Бирлашган Миллатлар Ташкилоти Бош Ассамблеяси қуйида қисқача БМТТД деб аталувчи Бирлашган Миллатлар Ташкилотининг Тараққиёт Дастурини ёрдам олувчи мамлакатларнинг ўз иқтисодий тараққиётларининг муҳим муаммоларини ҳал этиш ҳамда уларнинг ижтимоий тараққиёти ва ҳаёт даражасини кўтаришга кўмаклашиш мақсадида, миллий саъй-ҳаракатларини қўллаб-қувватлаш ва тўлдириш учун тузганлигини эътиборга олиб; ва

Ўзбекистон Ҳукумати БМТТДга ўз халқи манфаати йўлида ёрдам учун талабнома тақдим этиш истагида эканлигини назарда тутиб;

Қуйида Томонлар деб аталувчи Ҳукумат ва БМТТД дўстона ҳамкорлик руҳида ҳаракат қилиб, ушбу Битимни туздилар.

1. Ушбу Битим БМТТД ва унинг ижрочи-муассасалари ҳукуматга унинг тараққиёт лойиҳаларини бажариш ва БМТТД сармояси асосида бажариладиган лойиҳалар юзасидан бўлган асосий шартларни ўз ичига олади. Унинг қоидалари БМТТД томонидан бериладиган ҳар қандай ёрдамга, шунингдек мазкур ёрдамни тақдим этиш ва ушбу Битимга мувофиқ шу каби лойиҳалар бўйича ҳамда ижрочи-муассасаларнинг тегишли мажбуриятларини батафсилроқ белгилаш мақсадида Томонлар ишлаб чиқиши мумкин бўлган қуйидаги лойиҳалар бўйича «ҳужжатлар» деб аталувчи лойиҳалар, бошқа ҳужжатларга нисбатан татбиқ этилади.

2. БМТТД ушбу Битимга мувофиқ Ҳукумат тақдим этган ва БМТТД маъқуллаган талабномага жавоб тарзидагина ёрдамни амалга оширади. Бундай ёрдам Ҳукуматга ёки у тайинлаши мумкин бўлган юридик шахсга берилади. Унинг берилиши ва олиниши БМТТД ваколатли идораларининг тегишли ва қўлланиладиган резолюциялари ва қарорлари асосида белгиланади, шунингдек БМТТДда зарур фондлар мавжудлигига боғлиқ бўлади.

1. Ушбу Битим асосида Ҳукуматга БМТТД томонидан бериладиган ёрдам қуйидагилардан иборат бўлиши мумкин:

а) эксперт-маслаҳатчилар ва консультантлар, шу жумладан БМТТД ёки тегишли ижрочи-муассасалар томонидан тайинланадиган ва улар олдида масъул бўлган алоҳида ширкатлар ва ташкилотлар консультантларининг хизматларидан;

б) тезкор, бошқарув ёки маъмурий вазифаларни Ҳукуматнинг фуқаро хизматчилари ёки Ҳукумат ушбу Битимнинг I-моддаси 2-бандига мувофиқ танлаши мумкин бўлган юридик шахслар сифатида бажариш учун ижрочи-муассаса тайинлайдиган техник экспертлар хизматларидан;

в) қуйида кўнгиллилар деб аталувчи Бирлашган Миллатлар Ташкилоти кўнгиллилари хизматларидан;

г) қуйида мамлакат деб аталувчи Ўзбекистонда олиш қийин бўлган асбоб-ускуна ва ашёлардан;

д) семинарлар, кадрлар тайёрлаш дастури, кўргазмавий лойиҳалар, экспертларнинг ишчи гуруҳлари ва шунга ўхшаш тадбирларни ташкил этишдан;

е) талабалар ва аспирантларга стипендиялар бериш ёки Ҳукумат томонидан тайинланиб, тегишли ижрочи-муассаса тасдиқлаган номзодларнинг умумий таълим ёки касб тайёрловини олишларини таъминлайдиган шунга ўхшаш тадбирларга маблағ ажратишдан;

ж) Ҳукумат ва БМТТД ўзаро келишиб олиши мумкин бўлган ёрдамнинг ҳар қандай туридан.

2. Ёрдам кўрсатиш ҳақидаги талабнома Ҳукумат томонидан БМТТД номига ушбу мамлакатдаги БМТТДнинг вакил-резиденти (у ҳақида ушбу модданинг 4а-бандида қайд этилади) орқали БМТТДнинг бундай талабномалар учун белгиланган шакл ва тартибига мувофиқ юборилади. Ҳукумат БМТТДга талабномани баҳолаш учун барча зарур хизматларни ва, шу жумладан келгусида сармоя қўйилиши назарда тутилган лойиҳалар бўйича фаолиятга нисбатан ўз нияти ҳақида барча тегишли маълумотларни тақдим этади.

