Ўзбекистон Республикаси Ҳукумати билан Болгария Республикаси Ҳукумати, бундан кейин «Аҳдлашувчи Томонлар» деб аталувчилар,

ветеринария соҳасидаги ҳамкорликни чуқурлаштириш ва кенгайтириш истагидан келиб чиқиб, ҳайвонларда инфекцион касалликлар тарқалишининг олдини олиш ҳамда ўз давлатлари ҳудудини эпизоотия юқишидан биргаликда ҳимоя қилиш мақсадида,

ушбу Конвенцияни тузишга қарор қилдилар ва

Аҳдлашувчи Томонлар юқумли касалликларнинг ташувчилари бўлиши мумкин бўлган тирик ҳайвонлар, ҳайвонлардан олинган маҳсулотларни қайта ишлаш натижасида тайёрланган материаллар, ҳайвонлардан тайёрланган озиқ-овқатлар, озуқа ва нарсаларни олиб кириш, олиб чиқиш ва транзит қилишда уларнинг давлат ҳудудларини эпизоотиядан ҳимоя қилиш учун ўзаро ҳамкорлик қиладилар.

1. Аҳдлашувчи Томонлар нобоп зоналар, объектлар, касалланган ҳайвонлар тури ва сони, касалликларнинг шакли ва кечиши, инфекциялар тарқалишининг тахмин қилинаётган йўллари, қўзғатувчи тури, шунингдек касалликни чеклаш ва бартараф қилиш учун кўрилган чораларни кўрсатган ҳолда Халқаро эпизоотия бюросининг (ХЭБ) «А» рўйхатидаги касалликлар пайдо бўлиши тўғрисида бир-бирини хабардор қиладилар.

2. Аҳдлашувчи Томонлар зооантропоноз касалликлар пайдо бўлганлиги, ҳайвонларда ёки ҳайвонлардан тайёрланган озиқ-овқатларда одамлар ҳамда ҳайвонлар саломатлиги учун хавфли бўлган, келиб чиқиши биологик, кимёвий бўлган моддалар, механик аралашмалар мавжудлиги тўғрисида бир-бирини хабардор қиладилар.

3. Зарур ҳолларда, Аҳдлашувчи Томонлар ҳайвонларда пайдо бўлган касалликларга ташхис қўйиш борасида бир-бирларига ўзаро ёрдам кўрсатадилар, бу борада ўрнатилган халқаро ветеринария-санитария қоидаларига риоя қилган ҳолда бактерия ва вирус штаммларни aлмашишлари мумкин.

Ушбу Конвенция қоидалари қуйидагиларга қўлланади:

1) барча турдаги жониворлар (жумладан қушлар, мўйнали ҳайвонлар, лаборатория, ҳайвонот боғи, уй ҳайвонлари ва ёввойи ҳайвонлар, денгиз жониворлари, aсаларилар, балиқлар ва бошқа гидробионтлар, ҳайвонларнинг ҳомила, cигот, тухумҳужайралари ва маний, инкубация учун тухум ва уруғлантирилган икра);

2) ҳайвонлардан тайёрланган озиқ-овқатлар — гўшт ва гўшт маҳсулотлари, сут ва сут маҳсулотлари, балиқ, тухум ҳамда асаларичилик маҳсулотлари;

3) ҳайвонлардан тайёрланган материаллар — тери, жун, мўйна, пар, пат, эндокрин ва ошқозон материаллар, қон, суяк ва бошқа турдаги материаллар;

4) ҳайвонлар учун озуқалар;

5) ветеринария препаратлари, биологик материаллар ва коллекциялаш учун ҳaйвонлардан тайёрланган нарсалар.

Аҳдлашувчи Томонлар ҳайвонларни юқумли ва паразит касалликларининг олдини олиш ва уларга қарши курашиш бўйича муайян давлатда мавжуд бўлган йўриқ ва дастурларни қўллашнинг шарт-шароити ҳaмда усуллари тўғрисида бир-бирини хабардор қиладилар.

Аҳдлашувчи Томонлар ҳайвонлар, ҳайвонлардан олинган озиқ-овқатлар ва материалларни, ҳайвонлар учун озуқаларни, ветеринария препаратларни, биологик материаллар ва коллекциялаш учун ҳaйвонлардан тайёрланган нарсаларни олиб кириш, олиб чиқиш ҳамдa транзит қилишдаги ветеринария-санитария талаблари, шунингдек катта миқдорда иқтисодий зарар келтириши мумкин бўлган заҳарли озиқ-овқатлар, радиоактив ва бошқа моддалар ҳамда бошқаларга тегишли юқумли бўлмаган касалликлар юзага келганда қўлланиладиган чоралар тўғрисида ахборот алмашадилар.

Аҳдлашувчи Томонлар қуйидагиларни амалга оширадилар:

1) ветеринария-медицина фаолияти билан боғлиқ бўлган норматив ҳужжатлар ва бошқа махсус нашрларни алмаштириш;

2) ветеринария-медицина соҳасидаги махсус учрашувлар ва йиғилишлар тўғрисида бир-бирини хабардор қиладилар, шу билан бирга уларда иккала Аҳдлашувчи Томон мутахассислари иштирок этиши мумкин;

3) ветеринария фаолиятини ривожлантириш ва янада мукаммаллаштириш учун, ветеринарларнинг касбий малакасини ошириш учун мутахассислар алмашиш, тажриба ва билим алмашиш орқали ветеринария-медицина фани, таълим ва ветеринария хизматини амалий ташкил қилиш соҳасида ҳамкорликни амалга оширадилар.

