Tadbirkorlik subyektlari uchun yanada qulay shart-sharoitlar yaratish, qonun hujjatlarini unifikatsiya qilish, ma’muriy sarf-xarajatlarni tobora kamaytirish, tadbirkorlik faoliyatini amalga oshirish uchun ruxsatnoma turlarini qisqartirish va ularni berish tartib-qoidalarini soddalashtirish maqsadida:
qonun hujjatlarida belgilangan faoliyat turlari bilan shug‘ullanish uchun litsenziyalar kamida 5 yil muddatga beriladi;
1-ilovaga* muvofiq faoliyat turlarini amalga oshirish uchun litsenziyalar cheklanmagan muddatga beriladi, shu bilan birga tegishli faoliyat turlarini amalga oshirish uchun avval berilgan litsenziyalar cheklanmagan muddatga berilgan deb hisoblanadi;
* 1-ilova rus tilidagi matnda berilgan.
2-ilovada* ko‘rsatilgan faoliyat turlariga litsenziya berish vazifalari tegishli davlat boshqaruv organlari zimmasiga yuklatiladi.
* 2-ilova rus tilidagi matnda berilgan.
Litsenziya beruvchi organlar o‘rnatilgan tartibda tadbirkorlik subyektlari tomonidan litsenziya talablariga rioya etilishi ustidan qattiq nazoratni ta’minlasin.
2. O‘zbekiston Respublikasi Iqtisodiyot vazirligi, Adliya vazirligi, Monopoliyadan chiqarish davlat qo‘mitasi va Savdo-sanoat palatasining 2005-yil 1-oktabrdan boshlab 3-ilovaga* muvofiq tadbirkorlik faoliyatini yuritishda bir-birini takrorlaydigan va ortiqcha ruxsatnomalar berish tartib-qoidalarini bekor qilish to‘g‘risidagi taklifi qabul qilinsin.
* 3-ilova rus tilidagi matnda berilgan.
3. Belgilab qo‘yilsinki, tadbirkorlik subyektlari joylardagi davlat boshqaruvi va davlat hokimiyati organlari tomonidan rasmiylashtiriladigan va beriladigan ruxsatnomalar (qarorlar, kelishuv va xulosalar)ni olishi zarur bo‘lgan harakatlar hamda faoliyat turlari ro‘yxati faqat qonun hujjatlari bilan belgilanadi.
Joylardagi davlat boshqaruvi va davlat hokimiyati organlarining tadbirkorlik subyektlari tomonidan ayrim harakatlarni bajarish yoki faoliyatni amalga oshirish uchun ruxsatnomalar joriy etish va ruxsatnoma berish tartib-qoidalarini o‘rnatish maqsadida qaror qabul qilishi taqiqlansin.
Mazkur organlarning mansabdor shaxslari qarorning ushbu bandi buzilgan taqdirda shaxsan javobgar bo‘lishlari to‘g‘risida qat’iy ogohlantirilsin.
4. Vazirlar Mahkamasi uch oy muddatda joriy etilgan tartibda “Ruxsatnomalar berish tartib-qoidalari to‘g‘risida”gi O‘zbekiston Respublikasi Qonuni loyihasini:
tadbirkorlik subyektlari ruxsatnoma olishi zarur bo‘lgan harakatlar va faoliyat turlarining muayyan ro‘yxatini belgilash;
ruxsatnomalar berish jarayonining soddalashtirilgan, aniq va asosli mexanizmlari, “bir darchaga” tamoyilidan ustuvor foydalanish, ruxsatnomalar berishga to‘lanadigan haq miqdorini ularni rasmiylashtirish xarajatlari bilan cheklash ko‘zda tutilgan holda tayyorlab, O‘zbekiston Respublikasi Oliy Majlisi Qonunchilik palatasiga kiritsin.
5. O‘zbekiston Respublikasi Adliya vazirligi bir oy muddatda manfaatdor vazirliklar va idoralar bilan birgalikda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risidagi takliflarni Vazirlar Mahkamasiga kiritsin.
6. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari V.A. Golishev zimmasiga yuklansin.