3. БМТТД мақсадга мувофиқ деб қараладиган ташқи ёрдамдан фойдаланиб, ёрдамни бевосита Ҳукуматга ёки БМТТД томонидан лойиҳани рўёбга чиқаришда ҳамда ёрдамни амалга оширишда асосий жавобгарлик юклатиладиган ва шу мақсадда мустақил пудратчи мақоми бериладиган ижроси-муассаса орқали амалга оширилади. Башарти, ёрдам БМТТД томонидан бевосита Ҳукуматга берилса, ушбу Битимда ижрочи-муассасага ҳар қандай мурожаат этиб, иш кўриш БМТТДга мансуб деб шарҳланиши лозим ва матндан бошқа нарса англаниши ҳоллари бундан мустасно.

4. а) БМТТДнинг вакили бўлиш ва Дастурга тегишли барча масалалар бўйича Ҳукумат билан асосий алоқа канали вазифасини бажариш учун БМТТД мамлакатда вакил-резидент бошчилик қиладиган доимий миссияга эга бўлиши мумкин. Вакил-резидент БМТТД маъмурияти номидан иш кўриб, мазкур мамлакатда БМТТД маблағ билан таъминлаётган Дастурнинг барча жиҳатларига нисбатан тўлиқ жавобгар бўлади ва унга дескрицион ҳуқуқлар берилади ҳамда БМТ тизимидаги бошқа ташкилотларнинг мамлакатдаги гуруҳларининг касб ваколати ва Ҳукуматнинг тегишли идоралари билан муносабатларини эътиборга олиб, уларнинг ишига раҳбарлик қилади. Вакил-резидент Дастур номидан Ҳукуматнинг тегишли идоралари билан, жумладан ташқи ёрдамни мувофиқлаштириш бўйича Ҳукумат муассасалари билан алоқада бўлиб туради ва БМТТД ҳамда Бирлашган Миллатлар Ташкилоти бошқа тегишли Дастурларининг умумий сиёсат масалалари, мезонлари ва тартиб-қоидалари тўғрисида Ҳукуматга билдириб туради. У Ҳукуматнинг илтимосига биноан унга БМТТДнинг шу мамлакат бўйича дастурларини, лойиҳалар бўйича талабномаларни, шу мамлакат бўйича дастур юзасидан таклифларни тайёрлашда, лойиҳага таклиф этилган ўзгаришларни баён этишда кўмаклашади, турли хил ижрочи-муассаса ёки улар ўз консультантлари орқали БМТТД бераётган ёрдамнинг барча турларини тегишлича мувофиқлаштиришни таъминлайди. Агар Ҳукумат илтимос қилса, БМТТДнинг фаолиятини мамлакатда ўтказилаётган миллий икки томонлама ва кўп томонлама дастурлар билан мувофиқлаштиришда унга ёрдам беради ҳамда маъмурият ёки ижрочи-муассаса унга юклайдиган бошқа вазифаларни бажаради.

б) БМТТДнинг миссияси мамлакатда БМТТД ўзининг фаолиятини муносиб бажариши керак деб ҳисоблайдиган ходимлар штатига эга бўлиши мумкин. БМТТД вақти-вақти билан миссия ходимлари ва уларнинг оила аъзолари номларини Ҳукуматга маълум қилиб туради ва бундай шахсларнинг лавозим мақомидаги ўзгаришлар ҳақида ҳам унга хабар беради.

1. Ҳукумат БМТТД ёрдам бераётган ўзининг тараққиёт лойиҳалари ва тегишли лойиҳа ҳужжатларида қайд этилган вазифаларни бажаришда масъул бўлиб қолади ва ушбу Битим қоидалари ва лойиҳа ҳужжатларида алоҳида айтиб ўтилиши мумкин бўлган лойиҳаларнинг таркибий қисмларини бажаради. БМТТД Ҳукуматга ушбу Битим қоидалари ва лойиҳа ҳужжатларининг бир қисмини ташкил этувчи иш режасига кўра ва лойиҳага келгусида сармоялар қўйишга оид унинг ниятини рўёбга чиқартиришда кўмаклашиб, Ҳукуматни қўллаб-қувватлаш ва унинг лойиҳалардаги иштирокини тўлдириш мажбуриятини зиммасига олади. Ҳукумат БМТТД маблағ билан таъминлайдиган ҳар бир лойиҳа бўйича унинг иштирокида бевосита жавобгарлик зиммасида бўлган Ҳукуматнинг ҳамкорлик этувчи муассасаси тўғрисида БМТТДга хабар беради. Ҳукуматнинг ўз лойиҳалари учун умумий жавобгарлиги доирасига тегмай, Томонлар у ёки бу ижрочи-муассаса зиммасига у ёки бу лойиҳани ҳамкорлик қилаётган муассаса билан маслаҳатлашиб ва келишиб бажаришида асосий жавобгарликни юклаш тўғрисида аҳдлашиб олишлари мумкин; ҳар қандай шу каби чора, лойиҳаларни амалга оширишда жавобгарлик Ҳукумат ёки у тайинлаган юридик шахсга ўтказилиши ҳақида лойиҳа ҳужжатларининг бир қисмини ташкил этувчи иш режаси лойиҳасида, башарти улар тузилган бўлса битимларда, алоҳида қайд этиб ўтилиши лозим.

