Туманда географик объектларнинг номлари соҳасидаги ишларни тартибга солиш чора-тадбирлари тўғрисида Географик объектларни номлаш ва қайта номлаш масалалари бўйича республика комиссияси мажлисининг 2024 йил 10 майдаги 35-сонли баёни топшириқлари асосида Давлат кадастрлари палатаси туман филиали ва маҳалла фуқаролар йиғинлари масъуллари билан биргаликда ўтказилган хатлов натижасида туманда аниқланган ва тоифаларга ажратилган 576 та кўчаларни номлаш бўйича маҳалла фуқаролар йиғинлари Кенгашларининг таклифлари туман комиссиясининг йиғилишида кўриб чиқилиб, тегишли ҳужжатлар вилоят комиссиясига тақдим этилган.

«Географик объектларнинг номлари тўғрисида»ги Ўзбекистон Республикаси Қонунининг 4-, 6-, 10-моддалари, Вазирлар Маҳкамасининг 2012 йил 16 октябрдаги «Географик объектларнинг номлари соҳасидаги ишларни тартибга солиш чора-тадбирлари ҳақида» 295-сонли қарорига мувофиқ тумандаги маҳалла фуқаролар йиғинларидаги 576 та географик объектлар(кўча)ни номлаш бўйича таклифлар Иқтисодиёт ва молия вазирлиги ҳузуридаги Кадастр агентлиги Географик объектларга ном бериш ва уларни қайта номлаш тўғрисидаги таклифларни давлат экспертизасидан ўтказиш эксперт комиссияси томонидан кўриб чиқилган ва «Географик объектларнинг номлари тўғрисида»ги қонун ҳужжатлари талабларига мувофиқ деб топилиб, экспертиза хулосаси тасдиқланган.

Иқтисодиёт ва молия вазирлиги ҳузуридаги Кадастр агентлигининг 2025 йил 9 октябрдаги 05-19-17582-сонли хати, экспертиза хулосаси ва баёнига асосан туман ҳокимининг ўринбосари М.Абдуллаевнинг ахборотини атрофлича муҳокама қилиб, Ўзбекистон Республикаси «Географик объектларнинг номлари тўғрисида»ги Қонунининг 10-моддаси, «Маҳаллий давлат ҳокимияти тўғрисида»ги Қонуннинг 6- ва 24-моддаларига асосан халқ депутатлари Хатирчи туман Кенгаши қарор қилади:

1. Иқтисодиёт ва молия вазирлиги ҳузуридаги Кадастр агентлигининг 2025 йил 9 октябрдаги 05-19-17582-сонли хати ва экспертиза хулосаси маъқуллансин.

2. Республика эксперт комиссиясининг экспертиза хулосасига асосан қонун ҳужжатлари талабларига мувофиқ деб топилган тумандаги 576 та географик объектлар(кўча)нинг рўйхати 1-иловага;

тумандаги маҳаллаларнинг чегараси, тоифаланган кўчалар номи кўрсатилган хариталар 2-иловага мувофиқ тасдиқлансин.

3. Туман ҳокимининг ўринбосарлари (А.Нарзиев, М.Абдуллаев), Маҳаллалар уюшмаси туман бўлими (В.Авланов), Давлат кадастрлари палатаси туман филиали (Г. Холиқов), Давлат солиқ инспекцияси (А. Келдиёров), Статистика бўлими (А. Хусанов), Иқтисодиёт ва молия бўлими (О. Эрназаров), Давлат хизматлари маркази (Ж. Шодиев) тегишли ташкилотлар билан биргаликда қонун ҳужжатларига мувофиқ деб топилган 576 та географик объектлар(кўча)нинг номи бўйича иш юритиш ҳужжатларига тегишли ўзгартириш ва қўшимчалар киритиш билан боғлиқ барча тадбирларни амалга ошириш вазифаси юклатилсин.

4. Ички ишлар бўлими (О. Рўзимуродов) географик объектлар(кўча)нинг номлари аҳолининг фуқаролик паспортларига тегишли ўзгартиришлар киритиш ишларининг ташкилий равишда амалга оширилиши юзасидан зарур бўлган чора-тадбирларни амалга оширсин.

5. Давлат кадастрлари палатаси туман филиали (Г. Холиқов), Маҳаллалар уюшмаси туман бўлими (В. Авланов), маҳалла фуқаролар йиғинлари раисларига:

мазкур қарорнинг 2-иловаси билан тасдиқланган ҳар бир маҳалланинг чегараси, тоифаланган кўчалар номи кўрсатилган харитасини белгиланган тартибда маҳалла биносига ўрнатиш чораларини кўриш;

географик объектлар(кўча)нинг номланаётганлигини аҳолига тушунтириш, тарғибот-ташвиқот ишларини амалга ошириш;

Ободонлаштириш бошқармаси (Ж. Раҳмонов) билан ҳамкорликда ҳудудлардаги ном берилган кўчаларга уларнинг номлари қайд этилган металл кўрсаткичлар ўрнатиш вазифалари топширилсин.

Белгилансинки, географик объектларнинг номлари соҳасидаги ишларни молиялаштириш маҳаллий бюджет маблағлари ва қонун ҳужжатларида тақиқланмаган бошқа манбалар ҳисобидан амалга оширилади.

6. Туман ҳокимининг ўринбосарлари (А.Нарзиев, М.Абдуллаев), Маҳаллалар уюшмаси туман бўлими (В. Авланов), Иқтисодиёт ва молия бўлими (О.Эрназаров), Давлат кадастрлари палатаси туман филиали (Г. Холиқов) тумандаги маҳалла фуқаролар йиғинлари раислари билан биргаликда маҳалла фуқаролар йиғинларида кўча номлари акс эттирилган пешлавҳаларни белгиланган тартибда ўрнатиш вазифаси топширилсин.

7. Туман ҳокимлиги ахборот хизмати (З.Неъматов) мазкур қарорни «Хатирчи ҳаёти» газетасида эълон қилиш ҳамда туман ҳокимлигининг расмий сайтига жойлаштириш вазифаси юклатилсин.

8. Мазкур қарорнинг бажарилишини назорат қилиш халқ депутатлари туман Кенгашининг Қонунийликни таъминлаш ва коррупцияга қарши курашиш масалалари бўйича доимий комиссияси (А.Боймирзаев), мазкур қарорнинг ижросини таъминлаш Географик объектларга ном бериш ва уларнинг номларини ўзгартириш масалалари бўйича туман комиссияси аъзолари зиммасига юклансин.

9. Мазкур қарор расмий эълон қилинган кундан эътиборан кучга киради.