Davlat tasarrufidan chiqarish va xususiylashtirishdan tushadigan mablagʻlardan samarali va oqilona foydalanish ustidan nazorat qilishni taʼminlash maqsadida Vazirlar Mahkamasi qaror qiladi:

1. Davlat mulkini davlat tasarrufidan chiqarish, xususiylashtirishdan tushgan mablagʻlarni hisobga olish, taqsimlash va ulardan foydalanishni nazorat qilish tartibi ilovaga muvofiq tasdiqlansin.

2. Quyidagilar:

Oʻzbekiston Respublikasi Vazirlar Mahkamasining 1995-yil 31-iyuldagi 273-f-son farmoyishi;

Oʻzbekiston Respublikasi Vazirlar Mahkamasining “Respublika koʻchmas mulk birjasining samarali faoliyat koʻrsatishini taʼminlash chora-tadbirlari toʻgʻrisida” 1994-yil 29-apreldagi 228-son qarori (Oʻzbekiston Respublikasi QT, 1994-yil, 4-son, 25-modda) bilan tasdiqlangan kimoshdi savdosida va tanlovlarda sotiladigan davlat mulkiga haq toʻlash, ularni taqsimlash va ulardan foydalanish tartibi toʻgʻrisida Vaqtinchalik nizomga 1-ilovaning 2, 3, 4 va 5-bandlari oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari B. S. Hamidov va V. A. Chjen zimmasiga yuklansin.

1. Mazkur Tartib Vazirlar Mahkamasining “davlat mulkini davlat tasarrufidan chiqarish va xususiylashtirishdan tushgan mablagʻlardan foydalanishni tartibga solish chora-tadbirlari toʻgʻrisida” 1997-yil 20-oktabrdagi 481-son qaroriga muvofiq ishlab chiqilgan.

2. Davlat tasarrufidan chiqarish va xususiylashtirishdan tushgan mablagʻ Oʻzbekiston Respublikasi birlashtirilgan budjetining bir qismi hisoblanadi va ular:

aksiyadorlik jamiyatlariga aylantirilgan davlat korxonalari birlamchi emissiyasi aksiyalarini sotishdan olingan daromadlar;

davlat mulki obyektlarni kimoshdi savdolari, tanlovlar, birja savdolari va birjadan tashqari savdolarda sotishdan tushgan daromadlar;

yer uchastkalarini fuqarolarga meros qilib qoldiriladigan umrbod egalik qilish uchun kim oshdi savdolarida sotishdan va qonun hujjatlarida nazarda tutilgan hollarda yer uchastkalarini xususiylashtirishdan tushgan mablagʻlar;

davlat mulki ijaraga berilganda ijara toʻlovidan tushgan daromadlar;

davlat mulki qoʻmitasi tomonidan ilgari qarz oluvchilarga ular tomonidan olingan kreditlarni qaytarish tarzida berilgan kreditlar va qarzlar boʻyicha ulardan olingan daromadlardan hamda ular boʻyicha hisoblangan foizlar;

vaqtincha boʻsh mablagʻlarni davlat mulki qoʻmitasining talab qilib olinadigan depozit schyotidan tijorat banklarining depozitlariga joylashtirishdan olingan daromadlar;

Davlat mulki qoʻmitasi va uning hududiy boshqarmalarining talab qilib olinadigan depozit schyotlariga tushuvchi boshqa daromadlar hisobiga shakllanadi.

3. Davlat tasarrufidan chiqarish va xususiylashtirishdan tushgan mablagʻlar, alohida tartibda taqsimlanadigan xorijiy valyutadagi tushumlardan tashqari, Oʻzbekiston Respublikasi davlat mulki qoʻmitasi tomonidan quyidagi nisbatda taqsimlanadi:

50 foizi — davlat budjetiga yoʻnaltiriladi va investitsiya loyihalarini mablagʻ bilan taʼminlash uchun foydalaniladi;

20 foizi — Xususiy tadbirkorlik va kichik biznesni qoʻllab-quvvatlash fondiga (“Biznes-fond”ga) oʻtkaziladi;

20 foizi — ijtimoiy-iqtisodiy rivojlantirish loyihalarini mablagʻ bilan taʼminlash, bozor infratuzilmasi tashkilotlarini shakllantirish uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga;