2. Ҳукумат муайян лойиҳа учун БМТТД ёрдамини олиш мақсадида зарур ёки мақсадга мувофиқ деб билган муқаддам ўз зиммасига олган ҳар қандай мажбурият ушбу лойиҳага нисбатан БМТТД ва ижрочи-муассасанинг ўз мажбуриятларини бажаришда дастлабки шарт ҳисобланади. Башарти, ёрдам ушбу дастлабки мажбуриятлар бажарилишига қадар берила бошланган бўлса, БМТТДнинг ихтиёрига қараб, хабар берилмасдан тугатилиши ёки тўхтатиб қўйилиши мумкин.

3. БМТТД томонидан маблағ билан таъминланадиган бирон-бир лойиҳани бажаришга нисбатан Ҳукумат ва ижрочи-муассаса ўртасида эришилиши мумкин бўлган ҳар қандай масала юзасидан келишув ёки Ҳукумат ва техник эксперт ўртасидаги келишув ушбу Битимнинг қоидаларига мувофиқ тартибга солинади.

4. Ҳамкорлик этувчи муассаса тегишли тарзда ва ижрочи-муассаса билан маслаҳатлашиб, ҳар бир лойиҳага раҳбарлик этиш учун ҳамкорлик этувчи муассаса юклаган мажбуриятларни бажарадиган штатли мудирни тайинлайди. Ижрочи-муассаса тегишли ҳолларда Ҳукумат билан мастлаҳатлашиб, ижрочи-муассаса олдида лойиҳа даражасида амалга оширишида иштирок этишини умумий тарзда назорат қилувчи бош техник маслаҳатчи ёки мувофиқлаштирувчини тайинлайди. У ижрочи-муассасанинг экспертлари ва бошқа ходимлари фаолиятига раҳбарлик қилади ва уни мувофиқлаштиради, Ҳукуматнинг ишлаб чиқаришдан ажралмаган миллий параллель ходимларини тайёрлашда масъул бўлади. У БМТТД маблағ билан таъминлайдиган сармояларни, жумладан лойиҳа учун тақдим этиладиган асбоб-ускуналарни бошқариш ва улардан самарали фойдаланишда масъул бўлади.

5. Эксперт-маслаҳатчилар, консультантлар ва кўнгиллилар ўз мажбуриятларини бажариш мақсадида Ҳукумат, у тайинлайдиган шахслар ёки идоралар билан атрофлича мастлаҳатлашиб иш тутадилар ва уларнинг мажбуриятлари характери ва БМТТД, тегишли ижрочи-муассаса ва Ҳукумат келишиб оладиган ёрдам характерини ҳисобга олиб, мақсадга мувофиқ бўлган Ҳукуматнинг йўриқларига риоя этадилар. Техник экспертлар — фақат Ҳукумат олдида ёки улар йўллаган юридик шахслар олдида масъулдирлар ва улар фақат Ҳукумат ёки шундай юридик шахснинг тасарруфида бўладилар, лекин улар ўзларининг халқаро мақомига ёки БМТТД ёхуд ижрочи-муассаса топшириқларига зид бўлган бирон-бир вазифани бажаришга мажбур эмаслар. Ҳукумат ҳар бир техник эксперт унинг хизматига келган сана унинг тегишли ижрочи-муассаса билан тузган шартномасининг ҳақиқий санасига мос келишини таъминлаш мажбуриятини олади.

6. Стипендиялар учун номзодлар ижрочи-муассаса томонидан танланади. Стипендиялар ушбу ижрочи-муассаса йўл тутадиган сиёсат ва амалиёт бўйича тақдим этилади.

7. БМТТД маблағ билан таъминлайдиган ёки тақдим этадиган техникавий ёки ўзга асбоб-ускуна, материаллар, таъминот ашё-буюмлари ва бошқа мол-мулкка нисбатан эгалик ҳуқуқи Ҳукумат ва БМТТД келишиб олган тартибда ва шартларда Ҳукуматга ёки у тайинлайдиган юридик шахсга ўтказилмагандагина ва шунга қадар БМТТДга тегишли бўлади.

8. Патент ҳуқуқи, муаллифлик ҳуқуқи ва шунга ўхшаш ушбу Битимга мувофиқ БМТТД берадиган ёрдам натижаси бўлган ҳар қандай кашфиёт ёки ишга бўлган ҳар қандай ҳуқуқлар БМТТДга тегишли бўлади. Лекин, башарти ҳар бир алоҳида ҳолда Томонлар бошқача келишиб олмаган бўлсалар, Ҳукумат мамлакат ичида фойдаланиш учун чегирмаларсиз ёки шу каби тўловларсиз ҳар қандай кашфиётлар ёки иш натижаларидан фойдаланиш ҳуқуқига эга бўлади.

1. Ҳукумат БМТТД маблағ билан таъминлайдиган лойиҳанинг келгусидаги ривожланиши истиқболи ва унинг рентабеллиги ёки ушбу Битим ва унинг лойиҳа ҳужжатларидан келиб чиқадиган мажбуриятларга Ҳукумат риоя этишига оид сўраши мумкин бўлган тегишли маърузалар, хариталар, ҳисоб-китоб варақалари, ёзувлар, аризалар, ҳужжатлар ва бошқа маълумотларни БМТТДга тақдим қилади.

