Fuqarolarning konstitutsion huquqlari va manfaatlari himoya qilinishini taʼminlash, pensiyalarni, nafaqalarni, stipendiyalarni, budjet mablagʻidan pul bilan taʼminlanadigan korxonalar va tashkilotlar xodimlariga ish haqini oʻz vaqtida toʻlash maqsadida, shuningdek Oʻzbekiston Respublikasi Konstitutsion sudining “Korxonalar hisob raqamidan pul mablagʻlarini chiqarish navbatini tartibga soladigan qonunchilikni takomillashtirish toʻgʻrisida”gi 1998-yil 16-yanvardagi qaroriga hamda Oʻzbekiston Respublikasi Oliy Majlisi Kengashining 1998-yil 20-yanvardagi 568-I-sonli qaroriga muvofiq:

1. 1998-yil 1-fevraldan xoʻjalik yurituvchi subyektlarning hisob raqamidan pul mablagʻlarini chiqarishning quyidagi tartibi belgilansin.

Hisob raqamida unga qoʻyiladigan barcha talablarni qondirish uchun yetarli miqdorda pul mablagʻi boʻlsa, bu mablagʻ mijozning farmoyishi va boshqa hujjatlarning tushishi tartibiga (qaysi biri oldin tushganiga) qarab hisobdan chiqariladi.

Hisob raqamidagi pul mablagʻi unga qoʻyiladigan barcha talablarni qondirish uchun yetarli boʻlmasa, xoʻjalik yurituvchi subyektlarning banklardagi hisob raqamlaridan pul mablagʻi birinchi navbatda budjetga, budjetdan tashqari jamgʻarmalarga toʻlovlarni hamda ish haqini toʻlashga pul mablagʻi berishni koʻzda tutgan toʻlov (ijro) hujjatlariga mutanosib ravishda xoʻjalik yurituvchi subyektlarning budjetga toʻlovlar hamda mehnat huquqiy munosabatlaridan kelib chiqadigan talablar boʻyicha majburiyatlarini baravar taʼminlaydigan darajada hisobdan chiqariladi.

Bevosita ishlab chiqarish faoliyati bilan bogʻliq kechiktirib boʻlmaydigan ehtiyojlariga pul mablagʻlarini qonunchilikda belgilangan miqdorda hisobdan chiqarish kalendardan tashqari navbatda amalga oshiriladi.

Markaziy bank va Moliya vazirligi Oʻzbekiston Respublikasi Adliya vazirligi bilan birgalikda bir haftalik muddatda xoʻjalik yurituvchi subyektlarning banklardagi hisob raqamidan pul mablagʻini chiqarish tartibi toʻgʻrisidagi yoʻriqnomani ishlab chiqsin va tasdiqlasin.

2. Davlat boshqaruv organlari mansabdor shaxslarining moliya, soliq, bojxona va bank muassasalari ishiga xoʻjalik yurituvchi subyektlarning hisob raqamlaridagi pul mablagʻlarini hisobdan chiqarishda belgilangan tartibni buzishga olib keladigan aralashuvi taqiqlansin.

Belgilab qoʻyilsinki, ushbu Farmonning 1-bandida keltirilgan mablagʻni hisobdan chiqarish tartibini buzishda aybdor boʻlgan shaxslarga nisbatan qonunga muvofiq qattiq maʼmuriy va jinoiy javobgarlik choralari koʻriladi.

3. Toʻlovlarning davlat budjeti daromadlariga oʻz vaqtida oʻtkazilishi va budjetning daromad qismi boʻyicha operatsiyalarning bajarilishi, shuningdek xoʻjalik yurituvchi subyektlarning banklardagi hisob daftarlaridan mablagʻni chiqarishning belgilangan tartibiga rioya etilishi uchun shaxsiy javobgarlik tijorat banklari muassasalari va markaziy bank bosh boshqarmalari hisob-kitob-kassa markazlari rahbarlari hamda bosh buxgalterlari zimmasiga yuklansin.

4. Daromad mablagʻlaridan soliqlar va boshqa toʻlovlarning tushishi va qarzlarning kamayishi boʻyicha belgilangan koʻrsatkichlarning bajarilishi uchun soliq, moliya va bank organlari rahbarlari hamda mansabdor shaxslarni ragʻbatlantirish va ularning moddiy javobgarligi tizimi joriy etilsin.