5 foizi — xususiylashtirish boʻyicha Davlat dasturini amalga oshirish, investitsiya va bozor tuzilmalarini tashkil etish va rivojlantirish yuzasidan Oʻzbekiston Respublikasi davlat mulki qoʻmitasi xarajatlariga;

5 foizi — idora qilish va boshqaruv funksiyalarini amalga oshirish bilan bogʻliq xarajatlarni qoplash uchun Oʻzbekiston Respublikasi davlat mulki qoʻmitasi schyotiga

4. Davlat tasarrufidan chiqarish va xususiylashtirishdan xorijiy valyuta tushadigan mablagʻlar quyidagi nisbatda taqsimlanadi:

95 foizi — Oʻzbekiston Respublikasi Moliya vazirligining xorijiy valyutadagi talab qilib olinadigan depozit schyotiga;

5 foizi — Qoʻmitani texnika bilan jihozlash va respublika tashqarisida xalqaro seminarlar tashkil etish uchun davlat mulki qoʻmitasi ixtiyoriga.

5. Agar Oʻzbekiston Respublikasi Prezidentining farmonlari yoki Hukumatning alohida qarorlari bilan xususiylashtirishdan tushgan mablagʻlar yoki ularning bir qismi boshqa maqsadlarga yoʻnaltirilgan taqdirda mazkur Tartib ularning qolgan qismiga joriy etiladi.

6. Mazkur Tartibning 3 va 4-bandlariga muvofiq mablagʻlarni taqsimlashda:

Oʻzbekiston Respublikasi Hukumatining qarorlariga koʻra davlat tasarrufidan chiqarish va xususiylashtirishdan umumiy mablagʻlardan bir martalik toʻlovlar;

belgilangan tartibda bekor qilingan bitiruvlar boʻyicha davlat mulki qoʻmitasi tomonidan investorlarga qaytariladigan aksiyalarni fond bozorida sotishdan tushgan mablagʻlar;

bitishuv tuzish uchun investorlar tomonidan deponentga qoʻyilgan, ular boʻyicha bitishuvlar tuzilmagan va egalariga qaytarilishi kerak boʻlgan mablagʻlar;

amaldagi qonun hujjatlariga muvofiq majburiy tusga ega boʻlgan mulki obyektlarini sotish boʻyicha tenderlar oʻtkazish xarajatlari;

emissiya prospektlari va davlat mulkining sotiladigan obyektlari roʻyxati majburiy eʼlon qilinishi xarajatlari;

bank, mablagʻni toʻlovchilar tomonidan yanglishib oʻtkazilgan, shuningdek davlat mulki qoʻmitasining talab qilib olinadigan depozit schyotiga hamda uning hududiy boshqarmalarning talab qilib olinadigan ikkilamchi depozit schyotlariga tushgan mablagʻlar aniqlagungacha hisobga olinmaydi.

7. Aksiyalarni sotishdan tushgan mablagʻlar Oʻzbekiston Respublikasi Prezidentining 1998-yil 4-martdagi 1939-son Farmoniga muvofiq fond birjasi, brokerlar, davlatga tegishli aksiyalarni hisobga olish, saqlash boʻyicha depozitariylar xizmatlariga haq toʻlash boʻyicha operatsiya xarajatlari chiqarib tashlangan holda emitentga toʻliq miqdorda oʻtkaziladi hamda mazkur Tartibning 3-bandiga muvofiq taqsimlashda hisobga olinmaydi.

8. Mazkur Tartibning 2-bandida koʻrsatib oʻtilgan mablagʻlar davlat mulki qoʻmitasining talab qilib olinadigan depozit schyotida Oʻzbekiston Respublikasi Markaziy bankining Toshkent shahar bosh boshqarmasining hisob-kitob-kassa markazida (bankning kodi 00014) va Oʻzbekiston Respublikasi Markaziy bankning bosh hududiy boshqarmalarida ochilgan davlat mulki qoʻmitasining hududiy boshqarmalari talab qilib olinadigan ikkilamchi depozit schyotlarida jamlanadi.