2. БМТТД ушбу Битимга мувофиқ амалга оширилаётган ўзининг ёрдам бериш фаолияти тўғрисида Ҳукуматга маълум қилиб туриш мажбуриятини зиммасига олади. Битимдаги Томонлардан ҳар бири БМТТД маблағ билан таъминлаётган лойиҳаларнинг амалга оширилишини ҳар қандай вақтда назорат этишга ҳақлидир.

3. БМТТД маблағ билан таъминланган лойиҳа бажарилгандан сўнг унинг илтимосига биноан ушбу лойиҳа бўйича эришилган натижалар ва келгусида рўёбга чиқариладиган мақсадларни янада ривожлантириш учун амалга оширилаётган наф ҳақида, шу жумладан уни ёки БМТТД ёрдамини баҳолаш учун зарур ёки мақсадга мувофиқ маълумотларни Ҳукумат БМТТДга тақдим этади, ушбу мақсад учун БМТТД билан маслаҳатлашиб туради ва унга мазкур фаолиятни кузатиб туришга рухсат беради.

4. Ушбу моддага мувофиқ Ҳукумат БМТТДга тақдим этиши лозим бўлган ҳар қандай маълумот ва материаллар тегишли ижрочи-муассасанинг илтимосига биноан унинг ихтиёрига Ҳукумат томонидан тақдим қилинади.

5. Битимдаги Томонлар, лозим ҳолларда БМТТД маблағ билан таъминлайдиган лойиҳа ёки ундан олинадиган фойдага доир ҳар қандай маълумотни нашр этиш тўғрисида бир-бирлари билан мастлаҳатлашиб турадилар. Бироқ келгусида сармоя билан таъминланиши кўзда тутилган ҳар қандай лойиҳага оид ҳар қандай маълумот, башарти Ҳукумат БМТТДга ёзма равишда бундай лойиҳага нисбатан маълумот беришни чеклаш тўғрисида мурожаат этмаганда ёки шундай илтимос билан мурожаат этадиган пайтга қадаргина, БМТТД томонидан иқтидорли сармоядорлар ихтиёрига тақдим этилиши мумкин.

1. Ушбу Битимга мувофиқ БМТТД маблағ билан таъминлайдиган лойиҳаларни амалга оширишда қатнашиш ва ҳамкорлик этиш юзасидан ўз мажбуриятларини бажариш учун Ҳукумат тегишли лойиҳа ҳужжатларида ҳажми ва характери батафсил белгиланган қуйида кўрсатилганларни ўз бадали сифатида натура шаклида таъминлайди:

а) маҳаллий параллель мутахассислар ва бошқа ходимлар, жумладан бир-бирига ўхшаш техник экспертларнинг хизматларини;

б) ер участкалари, бинолар, кадрларни тайёрлаш учун ўқув базалари ва мавжуд бўлган ёки мамлакатда ишлаб чиқиладиган инфраструктуранинг бошқа таркибий қисмлари;

в) мавжуд бўлган ёки мамлакатда ишлаб чиқариладиган асбоб-ускуна, материаллар ва таъминот ашё-буюмлари.

2. Асбоб-ускуналарни етказиб бериш Ҳукуматга БМТТД берадиган ёрдамнинг бир қисмини ташкил этадиган барча ҳолларда, Ҳукумат бундай асбоб-ускуналарни олиб киришда солинадиган божни тўлаш, уни портдан лойиҳа амалга ошириладиган жойгача ташиш, сақлаш ва шунга ўхшаш харажатларини, уларни лойиҳа жойлашган жойга етказгандан кейин суғурта қилиш, ўрнатиш таъминлаш бўйича ҳам ҳар қандай тасодифий харажатларни кўтаради.

3. Шунингдек, Ҳукумат стажёрлар ва стипендия олувчиларга стипендиялар муддати давомида нафақалар тўлаб туришни ўз зиммасига олади.

4. Башарти, ушбу лойиҳа ҳужжатларида кўзда тутилган бўлса, Ҳукумат мазкур модданинг 1-бандида санаб ўтилган ашё-буюмлардан бирон-бири тақдим этилганлиги учун талаб этилган суммаларни лойиҳа ҳужжатлари бюджетида кўрсатилган ҳажмда БМТТД ёки ижрочи-муассасага тўлайди ёки уларнинг тўлашларини бошқача тарзда таъминлайди ва БМТТДга бу бандда назарда тутилган тўловлар ҳисобига сарфланган барча маблағлар хусусида йиллик ҳисобот бериб туради.

5. Олдинги бандга мувофиқ БМТТДга тўланиши лозим бўлган пул маблағлари Бирлашган Миллатлар Ташкилотининг Бош Котиби белгилаган ҳисобга топширилади ва уларни бошқариш БМТТДнинг амалдаги молиявий қоидаларига мувофиқ амалга оширилади.

6. Ҳукуматнинг лойиҳа учун бадалини ташкил этувчи предметлар қиймати ва ушбу Битимга мувофиқ Ҳукумат тўлаши лозим бўлган лойиҳа бюджетларида батафсил кўрсатилган ҳар қандай суммалар лойиҳа бюджетларини тайёрлаш пайтида энг янги маълумотларга асосланган ҳисоб-китоб сифатида қаралади. Келгусида харид этиладиган ҳар қандай ашё-буюмнинг ҳақиқий қийматини кўрсатиш керак бўлган ҳолларда, бундай суммаларга тузатишлар киритилиб турилиши лозим бўлади.

