Butunjahon pochta konvensiyasi, yozma xat-xabarlar Reglamenti, O‘zbekiston Respublikasi “Pochta aloqasi to‘g‘risida”gi Qonuni, O‘zbekiston Respublikasi Vazirlar Mahkamasining 2004-yil 7-maydagi “O‘zbekiston aloqa va axborotlashtirish agentligi faoliyatini takomillashtirish chora-tadbirlari to‘g‘risida”gi 215-son qarori bilan tasdiqlangan “O‘zbekiston aloqa va axborotlashtirish agentligi to‘g‘risidagi nizom”ga va 2004-yil 19-iyuldagi “Pochta aloqasi sohasidagi faoliyatni takomillashtirish to‘g‘risida”gi 339-son qaroriga muvofiq, shuningdek, “O‘zbekiston Respublikasi pochta to‘lovining davlat belgilari va maxsus xotira tamg‘alari to‘g‘risidagi nizom”ni amalga kiritish, shuningdek, pochta markalarining mavzuga oid rejalari nominali, adadi, markalangan pochta konvertlari va kartochkalarini jumladan ularni original markalar bilan ishlab chiqarishni, muomalaga kiritish va muomaladan chiqarish, pochta markalariga buyurtma berish, tarqatish va sotish, maxsus xotira tamg‘alarini qo‘llash va muomalaga kiritishni shakllantirishning umumiy prinsiplarini aniqlash maqsadida, buyuraman:

1. “O‘zbekiston Respublikasi pochta to‘lovining davlat belgilari va maxsus xotira tamg‘alari to‘g‘risidagi nizom” ilovaga* muvofiq tasdiqlansin.

2. Agentlikning Pochta texnologiyalari va xizmatlari bo‘limi (Bajanova) Agentlikda tasdiqlangan “O‘zbekiston Respublikasi pochta to‘lovining davlat belgilari va maxsus xotira tamg‘alari to‘g‘risidagi nizom”ni o‘rnatilgan tartibda O‘zbekiston Respublikasi Adliya vazirligida davlat ro‘yxatidan o‘tkazilishini ta’minlasin.

3. Mazkur Nizom O‘zbekiston Respublikasi Adliya vazirligida davlat ro‘yxatidan o‘tkazilgan vaqtdan o‘n kun o‘tgandan keyin amalga kiritilsin.

4. Mazkur Nizom amalga kiritilishi bilan O‘zbekiston Respublikasi Aloqa vazirligining 1995-yil 27-dekabrdagi 292-son buyrug‘i bilan tasdiqlangan “O‘zbekiston Respublikasi pochta to‘lovining davlat belgilari, radiomarkalar va maxsus pochta tamg‘alari to‘g‘risidagi nizom” o‘z kuchini yo‘qotgan deb hisoblansin (1995-yil 22-dekabr, ro‘yxat raqami 202).

5. Ushbu buyruqning ijrosini nazorat qilish Agentlik Bosh direktorining o‘rinbosari A.A. Xodjayev zimmasiga yuklansin.