Қайд этиб ўтилсинки, 2007 йилнинг 1 сентябрига келиб «Тошгузар-Бойсун-Қумқўрғон» янги темир йўл линияси биринчи босқичининг қурилиши якунланди, натижада Қашқадарё ва Сурхондарё вилоятларини мамлакатнинг бошқа ҳудудлари билан ишончли боғлаб турувчи ягона ва яхлит темир йўл коммуникациялари тизими шаклланди. Мазкур ҳудуднинг бой минерал-хом ашё ресурслари конларини самарали ва комплекс равишда ўзлаштириш, аҳоли бандлигини таъминлаш, барқарор ҳамда жадал иқтисодий ўсиш ва инсонлар фаровонлигини ошириш, экспорт салоҳиятини ўстириб бориш учун қулай шарт-шароитлар яратилди. Ўзбекистоннинг жаҳон бозорларига, энг аввало Трансафғон темир йўл коридори орқали, бир вақтнинг ўзида Ўзбекистоннинг транзит ҳаракатидаги ролини ошириш билан тўғридан-тўғри Ҳинд океани, Жанубий ва Жануби-Шарқий Осиё мамлакатлари портларига чиқиш имконияти пайдо бўлди.

«Тошгузар-Бойсун-Қумқўрғон» янги темир йўл линиясидан самарали, ишончли ва бехатар фойдаланишни таъминлаш мақсадида:

1. Маълумот учун қабул қилинсинки:

2007 йилнинг 15 сентябридан бошлаб «Ўзбекистон темир йўллари» давлат-акциядорлик компанияси ишчи комиссияларининг далолатномаларига мувофиқ «Тошгузар-Бойсун-Қумқўрғон» янги темир йўл линияси орқали юк ташиш поездларининг тўхтовсиз ҳаракати очилган;

Ўзбекистон Республикаси Молия вазирлиги билан «Ўзбекистон темир йўллари» давлат-акциядорлик компанияси томонидан юкларни темир йўл орқали ташиш тарифлари келишиб олинган;

«Россия темир йўллари» ОАЖ лойиҳалар ва сметаларни экспертиза қилиш бошқармаси томонидан Ўзбекистон Республикасидаги «Тошгузар-Бойсун-Қумқўрғон» янги темир йўл линияси қурилишининг айрим масалалари бўйича эксперт хулосаси олинган;

Ўзбекистон Республикаси Миллий хавфсизлик хизмати, Ички ишлар вазирлиги «Ўзбекистон темир йўллари» давлат-акциядорлик компанияси билан биргаликда «Тошгузар-Бойсун-Қумқўрғон» янги темир йўл линияси объектларидан фойдаланиш хавфсизлигини таъминлаш бўйича устувор чора-тадбирлар белгиланган.

2. Поездлар ҳаракатини вагонларга техник ишлов бериш ва тайёрлашни, локомотив бригадалари ишини, йўлларга ва йўл хўжалигига хизмат кўрсатишни, сигнализация ва энергия таъминоти тизимини ташкиллаштиришнинг аниқ тартибини назарда тутувчи «Тошгузар-Бойсун-Қумқўрғон» янги темир йўл линияси орқали юк ташиш поездларининг тўхтовсиз ҳаракатини ташкил этишнинг муваққат тартиби иловага мувофиқ тасдиқлансин.

3. «Ўзбекистон темир йўллари» давлат-акциядорлик компанияси:

Ўзбекистон Республикаси Вазирлар Маҳкамасининг 2004 йил 30 ноябрдаги 559-сонли қарори билан тасдиқлаган тармоқ жадвалига мувофиқ «Тошгузар-Бойсун-Қумқўрғон» янги темир йўл линиясининг ишлаб чиқариш ва ижтимоий инфратузилмаси объектлари қурилишини компаниянинг ўз шахсий маблағлари ва Япония халқаро ҳамкорлик банкининг кредит маблағлари ҳисобидан таъминласин;

мураккаб тоғ шароитларида темир йўлларни лойиҳалаштириш, қуриш ва реконструкция қилиш масалаларида тажрибага эга бўлган нуфузли хорижий лойиҳалаштириш ташкилотини жалб этган ҳолда қабул қилинган техник ечимларнинг ишончлилигини ва объектлардан фойдаланиш хавфсизлигини аниқлаш бўйича лойиҳанинг мустақил экспертизасини ўтказсин.

