Вазирлар Маҳкамасининг «Ахборот-коммуникация технологиялари соҳасида касб-ҳунар таълимини ривожлантиришга кўмаклашиш» лойиҳасини Германия Ҳукуматининг имтиёзли кредитидан фойдаланган ҳолда амалга ошириш чора-тадбирлари тўғрисида» 2004 йил 1 декабрдаги 563-сон қарорига мувофиқ ҳамда имтиёзли кредитнинг тежалган маблағларидан самарали фойдаланиш мақсадида Вазирлар Маҳкамаси қарор қилади:

1. «Ахборот-коммуникация технологиялари соҳасида касб-ҳунар таълимини ривожлантиришга кўмаклашиш» лойиҳасини амалга ошириш учун Германия тараққиёт банки (КfW) томонидан берилган 7669,4 минг евро миқдоридаги имтиёзли кредитни ҳамда 1023 минг евро миқдоридаги грантни ўзлаштириш доирасида:

а) Ўзбекистон Республикасининг 14 та касб-ҳунар коллежини замонавий ахборот-коммуникация технологиялари ва асбоб-ускуналари билан жиҳозлаш учун, ўтказилган тендер савдолари натижалари бўйича жами 4425,4 минг евро (кредит маблағлари) миқдорида контрактлар тузилганлиги, шу жумладан:

ахборот-технология асбоб-ускуналари етказиб бериш учун — 1397,4 минг евро миқдорида Fujitsu-Siemens компанияси билан 2005 йил 11 июлдаги SSEР/01Е/2005-сон контракт тузилганлиги;

ўқув анжомлари ва мебеллар етказиб бериш учун — 2599,5 минг евро миқдорида Lucas №uelle компанияси билан 2005 йил 23 августдаги SSEР/02ЕM/2005-сон контракт тузилганлиги;

ўқув материаллари сотиб олиш ва нашр этиш учун — 158,4 минг евро миқдорида Фан ва технологиялар маркази босмахонаси билан 2005 йил 15 июлдаги 02/У-сон контракт тузилганлиги;

б) Ўрта махсус, касб-ҳунар таълими маркази топшириғига биноан 2003 йил 1 октябрда КfW банки томонидан тендер асосида «GOPA» (Германия) консалтинг компанияси билан касб-ҳунар таълимини ривожлантиришга кўмаклашиш доирасида консалтинг хизматлари кўрсатиш юзасидан шартнома ҳамда унга жами 456,9 минг евро (289,3 минг евро — кредит маблағлари ва 167,6 минг евро — грант маблағлари) миқдорида иккита қўшимча битим тузилганлиги;

в) КfW имтиёзли кредитининг тежалган маблағлари 3244,0 минг еврони ташкил этганлиги маълумот учун қабул қилинсин.

2. Ўзбекистон Республикаси Олий ва ўрта махсус таълим вазирлигининг Ўрта махсус, касб-ҳунар таълими маркази, Ташқи иқтисодий алоқалар, инвестициялар ва савдо вазирлиги, Иқтисодиёт вазирлиги, Молия вазирлигининг КfW имтиёзли кредитининг 3244,0 минг евро миқдоридаги тежалган маблағларини ахборот-коммуникация технологиялари соҳасида кадрлар тайёрлашни амалга оширадиган касб-ҳунар коллежлари қўшимча сонини замонавий ўқув-лаборатория анжомлари билан жиҳозлашга йўналтириш тўғрисидаги таклифига 1 ва 2-иловаларга мувофиқ розилик берилсин.

3. Ўзбекистон Республикаси Олий ва ўрта махсус таълим вазирлигининг Ўрта махсус, касб-ҳунар таълими марказига:

лойиҳанинг ўз вақтида амалга оширилишини, маблағлардан, шунингдек етказиб бериладиган асбоб-ускуналардан мақсадли ва самарали фойдаланишни таъминлаш;

лойиҳада назарда тутилган тадбирларни 2006 йил охиригача тугаллаш юзасидан жавобгарлик юклансин.

4. Ўзбекистон Республикаси Олий ва ўрта махсус таълим вазирлигининг Ўрта махсус, касб-ҳунар таълими марказига, илгари белгиланган тендер шартларига риоя қилган ҳолда, тендер савдолари ўтказмасдан:

ахборот-технология асбоб-ускуналари етказиб бериш учун — Fujitsu-Siemens компанияси билан тузилган 2005 йил 11 июлдаги SSEР/01Е/2005-сон контрактга;

касб-ҳунар коллежларини жиҳозлаш мақсадида ўқув анжомлари ва мебеллар етказиб бериш учун — Lucas Nuelle компанияси билан тузилган 2005 йил 23 августдаги SSEР/02ЕМ/2005-сон контрактга қўшимча битимлар тузишга рухсат этилсин.

5. Ўзбекистон Республикаси Ташқи иқтисодий алоқалар, инвестициялар ва савдо вазирлиги:

ушбу қарорнинг 4-бандида кўрсатилган қўшимча битимларни белгиланган тартибда экспертизадан ўтказсин;

консалтинг хизматларининг амалдаги ижросини назарда тутиб, истисно тартибида, касб-ҳунар таълимини ривожлантиришга кўмаклашиш доирасида консалтинг хизматлари кўрсатиш учун 2003 йил 1 октябрдаги шартнома юзасидан, шунингдек ушбу шартномага 2005 йил 11 февралдаги 1-сон ва 2005 йил 18 апрелдаги 2-сон қўшимча битимлар юзасидан хулоса берсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С.Қосимов зиммасига юклансин.