Шаҳарда ва шаҳар атрофида йўловчилар ташиш билан банд бўлган ҳаракатдаги таркибдан фойдаланиш самарадорлигини ошириш, аҳолига хизмат кўрсатиш маданияти ва сифатини яхшилаш мақсадида Вазирлар Маҳкамаси қарор қилади:

1. «Тошшаҳарйўловчитранс» уюшмасида ва «Ўзавтотранс» корпорациясининг вилоят бирлашмаларида йўлкира карточкалари ва имтиёзли карточкаларни сотиш бўйича ягона хўжалик ҳисобидаги марказлар ташкил этилсин.

2. «Ўзавтотранс» корпорациясига ва «Тошшаҳарйўловчитранс» уюшмасига ҳокимликлар билан келишган ҳолда йўловчилар оқими кўп бўлган йўналишларда шаҳар йўналишларидагига қараганда 2 баравар ортиқ йўл ҳақи белгилаган ҳолда экспресс автобус йўналишларини жорий этишга рухсат берилсин, ушбу йўналишларда автобуслар умумий сонининг кўпи билан 20 фоизи ишлаши мумкинлиги белгилаб қўйилсин.

3. Республика шаҳар ҳокимликлари «Ўзавтотранс» корпорацияси «Тошшаҳарйўловчитранс» уюшмаси билан биргаликда бир чорак давомида:

йўналишлар масофасини ва уларнинг шаҳар транспортининг бошқа турлари билан такрорланишини қисқартириш мақсадида мавжуд йўналишлар тармоғини;

ҳаракатдаги таркибнинг ҳаракат жадваллари ва графикларига аниқлик киритган ҳолда тиғиз вақтларда йўловчилар оқимини мақбуллаштириш мақсадида йирик корхоналар ва ташкилотлар иш вақтининг бошланиши ва тугалланиши жадвалларини қайта кўриб чиқсин.

4. Ҳокимликлар:

транспорт корхоналари билан биргаликда шаҳарлар ва туманларнинг саноат корхоналарида эҳтиёт қисмлар, узеллар ва агрегатларни, шунингдек, резинотехника буюмларини жойлаштириш ва тайёрлаш йўли билан ҳаракатдаги таркибнинг техник ҳолатини сақлаб туриш масалаларини кўриб чиқсин;

транспорт ва йўл корхоналари билан биргаликда йўналишлар ўтадиган кўчалар ва автомобиль йўллари қатнов қисмининг ҳолатини кўриб чиқсин ҳамда аниқланган камчиликларни бартараф этиш чораларини кўрсин.

5. Белгилаб қўйилсинки, Мудофаа вазирлиги, Ички ишлар вазирлиги, Адлия вазирлиги, Ижтимоий таъминот вазирлиги, Прокуратура, Давлат божхона қўмитаси, Давлат солиқ бош бошқармаси меҳнатнинг кўчма хусусияти билан боғлиқ хизмат вазифаларини бажараётган ўз ходимларига жамоат транспортида бепул юриш учун марказлаштирилган тартибда харид қилинадиган имтиёзли ойлик йўл карточкаларини тақдим этади.

6. 5-бандда кўрсатилган вазирликлар ва идоралар харажатлар сметасида имтиёзли карточкалар сотиб олиш учун маблағлар ажратилишини назарда тутсин.

7. Вазирликлар, идоралар, корхоналар ва ташкилотларга ходимларга жамоат транспортида юриш ҳақини компенсация қилишни ойлик йўл карточкаларини сотиб олиш йўли билан амалга ошириш тавсия этилсин.

8. Вазирликлар, идоралар, ҳокимликлар, мулкчилик шаклларидан қатъи назар, корхоналар ва ташкилотларга йўловчилар транспортида бепул юриш ҳуқуқини берувчи гувоҳномаларни тайёрлаш ва бериш тақиқлансин, бунда ушбу ҳуқуқдан фақат «Ўзавтотранс» корпорацияси ва «Тошшаҳарйўловчитранс» уюшмаси фойдаланиши белгилаб қўйилсин.

9. Ўзбекистон Республикаси Молия вазирлиги Марказий банк билан биргаликда автомобиль ёқилғиси, харид қилинадиган ҳаракатдаги таркиб, эҳтиёт қисмлар учун олдиндан ҳақ тўлаш мақсадида «Ўзавтотранс» корпорациясига ва «Тошшаҳарйўловчитранс» уюшмасига бюджет маблағлари олдиндан ажратилишини таъминласин.

10. Ўзбекистон Республикаси Ички ишлар вазирлиги Тошшаҳарйўловчитранс объектларида, хусусан тунги вақтда, жамоат тартиби сақланишини таъминласин, жиноятчиликка қарши курашни кучайтирсин.

11. «Ўзавтотранс» корпорацияси ва «Тошшаҳарйўловчитранс» уюшмаси:

йўловчи ташишларда аҳолига хизмат кўрсатиш маданияти ва сифатини яхшилаш бўйича зарур чора-тадбирлар кўрилишини таъминласин;

жамоат транспортида бепул юриш ҳуқуқини берувчи ягона гувоҳнома намунасини ишлаб чиқсин ва жорий этсин;

ҳаракатдаги таркиб тегишли экипировкасиз, ташиш қоидаларисиз ва тарификациясиз йўлга чиқарилишини тақиқласин;

линияда молиявий интизомни бузувчиларга нисбатан санкцияларни кучайтирган ҳолда тушумнинг тўлиқ йиғилишини таъминлаш устидан назоратни кучайтирсин;

белгиланган даромадлар режасини бажарганлик, ҳаракатдаги таркибдан самарали фойдаланганлик, салонни намунали ва эстетик сақлаганлик учун ҳайдовчиларни (кондукторларни) рағбатлантириш ва санаб ўтилганларни бажармаганлик учун, шунингдек, йўналишдан ўзбошимчалик билан четга чиққанлик, ҳаракат жадвалини бузганлик, йўловчиларга чипта бермаганлик ёки йўл ҳақи учун ортиқча ҳақ ундирганлик ва ўз хизмат вазифаларига риоя қилмаганлик учун жазолаш тўғрисидаги низомни ишлаб чиқсин ва жорий этсин.

12. «Ўздавнефтмаҳсулот» бирлашмаси 1993 йилда йўловчи ташиш корхоналарига ёқилғи-мойлаш материалларини белгиланган лимитга нисбатан юз фоиз бериш тартибини сақлаб қолсин.

13. Вазирлар Маҳкамасининг Машинасозлик комплекси ҳаракатдаги таркибнинг барқарор ишлашини ва газ-баллон ёқилғисига ўтиши билан унинг самарадорлигини ошириш мақсадида бир ой муддатда «Ўзавтотранс» корпорацияси ва «Тошшаҳарйўловчитранс» уюшмасининг буюртманомалари бўйича республика саноат корхоналарида газ-баллон ускуналарини тайёрлашга буюртманомаларни кўриб чиқсин ва жойлаштирсин.

14. Қарорнинг бажарилишини назорат қилиш Капитал қурилиш, транспорт ва алоқа комплексига юклансин.