4. «Тошгузар-Бойсун-Қумқўрғон» темир йўл линияси қурилишининг боришини мувофиқлаштириш ва назорат қилиш бўйича Республика комиссияси раиси (Мирзиёев) ҳамда қурилаётган темир йўл линиясида лойиҳа ечимлари ва қурилиш-монтаж ишлари сифатини назорат қилиш бўйича доимий фаолият кўрсатувчи комиссия раиси (Йўлдошев):

«Тошгузар-Бойсун-Қумқўрғон» янги темир йўл линияси қурилиши масалалари бўйича қабул қилинган ечимларни бажаришда амалий ёрдам кўрсатсин;

«Тошгузар-Бойсун-Қумқўрғон» янги темир йўл линияси объектлари қурилиши ҳамда қурилиш ва фойдаланиш қоидалари ва стандартлари талабларига риоя қилиниши устидан қатъий назоратни таъминласин.

5. Ҳудуднинг мураккаб табиий шароитлари ва ишлар доимо ҳаракатда бажарилишини эътиборга олиб, «Тошгузар-Бойсун-Қумқўрғон» янги темир йўл линияси тўлиқ қуриб битказилгунга қадар, мазкур темир йўл линиясидан фойдаланишда бевосита банд бўлган барча тоифадаги ходимлар иш ҳақига Қашқадарё вилояти бўйича 1,4 ва Сурхондарё вилояти бўйича 1,3 миқдорида коэффициент белгилансин.

6. Объектнинг тўлиқ қурилиб битказилиши ва белгиланган тартибда Давлат комиссиясига топширилишига қадар, бўшайдиган маблағларни ташкилий даврда темир йўл янги участкаларини обод қилишга мақсадли йўналтирган ҳолда, «Ўзбекистон темир йўллари» давлат-акциядорлик компаниясини «Тошгузар-Бойсун-Қумқўрғон» янги темир йўл линияси орқали юкларни ташишдан оладиган даромади бўйича фойда солиғидан ҳамда Республика йўл фондига ажратмалар тўлашдан истисно тариқасида озод қилинсин.

7. Қашқадарё (Зайниев) ҳамда Сурхондарё (Эшмуродов) вилоятлари ҳокимликлари Ўзбекистон Республикаси Миллий хавфсизлик хизмати ва Ички ишлар вазирлиги билан биргаликда янги темир йўл линияси бўйлаб ишончли хавфсизлик ҳудудини ташкил этиш бўйича чора-тадбирларни ишлаб чиқсин ва амалга оширсин.

8. Мазкур қарорнинг ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.

1. Тошгузар — Бойсун — Қумқўрғон темир йўли участкасида 10 та алоҳида — Тошгузар, Қайирма, Бўзахўр, Деҳқонобод, Чашмаихафизон, Оқработ, Дарбанд, Бойсун, Тангимуш, Оқжар пунктлари фойдаланишга топширилди ва улар орқали юк ташиш поездларининг тўхтовсиз ҳаракати очилди. Участканинг умумий узунлиги 223 км ни ташкил этади.

Юк поездларини қабул қилиш, жўнатиш ва ўтказиш учун қуйидаги алоҳида пунктларда:

Тошгузар ва Деҳқонободда — 4 тадан қабул қилиш-жўнатиш йўли;

Оқработ, Дарбанд, Бойсун ва Тангимушда — 3 тадан қабул қилиш-жўнатиш йўли;

Қайирма, Бўзахўр, Чашмаихафизон ва Оқжарда — 2 тадан қабул қилиш-жўнатиш йўли жалб қилинган.

