Oʻzbekiston Respublikasi Prezidentining 2025-yil 5-maydagi PF-76-son “Taʼlim sifatini taʼminlash va taʼlim xizmatlari koʻrsatish tizimini takomillashtirish boʻyicha qoʻshimcha chora-tadbirlar toʻgʻrisida”gi Farmoni hamda Oʻzbekiston Respublikasi Vazirlar Mahkamasining 2025-yil 6-avgustdagi 498-son “Oʻrta maxsus, kasbiy, oliy va oliy taʼlimdan keyingi taʼlim, shuningdek, kadrlarni qayta tayyorlash va ularning malakasini oshirish tashkilotlarini kompleks hamda maxsus davlat akkreditatsiyasidan oʻtkazish tizimini joriy etish toʻgʻrisida”gi qaroriga muvofiq buyuraman:

1. Taʼlim tashkilotlarini kompleks va maxsus davlat akkreditatsiyasidan oʻtkazish uchun yigʻimlar miqdorlari va ularni hisoblash tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Iqtisodiyot va moliya vazirligi, Oliy taʼlim, fan va innovatsiyalar vazirligi, Raqobatni rivojlantirish va isteʼmolchilar huquqlarini himoya qilish qoʻmitasi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda Savdo-sanoat palatasi bilan kelishilgan.

3. Ushbu buyruq rasmiy eʼlon qilingan kundan eʼtiboran kuchga kiradi.

Ushbu Nizom oʻrta maxsus, kasbiy, oliy va oliy taʼlimdan keyingi taʼlim, shuningdek kadrlarni qayta tayyorlash va ularning malakasini oshirish boʻyicha faoliyat yurituvchi davlat va nodavlat taʼlim tashkilotlarini (bundan buyon matnda taʼlim tashkilotlari deb yuritiladi) kompleks va maxsus davlat akkreditatsiyasidan oʻtkazish toʻgʻrisidagi arizani koʻrib chiqish hamda kompleks va maxsus davlat akkreditatsiyasidan oʻtkazish uchun yigʻimlar miqdorlari va ularni hisoblash tartibini belgilaydi.

1. Kompleks va maxsus davlat akkreditatsiyasi Oʻzbekiston Respublikasi Prezidenti Administratsiyasi huzuridagi Taʼlim sifatini taʼminlash milliy agentligi (bundan buyon matnda Agentlik deb yuritiladi) tomonidan amalga oshiriladi.

2. Ushbu Nizomda quyidagi asosiy tushunchalar qoʻllaniladi:

arizani koʻrib chiqish uchun yigʻim — taʼlim tashkilotlarini kompleks va maxsus davlat akkreditatsiyasidan oʻtkazish toʻgʻrisidagi arizani (bundan buyon matnda ariza deb yuritiladi) koʻrib chiqish hamda ariza va unga ilova qilingan hujjatlarning toʻliqligi va toʻgʻriligini tekshirish bilan bogʻliq xarajatlarni qoplash uchun undiriladigan toʻlov;

bazaviy yigʻim miqdori — taʼlim tashkilotlarini kompleks va maxsus davlat akkreditatsiyasidan oʻtkazish jarayonida hisob-kitoblarni amalga oshirish uchun asos sifatida belgilangan boshlangʻich toʻlov miqdori;

koeffitsiyentlar — taʼlim tashkilotidagi talabalar va dasturlar sonidan hamda arizalarni qabul qilish muddatidan kelib chiqib, akkreditatsiya jarayonidagi xarajatlar miqdorini aniqlashda bazaviy yigʻim miqdoriga nisbatan qoʻllaniladigan nisbiy koʻrsatkichlar;

kompleks davlat akkreditatsiyasi — oʻrta maxsus, kasbiy, oliy taʼlimni va oliy taʼlimdan keyingi taʼlimni, shuningdek, kadrlarni qayta tayyorlashni va ularning malakasini oshirishni amalga oshiruvchi davlat va nodavlat taʼlim tashkilotlarini tashqi baholash natijalariga asoslangan jarayon;

maxsus davlat akkreditatsiyasi — oʻrta maxsus, kasbiy, oliy taʼlimni va oliy taʼlimdan keyingi taʼlimni, shuningdek, kadrlarni qayta tayyorlash va ularning malakasini oshirishni amalga oshiruvchi davlat va nodavlat taʼlim tashkilotlarida taʼlim dasturlari boʻyicha oʻquv jarayoni boshlanishidan oldin amalga oshiriladigan jarayon.