Budjetga toʻlovlarning tushishi hamda budjetga toʻlovlar boʻyicha qarzlarning kamaytirilishiga doir belgilangan koʻrsatkichlarning bajarilishi uchun rahbarlar va mansabdor shaxslarni ragʻbatlantirish va ularning moddiy javobgarligi toʻgʻrisidagi nizom tasdiqlansin.

Soliq va toʻlov intizomini mustahkamlash boʻyicha hukumat komissiyasiga zarur boʻlgan taqdirda unga oʻzgarishlar va qoʻshimchalar kiritish huquqi berilsin.

5. Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi yilning har choragi yakunlari boʻyicha hisobot choragidan keyingi oyning 15-kunidan kechiktirmay budjetga taalluqli barcha soliqlar va toʻlovlar toʻliq tushishiga doir ishlarning ahvolini, hududlar boʻyicha qarzlarning kamaytirilishini koʻrib chiqib, soliq, moliya va bank organlari rahbarlari hamda mansabdor shaxslarini ragʻbatlantirish va ularning moddiy javobgarligi toʻgʻrisidagi takliflarini Oʻzbekiston Respublikasi Vazirlar Mahkamasiga taqdim etsin.

6. Oʻzbekiston Respublikasi Moliya vazirligi va Davlat soliq qoʻmitasi korxonalar va tashkilotlarning budjetga toʻlovlar boʻyicha 1998-yil 1-yanvargacha qolgan qarzlar tuzilmasini oʻzgartirishga doir takliflarni bir oy muddatda soliq va toʻlov intizomini mustahkamlash boʻyicha hukumat komissiyasiga taqdim etsin.

7. Adliya vazirligi va Moliya vazirligi Oʻzbekiston Respublikasi Markaziy banki, boshqa manfaatdor vazirliklar va idoralar bilan birgalikda ikki hafta muddatda:

idoralarning amaldagi meʼyoriy hujjatlari va yoʻriqnomalarini ushbu Farmon talablariga muvofiqlashtirsin;

amaldagi qonunlarga ushbu Farmondan kelib chiqadigan oʻzgartishlar va qoʻshimchalarni kiritishga doir takliflarni tayyorlasin va taqdim etsin.

8. Ushbu Farmonning bajarilishini nazorat qilish Oʻzbekiston Respublikasi Bosh vazirining oʻrinbosari B. Hamidov zimmasiga yuklansin.

1. Respublika mintaqalarida manbalar boʻyicha budjetga daromadlar tushishining hamda budjetga toʻlovlar boʻyicha qarzlarning miqdorlarini kamaytirish yuzasidan belgilangan koʻrsatkichlarning sifatli bajarilishi uchun ragʻbatlantirish va moddiy javobgarlik tizimi:

Oʻzbekiston Respublikasi Davlat soliq qoʻmitasining Raisi va uning oʻrinbosarlari, Qoraqalpogʻiston Respublikasi, viloyatlar, shaharlar va tumanlar soliq xizmati organlarining boshliqlari va ularning oʻrinbosarlari;

Qoraqalpogʻiston Respublikasi Moliya vaziri, viloyat, shahar va tuman moliya boshqarmalarining boshliqlari hamda ularning budjet daromad qismining ijrosi uchun masʼul boʻlgan oʻrinbosarlari;

Budjetga toʻlovlar boʻyicha operatsiyalarni oʻz vaqtida oʻtkazish masalalari uchun javobgar boʻlgan tijorat banklari muassasalarining bosh buxgalterlari va ularning oʻrinbosarlari hamda Markaziy bank bosh boshqarmalari hisob-kitob-kassa markazlarining direktorlari va bosh buxgalterlari uchun belgilanadi.

2. Rahbarlar va mansabdor shaxslarni mukofotlash toʻgʻrisidagi qarorni qabul qilish chogʻida quyidagilar asosiy mezon hisoblanadi:

umuman hudud boʻyicha budjetga toʻlovlar tushishi yuzasidan belgilangan koʻrsatkichlar bajarilishini taʼminlash;

har chorakning birinchi kuniga nisbatan budjetga toʻlovlar boʻyicha qarzlarning miqdorini kamaytirish.

