Zamonaviy xalqaro talablarga javob beradigan avtomobil yoʻllari tarmogʻini yanada rivojlantirish, transport kommunikatsiyalari tizimining xalqaro transport koridorlariga keng integratsiyalashuvini taʼminlash, transport xarajatlarini qisqartirish chora-tadbirlarini amalga oshirish, umum foydalanadigan avtomobil yoʻllarini loyihalashtirish, qurish, taʼmirlash va mablagʻ bilan taʼminlashga yoʻnaltiriladigan davlat moliyaviy resurslaridan samarali foydalanish, shuningdek, Oʻzbekiston Respublikasi Moliya vazirligi huzuridagi Respublika yoʻl fondi tarkibini takomillashtirish va uning samaradorligini oshirish maqsadida:

1. Quyidagilar:

Xalqaro transport koridorlari tarkibiga kiruvchi umum foydalanadigan avtomobil yoʻllarini rekonstruksiya qilish, kapital va oʻrtacha taʼmirlash ishlarining 2006-yilgi Dasturi 1-ilovaga* muvofiq;

respublika ichki viloyatlararo umum foydalanadigan avtomobil yoʻllarini rekonstruksiya qilish, kapital va oʻrtacha taʼmirlash ishlarining 2006-yilgi Dasturi 2-ilovaga* muvofiq;

2006-yilda viloyatlar va tumanlar ichidagi umum foydalanadigan avtomobil yoʻllarini kapital va joriy taʼmirlashning yigʻma parametrlari 3-ilovaga* muvofiq tasdiqlansin.

2. Qurilish, rekonstruksiya qilish va taʼmirlash ishlarini amalga oshirishda buyurtmachi, texnik va moliyaviy nazorat oʻrnatish vazifasi:

xalqaro transport koridorlari tarkibiga kiruvchi umum foydalanadigan avtomobil yoʻllari, respublika ichki viloyatlararo yoʻllar — Oʻzbekiston Respublikasi Moliya vazirligi huzuridagi Respublika yoʻl fondi zimmasiga;

viloyatlar va tumanlar ichidagi umum foydalanadigan avtomobil yoʻllari — Qoraqalpogʻiston Respublikasi Vazirlar Kengashi va viloyatlar hokimliklari huzuridagi yagona buyurtmachi xizmatlari zimmasiga yuklansin.

Buyurtmachilar bajarilgan ishlarni nazorat qilish va qabul qilib olishda qurilish, rekonstruksiya qilish, kapital va joriy taʼmirlash kabi ish turlari boʻyicha loyiha-smeta hujjatlari parametrlari va ularning alohida pudratchi tashkilotlar bajargan ishlar hajmi va sifatiga mos kelishi aniq koʻrsatiladigan qatʼiy tartibga rioya etsinlar.

3. Oʻzbekiston Respublikasi Moliya vazirligining, 4-ilovaga* muvofiq, Respublika yoʻl fondi Ijroiya direksiyasi tarkibida daromadlarni prognoz qilish va dasturlarni moliyalashtirish boshqarmasi hamda xalqaro, respublika ichki va viloyatlararo umum foydalanadigan avtomobil yoʻllarini qurish, rekonstruksiya qilish va taʼmirlash konsepsiyasi hamda dasturlarini amalga oshirish boshqarmasini tashkil etgan holda uning tashkiliy tuzilmasi boʻyicha takliflari qabul qilinsin.

4. Oʻzbekiston Respublikasi Moliya vazirligi huzuridagi Respublika yoʻl fondi Oʻzbekiston transport va transport kommunikatsiyalari uyushmasi, “Oʻzavtoyoʻl” DAK, “Yoʻl-Loyiha byurosi” loyihalash instituti, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda uch oy muddatda 2007—2010-yillarda umum foydalanadigan avtomobil yoʻllarini rivojlantirish konsepsiyasi va dasturini ishlab chiqsin hamda belgilangan tartibda Vazirlar Mahkamasiga taqdim etsin.

Mazkur hujjatni ishlab chiqishda avtomobil yoʻllarini qurish va rekonstruksiya qilishni tashkil etishning ustuvor yoʻnalishlarini belgilovchi quyidagi asosiy mezonlarga amal qilinsin:

a) yoʻl kategoriyasi va transportda tashish hajmlaridan kelib chiqqan holda, yoʻl tarmogʻining tegishli darajada oʻtkazish qobiliyatini talab etadigan transport serqatnovligi;

b) yoʻllar va muhandislik inshootlarining zamonaviy xalqaro talabalarga javob beradigan yuksak texnikaviy darajasini taʼminlash asosida yoʻl harakati xavfsizligi va ishonchliligi;

v) yoʻl qurilishi sohasiga zamonaviy texnologiyalarni tadbiq etish, yoʻl kategoriyasiga qarab xarajatlarni optimallashtirish hisobiga avtomobil yoʻllari qurish va rekonstruksiya qilishga xarajatlarning nisbatan kam sarflanishi.

