Respublikamizning iqlim sharoitlariga mos keladigan kam qavatli xizmat binolari va uy-joylarga boʻlgan ehtiyojlarning oʻsib borayotganligini hisobga olib Vazirlar Mahkamasi qaror qiladi:

1. “Toshkenttiklanish” davlat-kooperativ qurilish birlashmasi “Toshkentqurilish” davlat-aksionerlik qurilish korporatsiyasi ixtiyoriga berilsin va uning negizida tarkibiga ilovaga* muvofiq korxonalar va tashkilotlar kirgan “Toshxorijiyqurilish” davlat-aksionerlik qurilish birlashmasi tashkil etilsin.

“Toshkentqurilish” davlat korporatsiyasi, “Oʻzshartnomasavdo” davlat uyushmasi yangi tashkil etilgan “Toshxorijiyqurilish” birlashmasini yetishmagan zarur ishlab chiqarish boʻlinmalari bilan toʻldirishni, mashinalar, mexanizmlar va asbob-uskunalar bilan jihozlashni taʼminlasinlar.

2. Oʻzbekiston Respublikasi Davlat mulki qoʻmitasi “Toshkentqurilish” korporatsiyasi va “Toshxorijiyqurilish” birlashmasi bilan birgalikda 1993-1994-yillarda amaldagi qonun hujjatlariga binoan “Toshxorijiyqurilish” birlashmasi tarkibiy boʻlinmalarini ochiq turdagi aksionerlik jamiyatlariga aylantirish boʻyicha zarur tashkiliy chora-tadbirlarni amalga oshirsin. Aksiyalarning davlatga qarashli ulushi 51 foiz miqdorida belgilab qoʻyilsin.

3. Belgilab qoʻyilsinki, yangi tashkil etilgan “Toshxorijiyqurilish” birlashmasining boshligʻi “Toshkentqurilish” davlat korporatsiyasi raisining birinchi oʻrinbosari hisoblanadi. Qoʻshimcha ravishda “Toshkentqurilish” davlat korporatsiyasi raisining birinchi oʻrinbosari lavozimi joriy etilsin.

4. Oʻzbekiston Respublikasi Tashqi ishlar vazirligining Diplomatik servis xizmati, Oʻzbekiston Respublikasi yuridik shaxslari va Oʻzbekiston Respublikasi fuqarolari boʻlgan jismoniy shaxslarning buyurtmanomalari boʻyicha, shuningdek, birlashmaning oʻz mablagʻlari va bank kreditlari hisobidan mebellar bilan jihozlangan kam qavatli obyektlarni loyihalashtirish va foydalanishga tayyor holda qurish “Toshxorijiyqurilish” davlat-aksionerlik qurilish birlashmasiga yuklatilsin.

Mablagʻ bilan taʼminlovchi banklar Diplomatik servis xizmatiga ularning 1994-1995-yillardagi hisob-kitoblariga muvofiq miqdorlarda kredit resurslari bersinlar.

5. Oʻzbekiston Respublikasi Markaziy bankiga keyinchalik markazlashtirilgan tartibda “Toshkentqurilish” korporatsiyasining “Toshxorijiyqurilish” birlashmasiga aylanma mablagʻlarini koʻpaytirishga belgilangan tartibga muvofiq ikki yil muddatga berish uchun Moliya vazirligiga 2 mlrd soʻm miqdorida 5 foizli maqsadli kredit ajratish tavsiya etilsin.

“Toshxorijiyqurilish” birlashmasi uchun 1993-1994-yillarda daromad soligʻi stavkasi 12 foiz miqdorida belgilansin.

6. Toshkent shahar hokimligining yuqorida qayd etilgan maqsadlar uchun “Toshxorijiyqurilish” birlashmasiga yer maydonlari ularning sifatiga, qanday yerda joylashganligiga va muhandislik kommunikatsiyalari bilan taʼminlanganligiga bogʻliq ravishda toʻlovlarning tabaqalashtirilgan miqdorlari joriy etilishi hisobga olingan holda ajratilishi toʻgʻrisidagi takliflari qabul qilinsin.

7.“Oʻzqurilishmateriallari” konserni, “Oʻzmetallkonsern”, “Toshkentqurilish”, “Oʻzsanoatxoʻjalikqurilish” davlat korporatsiyalari, “Oʻzboshyogʻochqurilish” boshqarmasi, “Oʻzshartnomasavdo”, “Oʻzbeksavdo” davlat uyushmalari texnik hujjatlarga muvofiq birlashmaga oʻz nomenklaturalariga birkitilgan metall prokati va trubalarni, yuqori sifatli materiallar, yigʻma temir-beton konstruksiyalar va yogʻochning qattiq turlaridan tayyorlangan parket, yoritish priborlari, sanfayans, poyandoz qoplamalarni yetkazib berish va sotishni taʼminlasinlar.

8. “Toshxorijiyqurilish” birlashmasiga birlashmaning oʻz mablagʻlari va bank kreditlari hisobidan qurilgan kottejlarni koʻchmas mulk birjasida sotishga yoki Oʻzbekiston fuqarolariga, xorijiy yuridik va jismoniy shaxslarga ijaraga berishga ruxsat berilsin. Bunday hollarda uy-joylar jismoniy shaxslarga ularning mavjud uy-joy sharoitlaridan qatʼi nazar sotiladi.

9. Oʻzbekiston Respublikasi Tashqi ishlar vazirligi respublikada roʻyxatga olingan xorijiy vakolatxonalar va firmalarning diplomatik va boshqa vositalari orqali respublika Hukumatining ushbu masala boʻyicha qarorini keng reklama qilsin hamda qayd etilgan obyektlarni qurishga yakka tartibdagi buyurtmalarni koʻpaytirish boʻyicha amaliy chora-tadbirlar koʻrsin.

10. Ushbu qarorning bajarilishini nazorat qilish Bosh vazirning oʻrinbosari K. N. Toʻlaganov zimmasiga yuklatilsin.