Ўзбекистон Республикаси Президентининг «Қуйи бўғинда сув ресурсларини бошқариш тизимини такомиллаштириш ҳамда сув ресурсларидан фойдаланиш самарадорлигини ошириш чора-тадбирлари тўғрисида» 2024 йил 5 январдаги ПҚ-5-сон қарори ижросини таъминлаш мақсадида, Ўзбекистон Республикаси «Маҳаллий давлат ҳокимияти тўгрисида»ги Қонуннинг 6 ва 24-моддаларига асосан халқ депутатлари туман Кенгаши қарор қилади:

1. Қамаши тумани «Сув етказиб бериш хизмати» давлат муассасаси директори А. Эшқобиловнинг 2026 йил 17 февралдаги 27-сонли хати маълумот учун қабул қилинсин.

2. Қамаши туманидаги фермер хўжаликларига ва бошқа сувдан фойдаланувчиларга 2025 йил суғориш мавсуми учун ажратилган сув лимити иловага мувофиқ қайта тасдиқлансин.

3. Қамаши тумани ҳокимининг ўринбосари Ҳ. Азизов ҳамда туман «Сув етказиб бериш хизмати» давлат муассасаси (Эшқобилов)га:

белгиланган лимитлар асосида истеъмолчиларга сув етказиб бериш;

ўзига бириктирилган ҳудудда сувнинг ҳисоби ва ҳисоботини юритиш;

суғориш тармоқлари ва улардаги гидротехник иншоотларни соз ҳолатда сақлаш, таъмирлаш - тиклаш тадбирларини амалга ошириш;

сув олиш жойларини сувни бошқариш ва ҳисобга олиш воситалари билан жиҳозлаш, сув мониторинги, ҳисоби ва ҳисоботи юритилишини рақамлаштириш;

истеъмолчилар кесимида истеъмол қилинган сув ҳажми тўғрисидаги маълумотларни солиқ органларига тақдим этиб бориш;

амалга оширилган ишлар юзасидан халқ депутатлари туман Кенгашига ҳисобот бериб бориш вазифаси юклатилсин.

4. Мазкур қарор қабул қилиниши муносабати билан халқ депутатлари Қамаши тумани Кенгашининг 2025 йил 12 ноябрдаги VII-13-90-4-58-K/25-сонли қарори ўз кучини йўқотган деб ҳисоблансин.

5. Қарорнинг ижросини назорат қилиш туман ҳокимининг ўринбосари Ҳ. Азизов ҳамда халқ депутатлари туман Кенгашининг Аграр, сув хўжалиги ва экология масалалари бўйича доимий комиссияси (Мирзаев) зиммасига юклатилсин.