7. Ҳукумат ҳар қандай лойиҳа жойлашган ерда ушбу лойиҳанинг БМТТД ва ижрочи-муассасаси маблағлари ҳисобига амалга оширилаётганлигини билдирувчи тегишли белгилар ўрнатилишини таъминлайди.

1. Юқоридаги V-моддада кўрсатилган бадалга қўшимча равишда Ҳукумат тегишли лойиҳа ҳужжатларида ёки БМТТД томонидан унинг раҳбар органларининг тегишли қарорларига мувофиқ суммаларда белгилаган қуйида қайд этиладиган маҳаллий харажатлар ёхуд хизматларни ўз зиммасига олиб ёки бошқача тарзда тўловларни таъминлаб, БМТТДга кўмаклашади:

а) мамлакатдаги лойиҳаларга юборилган эксперт-маслаҳатчилар ва консультантларнинг истиқомат этишлари учун маҳаллий харажатлар;

б) маҳаллий-маъмурий ва идора ходимларининг, шу жумладан маҳаллий котиблар, оғзаки ва ёзма таржимонлар хизматлари ҳамда шунга монанд кўмаклашув;

в) мамлакат ичида ходимларни ташиш;

г) расмий мақсадлар учун почта жўнатмалари ва электр алоқаси.

2. Ҳукумат ҳар бир техник экспертга ўзининг фуқаросини айни шундай техник эксперт лавозимига тайинланганида тўлаганидек маош, қўшимча пул ёки мукофот пулларини тўлайди. Тегишли ижрочи-муассаса ўз хизматчиларига қандай йиллик отпускаси ва касаллик туфайли отпускалар берса, у ҳам техник-экспертга шундай отпускалар беради. Тегишли ижрочи-муассасада ўз хизмати шартларига мувофиқ ватанига боришга ҳақли бўлган ўз ходимларига отпуска бериш учун зарур чораларни кўради. Башарти, ижрочи-муассаса зиммасига техник-эксперт билан тузилган шартнома шартларига мувофиқ товон тўлашни юклайдиган ҳолатларда Ҳукумат техник-эксперт хизматини тўхтатса, Ҳукумат шу каби ҳолатларда хизмати тўхтатиладиган ушбу мамлакат фуқаро хизматчисига ёки даражаси жиҳатидан тенг ходимга хизмат тугаганда нормал тарзда тўланадиган товонда иштирок этади.

3. Ҳукумат қуйидаги маҳаллий хизматларни ва биноларни натура билан таъминлаш мажбуриятини олади:

а) зарур девон бинолари ва бошқа бинолар;

б) миллий фуқаро хизматчиларига кўрсатилганидек халқаро ходимлар учун ҳам тиббий ва касалхона хизмати;

в) кўнгиллилар учун оддий, лекин қулай бинолар;

г) халқаро хизматчилар учун тегишли уй-жой қидириб топишда кўмаклашиши ва тенг даражадаги миллий фуқаро хизматчиларига бериладиган шартлар асосида техник экспертлар учун квартиралар бериш.

4. Ҳукумат, шунингдек Томонлар ўртасида қуйидаги харажатлар моддаларини тўлаш учун эришилган келишув бўйича белгиланган бир марталик суммани ҳар йили БМТТДга тўлаб, унинг мамлакатдаги миссиясини харажатларида қатнашади:

а) мамлакатда штаб-квартира сифатида зарур ускуналар ва таъминот буюмлари билан жиҳозланган тегишли идора бинолари;

б) тегишли маҳаллий котиблар ва идора ходимлари, оғзаки ва ёзма таржимонлар ҳамда шунга ўхшаш ёрдам;

в) вакил-резидент ва унинг ходимларини мамлакат ичида расмий сафарлар учун транспорт билан таъминлаш;

г) почта жўнатмалари ва электр алоқа;

д) вакил-резидент ва унинг ходимларини мамлакат ичидаги расмий сафарлари даврида кундалик тўловлар.

5. Ҳукумат юқоридаги 4-бандда қайд этилганларни натура шаклида ҳам тақдим этишга ҳақли. «б» ва «д» бандларида кўрсатилганлар бундан мустасно.

6. Ушбу модданинг қоидаларига биноан тўланиши лозим бўлган пул маблағлари Ҳукумат томонидан тўланади ва V-модданинг 5-бандига мувофиқ БМТТДнинг ихтиёрига келиб тушади. 2-банд қоидалари бундан мустаснодир.

Башарти лойиҳани амалга оширишда Томонлардан бири бошқа манбалардан ёрдам тақдим этса, Ҳукумат барча манбалардан олаётган ёрдамни самарали мувофиқлаштириш ва ундан фойдаланиш мақсадида Томонлар ўзаро ва ижрочи-орган билан маслаҳатлашиб турадилар. Ушбу моддадан Ҳукумат учун келиб чиқадиган мажбуриятлар унинг билан лойиҳани амалга оширишда ҳамкорлик қилувчи бошқа юридик шахслар билан тузиши мумкин бўлган бирон-бир битим томонидан ўзгартирилиши мумкин эмас.