2. Тошгузар, Қайирма, Бўзахўр, Деҳқонобод, Чашмаихафизон, Оқработ, Дарбанд, Бойсун, Тангимуш, Оқжар, Қумқўрғон алоҳида пунктларида ушлаб туриш ва сақлашга мўлжалланган боши берк йўллар мавжуд.

Барча алоҳида пунктлардаги стрелка ўтказгичларда электр узатмалар ўрнатилган бўлиб, улар курбель ёрдамида ўтказилади.

Қайта тиклаш ва ёнғинга қарши кураш поездлари Дарбанд станциясига жойлаштирилган.

Деҳқонобод станциясида юклаш-тушириш амалиётлари учун юк ҳовлиси мавжуд. Оқжар станциясида подъезд йўллари, ғалла тайёрлаш пункти ва нефть базасига қўшилиш нуқтаси жойлашган.

3. Чашмаихафизон — Оқработ станциялари орасидаги масофанинг 95-км да 95-сон стрелка ўтказгич узиб қўйилган бўлиб, қурилиш юклари ортилган вагонларни ўтказиш ва тозалаш мақсадида «Кўприкқурилиш» трести кўприк отрядининг вақтинчалик подъезд йўли қўйилган. Мазкур подъезд йўлига вагонларни ўтказиш ва олиб чиқиб кетиш тартиби Қарши — Термиз ҳудудий темир йўл бошқармаси томонидан тасдиқланган муваққат йўриқномада белгилаб берилган.

4. 4-сон Тариф йўриқномасининг 1-, 2-, 3-параграфларига мувофиқ Тошгузар, Деҳқонобод, Оқработ, Дарбанд, Бойсун, Тангимуш, Оқжар, Қумқўрғон ажратилган пунктлари тижорий амалиётлар, юк вагонларида юкларни қабул қилиш ва топшириш учун очиқ. 4-сон Тариф йўриқномасининг 8-параграфига мувофиқ Деҳқонобод станцияси тижорий амалиётлар (брутто массаси ҳар станцияга 20 ва 24 тонна бўлган универсал контейнерлардаги юкларни қабул қилиш ва топшириш) учун очиқ.

5. Янги темир йўл линиясининг қайта қурилиши, техник жиҳатдан жиҳозланиши ёки технологик ишлашидаги ўзгаришлар, янги механизация воситалари ва бошқа фойдаланиш шартларининг жорий қилиниши сабабли мазкур Муваққат тартибга мувофиқ ушбу линияда поездлар ҳаракатини ташкил этиш ва участкаларга хизмат кўрсатиш бўйича ўрнатилган механизмлар ўзгарган тақдирда ушбу Муваққат тартибга «Ўзбекистон темир йўллари» ДАТК томонидан компания Кенгаши билан келишилган ҳолда ўзгартиришлар киритилиши мумкин.

6. Тошгузар — Бойсун — Қумқўрғон участкасида поездлар ҳаракати Ягона диспетчерлик маркази (ЯДМ)нинг поезд диспетчери томонидан бошқарилиб, у мазкур участкадаги ҳаракатни ташкил қилишда 5 та жуфт юк поездларини ўтказишни назарда тутувчи тасдиқланган графикка асосланади.

7. Ўзбекистон Республикаси Темир йўлларидан фойдаланиш бўйича техник қоидаларнинг 176-банди талабларига мувофиқ, Тошгузар — Бойсун — Қумқўрғон йўналишидаги поездларга жуфт рақамлар, Қумқўрғон — Бойсун — Тошгузар йўналишидаги поездларга эса тоқ рақамлар берилади.

8. Тошгузар — Бойсун — Қумқўрғон участкасидаги поездлар ҳаракати станция бўйича навбатчилар томонидан электр жезлли тизим ва телефонни қўллаган ҳолда амалга оширилади.

