Oʻzbekiston Respublikasi fuqarolarining chet elga borishlarini soddalashtirish maqsadida hamda Oʻzbekiston Respublikasi Prezidentining “Iqtisodiy islohotlarni yanada chuqurlashtirish, xususiy mulk manfaatlarini himoya qilish va tadbirkorlikni rivojlantirish chora-tadbirlari toʻgʻrisida” 1994-yil 21-yanvardagi Farmoniga muvofiq Vazirlar Mahkamasi qaror qiladi:

1. Oʻzbekiston Respublikasi fuqarolarining chet elga borishlarining Vaqtinchalik tartibi 1-ilovaga muvofiq tasdiqlansin.

2. Oʻzbekiston Respublikasining diplomatik pasporti toʻgʻrisidagi Nizom hamda diplomatik pasport beriladigan shaxslar roʻyxati 2-ilovaga muvofiq tasdiqlansin.

3. Chet elga borishlari maxsus kelishuvni talab qiluvchi mansabdor shaxslarning roʻyxati tasdiqlansin (3-ilova).

4. Oʻzbekiston Respublikasi Vazirlar Mahkamasining “Oʻzbekiston Respublikasi delegatsiyalari, mutaxassislari va oʻquvchilarini chet elga xizmat safariga yuborish tartibi toʻgʻrisida” 1991-yil 25-oktabrdagi 271-son qarori oʻz kuchini yoʻqotgan deb hisoblansin.

5. Oʻzbekiston Respublikasi Tashqi ishlar vazirligi, Ichki ishlar vazirligi, Milliy xavfsizlik xizmati oʻzlarining yoʻriqnoma hujjatlarini Prezident Farmonining 16-bandiga hamda mazkur qarorga muvofiqlashtirsinlar.

1. Oʻzbekiston Respublikasi fuqarolari Oʻzbekiston Respublikasi qonun hujjatlariga muvofiq shaxsiy, jamoat ishlari boʻyicha, doimiy yashash uchun, sayyohlar sifatida, oʻqishga, davolanishga va xizmat safariga chet elga erkin borish huquqiga egadirlar.

Mazkur Tartib Oʻzbekiston Respublikasi fuqarolarining borish hujjatlarini rasmiylashtirish talab qilinmaydigan MDH aʼzolari boʻlgan davlatlardan boshqa xorijiy mamlakatlarga borishlari uchun joriy qilinadi.

2. Chet elga borish uchun fuqarolik pasportlari fuqarolarning anketa-arizalari asosida ularning doimiy yashash joyi boʻyicha Oʻzbekiston Respublikasi Ichki ishlar vazirligining organlarida rasmiylashtiriladi.

3. Diplomatik pasportlar “Oʻzbekiston Respublikasining diplomatik pasporti toʻgʻrisidagi Nizom”ga muvofiq Oʻzbekiston Respublikasi Tashqi ishlar vazirligi tomonidan beriladi.

4. Chet el xizmat safarlarini tashkil etish va ulardan samarali foydalanilishi uchun masʼuliyat xizmat safariga yuborish toʻgʻrisida qaror qabul qilgan tashkilotlar va organlarning rahbarlari zimmasiga yuklatiladi.

1. Oʻzbekiston Respublikasining chet elga bormoqchi boʻlgan fuqarolari tegishli shakldagi anketa-arizani toʻldirgan va shaxsini tasdiqlovchi hujjatlarni taqdim etgan holda, doimiy yashash joyi boʻyicha ichki ishlar organlariga murojaat qiladilar.

2. Ichki ishlar organlari fuqaroning anketa-arizasini 15 kun muddatda koʻrib chiqadilar va unga chet elga borishi uchun pasport beradilar. Chet elga doimiy yashashga ketayotgan fuqarolar uchun hujjatlarni koʻrib chiqish muddati zarur hollarda 30 sutkagacha uzaytirilishi mumkin.

Chet elga borayotgan fuqarolar xorijiy davlat vizasini olish uchun tegishli davlatlarning diplomatik va konsullik vakolatxonalariga murojaat qiladilar.

3. Anketa-ariza 18 yoshga toʻlgan fuqarolar tomonidan taqdim etiladi. 18 yoshga toʻlmagan bolalar borayotgan hollarda ularning qonuniy vakillarining iltimosnomalari taqdim etiladi.

14 dan 18 yoshgacha boʻlgan bolalar doimiy yashashga ketayotgan hollarda ketayotganlarning roziligini tasdiqlovchi notarius tomonidan tasdiqlangan hujjatlar ham taqdim etilishi kerak.