5. Oʻzbekiston Respublikasi Moliya vazirligi, Iqtisodiyot vazirligi, Oʻzbekiston transport va transport kommunikatsiyalari uyushmasi va “Oʻzavtoyoʻl” DAKning Avtomobil yoʻllarini rekonstruksiya qilish va qurilishini amalga oshirish boʻyicha “Oʻzavtoyoʻl” davlat-aksiyadorlik kompaniyasiga qarashli birlashgan direksiyasini tugatish toʻgʻrisidagi taklifiga rozilik berilsin.

6. Umum foydalanadigan avtomobil yoʻllarini, jumladan 2007—2010-yillarda rivojlantirish konsepsiyasi va dasturini tayyorlash uchun javobgarlik Oʻzbekiston Respublikasi Moliya vazirligi huzuridagi Respublika yoʻl fondiga va “Oʻzavtoyoʻl” davlat-aksiyadorlik kompaniyasiga hisobot beruvchi “Yoʻl-Loyiha byurosi” loyihalash instituti zimmasiga yuklansin.

“Yoʻl-Loyiha byurosi” loyihalash instituti tuzilmasida umum foydalanadigan avtomobil yoʻllarini rivojlantirish konsepsiyasi va dasturini tayyorlash boʻyicha boʻlim tashkil etilsin.

7. Oʻzbekiston Respublikasi Vazirlar Mahkamasi bir oy muddatda:

Respublika yoʻl fondining daromadlarini shakllantirish va uning mablagʻlarini sarflash tartibi toʻgʻrisida yangi tahrirdagi nizomni, Avtomobil yoʻllarini loyihalashtirish, qurish va rekonstruksiya qilish tartibi toʻgʻrisidagi nizomni, Bajarilgan ishlar sifatini nazorat qilish va qabul qilib olish toʻgʻrisidagi nizomni, shuningdek, umum foydalanadigan avtomobil yoʻllarini taʼmirlash va mablagʻ bilan taʼminlash boʻyicha ishlar Tasnifini tasdiqlasin;

tarmoqda xususiylashtirish jarayonlari chuqurlashuvini hisobga olgan holda “Oʻzavtoyoʻl” DAK tashkiliy tuzilmasini takomillashtirish, shuningdek, ekspluatatsiya va pudrat tashkilotlarini optimallashtirish boʻyicha takliflar kiritsin.

8. Oʻzbekiston Respublikasi Adliya vazirligi, Iqtisodiyot vazirligi, Moliya vazirligi hamda boshqa manfaatdor idoralar va tashkilotlar bilan birgalikda uch oy muddatda respublika avtomobil yoʻllari tizimini rivojlantirishning zamonaviy bosqichi talablaridan, avtomobil yoʻllarini qurish va foydalanishni tashkil etishning xalqaro tajribasidan kelib chiqqan holda “Oʻzbekiston Respublikasi avtomobil yoʻllari toʻgʻrisida” yangi tahrirdagi Qonuni loyihasini ishlab chiqsin va kiritsin.

9. Oʻzbekiston Respublikasi Moliya vazirligi, Iqtisodiyot vazirligi:

15,0 mlrd. soʻm miqdordagi Respublika yoʻl fondi daromadlarini 2006-yilda maktab taʼlimini rivojlantirish Davlat umummilliy Dasturini moliyalashtirish uchun Maktab taʼlimi jamgʻarmasiga yoʻnaltirsin;

Respublika yoʻl fondi daromad qismining amaliy ijrosi boʻyicha har chorak yakunlariga koʻra prognoz qilingandan ortiq tushumlardan foydalanish boʻyicha takliflar kiritsin.

10. “Oʻzbekiston Respublikasining 2006-yilgi Investitsiya dasturi toʻgʻrisida” Oʻzbekiston Respublikasi Prezidentining 2005-yil 8-noyabrdagi PQ-216-son qarorining 4-ilovasiga 2006-yilda avtomobil yoʻllari qurish va rekonstruksiya qilish dasturini amalga oshirish uchun markazlashtirilgan kapital mablagʻlarning limitlarini hisobga olgan holda 5-ilovaga* muvofiq tegishli oʻzgartishlar kiritilsin.

11. Ushbu qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.