«Ўзбекистон Республикаси Олий Мажлисининг Сенати тўғрисида»ги Конституциявий Қонуннинг 16-моддаси ва «Ўзбекистон Республикаси Олий Мажлиси Сенатининг Регламенти тўғрисида»ги Қонуннинг 6-моддасига асосан Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Олий Мажлиси Сенати Кенгашининг 2026 йил 12 мартдаги КҚ-325-V-сонли Қарори билан тасдиқланган Қорақалпоғистон Республикаси республика бюджетининг, вилоятлар вилоят бюджетларининг, Тошкент шаҳри шаҳар бюджетининг, туманлар ва шаҳарлар бюджетларининг қўшимча манбаларини аниқлаш ва улардан фойдаланиш тартиби тўғрисидаги намунавий низомга иловага мувофиқ ўзгартириш ва қўшимчалар киритилсин.

2. Мазкур Қарорнинг ижросини назорат қилиш Ўзбекистон Республикаси Олий Мажлиси Сенатининг Бюджет ва иқтисодий масалалар қўмитаси раиси Э. Гадоев зиммасига юклансин.

3. Ушбу Қарор қабул қилинган кундан эътиборан кучга киради.

Ўзбекистон Республикаси Олий Мажлиси Сенати Кенгашининг 2026 йил 12 мартдаги КҚ-325-V-сонли Қарори билан тасдиқланган Қорақалпоғистон Республикаси республика бюджетининг, вилоятлар вилоят бюджетларининг, Тошкент шаҳри шаҳар бюджетининг, туманлар ва шаҳарлар бюджетларининг қўшимча манбаларини аниқлаш ва улардан фойдаланиш тартиби тўғрисидаги намунавий низомга қуйидаги ўзгартириш ва қўшимчалар киритилсин:

1) 3-банди:

тўртинчи хатбошиси қуйидаги таҳрирда баён этилсин:

«Қорақалпоғистон Республикаси республика бюджетининг, вилоятлар вилоят бюджетларининг, Тошкент шаҳри шаҳар бюджети, туманлар ва шаҳарлар бюджетларининг электрон савдо майдончасида ер участкаларига бўлган ҳуқуқларни сотишдан, шунингдек, қишлоқ хўжалигига мўлжалланган ер участкаларига бўлган ижара ҳуқуқини электрон онлайн аукцион савдолари орқали сотишдан тушган маблағлари»;

бешинчи хатбошисидаги «тушумлар» деган сўз «маблағлар» деган сўз билан алмаштирилсин.

2) 10-банди қуйидаги таҳрирда баён этилсин:

«Қорақалпоғистон Республикаси республика бюджетининг, вилоятлар вилоят бюджетларининг, Тошкент шаҳри шаҳар бюджетининг, туманлар ва шаҳарлар бюджетларининг қўшимча манбалари ҳисобидан маблағлар йўналтириш бўйича Қорақалпоғистон Республикаси Жўқорғи Кенгеси, халқ депутатлари вилоятлар, Тошкент шаҳри, туманлар ва шаҳарлар Кенгашлари қарорларининг намунавий шакли 5-иловага мувофиқ тасдиқлансин.

Қорақалпоғистон Республикаси республика бюджетининг, вилоятлар вилоят бюджетларининг, Тошкент шаҳри шаҳар бюджетининг, туманлар ва шаҳарлар бюджетларининг қўшимча манбалари ҳисобидан маблағлар йўналтириш бўйича Қорақалпоғистон Республикаси Жўқорғи Кенгеси, халқ депутатлари вилоятлар, Тошкент шаҳри, туманлар ва шаҳарлар Кенгашлари қарорларида қуйидагилар кўрсатилади:

қарорнинг номи;

муқаддима (қарорнинг Ўзбекистон Республикаси Бюджет кодекси, «Маҳаллий давлат ҳокимияти тўғрисида»ги Ўзбекистон Республикаси Қонуни ва халқ депутатлари маҳаллий Кенгашининг Ўзбекистон Республикаси Олий Мажлиси Сенати Кенгашининг ушбу Қароридан келиб чиқиб қабул қилган қарорига (қарор санаси, номи ва рақами кўрсатилади) мувофиқ қабул қилинаётганлиги);

маблағ ажратиш тўғрисидаги таклиф жамоатчилик муҳокамасига қўйилган муддат ва унинг ID рақами;

маблағ ажратиш тўғрисидаги таклиф юзасидан умумлаштирувчи комиссиянинг хулосаси (хулоса рақами, қабул қилинган санаси ва қисқача мазмуни);

қарор қисмида:

тегишинча Қорақалпоғистон Республикаси Вазирлар Кенгашининг, вилоятлар, Тошкент шаҳар, туманлар ва шаҳарлар ҳокимликларининг тегишли бюджет қўшимча манбаларидан маблағ ажратиш тўғрисидаги таклифи;

маҳаллий бюджетнинг қўшимча манбаси тури ёки турлари (бунда маҳаллий бюджетнинг қўшимча манбаларининг ҳар бир туридан ажратиладиган маблағларни олувчилар, тадбирлар номи, асоси ва ажратиладиган маблағ миқдори қарорга иловаларда кўрсатилади);

қарор билан маблағ йўналтирилаётган масъул ташкилотларга ажратилган маблағлар доирасида белгиланган тартибда тўловларни амалга ошириш, ушбу маблағлардан тўғри, мақсадли ва самарали фойдаланиш юзасидан вазифа;

иқтисодиёт ва молия бош бошқармасига (бўлимига) бюджет харажатларига белгиланган тартибда ўзгартиришлар киритиш (бундан Ўзбекистон Республикаси Бюджет кодекси 143-моддаси учинчи қисмига мувофиқ бюджет харажатларига ўзгартириш киритилмайдиган ҳоллар мустасно) юзасидан, ғазначилик органларига тўловларни ўз вақтида амалга ошириш юзасидан вазифа;

қарорнинг ижросини назорат қилиш учун халқ депутатлари маҳаллий Кенгашининг масъул бўлган доимий комиссияси»;

3) 5-илованинг 4-банди қуйидаги таҳрирда баён этилсин:

«Мазкур қарор ижросининг назорати халқ депутатлари __________ Кенгашининг Маҳаллий бюджет, иқтисодий ислоҳотларни амалга ошириш, инвестициялар ва тадбиркорликни ривожлантириш масалалари бўйича доимий комиссияси зиммасига юклатилсин».