Ўзбекистон Республикаси Президентининг 2006 йил 27 сентябрдаги «Қимматли қоғозлар бозорини янада ривожлантириш чора-тадбирлари тўғрисида»ги ПҚ-475-сонли қарорининг (Ўзбекистон Республикаси қонун ҳужжатлари тўплами, 2006 й., 39-сон, 387-модда) 3-бандига мувофиқ Ўзбекистон Республикаси Давлат мулкини бошқариш давлат қўмитаси ва Молия вазирлиги қарор қилади:

1. Устав капиталида давлат акциялари пакети (улушлари) 50 фоиздан ортиқ бўлган корхоналарда ташқи аудитни ўтказадиган аудиторлик ташкилотлари рўйхатига аудиторлик ташкилотларини киритиш тартиби тўғрисидаги низом иловага мувофиқ тасдиқлансин.

2. Мазкур қарор Ўзбекистон Республикаси Адлия вазирлигида давлат рўйхатидан ўтказилганидан сўнг ўн кундан кейин кучга киради.

Мазкур Низом Ўзбекистон Республикасининг «Аудиторлик фаолияти тўғрисида»ги Қонуни, Ўзбекистон Республикаси Президентининг «Ўзбекистон Республикаси Давлат мулки қўмитаси фаолиятини такомиллаштириш чора-тадбирлари тўғрисида» 2006 йил 26 апрелдаги ПҚ-335-сон (Ўзбекистон Республикаси қонун ҳужжатлари тўплами, 2006 й., 17-сон, 140-модда) ва «Қимматли қоғозлар бозорини янада ривожлантириш чора-тадбирлари тўғрисида» 2006 йил 27 сентябрдаги ПҚ-475-сон (Ўзбекистон Республикаси қонун ҳужжатлари тўплами, 2006 й., 39-сон, 387-модда) қарорларига мувофиқ, устав капиталида давлат акциялари пакети (улушлари) 50 фоиздан ортиқ бўлган корхоналарда ташқи аудитни ўтказадиган аудиторлик ташкилотлари рўйхатини тузиш тартибини белгилайди.

1. Устав капиталида давлат акциялари пакети (улушлари) 50 фоиздан ортиқ бўлган корхоналарда ташқи аудитни ўтказадиган аудиторлик ташкилотлари рўйхатига (кейинги ўринларда — Рўйхат) аудиторлик ташкилотларини киритиш учун аудиторлик ташкилотларининг танлови аудиторлик фаолиятини юритиш учун лицензияга эга бўлган ва мазкур Низом билан белгиланган талабларга жавоб берувчи аудиторлик ташкилотларининг аризалари асосида амалга оширилади.

2. Танловда иштирок этиш учун талаблар танловда иштирок этадиган барча аудиторлик ташкилотлари учун ягона ҳисобланади.

3. Танловда қатнашадиган аудиторлик ташкилотлари ҳар йили 25 февралдан кечиктирмаган ҳолда Давлат мулки қўмитасига ушбу Низомнинг 13-банди талабларига мувофиқ тегишли ҳужжатларни тақдим этади.

4. Аудиторлик ташкилотларининг ҳужжатларини кўриб чиқиш учун Давлат мулки қўмитаси ва Молия вазирлиги ходимларидан иборат таркибда ишчи гуруҳи тузилади. Ишчи гуруҳнинг таркиби ва иш регламенти Давлат мулки қўмитаси ва Молия вазирлиги томонидан тасдиқланади.

5. Ишчи гуруҳ ҳар йили 1 мартга қадар аудиторлик ташкилотлари томонидан тақдим этилган ҳужжатларни кўриб чиқади, мазкур Низом талабларига жавоб берувчи аудиторлик ташкилотларини аниқлайди ва ҳар йили Давлат мулки қўмитаси ва Молия вазирлигининг қўшма қарори билан тасдиқланадиган Рўйхатни тузади.

6. Ҳар йили тасдиқланадиган аудиторлик ташкилотларининг рўйхати оммавий ахборот воситалари, шунингдек, Давлат мулки қўмитаси ва Молия вазирлигининг расмий интернет-сайтларида эълон қилинади.

7. Устав капиталида давлат акциялари пакети (улушлари) 50 фоиздан ортиқ бўлган корхоналарнинг бошқарув органлари аудиторлик ташкилотини танлов асосида тасдиқланган Рўйхатдан танлаб оладилар.

8. Рўйхатга киритилмаган ёки Рўйхатга киритилгандан кейин мазкур Низом талабларига номувофиқ бўлган аудиторлик ташкилотлари томонидан устав капиталида давлат акциялари пакети (улушлари) 50 фоиздан ортиқ бўлган корхоналарда аудиторлик текширувларини ўтказишга йўл қўйилмайди.

9. Аудиторлик ташкилоти мазкур Низом талабларига номувофиқ бўлган ҳолларда аудиторлик ташкилоти номувофиқлик юзага келган пайтдан бошлаб 10 кунлик муддат ичида Давлат мулки қўмитасига уни Рўйхатдан чиқариш тўғрисида ариза тақдим этади.