Ҳукумат БМТТД томонидан бериладиган ёрдамдан ҳар томонлама самарали фойдаланиш учун бор имкониятларини ишга солади, бу ёрдамдан кўзда тутилган мақсадларда фойдаланади. Қуйида қайд этилган қоидаларнинг қўллаш доирасини чекламай, Ҳукумат лойиҳа ҳужжатида кўзда тутилган мақсадларни рўёбга чиқариш учун аниқ тадбирларни амалга оширади.

1. Ҳукумат Бирлашган Миллатлар Ташкилоти ҳамда унинг органларига, жумладан БМТТД ва ижрочи-муассаса сифатида иш кўрувчи ёрдамчи органларга нисбатан уларнинг мол-мулклари, фондлари, авуарлари, шунингдек уларнинг ходимлари, жумладан вакил-президент ва мамлакатдаги БМТТД миссиясининг бошқа ходимларига дахлдор ҳолатларда Бирлашган Миллатлар Ташкилотининг имтиёзлар ва иммунитет тўғрисида Конвенцияси қоидаларини татбиқ этади.

2. Ҳукумат ижрочи-муассаса сифатида иш кўрувчи ҳар бир ихтисослашган муассасага нисбатан уларнинг мол-мулки, фондлари ва авуарларига доир ҳолатда ҳамда унинг ходимларига нисбатан ихтисослашган муассасаларнинг имтиёзлари ва иммунитетлари тўғрисида Конвенция қоидаларини, шу жумладан ушбу муассасага нисбатан қўлланиладиган Конвенция иловасини татбиқ этади. Атом энергияси бўйича халқаро агентлик (МАГАТЭ) ижрочи-муассаса сифатида иш тутган ҳолларда Ҳукумат унинг мол-мулки, фондлари ва авуарлари ҳамда унинг ходимлари ва экспертларига нисбатан МАГАТЭнинг имтиёзлари ва иммунитетлари тўғрисида Битим қоидаларини татбиқ этади.

3. Мамлакатдаги БМТТД миссияси аъзоларига ўз вазифаларини самарали бажариши учун лозим бўлган қўшимча имтиёзлар ва иммунитетлар берилади.

4. а) Башарти, Томонлар аниқ лойиҳаларга алоқадор лойиҳа ҳужжатлари бўйича бошқача тарзда келишиб олишмаса, Ҳукумат барча шахсларга Бирлашган Миллатлар Ташкилотининг тегишли ихтисослашган муассасаси ва МАГАТЭ Бирлашган Миллатлар Ташкилотининг имтиёзлар ва иммунитетларга доир 18 ҳамда 19-бўлимларига ёки ихтисослашган муассасаларнинг шундай Конвенциясининг 18-бўлимига ёки МАГАТЭнинг имтиёзлар ва иммунитетлар тўғрисида Битимига мувофиқ бериладиган имтиёз ва иммунитетларни беради. Жойларда Ҳукуматнинг фуқароларидан танланган, БМТТД, бирон-бир ихтисослашган муассаса ёки МАГАТЭ хизматидаги юқорида қайд этилган 1 ва 2-банд қоидалари таъсирига тушмайдиган ходимлар бундан мустаснодир.

б) Ушбу модданинг олдинги бўлимларида зикр этилган имтиёзлар ва иммунитетларга тааллуқли ҳуқуқий ҳужжатларни қўллаш мақсадида:

1) юқорида қайд этилган 4а-бандида кўрсатилган шахсларнинг тасарруфида ёки ихтиёрида мавжуд бўлган бирон-бир лойиҳага мансуб барча ҳужжатлар ҳолатларга қараб, Бирлашган Миллатлар Ташкилоти, тегишли ихтисослашган муассаса ёки МАГАТЭга тегишли ҳужжатлар сифатида қаралади ва;

2) лойиҳа мақсадлари учун олиб кирилган мамлакат ичида сотиб олинган ёки ижарага олинган асбоб-ускуна, материаллар ва таъминот ашё-буюмлари ҳолатларига қараб, Бирлашган Миллатлар Ташкилоти, тегишли ихтисослашган муассаса ёки МАГАТЭнинг мулки сифатида қаралади.

5. Ушбу Битимнинг IX, X ва XIII-моддаларида ишлатиладиган «хизмат вазифасини бажараётган шахслар» ибораси техник ходимлар, кўнгиллилар, консультантлар ҳамда юридик ва жисмоний шахслар, шунингдек уларнинг ходимларига нисбатан қўлланилади. У БМТТД томонидан ижрочи-муассаса сифатида ёки бошқача тарзда БМТТД томонидан маблағ билан таъминланаётган лойиҳани бажаришда ва унинг ходимларига кўмаклашишда ижрочи-муассаса сифатида БМТТД жалб этадиган Ҳукумат ва ноҳукумат ташкилотлари ёки ширкатларини қамраб олади. Ушбу Битимнинг бирон-бир қоидаси бундай ташкилотлар ёки ширкатларга ҳамда уларнинг ходимларига ҳуқуқий ҳужжатлар асосида бериладиган иммунитетлар ва енгилликларни чеклайдиган тарзда шарҳланмаслиги лозим.