1. Ушбу Конвенциянинг 4- ва 5-моддаларида кўрсатилган ҳужжатларни алмаштириш бўйича харажатларни юборувчи Аҳдлашувчи Томон қоплайди.

2. Мутахассисларни алмашиш Келишувчи Аҳдлашувчи Томон органлари ўртасида келишув бўйича амалга оширилади. Ушбу ҳолатларда йўл харажатларини юборувчи Аҳдлашувчи Томон қоплайди. Қабул қилувчи Аҳдлашувчи Томон эса кундалик ва турар жойи харажатларини ҳамда олдиндан келишилган дастурга мувофиқ мамлакат ичидаги сафарга чиқиш билан боғлиқ бўлган харажатларни қоплайди.

Ушбу Конвенция доирасида ҳамкорликни амалга ошириш учун рус ва инглиз тилларида расмийлаштирилган Халқаро эпизоотик Бюро (ХЭБ)нинг Халқаро зоосанитария кодекси талаблари асосида Аҳдлашувчи Томонлар томонидан берилган ҳамда келишилган ветеринария сертификатлари ҳақиқий ҳисобланади.

Олиб кирилаётган товар ёки тирик ҳайвонлар, ҳайвонлардан тайёрланган озиқ-овқатлар ва материаллар, озуқа юкланган алоҳида транспорт воситаси чегарада ветеринария кўригидан ўтказилаётганда у санитария ва гигиена талаблари жиҳатидан ветеринария сертификати талабларига жавоб бермаслиги аниқланса ёки товар ташилаётган транспорт воситалари ташишнинг ветеринария талабларига жавоб бермаса, импорт қилувчи давлатнинг ваколатли органлари экспорт қилувчи ваколатли органларини хабардор қиладилар ҳамда амалдаги миллий қонунларига мувофиқ ҳайвонларда юқумли ва паразит касалликлар ва одамларда антропозоонлар тарқалишидан давлат ҳудудини ҳимоя қилиш учун ҳаракат қиладилар.

Аҳдлашувчи Томонлар давлатларидан бирортасининг ҳудудида ХЭБнинг «А» рўйхатида кўрсатилган касалликлар мавжудлиги аниқланса, ушбу Аҳдлашувчи Томоннинг ваколатли органи бошқа Аҳдлашувчи Томоннинг ваколатли органини дарҳол хабардор қилиши ва ушбу Конвенциянинг 3-моддасида кўрсатилган юкларни олиб чиқишни тўхтатиши лозим.

Бундай ҳолатларда белгиланган олиб чиқариш тартиби халқаро қоидалар ва тартибларга мувофиқ қайтадан бошланади.

Аҳдлашувчи Томонларнинг ўзаро келишуви асосида бошқа аниқ ва аниқ бўлмаган касалликларга нисбатан ушбу Конвенциянинг қоидалари қўлланиши мумкин. Ҳар бир ҳолда ушбу Конвенциянинг таркибий қисми ҳисобланадиган қўшимча баённома расмийлаштирилади.

Аҳдлашувчи Томонлар халқаро ташкилотлар доирасида ўзаро қизиқиш уйғотувчи масалалар бўйича келишилган сиёсатни ўтказиш мақсадида маслаҳатлашувлар ва музокаралар ўтказадилар.

Ушбу Конвенция Аҳдлашувчи Томонларнинг улар иштирокчи бўлган бошқа халқаро шартномаларидан келиб чиқадиган мажбуриятларига дахл қилмайди.

Ушбу Конвенция қоидаларини талқин қилиш ва қўллашда юзага келадиган барча баҳсли масалалар Аҳдлашувчи Томонлар тарафидан маслаҳатлашув ҳамда музокаралар йўли билан ҳал қилинади.

Ушбу Конвенция Аҳдлашувчи Томонларнинг дипломатик каналлар орқали унинг кучга кириши учун зарур бўлган давлат ички процедураларини бажарганликлари тўғрисида охирги ёзма хабар олинган кундан ўттиз кун ўтгач кучга киради.

Ушбу Конвенция беш йиллик муддатга тузилади. Аҳдлашувчи Томонлардан бири бошқа Аҳдлашувчи Томонни, тегишли муддат тугашидан камида олти ой олдин дипломатик каналлар орқали ушбу Конвенциянинг амал қилишини тўхтатиш нияти тўғрисида ёзма равишда хабардор қилмаса, унинг фаолияти ўз-ўзидан кейинги беш йиллик муддатларга узаяди.

София шаҳрида 2003 йил 24 ноябрда икки асл нусхада, ҳар бири ўзбек, болгар ва рус тилларида бўлган бир хил маънода тузилди. Ушбу Конвенция қоидаларини талқин қилишда қарама-қаршиликлар юзага келган ҳолда рус тилидаги матндан фойдаланилади.