O‘zbekiston Respublikasining iqtisodiy xavfsizligini himoya qilish yuzasidan bojxona organlari ishining samaradorligini oshirish, vatanimiz tashkilotlari va firmalarining tashqi iqtisodiy faoliyati shart-sharoitlarini yaxshilash, alkogolli mahsulotlar ishlab chiqarish va ularning aylanishi ustidan davlat monopoliyasini ta’minlash, respublika hududiga tovarlarni kontrabanda yo‘li bilan keltirishning oldini olish uchun bojxona chegarasida nazoratni kuchaytirish va budjetga boj to‘lovlari tushumlarini ko‘paytirish maqsadida Vazirlar Mahkamasi qaror qiladi:

1. 1999-yildan boshlab O‘zbekiston Respublikasi Davlat bojxona qo‘mitasining shtatdagi xodimlari soni ilovaga muvofiq 366 kishiga ko‘paytirilsin.

2. O‘zbekiston Respublikasi Moliya vazirligi qo‘shimcha xodimlar xarajatlariga zarur mablag‘lar ajratishni belgilangan tartibda nazarda tutsin.

3. Qoraqalpog‘iston Respublikasi Vazirlar Kengashi, viloyatlar hokimliklari yangidan tashkil etiladigan bojxona postlarini tartibga keltirish, ularni binolar va aloqa vositalari bilan ta’minlashda O‘zbekiston Respublikasi Davlat bojxona qo‘mitasiga ko‘maklashsinlar.

4. Mazkur qarorning bajarilishini nazorat qilish O‘zbekiston Respublikasining Bosh vaziri O‘. T. Sultonov zimmasiga yuklansin.