Тошгузар, Қайирма, Бўзахўр, Деҳқонобод, Чашмаихафизон, Оқжар, Тангимуш ажратилган йўлларига юк поездларини қабул қилиш кириш сигналларининг рухсат берувчи кўрсаткичлари бўйича, Оқработ, Дарбанд, Бойсун ажратилган йўлларига юк поездларини қабул қилиш ИДПнинг 265-банди талабларига мувофиқ рўйхатга олинадиган ХДФУ буйруғи бўйича амалга оширилади, барча ажратилган йўллардан поездларни жўнатиш ИДПнинг 102-банди талабларига мувофиқ, станция бўйича навбатчилар томонидан поездлар машинистларига мазкур темир йўл қисми жезлини бериш орқали амалга оширилади.

9. Станция ТРАнинг 4.3 бандига мувофиқ, ушлаб туриш ва сақлашга мўлжалланган боши берк йўлларга олиб борувчи стрелкали кўрсаткичлар Тошгузар, Қайирма, Бўзахўр, Деҳқонобод, Чашмаихафизон, Оқработ, Дарбанд, Бойсун, Тангимуш, Оқжар, Қумқўрғон ажратилган йўлларида юк поездларини қабул қилиш-жўнатиш ва манёвр ишлари бажарилгач, ушлаб туриш ва сақлашга мўлжалланган боши берк йўлларга қаратиб қўйилади.

10. Қарши станциясидан Термиз минтақасига йўналган вагонлар оқимини ўтказиш учун шакллантириш режаси қуйидагича белгиланади:

Қарши станцияси бўйича:

Қарши — Дарбанд йўналишидаги поездлар учун — узатма;

Қарши — Сариосиё йўналишидаги поездлар учун — йиғма;

Қарши — Термиз йўналишидаги поездлар учун — йиғма-участка.

Ортга қайтадиган вагонлар оқимини ўтказиш учун шакллантириш режаси қуйидагича белгиланади:

Термиз станцияси бўйича:

Термиз — Дарбанд йўналишидаги поездлар учун — узатма;

Термиз — Қарши йўналишидаги поездлар учун — йиғма-участка.

Сариосиё станцияси бўйича:

Сариосиё — Қарши йўналишидаги поездлар учун — йиғма-участка.

11. «Ўзбекистон темир йўллари» ДАТКнинг барча станциялардан юкланган вагонлари қуйидагича юборилади:

Қарши МТУ Термиз минтақасининг барча станцияларига борувчи вагонлар Туркманистон темир йўллари ҳудудини кесиб ўтмасдан, Нишон-экспорт, Разъезд 161-экспорт ўтиш пунктларида тўхтамасдан янги темир йўл орқали;

Қарши МТУ Термиз минтақасидан Ўзбекистоннинг темир йўлларидаги барча станцияларга Болдир-экспорт, Талимаржон-экспорт ўтиш пунктларида тўхтамасдан янги темир йўл орқали.

12. Номенклатурага оид юкларни кузатиб бориш ёнғинга қарши ва қуролланган жамоаларни Дарбанд станциясига жойлаштирган ҳолда, Тошгузар — Бойсун — Қумқўрғон участкасида ҳарбийлашган қўриқлаш кўрсаткичлари ёрдамида ташкиллаштирилади.

13. Юк поездларини техник кўрикдан ўтказиш, ишлов бериш учун ажратилган пунктларда қуйидагилар ташкил этилган:

а) Дарбанд станциясида — техник кўрик пункти (ТКП).

Техник кўрик пункти юрувчи қисмлар, автотормоз ускуналари, зарб-юк тортиш ускуналари, кузовлардаги поездлар ҳаракати хавфсизлигига таҳдид соладиган носозликларни аниқлаш ва бартараф этиш, поездларнинг участкага кафолатли тарзда етиб келишини таъминлаш ҳамда вагонларни ташишга тайёрлашга хизмат қилади.

