Ўзбекистон Республикаси Олий Мажлиси Кенгашининг «Сирдарё вилоятининг маъмурий-ҳудудий тузилишига баъзи ўзгартиришлар киритиш тўғрисида» 2004 йил 11 февралдаги 597–II-сон қарорини қатъий амалга ошириш мақсадида Вазирлар Маҳкамаси қарор қилади:

1. Сирдарё вилоятининг Меҳнатобод туманини тугатиш, Оқолтин, Боёвут, Мирзаобод, Ховос, Ш.Рашидов туманлари ва Янгиер шаҳри ҳудудларини ўзгартириш ҳамда Ш.Рашидов туманини Сирдарё вилоятининг Сардоба тумани этиб қайта номлаш билан боғлиқ ташкилий тадбирларни амалга ошириш бўйича иловага мувофиқ Республика комиссияси ташкил этилсин.

2. Республика комиссияси (Ш.М.Мирзиёев) бир ой муддатда:

Сирдарё вилояти ҳокимлиги, Ўзбекистон Республикаси Молия вазирлиги, бошқа манфаатдор вазирликлар ва идоралар билан биргаликда Сирдарё вилоятининг Меҳнатобод туманини тугатиш, Оқолтин, Боёвут, Мирзаобод, Ховос, Ш.Рашидов туманлари ва Янгиер шаҳри ҳудудларини ўзгартириш ҳамда Ховос тумани маъмурий марказини Фарҳод шаҳарчасидан Ховос шаҳарчасига кўчириш, Ш.Рашидов туманини Сардоба тумани этиб қайта номлаш билан боғлиқ ташкилий масалаларни ҳал қилсин;

Ўзбекистон Республикаси Иқтисодиёт вазирлиги, Молия вазирлиги билан биргаликда 2004 йил учун Мирзаобод, Ховос, Оқолтин, Боёвут, Сардоба туманлари ва Янгиер шаҳрининг ижтимоий-иқтисодий ривожлантириш прогноз параметрларига ва бюджетларига тегишли ўзгартиришлар киритсин;

Ўзбекистон Республикаси Меҳнат ва аҳолини ижтимоий муҳофаза қилиш вазирлиги, маҳаллий ҳокимият органлари билан биргаликда юқорида кўрсатилган туманларнинг давлат ва хўжалик бошқарув органларини қўшиб юбориш натижасида бўшаб қоладиган ходимларни ишга жойлаштириш чора-тадбирларини кўрсин, уларни қайта тайёрлаш ва малакасини ўзгартириш чора-тадбирларини амалга оширсин;

Сирдарё вилояти ҳокимлиги билан биргаликда ташкилий даврда иқтисодиёт тармоқлари, коммунал соҳанинг узлуксиз ва бир маромда ишлашини, аҳолининг ижтимоий масалалари ўз вақтида ҳал этилишини таъминласин.

3. Мирзаобод ва Ховос туманлари ҳокимликларининг бошқарув аппарати тузилмаси ва бошқарув ходимларининг чекланган сони Вазирлар Маҳкамасининг «Давлат бошқаруви ҳудудий органлари тузилмасини такомиллаштириш тўғрисида» 2004 йил 5 январдаги 2-сон қарорига мувофиқ ҳокимликларнинг тасдиқланган тузилмаси ва бошқарув ходимларининг чекланган сони ҳисобга олинган ҳолда ўзгаришсиз қолиши маълумот учун қабул қилинсин.

4. Белгилансинки, Меҳнатобод туманининг адлия, ички ишлар, прокуратура ва суд органлари ходимлари сони Мирзаобод ва Ховос туманларининг тегишли туман бўлинмаларига қисқартиришсиз қайта тақсимланади, тегишли мол-мулк ва бинолар уларнинг балансида сақланиб қолади.

5. Ўзбекистон Республикаси Давлат статистика қўмитаси Сирдарё вилояти ҳокимлиги билан биргаликда икки ой муддатда, кейинчалик статистик база қиёсланишини таъминлаш учун, Ховос, Боёвут, Оқолтин, Мирзаобод, Сардоба туманлари ва Янгиер шаҳрининг тегишли кўрсаткичларини белгиласин.

6. Мазкур қарорнинг бажарилишини назорат қилиш Ўзбекистон Республикасининг Бош вазири Ш.М. Мирзиёев ва Сирдарё вилояти ҳокими Р.Ҳ. Ҳайдаров зиммасига юклансин.