Oʻzbekiston Respublikasining Havo kodeksiga, sifat boʻyicha xalqaro standartlarga, Xalqaro aviatsiya tashkiloti (IKAO)ning tavsiyalariga muvofiq va boshqaruv faoliyatini markazlashtirishdan chiqarish jarayonida parvozlarning xavfsizligini taʼminlash, shuningdek, isteʼmolchilarning manfaatlarini himoya qilish maqsadida Vazirlar Mahkamasi qaror qiladi:

1. Oʻzbekiston Respublikasi Havo kodeksining davlat boshqaruvi va parvozlarning xavfsizligini nazorat qilishga oid qismida bayon qilingan Aviatsiya maʼmuriyati funksiyasi “Oʻzbekiston havo yoʻllari” milliy aviakompaniyasining Davlat boshqaruvi va nazorati bosh inspeksiyasiga yuklatilsin.

2. Oʻzbekiston fuqaro aviatsiyasida Havo transporti ekspluatantlarini sertifikatsiya qilish joriy etilsin. Sertifikatsiya qilish havo transportidan foydalanishni tartibga soluvchi amaldagi qoidalar, yoʻriqnomalar va boshqa normativ hujjatlar boʻyicha amalga oshirilsin.

3. “Oʻzdavstandart” bilan “Oʻzbekiston havo yoʻllari” milliy aviakompaniyasining Davlat boshqaruvi va nazorati bosh inspeksiyasi oʻrtasida oʻzaro hamkorlik qilish toʻgʻrisida tuzilgan bitim maʼqullansin.

4. “Oʻzbekiston havo yoʻllari” milliy aviakompaniyasi foydalanuvchi sertifikatsiya tartib-qoidalari va ekspluatantlarga yoʻl-yoʻriq berish boʻyicha dasturulamalni tasdiqlasin va uni, idoraviy boʻysunishi va mulkchilik shaklidan qatʼiy nazar, barcha aviatsiya tashuvchilariga yetkazsin.

5. Belgilab qoʻyilsinki:

yangidan tashkil etiladigan ekspluatantlar ishlab chiqarish faoliyati boshlangunga qadar sertifikatsiya qilinadi. Ekspluatant guvohnomasi (sertifikat) ularga ishlab chiqarish-texnika negizi, havo kemalari va boshqa asbob-uskunalar tashkil etishning texnologik jarayonlarining huquqiy holati, parvozlarning bajarilishi va ularni taʼminlash, aviatsiya xodimlarining tayyorgarlik darajasi amaldagi talablarga muvofiqligi tekshirilgandan keyin beriladi;

faoliyat koʻrsatayotgan ekspluatantlar 1993-yil 1-dekabrga qadar guvohnoma olish uchun buyurtmanoma berishlari kerak.

6. Oʻzbekiston Respublikasi Havo kodeksining 96-moddasiga muvofiq Vazirlar Mahkamasining 1992-yil 21-maydagi 240-son qarori bilan tasdiqlangan korxonalarga (tashkilotlarga) faoliyatning ayrim turlari bilan shugʻullanish huquqini beruvchi ruxsatnomalar (litsenziyalar) berish tartibi toʻgʻrisidagi Nizom 2-bandining havo transporti orqali yoʻlovchilar va yuklarni tashishga oid qismiga “Organning nomi” ustunida “Baziplap Mahkamasi” soʻzlari oʻrniga “Oʻzbekiston havo yoʻllari” milliy aviakompaniyasi” soʻzlari yozilgan holda oʻzgartirish kiritilsin.

7. Mazkur qarorning bajarilishini nazorat qilish Bosh vazirning oʻrinbosari oʻrtoq. K. N. Toʻlaganov zimmasiga yuklatilsin.