Ўзбекистон Республикаси Ҳукумати ва Сербия Республикаси Ҳукумати (кейинги ўринларда алоҳида «Иштирокчи» ва биргаликда «Иштирокчилар» деб аталувчилар),

Иштирокчиларнинг барқарор, хавфсиз ва диверсификацияланган транспорт ва рақамли боғлиқлик тармоқларини мустаҳкамлашга бўлган умумий манфаатдорлигини эътироф этиб;

таъминот занжири ишончлилигини ошириш ва барқарор иқтисодий ўсишни қўллаб-қувватлаш учун муқобил Евросиё савдо йўлларининг муҳимлигини тан олиб;

Сербия Республикасининг Жануби-Шарқий Европа транспорт коридорларини Марказий ва Ғарбий Европа бозорлари билан боғловчи Ғарбий Болқондаги транспорт ва логистика маркази сифатидаги ролини эътироф этиб;

Ўзбекистоннинг Марказий Осиёдаги транзит маркази сифатидаги стратегик роли ва унинг Шарқий Осиё ҳамда Марказий Осиёни Жанубий Кавказ, Туркия ва Европа бозорлари билан боғловчи Транскаспий халқаро транспорт йўналиши (кейинги ўринларда «Ўрта коридор» деб аталувчи) бўйлаб жойлашувини, шунингдек, Ўзбекистоннинг коридорни қўллаб-қувватлаш мақсадида инфратузилмани модернизация қилиш бўйича улкан режаларини, шу жумладан, унинг Жануби-Шарқий Европа томон давомий боғлиқлигини инобатга олиб;

Сербия Республикасининг Ўрта коридор ва Жануби-Шарқий Европа бозорлари ўртасида самарали, тижорат жиҳатдан мақсадга мувофиқ ва экологик жиҳатдан барқарор боғлиқликни рағбатлантиришга бўлган қизиқишини қайд этиб;

савдога кўмаклашиш, хусусий секторнинг жалб этилиши ва лойиҳага асосланган ҳамкорликни қўллаб-қувватловчи мослашувчан ва амалий ҳамкорлик асосини яратиш истагида;

қуйидагилар тўғрисида ўзаро англашувга эришдилар:

Мазкур Англашув Меморандумининг мақсади Ўрта коридорни ривожлантиришда Иштирокчилар ўртасидаги ҳамкорлик учун ҳуқуқий жиҳатдан мажбурий бўлмаган асос яратишдан иборат бўлиб, у қуйидагиларга қаратилган ҳисобланади:

(а) Ўзбекистон Республикаси, Сербия Республикаси ҳамда Евросиё ва Жануби-Шарқий Европанинг кенгроқ бозорлари ўртасидаги савдо ва инвестиция алоқаларини мустаҳкамлаш;

(б) Ўрта коридорнинг ривожланиши ва операцион самарадорлигини қўллаб-қувватлаш; ҳамда

(с) инновация, барқарорлик ва хусусий сектор иштирокини рағбатлантириш.

Мазкур Меморандум доирасидаги ҳамкорлик қуйидаги йўналишларни ўз ичига олиши мумкин, аммо улар билан чекланмайди:

1. Ўрта коридор ва Евросиёнинг боғлиқлиги

(а) Ўрта коридорнинг самарадорлиги, ишончлилиги ва тижорий жозибадорлигини оширишга қаратилган сиёсий ва амалий ташаббусларни қўллаб-қувватлаш;

(б) муаммоли нуқталарни бартараф этиш учун устуворликларни уйғунлаштириш мақсадидабилан янада самарали минтақавий мувофиқлаштирувни тегишли минтақавий ва халқаро боғлиқлик ташаббуслари билан биргаликда кучайтириш.

2. Инвестиция ва хусусий секторнинг жалб этилиши

(а) Иштирокчиларнинг давлат муассасалари ва хусусий сектор субъектлари, шу жумладан, аммо улар билан чекланмаган ҳолда, технология, дизайн/архитектура, қурилиш ва молия соҳаларида фаолият юритувчи компаниялар ўртасидаги ҳамкорликка хусусий субъектларнинг инвестиция қарорлари ҳукуматлар томонидан йўналтирилиши мумкин эмаслигини эътироф этган ҳолда кўмаклашиш;

(б) ҳар икки мамлакат компанияларининг инфратузилмани модернизация қилишни ривожлантиришда иштирок этишига кўмаклашиш;

(с) транспорт инфратузилмаси, логистика хизматлари ва рақамли платформаларга инвестиция киритиш имкониятларини рағбатлантириш;

(д) Ўрта коридор инфратузилмасини ривожлантириш билан боғлиқ харидлар жараёнларининг шаффофлиги ва рақобатбардошлигини ошириш, шу жумладан, Ўзбекистоннинг Инфратузилма шаффофлиги ташаббуси (СоСТ) билан ҳамкорлигини қўллаб-қувватлаш.