3. Rahbarlar va mansabdor shaxslarga jarima solish toʻgʻrisidagi qarorni qabul qilish chogʻida quyidagilar mezon boʻladi:

umuman hudud boʻyicha budjetga toʻlovlar tushishi yuzasidan belgilangan koʻrsatkichlarning bajarilishini taʼminlamaslik;

budjetga toʻlovlar boʻyicha qarzlarning jami miqdori belgilab qoʻyilgan yuqori darajadan oshib ketishi. Qarzlar boʻyicha eng yuqori miqdor toʻlovlarning tegishli davrda (ortib boruvchi yakunga koʻra) amaldagi tushumining 10 foizi miqdorida belgilanadi;

hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi tomonidan aniqlangan ayrim manbalar boʻyicha tushumlarning belgilangan koʻrsatkichlari bajarilishini taʼminlamaslik.

4. Umuman va manbalar boʻyicha budjetga toʻlovlar tushishi yuzasidan belgilangan koʻrsatkichlarni bajarganlik, shuningdek budjetga toʻlovlar boʻyicha qarzlarni kamaytirganlik uchun har chorakning birinchi kunidagi holatga koʻra ushbu Nizomning 1-bandida koʻrsatib oʻtilgan mansabdor shaxslar har chorakda mansab maoshining 150 foizi miqdorida mukofotlanadilar. Mehnat haqi fondi boʻyicha tejaladigan mablagʻ va tegishli organlar maxsus fondlarining mablagʻlari mukofotlarni toʻlash manbalari hisoblanadi.

5. Ushbu Nizomning 1-bandida koʻrsatilgan mansabdor shaxslarga Oʻzbekiston Respublikasi Mehnat kodeksining 181-moddasiga muvofiq quyidagilar uchun jarima solinadi:

umuman chorakka belgilangan koʻrsatkich bajarilmaganligi, budjetga toʻlovlar boʻyicha qarzning jami miqdori belgilab qoʻyilgan eng yuqori darajadan ortiqcha oʻsishiga yoʻl qoʻyilganligi uchun — chorakka hisoblaganda mansab maoshining 10 foizidan 20 foizigacha miqdorda. Hisobot choragida ushbu koʻrsatkichlar bajarilmagan, ammo ortib boruvchi yakunga koʻra ularning bajarilishi taʼminlangan hollarda mansabdor shaxslarga jarima solinmaydi;

umuman belgilangan koʻrsatkich bajarilgani holda, ammo 4 va undan koʻproq manbalar boʻyicha budjetga tushumlarni taʼminlamaganlik uchun — chorakka hisoblaganda mansab maoshining 10 foiziga qadar miqdorda;

umuman belgilangan koʻrsatkich bajarilgani holda, ammo 3 tagacha manbadan budjetga tushumlarni taʼminlamaganlik uchun mansabdor shaxslar mukofotlanmaydilar va ularga jarima solinmaydi.

6. Mazkur Nizomning bajarilishini hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi nazorat qilib boradi, u har chorakda oʻz majlislarida respublika mintaqalari boʻyicha budjetga soliqlar va boshqa toʻlovlarning tushishiga doir ahvolni koʻrib chiqadi hamda rahbarlar va mansabdor shaxslarni ragʻbatlantirish va ularning moddiy javobgarligi toʻgʻrisidagi tegishli takliflarni Vazirlar Mahkamasiga kiritadi.

7. Quyidagilarga jarimalar solinadi:

Davlat soliq qoʻmitasining Raisi va uning oʻrinbosarlariga, Qoraqalpogʻiston Respublikasi, viloyatlar va Toshkent shahar soliq xizmatlarining boshliqlariga, Qoraqalpogʻiston Respublikasi moliya vaziriga hamda viloyatlar va Toshkent shahar moliya boshqarmalarining boshliqlariga — hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasining takliflari asosida Vazirlar Mahkamasining qarori bilan;

Qoraqalpogʻiston Respublikasi, viloyatlar va Toshkent shahar soliq xizmatlari boshliqlarining oʻrinbosarlariga, Qoraqalpogʻiston Respublikasi moliya vazirining oʻrinbosarlariga, viloyatlar va Toshkent shahar moliya boshqarmalari boshliqlarining budjetlar daromad qismining ijrosi uchun javobgar boʻlgan oʻrinbosarlariga, shaharlar va tumanlar davlat soliq xizmatlari hamda moliya organlarining boshliqlariga va ularning oʻrinbosarlariga, tijorat banklari muassasalarining bosh buxgalterlari va ularning oʻrinbosarlariga, Markaziy bank bosh boshqarmalari hisob-kitob-kassa markazlarining direktorlariga hamda bosh buxgalterlariga — ularning yuqori organlari tomonidan.

8. Jarimalar Oʻzbekiston Respublikasi Mehnat kodeksining 182-moddasida koʻzda tutilgan tartibda solinadi.