Davlat mulki qoʻmitasi hududiy boshqarmalarning talab qilib olinadigan ikkilamchi depozit schyotlarida toʻplanuvchi davlat tasarrufidan chiqarish va xususiylashtirishdan tushgan mablagʻlar har haftada (har seshanba kunlari) mazkur Tartibining 3-bandi oxirgi xatboshiga muvofiq taqsimlangan sifatida hisobga olinadigan idora qilish va boshqarish funksiyalarini amalga oshirish bilan bogʻliq sarf-xarajatlarni qoplash uchun Davlat mulki qoʻmitasining hududiy boshqarmalari ixtiyorida qoldiriladigan mablagʻlarning 5 foizi chiqarib tashlangan holda Davlat mulki qoʻmitasining Oʻzbekiston Respublikasi Markaziy bankining Toshkent shahar bosh boshqarmasi hisob-kitob-kassa markazidagi talab qilib olinadigan depozit schyotiga oʻtkaziladi.

9. Toʻlovchilar tomonidan yanglishib oʻtkazilgan mablagʻlar, bank tomonidan yanglishib oʻtkazilgan mablagʻlar, birjalar va brokerlar xizmatlariga toʻlangan miqdorlar va aniqlanishi kerak boʻlgan miqdorlar har haftada Markaziy bankning hududiy bosh boshqarmasiga taqdim etiladigan Davlat mulki qoʻmitasi hududiy boshqarmasi boshligʻining imzosi va gerbli muhr bilan tasdiqlanadigan shaklda (1-ilova) aks ettirib boriladi. Davlat mulki qoʻmitasiga taqdim etiladi.

10. Manbalarning barcha turlari boʻyicha Davlat mulki qoʻmitasi va uning hududiy boshqarmalarining talab qilib olinadigan depozit schyotlariga kelib tushuvchi mablagʻlar davlat mulki hisoblanadi va ushbu mablagʻlarga soliq solinmaydi.

11. Mablagʻlarni Davlat mulki qoʻmitasining Markaziy bankning hududiy bosh boshqarmalardagi talab qilib olinadigan depozit schyotlariga oʻtkazish xaridor (yuridik yoki jismoniy shaxs)ning topshirigʻiga koʻra tegishli tijorat banki tomonidan amalga oshiriladi.

Bankda schyotlari boʻlmagan jismoniy shaxslar naqd mablagʻlarni bank orqali oʻtkazishlari mumkin.

12. Toʻlov hujjatlarida toʻlovchilar — davlat mulki obyektlarini va aksiyalarni sotib oluvchi xaridorlar:

Markaziy bankning hududiy bosh boshqarmasining talab qilib olinadigan ikkilamchi depozit schyotining rekvizitlarini;

mazkur Tartibning 1-qismi 2-bandiga muvofiq toʻlovning nomini;

mablagʻlarni oʻtkazish asoslarini (oldi-sotdi shartnomasining yoki uning oʻrnini bosuvchi boshqa hujjatlarning roʻyxatdan oʻtish raqamini);

xususiylashtiriladigan obyekt nomini koʻrsatishlari shart.

Xaridor tomonidan Toʻlov topshirigʻini toʻldirish uchun zarur boʻlgan schyotlar raqami va boshqa banklar rekvizitlari xususiylashtiriladigan obyektning oldi-sotdi shartnomasida yoki uning oʻrnini bosuvchi boshqa hujjatda keltiriladi.

13. Davlat mulki qoʻmitasi va uning hududiy boshqarmalari xususiylashtiriladigan har bir obyekt boʻyicha mablagʻlar kelib tushishi va harakatini tarmoqlar va kelib tushishi manbalari boʻyicha hisobga olib boradilar, Davlat mulki qoʻmitasi tomonidan tasdiqlangan va Moliya vazirligi bilan kelishilgan tartibda va shaklda ular boʻyicha hisobot tuzadilar.

Davlat tasarrufidan chiqarish va xususiylashtirishdan tushadigan mablagʻlar va ularning harakati toʻgʻrisidagi yigʻma jadvallar hududiy boshqarma tomonidan har oyda Davlat mulki qoʻmitasiga hisobot oyidan keyingi oyning 1-kunidagi holati boʻyicha oyning 5-kunigacha taqdim etiladi.

14. Xususiylashtiriladigan obyekt boʻyicha hisob-kitoblar shakllari va muddatlari xaridor bilan Davlat mulki qoʻmitasi yoki uning hududiy boshqarmalari oʻrtasida tuzilgan oldi-sotdi shartnomalarida belgilanadi. Bunda obyektni qiymati boʻlib-boʻlib toʻlagan holda sotib olish muddati bir yildan oshmasligi kerak.