3. Барқарорлик ва кам углеродли транспорт

(а) хавфларни камайтириш ва тўлиқ ҳаётий цикл давомида олинадиган фойдаларни таъминлаш учун транспорт инфратузилмасини иқлим муаммоларига мослаштириш;

(б) барча тегишли халқаро экологик ва ижтимоий стандартларга мувофиқлаштиришни рағбатлантириш, хавфсизлик ва молиявий жиҳатдан мақбулликни таъминлаш ҳамда барча учун мобиллик имкониятидан тенг ҳуқуқли фойдаланишни таъминлаш;

(с) нол эмиссия йўналишлари сари изчил тараққиётни таъминлаш учун бевосита Миллий миқёсда белгиланадиган ҳиссалар билан боғлаган ҳолда, иссиқхона газлари чиқарилиши ва атроф-муҳитга таъсирни минималлаштирадиган транспорт турлари ва ёқилғиларига ўтишни қўллаб-қувватлаш.

4. Салоҳиятни ошириш ва билим алмашинуви

(а) Ўрта коридор ва транспорт/инфратузилмани Ўзбекистон Республикаси ва Сербия Республикаси ўртасидаги Иқтисодий ҳамкорлик бўйича ҳукуматлараро комиссия кун тартибининг доимий масаласи сифатида киритиш;

(б) Иштирокчилар ўртасида келишилган ҳолларда транспортни бошқариш, божхона жараёнларини соддалаштириш, энергия самарадорлиги, экологик стандартлар, санкцияларни четлаб ўтишнинг олдини олиш ҳамда товар ва хизматлар ҳаракатига кўмаклашишни қамраб олган ҳолда экспертлар алмашинуви, илғор тажриба алмашинуви, ўқув тадбирлари ва ўрганув ташрифларига кўмаклашиш.

1. Иштирокчилар мазкур Меморандум доирасидаги фаолиятни мувофиқлаштириш учун ваколатли органлар ёки алоқа нуқталарини белгилайдилар.

2. Ўзаро келишув асосида, ҳамкорлик қўшма ишчи гуруҳлар, лойиҳа келишувлари, техник ҳамкорлик дастурлари ёки ишбилармонлик ҳамкорлиги платформалари орқали амалга оширилиши мумкин.

1. Мазкур Меморандум халқаро ёки миллий ҳуқуққа мувофиқ ҳуқуқ ёки мажбуриятлар юзага келтиришни назарда тутмайди.

2. Мазкур Меморандум доирасида амалга ошириладиган фаолият ҳар бир Иштирокчи давлатининг амалдаги қонунлари ва норматив-ҳуқуқий ҳужжатларига мувофиқ олиб борилади.

1. Мазкур Меморандум ҳеч бир Иштирокчи учун молиявий мажбуриятлар юзага келтирмайди.

2. Мазкур модданинг 1-бандида кўрсатилганидан қатъи назар, башарти мазкур Меморандум доирасидаги фаолият билан боғлиқ ҳар қандай молиявий мажбуриятлар юзага келса, бундай мажбуриятлар маблағлар мавжудлигига ва алоҳида ёзма келишувларга боғлиқ бўлади.

Тегишли ҳолларда Иштирокчилар мазкур Меморандум доирасида алмашилган махфий ёки хизмат доирасида фойдаланиладиган ахборотни ўз давлатларининг қонунлари ва сиёсатига мувофиқ ҳимоя қилиш учун тегишли чоралар кўрадилар.

Мазкур Меморандумни талқин қилиш ёки амалга оширишдан келиб чиқадиган ҳар қандай келишмовчиликлар Иштирокчилар ўртасида маслаҳатлашувлар ва мулоқот орқали ҳал этилади.

Мазкур Меморандумга Иштирокчиларнинг ўзаро ёзма розилиги билан исталган вақтда ўзгартиришлар киритилиши мумкин.

1. Мазкур Меморандум имзоланган санадан бошлаб амал қилади.

2. У беш (5) йил муддат давомида амалда бўлади ва Иштирокчиларнинг ўзаро ёзма розилиги билан узайтирилиши мумкин.

3. Ҳар қайси Иштирокчи дипломатик каналлар орқали ёзма хабарнома юбориш орқали мазкур Меморандумни тўхтатиши мумкин. Тўхтатилиш, башарти бошқача тарзда келишилмаган бўлса, амалга оширилаётган ҳамкорлик фаолиятларига дахл қилмайди.

Белград шаҳрида, 2026 йил 8 сентябрда, икки нусхада, ўзбек, серб ва инглиз тилларида имзоланди, бунда барча матнлар тенг аутентикдир. Талқин қилишда ҳар қандай тафовут юзага келган тақдирда, инглиз тилидаги матн устувор ҳисобланади.