Вазирлар Маҳкамасининг «Ўзбекнефтгаз» миллий холдинг компаниясининг бошқарув тузилмасини такомиллаштириш тўғрисида» 2003 йил 21 октябрдаги 460-сон қарорини бажариш юзасидан ҳамда республика нефть ва газ тармоғининг ишчилар таъминоти корхоналарини ташкил этиш ва бошқариш тизимини янада такомиллаштириш мақсадида Вазирлар Маҳкамаси қарор қилади:

1. Ўзбекистон Республикаси Давлат мулки қўмитаси, «Ўзбекнефтгаз» миллий холдинг компанияси ва ишчилар таъминоти корхоналари акциядорларининг ишчилар таъминоти функцияларини амалга оширувчи иловага мувофиқ корхоналарни бирлаштириш йўли билан «Бухоронефтгазишчитаъминот», «Қашқадарёнефтгазишчитаъминот», «Водийнефтгазишчитаъминот» ва «Тошнефтгазишчитаъминот» очиқ акциядорлик жамиятларини ташкил этиш тўғрисидаги таклифига розилик берилсин.

2. Қуйидагилар:

нефть ва газни қидириш, бурғулаш, қазиб чиқариш, ташиш ва қайта ишлаш объектларида машғул бўлган нефть ва газ тармоғи ходимларини озиқ-овқат ва кундалик эҳтиёж товарлари билан таъминлаш;

нефть ва газ тармоғи объектларига туташ аҳоли пунктларида озиқ-овқат маҳсулотлари билан улгуржи ва чакана савдо қилиш ва савдо шохобчаларини кенгайтириш;

қишлоқ хўжалиги маҳсулотлари етиштирувчи ёрдамчи хўжаликларни ривожлантириш ва юритиш «Бухоронефтгазишчитаъминот», «Қашқадарёнефтгазишчитаъминот», «Водийнефтгазишчитаъминот» ва «Тошнефтгазишчитаъминот» очиқ акциядорлик жамиятларининг асосий вазифалари ҳисоблансин.

3. Ўзбекистон Республикаси Давлат мулки қўмитаси ва «Ўзбекнефтгаз» миллий холдинг компанияси «Ўзнефтгазишчитаъминот» акциядорлик компаниясини тугатиш комиссияси билан биргаликда қайта ташкил этилаётган акциядорлик жамиятларининг устав жамғармалари Ўзбекистон Республикаси Президентининг 2003 йил 24 январдаги ПФ–3202-сон Фармони талабларига мувофиқ шакллантирилишини ва янги ташкил этилаётган акциядорлик жамиятларининг уставлари белгиланган тартибда тасдиқланишини таъминлаган ҳолда, уларда бир ой муддатда акциядорларнинг умумий йиғилишларини ўтказсинлар.

4. Белгилаб қўйилсинки, «Бухоронефтгазишчитаъминот», «Қашқадарёнефтгазишчитаъминот» ва «Водийнефтгазишчитаъминот» очиқ акциядорлик жамиятларининг давлатга тегишли акциялари пакетлари «Ўзгеобурғунефтгазқазибчиқариш» акциядорлик компаниясига ишончли бошқарувга, «Тошнефтгазишчитаъминот» очиқ акциядорлик жамияти акцияларининг давлат пакети эса «Ўзтрансгаз» акциядорлик компаниясига ишончли бошқарувга, улар белгиланган тартибда профессионал бошқарувчи компанияларга ишончли бошқарувга берилгунга қадар берилади.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ў.Т.Султонов зиммасига юклансин.