1. Ҳукумат БМТТД, унинг ижрочи-идоралари, экспертлар ва уларнинг хизматида бўлган бошқа шахсларни ушбу Битимга мувофиқ адо этаётган мажбуриятларига зид бўлиши мумкин бўлган қарорлар ва бошқа ҳуқуқий қоидаларнинг қўлланиши доирасидан чиқариш учун керак бўлган барча чораларни кўради, тез самарали қўллаш учун лозим бўлиши мумкин бўлган шу каби бошқа имтиёзларни кафолатлайди. Хусусан, у уларга қуйидаги ҳуқуқ ва имтиёзларни кафолатлайди:

а) тезлик билан БМТТД ёки бирон-бир ижрочи-муассасада хизмат қилаётган эксперт ва бошқа ходимларни ишончли эканликларини текшириш;

б) тезда зарур виза, лицензия ва рухсатномаларни бепул тарзда бериш;

в) иш жойига кириш учун ижозат ва ҳамма зарур имтиёзлар;

г) БМТТД ёрдамини тегишлича қўллаш лозим бўлганда, мамлакат ичида эркин ҳаракатланиш, мамлакатга кириш ва чиқиб кетиш;

д) энг қулай валюта курси;

е) ускуналар, материаллар, таъминот ашё-буюмларини олиб кириш ва кейинчалик олиб чиқишга оид ҳар қандай зарур рухсатномалар;

ж) БМТТД ходимлари, унинг ижрочи-муассасалари ёки уларнинг хизматида бўлган бошқа шахсларга тегишли шахсий фойдаланиш ёки истеъмол учун ва кейинчалик олиб чиқиб кетиладиган мол-мулкни олиб киришда зарур бўлган ҳар қандай рухсатномалар;

з) «е» ва «ж» бандларида қайд этилган буюмларни божхонадан тезлик билан ўтказиш.

2. Ушбу Битимга кўра ёрдам Ўзбекистон халқи ва Ҳукумати фойдасини кўзлаб берилиши боисидан Ҳукумат ушбу Битимдан келиб чиқадиган операцияларга боғлиқ барча масъулиятни ўз зиммасига олади. У ижрочи-муассасалар, уларнинг ходимлари ва улар хизматида бўлган ва бошқа шахсларга нисбатан учинчи томонлар даъво қилган тақдирда, ўз зиммасига даъволарни кўриб чиқиш масъулиятини олади ҳамда уларни ушбу Битимга оид операциялардан келиб чиқадиган талаблар ёки бошқа хил мажбуриятларни бажаришдан озод қилади. Башарти, Томонлар ва ижрочи-муассаса юқорида қайд этилган шахсларнинг қўпол эҳтиётсизлиги ёки қасддан ҳуқуққа хилоф ҳаракатлари натижасида талаб ёки мажбурият келиб чиқишига оид келишиб олишган бўлса, юқорида баён этилган қоидалар татбиқ этилмайди.

1. Башарти, БМТТД фикрича лойиҳани муваффақиятли тугатиш ва унинг мақсадига эришиш учун тўсқинлик қилаётган ёки қилиши мумкин бўлган ҳолатлар келиб чиқса, БМТТД ёзма тарзда Ҳукумат ва тегишли ижрочи-муассасани огоҳлантириб, ҳар қандай лойиҳа учун берилаётган ёрдамни тўхтатиши мумкин. БМТТД ушбу хатида ёки кейинги хатида қандай шароитларда лойиҳа учун ўз ёрдамини давом эттиришга тайёрлигини билдириши мумкин. Ҳар қандай бу каби тўхтатиш унинг қайд этган шартларини Ҳукумат қабул қилмагунча ва БМТТД ёзма равишда Ҳукумат ва ижрочи-муассасани ёрдамини тиклашга тайёр эканлиги ҳақида билдирмагунча давом этаверади.

2. Башарти ушбу модданинг 1-бандида баён этилган ҳар қандай вазият у тўғрида ҳамда Ҳукуматга БМТТД ва ижрочи-муассаса ёрдамининг вақтинча тўхтатиб қўйиш ҳақида хабар берилгандан сўнг 14 кун давом этса, ушбудан сўнг ҳар қандай вақтда вазият давом этиш жараёнида БМТТД Ҳукуматга ва ижрочи муассасага юборадиган ёзма билдириши билан лойиҳага ёрдам беришни тўхтатиши мумкин.

3. Ушбу модда қоидалари эътироф этилган ҳуқуқий нормалар ва ҳар қандай бошқа асос бўйича мазкур ҳолатларда БМТТД ихтиёрида бўладиган бошқа ҳеч қандай ҳуқуқлар ёки ундириш воситаларига дахл қилмайди.