15. Fond birjasida yoki boshqa investitsiya muassasalari orqali sotiladigan aksiyalar uchun haq toʻlash tartibi va shartlari Davlat mulki qoʻmitasi, uning hududiy boshqarmalari yoki ular tomonidan vakolat berilgan agentlar bilan maxsus litsenziyalarga ega boʻlgan qimmatli qogʻozlar bozori qatnashchilari oʻrtasida tuziladigan shartnoma-topshiriqnomalarda belgilanadi.

16. Davlatga tegishli aksiyalarni hisobga olish va Milliy depozitariyda saqlash, savdolarni tashkil etish va aksiyalarni sotish xarajatlari mazkur Tartibga muvofiq ularni sotishdan tushgan tushum hisobiga qoplanadi.

17. Brokerlik idoralari yoki boshqa investitsiya muassasalari mablagʻlarning oldi-sotdi shartnomalari tuzilgan paytda boshlab 5-bank kuni mobaynida talab qilib olinadigan depozit schyotlarga kelib tushishini taʼminlashlari kerak.

18. Koʻchmas mulk (mol-mulk) obyektlarini kimoshdi savdosida, tanlovlarda, birja va birjadan tashqari savdolarda sotishdan tushgan mablagʻlar obyektlar (mulklar)ni bevosita sotishdan tushadigan pul mablagʻlari hisobiga, shuningdek kimoshdi savdosi qatnashchilarini savdoga qoʻyiladigan mol-mulk bilan oldindan tanishtirganlik uchun olingan tushumlar, savdo gʻolibi mol-mulkni sotib olishni rad etganda qaytarib berilmagan garov summalari hisobidan tashkil topadi.

Koʻrsatib oʻtilgan mablagʻlar Oʻzbekiston Respublikasi Davlat mulki qoʻmitasining talab qilib olinadigan depozit schyotida yoki uning hududiy boshqarmalarning talab qilib olinadigan ikkilamchi depozit schyotlarida toʻplanadi.

Mazkur Tartibda davlat mulki obyektlarini sotuvchi deganda Oʻzbekiston Respublikasi Davlat mulki qoʻmitasi yoki uning hududiy boshqarmalari tushuniladi.

19. Obyekt (mol-mulk) kimoshdi savdosida, tanlovlarda, birja va birjadan tashqari savdolarda yakuniy bayon (kimoshdi, tanlov), kontrakt (birja savdolari) imzolangan paytdan boshlab kechi bilan oʻn kunda, shuningdek birjadan tashqari savdolarda ahdlashuvchi tomonlar bitim tuzganlaridan soʻng uch kun muddatda amaldagi qonun hujjatlariga muvofiq sotuvchi bilan xaridor oʻrtasida oldi-sotdi shartnomasi imzolanadi.

Davlat koʻchmas mulki (mol-mulki) obyektlari sotilishidan tushgan barcha mablagʻlar vositachilik yigʻimi chiqarib tashlangan holda Oʻzbekiston Respublikasi Davlat mulki qoʻmitasining talab qilib olinadigan depozit schyotiga yoki uning hududiy boshqarmalarining talab qilib olinadigan ikkilamchi depozit schyotlariga yoʻnaltiriladi, ular keyinchalik mazkur Tartibga muvofiq taqsimlanadi.

Davlat koʻchmas mulki (mol-mulk) obyektlari kimoshdi savdosi yoki tanlov orqali sotilganda Respublika koʻchmas mulk birjasi tomonidan undiriladigan vositachilik yigʻimlari quyidagi tartibda belgilanadi:

sotuv narxi boshlangʻich narxiga qaraganda 100 foizgacha oshganda Respublika koʻchmas mulk birjasiga sotuv narxining 10 foizi miqdorida vositachilik yigʻimi oʻtkaziladi;

sotuv narxi boshlangʻich narxiga qaraganda 100 foizdan oshganda Respublika koʻchmas mulk birjasiga sotuv narxining 12 foizi miqdorida vositachilik yigʻimi oʻtkaziladi.

