Boshqaruv organlari tuzilmasini takomillashtirish, uni bozor iqtisodiyoti tamoyillari va talablariga muvofiqlashtirish, ularni saqlash sarf-xarajatlarini yanada qisqartirish va kamaytirish maqsadida Vazirlar Mahkamasi qaror qiladi:

1. Maʼmuriy-boshqaruv apparati tuzilmasini takomillashtirish va uning xodimlari sonini qisqartirish boʻyicha Respublika komissiyasining:

vazirliklar, davlat qoʻmitalari, idoralar, uyushmalar, konsernlar, korporatsiyalar, kompaniyalar va ular tasarrufidagi tashkilotlar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari boshqaruv apparati xodimlari sonini 1 — 3-ilovalarga* muvofiq;

vazirlar, davlat qoʻmitalari raislari va idoralar rahbarlari oʻrinbosarlari sonini 5-ilovaga* muvofiq qisqartirish toʻgʻrisidagi taklifi qabul qilinsin.

2. Vazirliklar, idoralar, uyushmalar, konsernlar, korporatsiyalar, kompaniyalar va boshqa xoʻjalik birlashmalari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

boshqaruv apparati xodimlari sonini qisqartirish boʻyicha belgilangan topshiriqlarning bajarilishini taʼminlasinlar va 1999-yil 1-yanvargacha shtatlar jadvalini maʼmuriy-boshqaruv xodimlarining tasdiqlangan cheklangan soniga muvofiqlashtirsinlar;

Oʻzbekiston Respublikasi Mehnat vazirligi bilan birgalikda boshqaruv organlari apparatidan boʻshab qoladigan xodimlarni ish bilan taʼminlash va ijtimoiy himoya qilish masalalarini qonunchilikda belgilangan tartibda hal etsinlar.

3. Oʻzbekiston Respublikasi Moliya vazirligi 1999-yil uchun Davlat budjetini shakllantirishda budjet tashkilotlari boʻyicha maʼmuriy-boshqaruv apparatini saqlash sarf-xarajatlarini vazirliklar, davlat qoʻmitalari, idoralar va ularning budjet mablagʻlari hisobidan mablagʻ bilan taʼminlanadigan tasarrufidagi tashkilotlar boshqaruv apparati xodimlarining belgilangan cheklangan soniga qatʼiy muvofiq holda mablagʻ bilan taʼminlasin.

4. Oʻzbekiston Respublikasi Vazirlar Mahkamasi Komplekslari, Moliya vazirligi boshqaruv apparati xodimlari sonini qisqartirish boʻyicha belgilangan topshiriqlarning Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar, davlat qoʻmitalari, idoralar, uyushmalar, konsernlar, korporatsiyalar, kompaniyalar va boshqa xoʻjalik birlashmalari tomonidan bajarilishini 1999-yil I choragi yakunlariga koʻra tekshirsinlar hamda Vazirlar Mahkamasiga tegishli takliflar kiritsinlar.

5. Mazkur qarorning bajarilishini nazorat qilish Bosh vazir oʻrinbosari B. S. Hamidov zimmasiga yuklansin.