Мазкур ТКПда икки турдаги техник хизматлар кўрсатилади:

ТХ — юк вагонларига техник хизмат кўрсатиш. Бунда манёвр ишлари жараёнида юзага келган шикастларни аниқлаш мақсадида вагонларнинг техник ҳолати текширилади;

ЖТ-1 — юк вагонларини ташишга тайёрлашда составдан ажратиб олган ҳолда жорий таъмирлаш. Бунда кўрикни ўтказувчи ажратиб олган ҳолда таъмирлаш талаб этиладиган вагонлар бўйича белгиланган шаклда билдирги тўлдиради.

Составга техник хизмат кўрсатиш якунлангач, катта назоратчи вагонлар операторига тўсиқни олиб ташлашга кўрсатма беради, станция бўйича навбатчини поезд тайёр эканлиги ҳақида хабардор қилади ва буни юк вагонларини техник кўрикка тайёрлаш бўйича ВУ-14 шаклдаги китобда тасдиқлайди;

б) Қумқўрғон станциясида — вагонларга назорат-техник хизмат кўрсатиш пункти (НТХКП).

Вагонларга назорат-техник хизмат кўрсатиш пунктларида (НТХКП) состав тўхтаб турган вақтда поездлардаги вагонлар техник кўрикдан ўтказилади. Бунда қуйидаги амаллар бажарилади:

вагонларнинг автотормоз тизимини текислик режимига ўтказиш;

вагонларнинг техник ҳолатини текшириш;

аниқланган носозликларни бартараф этиш;

автотормозларни синаб кўриш ва тормозлар бўйича ВУ-45 шаклдаги маълумотнома бериш;

в) Тошгузар, Оқработ станцияларида — автотормозларни синаб кўриш постлари (АСП).

Техник носозлик туфайли ажратиб олиш талаб этиладиган вагонлар учун текширувчилар томонидан ВУ-23 шаклда билдирги берилади ва ушбу ҳужжат асосида вагонлар энг яқин масофада жойлашган таъмирлаш пунктига юборилади. АСП жойлашган ажратилган пунктларда автотормозлар бевосита локомотивдан туриб текширилади ҳамда тормозлар ҳақида ВУ-45 шаклда маълумотнома расмийлаштирилади;

г) Бўзахўр, Деҳқонобод, Бойсун, Тангимуш ажратилган пунктларида вагонлар жуфт ва тоқ йўналишларда ҳаракатланаётган пайтдаги уларнинг техник ҳолатини текширувдан ўтказиш учун постлар ташкил қилинган.

Поезд ажратилган пунктларда тўхтатилгач, назорат пости текширувчилари томонидан поезднинг хавфсиз ҳаракатланишига хавф солаётган носозлик аниқланади ва бартараф этилади. Носозлик аниқланган вагон поезддан узиб қўйилган тақдирда, текширувчилар составдаги автотормозларни синаб кўради ва локомотив машинистида турадиган ВУ-45 шаклдаги тормозлар бўйича маълумотномага тегишли қайдларни киритади.

14. Тошгузар — Бойсун — Қумқўрғон участкасидаги жуфт йўналишдаги поездларни ўтказиш учун вагонлар ҳолати устидан техник кўрик ва назоратнинг қуйидаги тартиби белгиланади:

Тошгузар, Деҳқонобод, Бойсун станциялари бўйича — поездларга техник ишлов берилмайди, Тошгузар станцияси бўйича, зарурат бўлганда, поездни итариб борувчи локомотив автотормозлари тўлиқ кўрикдан ўтказилади;

Оқработ станцияси бўйича барча поездларда автотормозлар текислик режимидан тоғли режимга ўтказилиб, локомотивни ўрнатилган нормативга биноан 40 дақиқага узмай турган ҳолда, узоқ нишаблик олдидан 10 дақиқалик танаффус билан тўлиқ синовдан ўтказилади. Тузилган поезд составларининг автотормозлари тўлиқ синовдан ўтказилади;

Дарбанд станцияси бўйича — локомотивни ўрнатилган нормативга биноан 120 дақиқага узиб қўйган ҳолда, поездларга техник ишлов берилади;

Қумқўрғон станцияси бўйича — янги темир йўлда қатнаётган барча поездларда автотормозлар текислик режимидан тоғли режимга ўтказилиб, ўрнатилган нормативга биноан 30 дақиқага мобайнида синовдан ўтказилади.