3. Oliy taʼlim tashkilotlarini kompleks davlat akkreditatsiyasidan oʻtkazish boʻyicha yigʻim miqdori quyidagi formulaga asosan hisoblanadi:

Bunda:

KA_O — oliy taʼlim tashkilotlarini kompleks davlat akkreditatsiyasidan oʻtkazish boʻyicha yigʻim miqdori;

Y_KO — oliy taʼlim tashkilotlarini kompleks davlat akkreditatsiyasidan oʻtkazish boʻyicha bazaviy yigʻim miqdori;

K_T — talabalar soni koeffitsiyenti;

K_D — dasturlar soni koeffitsiyenti;

Y_K — oliy taʼlim tashkilotining asosiy binosi (binolar majmui, kampus) joylashgan hududdan (Qoraqalpogʻiston Respublikasi, viloyatlar va Toshkent shahri) tashqaridagi har bir oʻquv binosi (binolari majmui, kampus) uchun yigʻim miqdori.

4. Oʻrta maxsus, kasbiy, oliy taʼlimdan keyingi taʼlim hamda kadrlarni qayta tayyorlash va ularning malakasini oshirish tashkilotlarini kompleks davlat akkreditatsiyasidan oʻtkazish boʻyicha yigʻim miqdori quyidagi formulaga asosan hisoblanadi:

Bunda:

KA_B — oʻrta maxsus, kasbiy, oliy taʼlimdan keyingi taʼlim hamda kadrlarni qayta tayyorlash va ularning malakasini oshirish tashkilotlarini kompleks davlat akkreditatsiyasidan oʻtkazish boʻyicha yigʻim miqdori;

Y_KB — oʻrta maxsus, kasbiy, oliy taʼlimdan keyingi taʼlim hamda kadrlarni qayta tayyorlash va ularning malakasini oshirish tashkilotlarini kompleks davlat akkreditatsiyasidan oʻtkazish boʻyicha bazaviy yigʻim miqdori;

K_D — dasturlar soni koeffitsiyenti;

Y_K — oʻrta maxsus, kasbiy, oliy taʼlimdan keyingi taʼlim hamda kadrlarni qayta tayyorlash va ularning malakasini oshirish tashkilotining asosiy binosi (binolar majmui, kampus) joylashgan hududdan (Qoraqalpogʻiston Respublikasi, viloyatlar va Toshkent shahri) tashqaridagi har bir oʻquv binosi (binolari majmui, kampus) uchun yigʻim miqdori.

5. Taʼlim tashkilotlarining taʼlim dasturlarini maxsus davlat akkreditatsiyasidan oʻtkazish boʻyicha yigʻim miqdori quyidagi formulaga asosan hisoblanadi:

Bunda:

MA — taʼlim dasturlarini maxsus davlat akkreditatsiyasidan oʻtkazish boʻyicha yigʻim miqdori;

Y_MB — maxsus davlat akkreditatsiyasi boʻyicha bazaviy yigʻim miqdori;

Y_K — taʼlim tashkilotining asosiy binosi (binolar majmui, kampus) joylashgan hududdan (Qoraqalpogʻiston Respublikasi, viloyatlar va Toshkent shahri) tashqaridagi har bir oʻquv binosi (binolari majmui, kampus) uchun yigʻim miqdori.

6. Arizani koʻrib chiqish uchun bazaviy hisoblash miqdorining ikki baravari miqdorida yigʻim undiriladi.

7. Kompleks va maxsus davlat akkreditatsiyasidan oʻtkazish uchun quyidagi miqdorlarda bazaviy yigʻim undiriladi:

oʻrta maxsus va kasbiy taʼlim tashkilotlarini kompleks davlat akkreditatsiyasidan oʻtkazish uchun — bazaviy hisoblash miqdorining yuz baravari, maxsus davlat akkreditatsiyasidan oʻtkazish uchun (har bir taʼlim dasturi uchun) — bazaviy hisoblash miqdorining oʻn sakkiz baravari;

oliy taʼlim tashkilotlarini kompleks davlat akkreditatsiyasidan oʻtkazish uchun — bazaviy hisoblash miqdorining toʻrt yuz yigirma baravari, maxsus davlat akkreditatsiyasidan oʻtkazish uchun (har bir taʼlim dasturi uchun) — bazaviy hisoblash miqdorining yuz baravari;