Doimiy yashash uchun ketilayotganda ota-ona, er-xotinlarning roziligini tasdiqlovchi notarius tomonidan tasdiqlangan hujjatlar — ular vafot etgan boʻlsalar — vafot etganlik toʻgʻrisidagi guvohnomasining nusxasi taqdim etilishi kerak.

1. Xizmat safarlariga borishni rasmiylashtirish yuboruvchi tashkilotning murojaati hamda boruvchi shaxslarning anketa-arizalari asosida amalga oshiriladi. Fuqarolik pasportlari ichki ishlar organlari tomonidan rasmiylashtiriladi, boriladigan mamlakatga xizmat vizalari Oʻzbekiston Respublikasi Tashqi ishlar vazirligi orqali taʼminlanadi.

Fuqarolik pasportini va xizmat vizasini rasmiylashtirishning umumiy muddati 20 kundan oshmasligi kerak.

2. Vazirliklar, davlat qoʻmitalari, idoralar hamda davlat va xoʻjalik boshqaruvi boshqa organlari apparatining masʼul xodimlarini xorijiy mamlakatlarga xizmat safariga yuborish toʻgʻrisidagi qaror tegishli vazirliklar, davlat qoʻmitalari, idoralar va muassasalar rahbarlari tomonidan qabul qilinadi.

3. Korxonalar, muassasalar, tashkilotlar oʻquv yurtlari rahbarlari va xodimlarini xorijiy mamlakatlarga xizmat safariga yuborish bu tuzilmalarning oʻzlarining qarori asosida amalga oshiriladi.

4. Qoʻshma korxonalar, kichik korxonalar, masʼuliyati cheklangan jamiyatlar, aksionerlik korxonalari va jamiyatlari, firmalar va xususiy kompaniyalar, mulkchilikning barcha shakllaridagi qishloq xoʻjaligi birlashmalari rahbarlari va xodimlari chet elga oʻzlarining mustaqil qarorlari asosida boradilar.

5. Davlat kontrakti asosida xorijiy mamlakatlarga xizmat safariga yuborish toʻgʻrisidagi qaror yuboruvchi tashkilot tomonidan qabul qilinadi.

Xususiy kontraktlar boʻyicha ishlash uchun chet elga borish Mehnat vazirligi tomonidan rasmiylashtiriladi.

6. Oʻquvchilar, aspirantlar, olimlar va mutaxassislar xorijiy mamlakatlarga oʻqishga, stajirovkaga yuborilayotganda qarorni ularni yuboruvchi muassasa qabul qiladi.

7. Hukumatlararo bitimlar boʻyicha xorijiy mamlakatlarga yuborish toʻgʻrisidagi qaror tegishli vazirliklar va idoralarning taqdimnomasi boʻyicha Vazirlar Mahkamasi tomonidan qabul qilinadi.

8. Jamoat tashkilotlari tomonidan xorijiy mamlakatlarga xizmat safariga yuborish toʻgʻrisidagi qaror bu tashkilotlarning rahbar organi tomonidan qabul qilinadi.

9. Xizmat safarlariga borayotgan shaxslar davlat siri hisoblangan maʼlumotlardan voqif boʻlsalar yuboruvchi tashkilotlar ularning anketa-arizasi bilan birgalikda voqiflik darajasi toʻgʻrisidagi xulosani taqdim etadilar.

1. Quyidagi sabablar chet elga borish huquqini vaqtincha cheklash uchun asos boʻlib xizmat qilishi mumkin:

a) agar shaxs davlat siri hisoblangan maʼlumotlardan voqif boʻlsa yoki uning chet elga borishiga monelik qiluvchi boshqa shartnoma, kontrakt majburiyatlari amalda boʻlsa — bu holatlarning amal qilishi tugagunga qadar;

b) agar shaxsga nisbatan jinoiy ish qoʻzgʻatilgan boʻlsa — ish sudda koʻrib chiqilgunga qadar;

v) agar shaxs sudning hukmi bilan xavfli retsidivist deb tan olingan yoki militsiyaning maʼmuriy nazorati ostida boʻlsa sudlanganlik bekor qilinmagun (olib tashlanmagun)ga qadar yoki nazorat qilish toʻxtatilgungacha;

g) agar shaxs unga sud tomonidan yuklatilgan majburiyatlarni ijro etishdan boʻyin tovlayotgan boʻlsa — majburiyatlarni ijro etmagunga qadar;

d) agar shaxs oʻzi toʻgʻrisida shak-shubhasiz yolgʻon maʼlumotlarni bergan boʻlsa;

e) agar sudda shaxsga nisbatan fuqarolik daʼvosi qoʻzgʻatilgan boʻlsa — ish koʻrib chiqilgunga qadar;

j) agar shaxs chaqiriq uchastkasida roʻyxatga olingan va haqiqiy xizmatga chaqirilishi kerak boʻlsa — haqiqiy muddatli xizmatni oʻtagunga qadar yoki qonunga muvofiq undan ozod qilingunga qadar;

2. Ushbu boʻlimning 1-bandi “a” kichik bandida nazarda tutilgan hollar doimiy yashash uchun chet elga joʻnab ketishga ruxsat berishni rad etish uchun asos boʻlishi mumkin.

