Respublikamizning iqlim sharoitlariga mos keladigan kam qavatli xizmat binolari va uy-joylarga boʻlgan ehtiyojlarning oʻsib borayotganligini hisobga olib Vazirlar Mahkamasi qaror qiladi:

1. “Toshkenttiklanish” davlat-kooperativ qurilish birlashmasi “Toshkentqurilish” davlat-aksionerlik qurilish korporatsiyasi ixtiyoriga berilsin va uning negizida tarkibiga ilovaga* muvofiq korxonalar va tashkilotlar kirgan “Toshxorijiyqurilish” davlat-aksionerlik qurilish birlashmasi tashkil etilsin.

“Toshkentqurilish” davlat korporatsiyasi, “Oʻzshartnomasavdo” davlat uyushmasi yangi tashkil etilgan “Toshxorijiyqurilish” birlashmasini yetishmagan zarur ishlab chiqarish boʻlinmalari bilan toʻldirishni, mashinalar, mexanizmlar va asbob-uskunalar bilan jihozlashni taʼminlasinlar.

2. Oʻzbekiston Respublikasi Davlat mulki qoʻmitasi “Toshkentqurilish” korporatsiyasi va “Toshxorijiyqurilish” birlashmasi bilan birgalikda 1993-1994-yillarda amaldagi qonun hujjatlariga binoan “Toshxorijiyqurilish” birlashmasi tarkibiy boʻlinmalarini ochiq turdagi aksionerlik jamiyatlariga aylantirish boʻyicha zarur tashkiliy chora-tadbirlarni amalga oshirsin. Aksiyalarning davlatga qarashli ulushi 51 foiz miqdorida belgilab qoʻyilsin.

3. Belgilab qoʻyilsinki, yangi tashkil etilgan “Toshxorijiyqurilish” birlashmasining boshligʻi “Toshkentqurilish” davlat korporatsiyasi raisining birinchi oʻrinbosari hisoblanadi. Qoʻshimcha ravishda “Toshkentqurilish” davlat korporatsiyasi raisining birinchi oʻrinbosari lavozimi joriy etilsin.

4. “Toshxorijiyqurilish” zimmasiga Tashqi ishlar vazirligi Diplomatik servis xizmatining, yuridik shaxslar va Oʻzbekiston Respublikasi fuqarolari boʻlgan jismoniy shaxslarning buyurtmalariga binoan mebel bilan jihozlangan kam qavatli uy-joy-xoʻjalik obyektlarini loyihalash va foydalanishga tayyor holda qurish vazifasi yuklatilsin.

Qurilish buyurtmachilar mablagʻlari, Diplomatik servis xizmatining oʻz mablagʻlari va bank kreditlari hisobiga amalga oshirilsin. Mablagʻ bilan taʼminlovchi banklar Diplomatik servis xizmatini uning 1994-1995-yillarga hisob-kitobiga muvofiq hajmlardagi kredit resurslari bilan taʼminlasinlar.

5. Oʻzbekiston Respublikasi Markaziy bankiga keyinchalik markazlashtirilgan tartibda “Toshkentqurilish” korporatsiyasining “Toshxorijiyqurilish” birlashmasiga aylanma mablagʻlarini koʻpaytirishga belgilangan tartibga muvofiq ikki yil muddatga berish uchun Moliya vazirligiga 2 mlrd soʻm miqdorida 5 foizli maqsadli kredit ajratish tavsiya etilsin.

“Toshxorijiyqurilish” birlashmasi uchun 1993-1994-yillarda daromad soligʻi stavkasi 12 foiz miqdorida belgilansin.

6. Toshkent shahar hokimligining qurilish uchun berilgan uchastkalar hamda ularning “Toshxorijiyqurilish” birlashmasining buyurtmalari boʻyicha tezkorlik bilan ajratilishi toʻgʻrisidagi takliflari maʼqullansin.

7.“Oʻzqurilishmateriallari” konserni, “Oʻzmetallkonsern”, “Toshkentqurilish”, “Oʻzsanoatxoʻjalikqurilish” davlat korporatsiyalari, “Oʻzboshyogʻochqurilish” boshqarmasi, “Oʻzshartnomasavdo”, “Oʻzbeksavdo” davlat uyushmalari texnik hujjatlarga muvofiq birlashmaga oʻz nomenklaturalariga birkitilgan metall prokati va trubalarni, yuqori sifatli materiallar, yigʻma temir-beton konstruksiyalar va yogʻochning qattiq turlaridan tayyorlangan parket, yoritish priborlari, sanfayans, poyandoz qoplamalarni yetkazib berish va sotishni taʼminlasinlar.

8. Oʻzbekiston Respublikasi Davlat mulki qoʻmitasi va Tashqi ishlar vazirligi bir oy muddatda xorijiy fuqaroligi boʻlgan jismoniy shaxslarga va Oʻzbekiston Respublikasi fuqarolariga ofislarni va uy-joylarni mulk qilib sotish yoki ijaraga berish tartibini va shartlarini ishlab chiqsinlar va koʻrib chiqish uchun Vazirlar Mahkamasiga kiritsinlar.

9. Oʻzbekiston Respublikasi Tashqi ishlar vazirligi respublikada roʻyxatga olingan xorijiy vakolatxonalar va firmalarning diplomatik va boshqa vositalari orqali respublika Hukumatining ushbu masala boʻyicha qarorini keng reklama qilsin hamda qayd etilgan obyektlarni qurishga yakka tartibdagi buyurtmalarni koʻpaytirish boʻyicha amaliy chora-tadbirlar koʻrsin.

10. Ushbu qarorning bajarilishini nazorat qilish Bosh vazirning oʻrinbosari K. N. Toʻlaganov zimmasiga yuklatilsin.