oliy taʼlimdan keyingi taʼlim tashkilotlarini kompleks davlat akkreditatsiyasidan oʻtkazish uchun — bazaviy hisoblash miqdorining ikki yuz oʻttiz sakkiz baravari, maxsus davlat akkreditatsiyasidan oʻtkazish uchun (har bir taʼlim dasturi uchun) — bazaviy hisoblash miqdorining sakson olti baravari;

kadrlarni qayta tayyorlash va ularning malakasini oshirish taʼlim tashkilotlarini kompleks davlat akkreditatsiyasidan oʻtkazish uchun — bazaviy hisoblash miqdorining yuz baravari, maxsus davlat akkreditatsiyasidan oʻtkazish uchun (har bir taʼlim dasturi uchun) — bazaviy hisoblash miqdorining oʻn yetti baravari.

8. Davlat akkreditatsiyasidan oʻtkazish uchun amalga oshirilgan barcha yigʻimlar, akkreditatsiya natijasidan qatʼi nazar, taʼlim tashkilotiga qaytarilmaydi.

9. Taʼlim tashkilotini kompleks yoki maxsus davlat akkreditatsiyasidan oʻtkazishda, taʼlim tashkilotining asosiy binosi (binolar majmui, kampus) joylashgan hududdan (Qoraqalpogʻiston Respublikasi, viloyatlar va Toshkent shahri) tashqaridagi har bir oʻquv binosi (binolari majmui, kampus) uchun bazaviy hisoblash miqdorining oʻn ikki baravari miqdorida yigʻim undiriladi.

10. Oliy taʼlim tashkilotini kompleks davlat akkreditatsiyasidan oʻtkazish uchun bazaviy yigʻim miqdori taʼlim tashkilotidagi talabalarning umumiy soniga mutanosib ravishda talabalar soni koeffitsiyentiga koʻpaytirish orqali hisoblanadi.

Bunda koeffitsiyentning boshlangʻich qiymati bir birlik etib belgilanadi hamda sirtqi va masofaviy taʼlim shakllaridagi har bir talaba uchun koeffitsiyentga 0,000016 birlik va boshqa shakllaridagi har bir talaba uchun koeffitsiyentga 0,00004 birlik qoʻshib boriladi.

11. Taʼlim tashkilotlarini kompleks davlat akkreditatsiyasidan oʻtkazishda bazaviy yigʻim miqdori taʼlim dasturlarining umumiy soniga mutanosib ravishda dasturlar soni koeffitsiyentiga koʻpaytirish orqali hisoblanadi.

Bunda koeffitsiyentning boshlangʻich qiymati bir birlik etib belgilanadi hamda har bir taʼlim dasturi uchun koeffitsiyentga 0,01 birlik qoʻshib boriladi.

Taʼlim dasturlarining umumiy sonini aniqlashda oʻrta maxsus taʼlim yoʻnalishlari, kasbiy taʼlimning kasb va mutaxassisliklari, bakalavriat taʼlim yoʻnalishlari, magistratura mutaxassisliklari, oliy taʼlimdan keyingi taʼlim ixtisosliklari hamda qayta tayyorlash va malaka oshirish kurslarining soni inobatga olinadi.

12. Maxsus davlat akkreditatsiyasidan oʻtkazish uchun Oʻzbekiston Respublikasi Vazirlar Mahkamasining 2025-yil 6-avgustdagi 498-son “Oʻrta maxsus, kasbiy, oliy va oliy taʼlimdan keyingi taʼlim, shuningdek, kadrlarni qayta tayyorlash va ularning malakasini oshirish tashkilotlarini kompleks hamda maxsus davlat akkreditatsiyasidan oʻtkazish tizimini joriy etish toʻgʻrisida”gi qarorida belgilangan arizalarni qabul qilish muddatlaridan tashqari boshqa muddatlarda ariza taqdim etilganda, Agentlik va taʼlim tashkiloti oʻrtasida tuziladigan shartnoma shartlariga muvofiq maxsus davlat akkreditatsiyasidan oʻtkazish uchun belgilangan bazaviy yigʻim miqdoriga 1,5 oshiruvchi koeffitsiyent qoʻllaniladi.

13. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgarlikka tortiladilar.