15. Тошгузар — Бойсун — Қумқўрғон участкасидаги тоқ йўналишдаги поездларни ўтказиш учун вагонлар ҳолати устидан техник кўрик ва назоратнинг қуйидаги тартиби белгиланади:

Қумқўрғон станцияси бўйича — локомотивни ўрнатилган нормативга биноан 120 дақиқага узиб қўйган ҳолда, тузилган поезд составларига техник ишлов берилади, транзит поездларга техник ишлов берилмайди;

Бойсун станцияси бўйича — поездларга техник ишлов берилмайди;

Дарбанд станцияси бўйича — локомотивни ўрнатилган нормативга биноан 60 дақиқага узиб қўйган ҳолда, тузилган поезд составларига техник ишлов берилади;

Оқработ станцияси бўйича локомотивни ўрнатилган нормативга биноан 30 дақиқага узмай турган ҳолда, узоқ нишаблик олдидан 10 дақиқалик танаффус билан поездларда автотормозлар текислик режимидан тоғли режимга ўтказилади. Тузилган поезд составларининг автотормозлари тўлиқ синовдан ўтказилади;

Деҳқонобод станцияси бўйича — локомотивни ўрнатилган нормативга биноан 40 дақиқага узмай турган ҳолда, состав назорат кўригидан ўтказилади;

Тошгузар станцияси бўйича — локомотивни ўрнатилган нормативга биноан 40 дақиқага узмай турган ҳолда, поездлар тўлиқ техник кўрикдан ўтказилиб, автотормозлар текислик режимидан тоғли режимга ўтказилади.

16. Юк поездлари қатновининг қуйидаги кафолатланган участкалари белгиланади:

Қарши — Дарбанд — Қарши;

Дарбанд — Қудуқли — Дарбанд;

Дарбанд — Термиз — Дарбанд.

17. Янги Тошгузар — Бойсун — Қумқўрғон темир йўл линияси бўйлаб ва ортга вагонлар қаторини ўтказиш учун поездларнинг оғирлик нормаси итариб борувчи локомотивдан фойдаланган ҳолда 2500 тонна этиб белгиланган. Тошгузар — Бойсун — Қумқўрғон участкасида юк поездлар ҳаракати 3ТЭ10М ва 2ТЭ10М (итариб борувчи) сериясидаги локомотивлар томонидан амалга оширилади.

Қумқўрғон — Дарбанд участкасида қуйидаги оғирлик нормаси белгиланган:

а) тоқ йўналишда:

3ТЭ10М сериясидаги тепловозлар учун (итариб борувчи 2ТЭ10М локомотиви билан) — 2500 тонна;

3ТЭ10М тепловозлари учун — 1500 тонна;

б) жуфт йўналишда:

3ТЭ10М тепловозлари учун — 2500 тонна;

2ТЭ10М тепловозлари учун — 2000 тонна.

Тошгузар — Оқработ участкасида қуйидаги оғирлик нормаси белгиланган:

а) жуфт йўналишда:

3ТЭ10М тепловозлари учун (итариб борувчи 2ТЭ10М локомотиви билан) — 2500 тонна;

3ТЭ10М тепловозлари учун — 1500 тонна;

б) тоқ йўналишда:

3ТЭЮМ тепловозлари учун — 2500 тонна;

2ТЭ10М тепловозлари учун — 2000 тонна.

18. Қарши, Термиз деполарининг локомотив бригадалари Дарбанд станциясида алмаштирилади. Қарши, Термизда рўйхатдан ўтган поезд тепловозларини алмаштириш Дарбанд станциясида амалга оширилади. Асбоб-анжомлар ва дизель ёқилғиси, қум билан таъминлаш Қарши, Термиз депосида амалга оширилади.