Kimoshdi savdosi tashkilotchisiga — Respublika koʻchmas mulk birjasi filialiga vositachilik yigʻimining 60 foizi Respublika koʻchmas mulk birjasiga 40 foizi oʻtkaziladi.

20. Shartnoma shartlariga muvofiq xaridor obyektni sotib olish schyotiga belgilangan tartibda mablagʻ toʻlaydi.

Obyekt (mol-mulk) kimoshdi savdosida, tanlovlarda birja va birjadan tashqari savdolarda sotilganda oldi-sotdi shartnomasi boʻyicha haq bitishuv miqdoriga qarab quyidagi muddatlarda toʻlanadi:

100 ming soʻmgacha boʻlganda — 5 kun ichida;

100 ming soʻmdan ortiqdan 500 ming soʻmgacha boʻlganda — 1 oy ichida;

500 ming soʻmdan ortiqdan 2 mln soʻmgacha boʻlganda — 3 oy ichida;

2 mln soʻmdan ortiq boʻlganda — 6 oy ichida.

Vositachilik haqi ilgari toʻlangan zakalat hisobga olingan holda kimoshdi savdosi tashkilotchisining talab qilib olinadigan depozit schyotiga oʻtkaziladi.

Yer uchastkalari meros qilib qoldiriladigan umrbod egalik qilish uchun kimoshdi savdosida sotilganda uning qiymatini boʻlib- boʻlib toʻlash bir yildan koʻp boʻlmagan muddatga belgilanadi.

21. Xaridor obyektning toʻliq qiymatining toʻlaganda hamda Davlat mulki qoʻmitasi yoki uning hududiy boshqarmasi tomonidan Davlat dalolatnomasi berilgandan soʻng obyekt egasi huquqiga ega boʻladi.

22. Kim oshdi savdosida, tanlovda, birja va birjadan tashqari savdolarda sotilgan obyektlar uchun oʻz vaqtida hisob-kitob qilishi ustidan nazoratni Davlat mulki qoʻmitasi va uning hududiy boshqarmalari amalga oshiradi.

Tomonlar oʻrtasidagi barcha nizolar oʻzaro kelishuv boʻyicha yoki sud tartibida hal etiladi.

23. Davlat mulki obyektlari va aksiyalarni sotib oluvchilar mablagʻlar toʻliq va oʻz vaqtida oʻtkazilishi uchun qonun hujjatlariga muvofiq javob beradilar.

Obyektlarni davlat tasarrufidan chiqarish va xususiylashtirishdan, davlat mulki obyektlarini sotishdan tushgan belgilangan muddatlarda toʻlanmagan mablagʻlar qonun hujjatlariga muvofiq, muddati oʻtkazib yuborilgan har bir kun uchun penya hisoblangan holda, xaridorlarning talab qilib olinadigan depozit schyotlaridan soʻzsiz undirib olinadi.

24. Davlat mulki qoʻmitasi, uning hududiy boshqarmalari:

Oldi-sotdi shartnomalariga yoki ularning oʻrnini bosuvchi boshqa hujjatlarga muvofiq xususiylashtirish obyektlari xaridorlaridan mablagʻlardan toʻliq va oʻz vaqtida tushishi ustidan nazoratni amalga oshiradi;

Talab qilib olinadigan depozit schyotlarida mablagʻlar harakati toʻgʻrisida tegishli koʻchirmalarni bankdan olgan holda xizmat koʻrsatuvchi banklar bilan kelishib xususiylashtirishdan olingan mablagʻlarni tushishi ustidan kundalik nazoratni amalga oshiradi;

25. Mazkur Tartibning 3-bandida nazarda tutilgan mablagʻlardan yoʻnalishlar boʻyicha foydalanish tartibi amaldagi qonun hujjatlariga muvofiq belgilanadi.

Investitsiya loyihalarini mablagʻ bilan taʼminlash uchun maqsadli foydalaniladigan mablagʻlarni davlat budjetiga oʻtkazish (50 foizini) har oyda Davlat mulki qoʻmitasining depozit schyotidan amalga oshiriladi.

