Ўзбекистон Республикаси Солиқ кодексининг 412-, 429- ва 437-моддаларига асосан Сурхондарё вилоятида 2026 йилда юридик шахсларнинг мол-мулкига солинадиган солиқнинг минимал қийматига нисбатан коэффициент қўллаш ва вилоятда юридик ва жисмоний шахсларнинг қишлоқ хўжалигига мўлжалланмаган ерларига 2026 йил учун ер солиғи ставкаларини тасдиқлаш юзасидан туман солиқ инспекцияси бошлиғи А. Алмардоновнинг ҳисоботини тинглаб, сессияда депутатлар томонидан билдирилган фикр-мулоҳазаларни ҳамда Сурхондарё вилоят Кенгашининг 2026 йил 6 январдаги VII-17-2-8-0-K/26-сонли қарорини инобатга олиб, Ўзбекистон Республикасининг «Маҳаллий давлат ҳокимияти тўғрисида»ги Қонуннинг 6-, 24-моддаларига мувофиқ халқ депутатлари Жарқўрғон тумани Кенгаши қарор қилади:

1. Туман Солиқ инспекциясининг 2025 йил 16 декабрдаги 14-09653-сонли хати маълумот учун қабул қилинсин.

2. Туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — туман Иқтисодиёт ва молия бўлими бошлиғи (Р. Хамраев), туман Солиқ инспекцияси бошлиғи (А. Алмардонов)га:

юридик шахсларнинг мол-мулкига солинадиган солиқни ҳисоблаб чиқариш мақсадида, кўчмас мулкка бўлган ҳуқуқларни давлат рўйхатидан ўтказувчи органларда рўйхатдан ўтказилиши лозим бўлган бинолар ва иншоотларнинг 1 кв.м учун мутлоқ миқдорда белгиланган минимал қийматда бўлишини назорат қилиш;

юридик шахсларнинг мол-мулкига солинадиган солиқни ҳисоблаб чиқариш кўчмас мулкка бўлган ҳуқуқларни давлат рўйхатидан ўтказувчи органларда рўйхатдан ўтказилиши лозим бўлган бинолар ва иншоотларнинг 1 кв. м учун мутлоқ миқдори туманда ва қишлоқ жойларда 1 390 000 (бир миллион уч юз тўқсон минг) сўм белгиланганлиги минимал қийматда бўлиши юзасидан «Сурхондарё» телевидениеси билан ҳамкорликда пресс клублар ва чиқишларни амалга ошириш ҳамда телевидения орқали кенг оммага тақдим этиш;

юридик шахслар томонидан мавжуд мол-мулклари учун ҳисобланган ер солиқларини ўз вақтида ва тўлиқ тўлаб боришларини назоратга олиш;

2026 йил 1 февралга қадар солиқ тўловчиларни қўллаб- увватлаш ва эътироф этиш мақсадида 2025 йил давомида мол-мулк солиқларини белгиланган тартибда ва муддатда тўлашда фаол бўлган тумандан камида 3 тадан юридик шахсларни моддий ва маънавий томонлама рағбатлантириш таклифларини киритиш вазифалари юклатилсин.

ер солиғининг амалдаги ставкалари юридик шахсларнинг 1 гектарига 52,780 млн. сўм ва жисмоний шахсларнинг 1 кв. м га 441,38 сўм, юридик шахслар учун 1 коэффициентгача ва жисмоний шахслар 1 коэффициентгача индексация қилиниши қўллаган ҳолда ер солиғи ставкаларини белгилаши мумкинлиги юзасидан «Сурхондарё» телевидениеси билан ҳамкорликда пресс клублар ва чиқишларни амалга ошириш ҳамда телевидение орқали оммага тақдим этсин;

белгиланган ер солиғи ставкаларига (юридик ва жисмоний шахсларнинг) қишлоқ хўжалигига мўлжалланмаган ерлар учун уларнинг ҳудудларида жойлашган даҳа, мавзе, маҳалла, кўча кесимида 0,5 дан 2,0 гача камайтирувчи ва оширувчи коэффициентларни қўллашлари юзасидан маълумотларни таъминлаб берсин;

10 (ўн) кун муддатда 2025 йил давомида қишлоқ хўжалигига мўлжалланмаган ерлари учун ер солиқларини белгиланган муддатда ва миқдорда фаоллик билан тўлаган тумандаги барча юридик ва жисмоний шахсларни маҳаллий бюджет ҳисобидан моддий ва маънавий рағбатлантириш тўғрисида тегишли халқ депутатлари туман Кенгашига таклифларини киритсин;

халқ депутатлари туман Кенгаши томонидан қишлоқ хўжалигига мўлжалланмаган ер участкалари учун кейинги солиқ даврига тасдиқланган солиқ ставкаларини беш кун ичида солиқ тўловчиларга маълумот учун етказилишини таъминлассин;

ҳар чорак якунида юридик ва жисмоний шахсларга ҳисобланган ер солиғи ва ундирилган солиқлар тўғрисида ҳамда юридик шахсларга ҳисобланган мол-мулк солиғи ва ундирилган бошқа солиқлари тўғрисида халқ депутатлари туман Кенгашига ахборот бериб борсин.

3. Қуйидагилар:

Ўзбекистон Республикаси Солиқ кодекси билан белгиланадиган Жарқўрғон туманига 2026 йилда юридик ва жисмоний шахсларнинг мол-мулкига солиқ солишда минимал қийматга қўлланиладиган коэффитцент миқдори 1-иловага;

Ўзбекистон Республикаси Солиқ кодекси билан белгиланадиган солиқ ставкалари асосида (юридик ва жисмоний шахсларнинг) қишлоқ хўжалигига мўлжалланмаган ерлар учун Жарқўрғон туманининг иқтисодий ривожланишига қараб, камайтирувчи ва оширувчи коэффициентлари 2-иловага мувофиқ тасдиқлансин.

4. Туман ҳокимлиги матбуот хизмати ва «Жануб гавхари» газетаси таҳририяти (Д. Чориева)га, «Жарқўрғон» газетаси таҳририятига мазкур лойиҳани амалга оширишнинг мақсади ва унинг туман иқтисодиётини юксалтиришдаги афзалликлари тўғрисида телевидение, радио, расмий саҳифалар орқали оммавий ахборот воситалари ва интернет тармоқларида кенг ёритиб бориш тавсия этилсин.

5. Халқ депутатлари Жарқўрғон туман Кенгашининг 2025 йил 1 мартдаги «Халқ депутатлари Жарқўрғон туман Кенгаши 2025 йил 1 февралдаги VII-5-19-8-112-K/25 сонли қарорига ўзгартириш ва қўшимча ҳақида»ги VII-6-30-8-112-K/25-сонли қарори ўз кучини йўқотган деб ҳисоблансин.

6. Ушбу қарорнинг ижросини назорат қилиш халқ депутатлари туман Кенгашининг Маҳаллий бюджет, иқтисодий ислоҳотларни амалга ошириш, туризм, инвестициялар ва тадбиркорликни ривожлантириш масалалари бўйича доимий комиссияси (А. Тошпўлатов) зиммасига юклатилсин.

7. Мазкур қарор расман эълон қилинган кундан кучга киради.