Ushbu Tartibning IV boʻlimida nazarda tutilgan asoslar boʻyicha chet elga borishga ruxsat berishning rad etilishi, javob berishning belgilangan muddatdan ortiqcha kechiktirilishi fuqaro tomonidan yuqori organga shikoyat qilinishi mumkin, bu organ bir oydan koʻp boʻlmagan muddatda javob berishi kerak, fuqaro uning qaroridan norozi boʻlganda sudga shikoyat qilishi mumkin. Mazkur Tartibning IV boʻlim 1-bandining “b” va “j” bandlarida koʻrsatilgan sabablar boʻyicha chet elga borish huquqini cheklash ustidan shikoyat qilinishi mumkin emas.

1. Oʻzbekiston Respublikasining diplomatik pasporti — bu Oʻzbekiston Respublikasi fuqarosi Oʻzbekiston Respublikasi tashqarisiga borganda, Oʻzbekiston Respublikasidan tashqarida yashaganda uning shaxsini va maqomini tasdiqlovchi Oʻzbekiston Respublikasi Tashqi ishlar vazirligi tomonidan berilgan hujjatdir.

2. Oʻzbekiston Respublikasining diplomatik pasporti Oʻzbekiston Respublikasidan dunyoning barcha mamlakatlariga borish uchun haqiqiydir.

3. Oʻzbekiston Respublikasi Tashqi ishlar vazirligi Oʻzbekiston Respublikasi Hukumati nomidan xorijiy davlatlarning barcha vakolatli organlaridan Oʻzbekiston Respublikasining diplomatik pasportini koʻrsatuvchilarni erkin va toʻsiqsiz oʻtkazib yuborishlarini va zarurat boʻlganda ularga har qanaqa koʻmak berishlarini va himoya qilishlarini iltimos qiladi.

4. Diplomatik pasport besh yil muddatga beriladi.

5. Diplomatik pasport mazkur Nizomning ilovasida koʻrsatilgan mansabdor shaxslarga beriladi.

6. Diplomatik pasport er-xotinlarga, diplomatik pasporti boʻlgan shaxslar bilan birgalikda boruvchi 18 yoshgacha boʻlgan bolalarga ham beriladi. 16 yoshgacha boʻlgan bolalar ota-onalaridan birining pasportiga yozib qoʻyiladilar. Ayrim hollarda bolalarga ular balogʻat yoshiga yetgunlariga qadar ham diplomatik pasport berilishi mumkin.

7. Diplomatik pasportlar Oʻzbekiston Respublikasi Tashqi ishlar vazirligining Konsullik boshqarmasi tomonidan beriladi. Diplomatik pasportlardagi barcha yozuvlar Oʻzbekiston Respublikasi Tashqi ishlar vazirligining Konsullik boshqarmasi tomonidan amalga oshiriladi. Pasport egasi haqidagi maʼlumotlar oʻzbek, rus va ingliz tillarida kiritiladi.

8. Diplomatik pasport chet elda yoʻqotib qoʻyilgan hollarda pasport egasi tezlik bilan bu haqda Oʻzbekiston Respublikasining konsullik muassasasiga, agar pasport respublika hududida yoʻqotib qoʻyilgan boʻlsa — Oʻzbekiston Respublikasi Tashqi ishlar vazirligiga xabar berishi shart.

Yoʻqotib qoʻyilgan pasport oʻrniga yangi pasport belgilangan ichki tartibga muvofiq beriladi.

9. Diplomatik pasportlar bepul beriladi.

10. Diplomatik pasport Oʻzbekiston Respublikasining mulki hisoblanadi.

11. Diplomatik pasportlarning blanklari qatʼiy hisobda turadigan hujjatdir. Ular Oʻzbekiston Respublikasi Tashqi ishlar vazirligining buyurtmalariga koʻra tayyorlanadi.

Diplomatik pasportlarni hisobga olish, saqlash, yoʻq qilish Oʻzbekiston Respublikasi Tashqi ishlar vazirligi tomonidan amalga oshiriladi.

12. Fuqarolar chet el safaridan qaytib kelganlarida diplomatik pasportlar bir hafta muddatda ularni saqlash va foydalanish masʼuliyati yuklatilgan Oʻzbekiston Respublikasi Tashqi ishlar vazirligiga topshirilishi kerak.