10. Ўзбекистон Республикаси Давлат мулки қўмитаси ва Молия вазирлигининг мониторинги давомида аудиторлик ташкилотининг мазкур Низом талабларига номувофиқлиги аниқланган тақдирда ушбу аудиторлик ташкилоти Рўйхатдан чиқарилади ва номувофиқлик аниқланган кундан бошлаб кейинги Рўйхат тасдиқланадиган кунга қадар такроран Рўйхатга киритиш учун ҳужжатларни тақдим этиш ҳуқуқига эга бўлмайди.

11. Ишчи гуруҳ хулосасига кўра аудиторлик ташкилотини Рўйхатдан чиқариш тўғрисидаги қарор Ўзбекистон Республикаси Давлат мулки қўмитаси ва Молия вазирлигининг қўшма қарори билан тасдиқланади ва оммавий ахборот воситаларида эълон қилинади.

12. Танловда иштирок этиш учун аудиторлик ташкилотига қуйиладиган талаблар бўлиб:

а) аудиторлик ташкилоти раҳбари ва аудиторларда (ариза берилган вақтда) амалда бўлган аудитор малака сертификатларининг ва малака ошириш курсларини тугатганлик тўғрисидаги гувоҳномаларнинг мавжудлиги;

б) аудиторлик фаолияти соҳасида камида 2 йиллик иш тажрибасининг мавжудлиги, шу жумладан, акциядорлик жамиятларидаги текширишлар бўйича;

в) шаклланган устав капиталининг мавжудлиги;

г) штатдаги камида 2 та аудиторларда «Сертификатланган ҳисобчи-амалиётчи (CAP)» ёки «Сертификатланган халқаро профессионал ҳисобчи (CIPA)» Халқаро профессионал ҳисобчиларни сертификатлаш дастури бўйича «Молиявий ҳисоб» фанини муваффақиятли топширганлик тўғрисида гувоҳномаларнинг мавжудлиги;

д) аудиторлик ташкилотида камида 1 та қимматли қоғозлар бозори соҳасида малакага эга бўлган мутахассиснинг мавжудлиги (малака қимматли қоғозлар бозори мутахассиси сертификати мавжудлиги ёки ушбу соҳада иш тажрибасининг мавжудлиги билан тасдиқланади);

е) фуқаролик жавобгарлиги бўйича суғурта полиси мавжуд бўлиши;

ж) Ўзбекистон Республикаси Молия вазирлигининг 2006 йил 21 августдаги 76-сон буйруғи билан тасдиқланган 4-сон аудиторлик фаолиятининг Миллий стандарти «Аудиторлик ташкилотларининг ички стандартларига қўйиладиган талаблар»га (2006 йил 25 сентябрь, рўйхат рақами 1624 — Ўзбекистон Республикаси Қонун ҳужжатлари тўплами, 2006 й., 39-сон, 392-модда) мувофиқ ички стандартлар ва уларнинг иловаларини мавжудлиги ҳисобланади.

13. Танловда иштирок этиш учун аудиторлик ташкилоти:

а) аудиторлик ташкилоти раҳбари ва аудиторларнинг аудитор малака сертификатларининг сертификат берган муассаса томонидан белгиланган тартибда тасдиқланган нусхалари ёки малака ошириш курсларини тугатганлик тўғрисидаги гувоҳномаларининг нотариал тасдиқланган нусхалари;

б) камида 2 та аудиторнинг «Сертификатланган ҳисобчи-амалиётчи (CAP)» ёки «Сертификатланган халқаро профессионал ҳисобчи (CIPA)» Халқаро профессионал ҳисобчиларни сертификатлаш дастури бўйича «Молиявий ҳисоб» фанини муваффақиятли топширганлик тўғрисида ҳужжатни мазкур ҳужжатни берган муассаса томонидан белгиланган тартибда тасдиқланган нусхаси ёки нотариал тасдиқланган нусхаси;

в) акциядорлик жамиятларини текшириш бўйича иш тажрибасига эга эканлигини тасдиқловчи аудиторлик хулосаларининг нусхалари;

г) аудиторлик ташкилотини устав капиталининг шаклланганлигини тасдиқловчи ҳужжатлар;

д) маълумоти тўғрисидаги диплом ёки қимматли қоғозлар бозори мутахассиси малака аттестатининг нусхаси ёхуд қимматли қоғозлар бозори соҳасидаги малакани тасдиқловчи меҳнат дафтарчасидан кўчирма;

е) фуқаролик жавобгарлиги бўйича суғурта полисининг нусхаси;

ж) ички стандартлар ва уларнинг иловаларини нусхаларини тақдим этади.

14. Мазкур Низом Ўзбекистон Республикаси Монополиядан чиқариш, рақобат ва тадбиркорликни қўллаб-қувватлаш давлат қўмитаси билан келишилган.