Ўзбекистон Республикасининг «Ўзбекистон Республикасининг Марказий банки тўғрисида»ги ва «Тўловлар ва тўлов тизимлари тўғрисида»ги қонунларига мувофиқ Ўзбекистон Республикаси Марказий банки бошқаруви қарор қилади:

1. Ўзбекистон Республикаси Марказий банки бошқарувининг 2021 йил 10 мартдаги 28/21-сон қарори (рўйхат рақами 3294, 2021 йил 3 апрель) (Қонун ҳужжатлари маълумотлари миллий базаси, 03.04.2021 й., 10/21/3294/0285-сон) билан тасдиқланган Ўзбекистон Республикаси ҳудудида банк карталарининг чиқарилиши ва муомалада бўлиши қоидалари тўғрисидаги низомга иловага мувофиқ ўзгартириш ва қўшимчалар киритилсин.

2. Мазкур қарор расмий эълон қилинган кундан эътиборан уч ойдан кейин кучга киради.

1. Муқаддима қуйидаги таҳрирда баён этилсин:

«Мазкур Низом банклар томонидан банк карталарининг чиқарилиши, уларнинг муомалада бўлиши ва ўтказилган операциялар бўйича ҳисоб-китобларни амалга ошириш, шунингдек тўлов операцияларини банкларнинг ахборотни ички қайта ишлаш модели (бундан буён матнда Ин-ҳоусе модели деб юритилади) орқали қайта ишлашни ташкил этиш, амалга ошириш ҳамда назорат қилиш қоидаларини белгилайди.».

2. 1-банд қуйидаги мазмундаги хатбоши билан тўлдирилсин:

«Ин-ҳоусе модели — банк томонидан процессинг хизматини кўрсатувчи учинчи шахсни жалб этмаган ҳолда ўзининг ахборот инфратузилмаси орқали тўловчи ҳамда маблағларни олувчининг айни бир банкда очилган банк карталари билан амалга ошириладиган тўлов операцияларини авторизация қилиш, қайта ишлаш ва банк ҳисобварақларида акс эттиришдан иборат тизим.».

3. Қуйидаги мазмундаги 2¹-банд билан тўлдирилсин:

«2¹. Ин-ҳоусе модели ушбу Низомнинг 57¹ — 57⁷-бандларида белгиланган талабларга жавоб берадиган банклар томонидан ихтиёрий равишда қўлланилади.».

4. Қуйидаги мазмундаги 15¹-боб билан тўлдирилсин:

57¹. Банк Ин-ҳоусе модели асосида тўлов операцияларини қайта ишлашда Тўлов тизимлари операторлари ва тўлов хизматларини етказиб берувчиларнинг тўлов тизимларида ахборот хавфсизлиги ва киберхавфсизликни таъминлаш ҳамда рақамли технологиялар воситасида содир этиладиган ҳуқуқбузарликларни олдини олиш чораларини кўриш тўғрисидаги низомда (рўйхат рақами 3513, 2024 йил 21 май) белгиланган ахборот хавфсизлиги ва киберхавфсизлик талабларига риоя этиши, фаолият узлуксизлиги ҳамда ахборот тизимларини тиклаш режаларини ишлаб чиқиши ва уларни йилига камида бир марта синовдан ўтказиши шарт.

57². Банк Ин-ҳоусе моделини жорий этишдан камида ўттиз кун олдин Марказий банкка ёзма ёки электрон шаклда хабарнома тақдим этади. Бунда Ин-ҳоусе моделини ишга тушириш санаси, қайта ишланадиган операциялар турлари, фойдаланиладиган ахборот тизимлари, ахборот хавфсизлиги ва фаолият узлуксизлигини таъминлаш чоралари кўрсатилади.

57³. Банк Ин-ҳоусе моделини қўллашда тўлов маълумотларининг махфийлиги, яхлитлиги ва мавжудлигини таъминлаш бўйича ички ҳужжатларни тасдиқлаши, шунингдек операцион ва технологик таваккалчиликларни аниқлаш, баҳолаш, мониторинг қилиш ва камайтириш тартибини белгилаши лозим.

57⁴. Банк Ин-ҳоусе моделининг узлуксиз ишлашини таъминлаш учун асосий ахборот тизимидан мустақил захира алоқа канали ва ахборот тизимига эга бўлиши, улардаги маълумотларнинг мунтазам янгиланишини ҳамда захира тизимига ўтиш жараёнининг йилига камида бир марта синовдан ўтказилишини таъминлайди.

57⁵. Ин-ҳоусе модели орқали фақат тўловчи ва маблағларни олувчининг айни бир банкда очилган банк карталари орқали амалга ошириладиган тўлов операциялари қайта ишланади. Бунда ҳисоб-китоблар реал вақт режимида ёки белгиланган клиринг сессиялари якунлари бўйича амалга оширилади.

57⁶. Банк Ин-ҳоусе модели орқали амалга оширилган тўлов операцияларига оид барча маълумотларни камида беш йил давомида сақланишини, яхлитлигини ҳамда зарур ҳолларда қайта тикланишини таъминлайди.

57⁷. Банк Ин-ҳоусе моделининг ишлашига таъсир кўрсатган операцион ҳодиса, ахборот тизимидаги узилиш ёки ахборот хавфсизлиги ва киберхавфсизлик ҳодисаси аниқланганда бу ҳақда Марказий банкка зудлик билан ёзма ёки электрон шаклда дастлабки ахборотни тақдим этиши шарт. Бунда ҳодисанинг сабаблари, оқибатлари ва уни бартараф этиш бўйича кўрилган чоралар ҳақидаги батафсил ахборот ҳодиса аниқланган кундан бошлаб уч иш куни ичида тақдим этилади.

57⁸. Марказий банк банклар томонидан Ин-ҳоусе модели асосида тўлов операцияларини қайта ишлашда ушбу Низом талабларига риоя этилиши устидан қонунда белгиланган ваколатлари доирасида мониторинг ва назоратни амалга оширади.

57⁹. Банк Ин-ҳоусе моделини ишга туширишдан олдин ушбу Низомнинг 57¹ — 57⁶-бандларида назарда тутилган ташкилий ва техник чоралар бажарилишини таъминлайди.».