1. БМТТД ва Ҳукумат ўртасида ушбу Битим натижасида ёки у сабабли юзага келган ҳар қандай низо музокаралар ёки тортишувни бошқача ҳал этиш усуллари билан ҳал этилмаса, Томонлардан бирон-бирининг илтимосига кўра у ҳакамлар муҳокамасига берилиши мумкин. Ҳар бир томон бир ҳакамни тайинлайди. Томонлар тайинланган ҳакамлар муҳокама жараёнида раислик этувчи учинчи ҳакамни тайинлайдилар. Башарти ҳакамлар муҳокамаси тўғрисида илтимосдан сўнг 30 кун ичида Томонлардан бирон-бири ҳакам тайинланмаса, икки ҳакам тайинлангандан кейин 15 кун ичида учинчи ҳакам тайинланмаса, ҳар қандай Томон Халқаро суднинг раисидан ҳакам тайинлашни сўраши мумкин. Ҳакамлар муҳокамаси тартиб-қоидалари ҳакамлар томонидан ўрнатилади, ҳакамлик бўйича харажатлар миқдорини ҳакамлар белгилайди ва уларни низолашувчи томонлар кўтарадилар. Чиқарилган ҳакамлар қарори асослантирилган сабабларнинг баёнотини ўз ичига олиши ва Томонлар уни низо юзасидан қатъий қарор сифатида қабул этишлари лозим.

2. Ҳукумат ва техник эксперт ўртасида Ҳукумат хизматида бўлгандаги шароитларда келиб чиқувчи ҳар қандай низо Ҳукумат ёки шу манфаатдор техник эксперт томонидан мазкур техник экспертнинг вакили бўлган ижрочи-муассаса муҳокамасига берилиши мумкин ва тегишли ижрочи-муассаса низони ҳал этишда хайрли хизматлар вазифасини бажаради. Башарти низони юқорида қайд этилган тартибда ёки бошқа ҳар қандай келишув услубида ҳал этиш мумкин бўлмаса, Томонлардан бирон-бирининг илтимосига кўра масала ушбу модданинг 1-бандида баён этилган қоидаларга мувофиқ ҳакамлик муҳокамасига берилади ва бунда Томонлардан бирон-бири ёки улар тайинлаган ҳакамлар томонидан тайинламаган ҳакамни доимий ҳакамлик судининг Бош Котиби тайинлашигина мустаснодир.

1. Ушбу Битим имзолангандан сўнг кучга киради ва қуйидаги 3-бандга мувофиқ тўхтатилгунча кучга эга бўлади. Ушбу Битим кучга кириши билан БМТТД ва унинг мамлакатдаги штаб квартираси маблағлари ҳисобига Ҳукуматга ёрдам беришга оид илгари амалда бўлган битимлар бекор қилинади ва унинг қоидалари Ҳукуматга берилаётган ва эндиликда бекор қилинган Битимлар асосида мамлакатда ташкил топган БМТТД штаб-квартирасига келаётган ҳар қандай турдаги ёрдамларга жорий этилади.

2. Ушбу Битимга Томонлар ёзма равишда келишиб олишлари орқали ўзгаришлар киритилиши мумкин. Ушбу Битим қамраб олмаган барча алоқадор масалаларни Томонлар БМТнинг тегишли идоралари резолюциялари ва қарорларига мувофиқ ҳал қиладилар. Ҳар бир Томон ушбу бандга оид бошқа Томоннинг ҳар қандай таклифини ҳар томонлама ижобий тарзда инобатга олиши лозим.

3. Ушбу битим бирон-бир Томон бошқа Томонни билдириш хати билан огоҳлантиргандан сўнг тўхтатиши мумкин ва ушбу билдириш хати олингандан сўнг 60 кун ўтгач, Битимнинг амал қилиши тўхтайди.

4. Томонлар ушбу Битимнинг IV-моддасига мувофиқ (лойиҳаларга тааллуқли маълумотлар) ва VIII-моддасига кўра (ёрдамни ишлатиш) ўз зиммаларига олган мажбуриятлар ушбу Битимнинг амал қилиши тўхтагандан сўнг ҳам кучда қолади. Ушбу Битимнинг IХ-моддасида қайд этилган (имтиёзлар ва иммунитетлар), Х-моддасида кўрсатилган (лойиҳасини бажариш учун зарур имтиёзлар) ва ХII-моддасидаги (низоларни ҳал этиш) тўғрисида Ҳукумат ўз зиммасига олган мажбуриятлар БМТТДга, ҳар қандай ижрочи-муассасага ёки ушбу Битимга мувофиқ уларнинг хизматида бўлган шахсларга тегишли ходимларни чақириб олиш, фондлар ва мол-мулкни қайтариб олишни режали тартибда амалга оширишга доир қисмида Битимнинг амал қилиш муддати тугагач ёки унинг амал қилиши тўхтатилгач ҳам кучда қолади.

Юқоридагиларни тасдиқлаш мақсадида қуйида имзо чеккан Бирлашган Миллатлар Ташкилоти Тараққиёт дастурининг ва Ҳукуматнинг тегишли тарзда тайинланган вакиллари тегишли Томонлар номидан ушбу Битимни имзоладилар.

Тошкент шаҳрида 1993 йил 10 июнь куни инглиз ва ўзбек тилида, икки нусхада тайёрланди.