликни таъминлаш мақсадида тегишли ҳукумат органлари, ташкилотлари ва ишбилармонлар доираси вакилларидан иборат Иқтисодий, саноат ва илмий-техникавий ҳамкорлик бўйича ўзбек-чех Ҳукуматлараро Комиссияси (кейинги ўринларда «Ҳукуматлараро Комиссия») тузилади.

Ҳукуматлараро Комиссия йиғилишлари лозим бўлганда, бироқ бир йилда камида бир марта навбатма-навбат Ўзбекистон Республикаси ва Чехия Республикасида ўтказилади. Ҳукуматлараро Комиссия ўзининг иш тартибини белгилайди.

1. Ҳукуматлараро Комиссия фаолиятининг асосий вазифалари қуйидагилардир;

а) ўзаро манфаатларни акс эттирувчи соҳаларда иқтисодий, саноат ва илмий-техникавий ҳамкорлик дастурларининг муҳокамаси;

б) кредит бериш ҳамда иқтисодий, саноат ва илмий-техникавий ҳамкорликни молиялаштиришни таъминлаш учун қулай шароитлар яратиш;

в) кичик ва ўрта тадбиркорликни қўллаб-қувватлаш бўйича қабул қилинган дастурларни тайёрлаш ва амалга ошириш;

г) икки мамлакат субъектларининг Томонлар ҳудудларида ўтказиладиган халқаро кўргазмалар ва ярмаркаларда иштирок этиши учун, шунингдек икки Томон мамлакатларининг Савдо-саноат палаталари ҳамкорлик қилиши учун тегишли шароитларни яратиш;

д) инфратузилманинг экологик хавфсиз тизимларини ривожлантиришда ҳамкорлик, жумладан қуйидаги соҳаларда:

энергетика;

автомобиль ва темир йўл тармоқлари;

авиация транспорти;

телекоммуникация;

саноат ва маиший чиқиндиларни йиғиш ва қайта ишлаш;

суғориш тизими ва мелиорация;

е) атроф-муҳит муҳофазаси ва экологик хавфсизликка эришиш, бунда асосан табиий ресурсларнинг рационал ишлатилиши инобатга олинади, ҳамда саноат ривожланишининг глобал ва минтақавий дастурларига мувофиқ экологик тоза ишлаб чиқариш соҳасини кенгайтириш;

ж) халқаро хавфсизлик стандартларига мувофиқ атом реакторлари хавфсизлигини оширишга қаратилган махсус дастурлар ишлаб чиқиш.

2. Ҳукуматлараро Комиссия кооперация муносабатлари ва ишлаб чиқариш ҳамкорлигининг бошқа шаклларининг ривожланишига кўмаклашади.

Ушбу Битим доирасидаги ҳамкорлик Томонларнинг халқаро ҳуқуқ нормалари, 1996 йил 21 июндаги бир томондан Ўзбекистон Республикаси ва иккинчи томондан Европа ҳамжамиятлари ва уларнинг аъзо давлатлари ўртасида шерикчиликни ўрнатувчи Шерикчилик ва ҳамкорлик тўғрисидаги Битим ҳамда бир томондан Ўзбекистон Республикаси ва иккинчи томондан Европа ҳамжамиятлари ёки Европа ҳамжамиятлари ва уларнинг аъзо давлатлари ўртасидаги бошқа халқаро шартномаларнинг нормалари ҳамда Чехия Республикасининг Европа Иттифоқига аъзолигидан келиб чиқадиган мажбуриятлари асосида амалга оширилади.

Томонларнинг ўзаро келишувига мувофиқ, ушбу Битимга унинг ажралмас қисми ҳисобланадиган алоҳида баённомалар билан расмийлаштириладиган ўзгартириш ва қўшимчалар киритилиши мумкин.

Ушбу Битимнинг қўлланилиши ва талқин этилиши билан боғлиқ низолар Томонларнинг музокара ўтказиши йўли билан ҳал этилади.

Ушбу Битим имзоланган кундан бошлаб кучга киради.

Ушбу Битим беш йилга тузилади ва бир Томон бошқа Томонни камида 6 ой олдин Битимнинг амал қилишини тўхтатиш тўғрисида ёзма шаклда хабардор қилмагунга қадар ўз-ўзидан бир йиллик муддатларга узайтирилади.

Тошкент шаҳрида 2004 йил 28 июнда икки асл нусхада, ҳар бири ўзбек, чех ва рус тилларида тузилди, бунда барча матнлар бир хил кучга эга.

Талқин қилишда келишмовчиликлар юзага келса, Томонлар рус тилидаги матнга амал қиладилар.