19. Дарбанд станциясида кўздан кечириш хандақи ишга туширилгунига қадар янги Тошгузар — Бойсун — Қумқўрғон темир йўл линиясига бириктирилган барча тепловозларни барча керакли анжомлар билан таъминлаган ҳолда, ТО-2 нормативи бўйича техник кўрикдан ўтказиш вақтинча улар рўйхатдан ўтган депода бажарилади.

20. Тошгузар, Деҳқонобод, Бойсун станцияларида манёвр ишларини амалга ошириш учун ТЭМ-2 сериясидаги манёвр тепловозлари жалб қилинган бўлиб, улар кечаю кундуз ишлайди. Манёвр тепловозларини ёқилғи билан таъминлаш жойида амалга оширилади.

21. Станциялар оралиғида поезд тўхташга мажбур бўлган ҳолларда ТЭҚнинг 275, 276, 278-бандлари талабларига мувофиқ машинист қуйидагиларни бажариши шарт:

а) нишабликда — контролёрни ўчириш ва автоматик тормозларни ҳаракатга келтириш. Поезд тўхтагач, локомотивнинг қўшимча тормози ва составдаги қўлда бошқарилувчи тормозларни ҳаракатга келтириш. Машинист ёрдамчиси вагонлар ғилдираклари остига локомотивда турадиган тормоз бошмоқларини қўйиб чиқиши, улар бўлмаганда эса вагонларнинг қўлда бошқарилувчи тормозларини қўшимча равишда ишга тушириши лозим;

б) юқорига кўтарилишда — контролёр дастагини энг паст юриш тезлигига ўтказиши, тезлик пасайгач, контролёрни ўчириши ва локомотивнинг қўшимча тормозини, состав тўхтаганидан сўнг эса автоматик тормозларни ҳам ҳаракатга келтириши лозим. Машинист ёрдамчиси вагонлар ғилдираклари остига локомотивда турадиган тормоз бошмоқларини қўйиб чиқиши, улар бўлмаганда эса вагонларнинг қўлда бошқарилувчи тормозларини қўшимча равишда ишга тушириши керак.

22. Тошгузар — Бойсун — Қумқўрғон участкасида барча юк поездларини кузатиб бориш Қарши, Термиз локомотив деполарининг жамоавий йўриқчилар таркиби (машинист-йўриқчилар) томонидан амалга оширилади.

23. Тошгузар станциясидан Оқработ станциясининг «ПН» ПК 1072+88 такрорланувчи тоқ светофоригача (светофор ҳам киради) бўлган участка чегарасида СМБ ва алоқа ускуналарига хизмат қилиш Қарши сигнализация ва алоқа дистанцияси томонидан, «ПН» ПК 1072+88 такрорланувчи тоқ светофоридан (светофор кирмайди) Қумқўрғон станциясигача бўлган участкада Термиз сигнализация ва алоқа дистанцияси томонидан амалга оширилади.

24. Тошгузар — Бойсун — Қумқўрғон участкасининг барча станция оралиқларида поездлар ҳаракатини ташкил қилиш учун электр жезл тизими ишга туширилган.

25. Тошгузар, Қайирма, Бўзахўр, Деҳқонобод, Чашмаихафизон, Тангимуш, Оқжар алоҳида пунктларида стрелкали ўтказмалар йўналиш-назорат ускуналари билан жиҳозланган бўлиб, улар стрелка ва сигналларни калитли боғлама ускуналари ёрдамида қулфлашни кўзда тутади.