26. Xususiy tadbirkorlik va kichik biznesni qoʻllab-quvvatlash Fondiga (Biznes-fondga) moʻljallangan mablagʻlar har oyda 20 foiz miqdorida oʻtkaziladi va ularni nazorat qilish quyidagi tartibda amalga oshiriladi:

Oʻzbekiston Respublikasi Davlat mulki qoʻmitasi qaytarib berish asosida pul mablagʻlarini berish tartibi va shartlari toʻgʻrisida Biznes-fond bilan shartnoma tuzadi.

Shartnomada quyidagi shartlar tartibda oldindan kelishib olinishi kerak:

Xususiylashtirish va davlat tasarrufidan chiqarishdan tushadigan mablagʻlar toʻgʻrisidagi Oʻzbekiston Respublikasi Davlat mulki qoʻmitasi boʻyicha bir yilga belgilangan prognozga muvofiq Biznes-fondga ajratiladigan pul mablagʻlarining eng yuqori miqdori koʻrsatiladi;

Biznes-fond tomonidan qarzni uzish jadvalini taqdim etish muddatlari;

davlat mablagʻlari hisobidan Biznes-fondga berilgan kreditlar va unga ajratilgan kreditlar boʻyicha foizlardan uning foydalanishi yoʻnalishlari va muddatlari;

muddati oʻtib ketgan qarzlarni va jazo jarimalarni hisoblab chiqish tartibi;

Biznes-fond tomonidan moliyaviy hisobotni taqdim etish tartibi;

toʻlovlar boʻyicha oʻzaro solishtirib chiqishlarni oʻtkazish tartibi;

Biznes-fondning Davlat mulki qoʻmitasi oldidagi moddiy javobgarligi chora-tadbirlari;

tomonlarning bank rekvizitlari va boshqalar.

Shartnoma shartlariga har qanday oʻzgartirishlar faqat tomonlarning yozma ahdlashuviga koʻra kiritiladi.

Biznes-fond tomonidan qaytariladigan mablagʻlar Davlat mulki qoʻmitasining talab qilib olinadigan depozit schyotiga oʻtkaziladi. Tuzilgan shartnomalar boʻyicha Biznes-fond tomonidan toʻlov toʻxtatilgan hollarda Davlat mulki qoʻmitasi muddati oʻtkazib yuborilgan qarz miqdorlaridagi mablagʻlarni Biznes-fondning “Oʻztadbirkorbank” muassasalaridagi schyotlaridan soʻzsiz tartibda hisobdan chiqarib tashlashga haqlidir.

27. Hududlarni ijtimoiy-iqtisodiy rivojlantirish ehtiyojlari uchun mablagʻlarni Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga oʻtkazish (20 foiz) va ulardan maqsadli foydalanish ustidan nazorat qilish quyidagi tartibda amalga oshiriladi:

Har oyda joriy oyning 15-kunigacha Oʻzbekiston Respublikasi Davlat mulki qoʻmitasi toʻlov topshirigʻi bilan talab qilib olinadigan depozit schyotidagi 20 foiz mablagʻni Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining joriy schyotlariga oʻtkaziladi.

Koʻrsatilgan schyotdan olingan mablagʻlar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan quyidagi ustuvor yoʻnalishlar boʻyicha foydalaniladi:

a) Mablagʻlarning kamida 50 foizi aholining ijtimoiy himoyalanmagan qatlami uchun uy-joy qurilishini mablagʻ bilan yoʻnaltiriladi;

b) qolgan mablagʻlar:

qishloq joylarda kichik biznes va xususiy tadbirkorlikni, suv quvurlari, oqova suv tizimi va inshootlarini, gaz va elektr taʼminoti tarmoqlarini, yoʻllar, hududlarni obodonlashtirishni rivojlantirish uchun zarur boʻlgan muhandislik va ishlab chiqarish infratuzilmasi obyektlarini, shuningdek ijtimoiy infratuzilma-taʼlim, sogʻliqni saqlash, madaniyat va sport obyektlari qurilishini mablagʻ bilan taʼminlash uchun;

Kichik biznes va xususiy tadbirkorlikni qoʻllab-quvvatlash davlat dasturiga muvofiq Milliy depozitariyning viloyatlardagi filiallarini, respublika fond birjalarini, koʻchmas mulk birjalari, tovar-xomashyo birjasi, tovar ishlab chiqaruvchilar va tadbirkorlar palatasini, biznes-inkubatorlarni qisman mablagʻ bilan taʼminlash uchun va biznes-markazlar tashkil etishga yoʻnaltiriladi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari schyotlaridagi mablagʻlaridan foydalanish yoʻnalishlari toʻgʻrisidagi qaror Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimliklari tomonidan farmoyish (qaror) shaklida, ulardan foydalanishning yuqorida koʻrsatilgan yoʻnalishlariga muvofiq qabul qilinadi. Qoraqalpogʻiston Respublikasi Moliya vazirligi, hokimliklar moliya boshqarmasi joriy schyot egalari hisoblanadi.

