Oʻzbekiston Respublikasining “Aloqa toʻgʻrisida”, “Radiochastotalar spektri toʻgʻrisida”, “Fuqarolar murojaati toʻgʻrisida”gi qonunlariga, Oʻzbekiston Respublikasi Vazirlar Mahkamasining 1998-yil 10-iyuldagi “Chastota spektridan foydalanish, teleradiodasturlarni shakllantirish va tarqatish hamda maʼlumotlar uzatish samaradorligini oshirish yuzasidan qoʻshimcha chora-tadbirlar toʻgʻrisida”gi 293-son, 2004-yil 7-maydagi “Oʻzbekiston aloqa va axborotlashtirish agentligi faoliyatini takomillashtirish chora-tadbirlari toʻgʻrisida”gi 215-son qaroriga muvofiq buyuraman:

1. “Radioaloqa vositalariga, televideniye va radioeshittirish dasturlarini qabul qilishga taʼsir etuvchi radioxalaqitlarni bartaraf etish uchun buyurtma qabul qilish va koʻrib chiqish tartibi toʻgʻrisida”gi yoʻriqnoma ilovaga* muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtganidan oʻn kun keyin kuchga kirgan deb hisoblansin.

3. Mazkur buyruq kuchga kirgan kundan boshlab amaldagi OʻzPTAning 1999-yil 26-iyul 278-son buyrugʻi bilan tasdiqlangan hamda Oʻzbekiston Respublikasi Adliya vazirligida 1999-yil 9-iyul 767-son bilan roʻyxatdan oʻtgan “Radioaloqa vositalariga, televideniye va radioeshittirish dasturlarini qabul qilishga taʼsir etuvchi radioxalaqitlarni bartaraf etish uchun buyurtma qabul qilish va koʻrib chiqish tartibi toʻgʻrisida”gi yoʻriqnoma oʻz kuchini yoʻqotgan deb hisoblansin.

4. Mazkur buyruqning bajarilishini nazorat qilish Bosh direktor oʻrinbosari M.M. Sangilov zimmasiga yuklansin.