O‘zbekiston Respublikasi “Sug‘urta faoliyati to‘g‘risida”gi Qonunning 10-moddasi va O‘zbekiston Respublikasi Vazirlar Mahkamasining 1998-yil 8-iyuldagi 286-sonli “Sug‘urta faoliyatini davlat tomonidan tartibga solish chora-tadbirlari to‘g‘risida”gi qarorning 3-bandiga muvofiq buyuraman:

1. Ilova qilingan Sug‘urtalovchining ijro etuvchi organi rahbariga va bosh buxgalteriga qo‘yiladigan malaka talablari to‘g‘risidagi nizom tasdiqlansin.

2. Ushbu buyruq O‘zbekiston Respublikasi Adliya vazirligida davlat ro‘yxatiga olingan kundan o‘n kun o‘tgach kuchga kiritilsin.

Mazkur Nizom O‘zbekiston Respublikasi “Sug‘urta faoliyati to‘g‘risida”gi Qonunning 10-moddasi va O‘zbekiston Respublikasi Vazirlar Mahkamasining 1998-yil 8-iyuldagi 286-sonli “Sug‘urta faoliyatini davlat tomonidan tartibga solish chora-tadbirlari to‘g‘risida”gi qarorining 3-bandiga muvofiq ishlab chiqilgan va sug‘urtalovchining ijro etuvchi organi rahbarlariga va bosh buxgalterlariga qo‘yiladigan malaka talablarini belgilaydi.

Mazkur Nizom O‘zbekiston Respublikasi Hukumati qarori bilan tayinlangan sug‘urtalovchining ijro etuvchi organi rahbarlariga tadbiq etilmaydi.

1. Mazkur Nizom maqsadini amalga oshirishda quyidagi tushunchalar qo‘llaniladi:

sug‘urtalovchining ijro etuvchi organi rahbari — qonunchilik va sug‘urtalovchining ta’sis hujjatlariga muvofiq tayinlanishi yoki saylanishi natijasida, tuzilgan mehnat shartnomasiga asosan sug‘urtalovchining yagona ijro etuvchi organi bo‘lib hisoblanadigan yoki sug‘urtalovchining kollegial ijro etuvchi organi ustidan boshqaradigan jismoniy shaxs;

sug‘urtalovchining bosh buxgalteri — sug‘urtalovchining buxgalteriya hisoboti va moliyaviy boshqaruvi funksiyasini amalga oshiruvchi, buxgalteriya hisobotini tashkillashtirishni hamda moddiy va moliyaviy resurslarni maqsadga muvofiq, tejamkorlik bilan ishlatilishini nazorat qilishni ta’minlaydigan shaxs;

Davsug‘urtanazorat — O‘zbekiston Respublikasi Moliya vazirligi huzuridagi sug‘urta nazorati davlat inspeksiyasi.

2. Sug‘urtalovchining ijro etuvchi organi rahbari yoki bosh buxgalteri lavozimiga saylangan yoki tayinlangan vaqtdan boshlab 10 ish kuni mobaynida sug‘urtalovchi bu haqda to‘ldirgan anketa (mazkur Nizomga ilova)ni ilova qilgan holda Davsug‘urtanazoratni xabardor qilishga majbur.

3. Sug‘urtalovchining ijro etuvchi organi rahbari quyidagi talablarga javob berishi shart:

oliy ma’lumotga ega bo‘lishi;

sug‘urta sohasida 2 yildan kam bo‘lmagan ish stajiga ega bo‘lishi, shundan sug‘urta sohasida bir yillik ish staji ushbu lavozimga tayinlanish yoki saylanishdan oldin kelishi kerak;

4. Sug‘urtalovchining ijro etuvchi organi rahbari etib, rahbar tomonidan amalga oshirilgan harakatlar yuridik shaxsni bankrotlikka yoki uni majburiy tugatish to‘g‘risida qaror chiqarilishiga olib kelganligi bo‘yicha ma’lumotlar mavjud bo‘lgan hollarda, bankrot deb topilgan yoki uni majburiy tugatish to‘g‘risida qaror qabul qilingan paytgacha bir yildan ortiq bo‘lmagan davr mobaynida har qanday yuridik shaxsning rahbari (birinchi shaxs) bo‘lib hisoblangan shaxs sug‘urtalovchining ijro etuvchi organi rahbari lavozimiga tayinlanishi yoki saylanishi mumkin emas.

5. Sug‘urtalovchining bosh buxgalteri quyidagi talablarga javob berishi shart:

oliy kasbiy (buxgalterlik, moliyaviy, iqtisodiy) ma’lumotga ega bo‘lishi;

2 yildan kam bo‘lmagan buxgalter ish stajiga ega bo‘lishi.

6. Istisno hollarida sug‘urtalovchining bosh buxgalteri lavozimiga oliy kasbiy (buxgalterlik, moliyaviy, iqtisodiy) ma’lumotga ega bo‘lmagan shaxs, 5 yildan kam bo‘lmagan moliyaviy, buxgalterlik ish staji mavjud bo‘lishi sharti bilan tayinlanishi mumkin.

7. Agar sug‘urtalovchining ijro etuvchi organi rahbari yoki uning bosh buxgalteri taqdim qilingan hujjatlar bo‘yicha o‘rnatilgan malaka talablariga mos kelmasa, Davsug‘urtanazorat sug‘urtalovchiga ko‘rsatma olingan paytdan boshlab bir oy muddat ichida kamchiliklarni bartaraf etish to‘g‘risida ko‘rsatma beradi.

8. Davsug‘urtanazorat ko‘rsatmasida ko‘rsatilgan kamchiliklar sug‘urtalovchi tomonidan bartaraf etilmagan taqdirda, Davsug‘urtanazorat ushbu sug‘urtalovchiga O‘zbekiston Respublikasining qonunchiligiga muvofiq choralar ko‘radi.

10. Mazkur Nizomdan kelib chiqqan nizolar O‘zbekiston Respublikasi qonunchiligida o‘rnatilgan tartibda hal etiladi.

Anketa shaxsning o‘z qo‘li bilan, tushunarli dastxatda, siyoh yoki qora, ko‘k, binafsha rangli sharikli ruchka pastasida to‘ldirilishi kerak. Hamma sanalar arab raqamida yozilishi shart.

Anketaning hamma savollariga to‘liq va aniq javoblar berilishi hamda anketaning biror qismi to‘ldirilmasdan qolmasligi shart. Hech bo‘lmasa to‘ldirilmay qolgan biror bir qismining mavjudligi, anketaning to‘liq to‘ldirilmaganligini anglatadi va u sug‘urtalovchiga qayta ishlash uchun qaytariladi. Zarur bo‘lganda to‘liq ma’lumot keltirish uchun anketaga qo‘shimcha varaqlar ilova qilinishi mumkin.