Mablagʻlarni oʻtkazish uchun toʻlov topshiriqlari qabul qilingan qaror asosida Qoraqalpogʻiston Respublikasi Moliya vazirligi, hokimlik moliya boshqarmasi tomonidan tayyorlanadi va bankka beriladi.

Yoʻnalishlar boʻyicha mablagʻlarning oʻz vaqtida oʻtishini xizmat koʻrsatish shartnomasiga muvofiq bank taʼminlaydi.

Davlat mulki qoʻmitasining hududiy boshqarmalari har oyda hisobot oyidan keyingi oyning 10-kunigacha Oʻzbekiston Respublikasi Davlat mulki qoʻmitasiga, ilova qilinayotgan shaklga muvofiq (2-ilova) hokimliklar tomonidan mablagʻlardan foydalanish yoʻnalishlari toʻgʻrisida hisobotni taqdim etadilar.

28. Xususiylashtirish davlat dasturini amalga oshirish, investitsiya, moliya va bozor tuzilmalarini tashkil etish, rivojlantirish boʻyicha xarajatlar uchun nazarda tutilgan mablagʻlarni oʻtkazish (5-foiz) ulardan maqsadli foydalanish ustidan nazorat quyidagi tartibda amalga oshiriladi:

Davlat mulki qoʻmitasining Markaziy bankning Toshkent shahar bosh boshqarmasi hisob-kitob-kassa markazidagi talab qilib olinadigan depozit schyotidan mablagʻlarni sarflash quyidagi yoʻnalishlar boʻyicha amalga oshiriladi:

respublika viloyatlarida (mintaqalarida) biznes-inkubatorlar, biznes-markazlar, Milliy depozitariyning filiallarini, respublika fond birjasi, koʻchmas mulk birjasi, tovar-xomashyo birjasini rivojlantirishga moliyaviy koʻmaklashish;

sanatsiya qilish jamgʻarmasini toʻldirishga;

Kichik biznesni va xususiy tadbirkorlikni rivojlantirishni qoʻllab-quvvatlash davlat dasturiga muvofiq meʼyoriy-huquqiy, ixtisoslashtirilgan adabiyotlarni tayyorlash va nashr etish;

Davlat mulkini xususiylashtirish va davlat tasarrufidan chiqarish davlat dasturini amalga oshirish bilan bogʻliq boshqa xarajatlar.

Markaziy bankning Toshkent shahar bosh boshqarmasi hisob-kitob-kassa markazi mablagʻlarini xizmat koʻrsatish shartnomasiga muvofiq oʻz vaqtida oʻtkazilishini taʼminlaydi.

29. Mazkur Tartibga muvofiq taqsimlanishi kerak boʻlgan mablagʻlardan maqsadli va samarali foydalanish ustidan nazorat Moliya vazirligi tomonidan amalga oshiriladi.

30. Davlat mulki qoʻmitasi har chorakda, chorak tamom boʻlgandan keyingi oyning 20 kunidan kechikmasdan talab qilib olinadigan depozit schyotidan amalga oshirilgan sarf-xarajatlar toʻgʻrisida Mazkur Tartibning 25 — 28-bandlariga muvofiq xarajatlarning maqsadlari koʻrsatilgan holda Moliya vazirligiga axborot taqdim etadi.

31. Mazkur Tartibning 26 — 28-bandlariga muvofiq mablagʻlarning kelib tushishi va sarflanishi boʻyicha birlamchi hujjatlarni tekshirish bir yilda kamida bir marta Moliya vazirligi tomonidan amalga oshiriladi.

32. Mazkur Tartibning qoʻllanilishi yuzasidan tushuntirishlar Oʻzbekiston Respublikasi Moliya vazirligi va Davlat mulki qoʻmitasi tomonidan beriladi.