26. Тошгузар, Қайирма, Бўзахўр, Деҳқонобод, Чашмаихафизон, Оқработ, Дарбанд, Бойсун, Тангимуш, Оқжар, Қумқўрғон алоҳида пунктларида қуйидаги алоқа турлари ўрнатилган: станциялараро, телефон, ҳар бир станция бўйича, диспетчерлик, радио. Қуйидаги пунктларда: Тошгузар, Деҳқонобод, Оқработ, Дарбанд, Бойсун пунктларида радиоманёвр алоқаси ўрнатилган. Қуйидаги пунктларда: Тошгузар, Қайирма, Бўзахўр, Деҳқонобод, Чашмаихафизон, Оқработ, Дарбанд, Бойсун, Тангимуш пунктларида АТС орқали телефон алоқаси ҳам ўрнатилган.

27. Тошгузар — Бойсун — Қумқўрғон темир йўл линиясига хизмат кўрсатиш мақсадида СПЧ-14 ихтисослаштирилган йўл дистанцияси ташкил этилган бўлиб, у Дарбанд станциясига жойлаштирилган.

СПЧ-14 ихтисослаштирилган йўл дистанциясининг хизмат кўрсатиш чегараси Тошгузар — Қайирма станциялари оралиғининг 3-километри (у ҳам киради)дан Оқжар — Қумқўрғон станциялари оралиғининг 222-километри (у ҳам киради)гача.

Участка 12 та темир йўл қисмига бўлинган бўлиб, улар қуйидаги станцияларда жойлашган: Бўзахўр, Жарқудуқ, Деҳқонобод, Қорадахна, Чашмаихафизон, Оқработ, Оқназар, Дарбанд, Бойсун, Пулҳоким, Тангимуш, Қумқўрғон. Сунъий иншоотларга хизмат кўрсатиш, таъмирлаш ва улардан фойдаланиш бўйича йўл бригадалари Деҳқонобод, Оқработ, Дарбанд, Қумқўрғон станцияларида жойлашган. СПЧ-14 йўл дистанцияси йўл механизмлари, транспорт, юк кўтариш ва назорат-ўлчов воситалари, сунъий иншоотлар цехлари учун жиҳозлар ва механик устахоналар учун станоклар билан жиҳозланган. Қўл асбоб-ускуналари, сигнал бериш анжомлари ва инвентари билан таъминланган. Қорга қарши кураш тадбирлари СПЧ-14 ихтисослаштирилган йўл дистанцияси томонидан ишлаб чиқилган ва тасдиқланган режа асосида олиб борилади.

28. Тошгузар — Бойсун — Қумқўрғон участкасидаги электр тармоқларининг узунлиги 223 км ни ташкил этади. Мазкур линиянинг Тошгузар станциясидан (у ҳам киради) Оқработ станциясининг 106-километригача (у ҳам киради) бўлган қисмидаги электр тармоқлари тақсимоти ва унга хизмат кўрсатиш туман электр тармоқлари (РЭС-4) томонидан, Оқработ станциясининг 106-километридан (106-километр кирмайди) Қумқўрғон станциясигача (у ҳам киради) бўлган қисми Термиз участкаси Қарши электр таъминот дистанциясининг 20-цехи томонидан амалга оширилади. Тошгузар — Бойсун — Қумқўрғон янги темир йўлини электр энергияси билан барқарор таъминлаш мақсадида: Тошгузар, Деҳқонобод, Оқработ, Бойсун, Дарбанд, Қумқўрғон станцияларида ТП-ЭП-20 турига мансуб трансформатор подстанциялари, бошқа алоҳида пунктларда эса КТП турига мансуб йиғма трансформатор подстанциялари ишга туширилган.

Электр таъминотига етказилган шикастларни тезкорлик билан бартараф этиш мақсадида мобил таъмирлаш бригадалари кўзда тутилган бўлиб, улар Деҳқонобод, Дарбанд станцияларида жойлашган.

29. Янги темир йўл линиясида тўғридан-тўғри қатновчи юк поездлари ҳаракатини ташкил қилиш тартиби ПТЭ, ИДП, ИСИ ТРА ва бошқа норматив ҳужжатлар талабларига мувофиқ белгиланади.