13. Nizom qoidalarini buzish Oʻzbekiston Respublikasining diplomatik pasportidan foydalanish huquqidan mahrum qiladi. Diplomatik pasportdan foydalanish huquqidan mahrum qilish haqidagi masala konsullik xizmatining taqdimnomasiga koʻra Tashqi ishlar vazirligi tomonidan koʻrib chiqiladi.

14. Oʻzbekiston Respublikasi Tashqi ishlar vazirligi xalqaro hamjamiyatga yangi diplomatik pasportlarning namunalari taqdim etilishini taʼminlaydi.

15. Oʻzbekiston Respublikasining diplomatik pasportlari muomalaga joriy qilinishi bilan Oʻzbekiston Respublikasi fuqaroligiga tegishlilik haqida belgisi boʻlgan sobiq SSR Ittifoqining diplomatik pasportlari haqiqiy emas deb hisoblansin.

Oʻzbekiston Respublikasining Prezidenti

Oʻzbekiston Respublikasi Prezidentining Davlat maslahatchilari

Oʻzbekiston Respublikasi Prezidenti Kotibiyatining mudiri

Oʻzbekiston Respublikasi Prezidenti Apparati Ishlar boshqaruvchisi va uning oʻrinbosarlari

Oʻzbekiston Respublikasi Prezidentining yordamchilari

Oʻzbekiston Respublikasi Prezidenti xavfsizlik xizmatining boshligʻi

Oʻzbekiston Respublikasi Prezidentining matbuot kotibi

Oʻzbekiston Respublikasi Oliy Kengashining raisi

Oʻzbekiston Respublikasi Oliy Kengashi Raisining oʻrinbosarlari

Oʻzbekiston Respublikasi Oliy Kengashi parlamentlararo aloqalar boʻlimining mudiri

Oʻzbekiston Respublikasining Bosh vaziri

Oʻzbekiston Respublikasi Bosh vazirining birinchi oʻrinbosari

Oʻzbekiston Respublikasi Bosh vazirining oʻrinbosarlari

Oʻzbekiston Respublikasi vazirlari, davlat qoʻmitalarining raislari va ularning birinchi oʻrinbosarlari

Oʻzbekiston Respublikasi Fanlar akademiyasining Prezidenti

Oʻzbekiston Respublikasi Markaziy banki Boshqaruvining raisi

Oʻzbekiston Respublikasi Tashqi iqtisodiy faoliyat Milliy banki Boshqaruvining raisi

Favqulodda vaziyatlar boʻyicha davlat komissiyasining raisi

Oʻzbekiston Respublikasi Milliy xavfsizlik xizmatining raisi va uning birinchi oʻrinbosari

Oʻzbekiston Respublikasi Bosh prokurori va uning birinchi oʻrinbosari

Oʻzbekiston Respublikasi Konstitutsiyaviy Sudining raisi

Oʻzbekiston Respublikasi Oliy Sudining raisi va uning birinchi oʻrinbosari

Oʻzbekiston Respublikasi Oliy Xoʻjalik Sudining raisi va uning birinchi oʻrinbosari

Qoraqalpogʻiston Respublikasi Oliy Kengashining raisi

Qoraqalpogʻiston Respublikasi Vazirlar Kengashining raisi

Viloyatlar va Toshkent shahar hokimlari

Qoraqalpogʻiston Respublikasi Oliy Kengashi raisining oʻrinbosarlari

Qoraqalpogʻiston Respublikasi Vazirlar Kengashi raisining oʻrinbosarlari

Oʻzbekiston Respublikasi Tashqi ishlar vazirligining diplomatik xodimlari

Xalqaro tashkilotlardagi diplomatik lavozimga tenglashtiriladigan lavozimlarda ishlayotgan Oʻzbekiston Respublikasi vakolatxonalarining xodimlari

Oʻzbekiston Respublikasi Tashqi ishlar vazirligining diplomatik kuryerlari

Milliy xavfsizlik xizmati Raisining oʻrinbosarlari

Mudofaa vazirining oʻrinbosarlari

Ichki ishlar vazirining oʻrinbosarlari

Harbiy attashe, harbiy-havo kuchlari attashesi va ularning yordamchilari

Oʻzbekiston Respublikasi Qurolli Kuchlari qoʻshin turlari qoʻmondonlari

Oʻzbekiston Respublikasining savdo vakillari, Oʻzbekiston Respublikasi savdo vakolatxonasining maslahatchilari va attashelari

Davlat va Hukumat rasmiy delegatsiyalarining aʼzolari