Oʻzbekiston Respublikasi Hukumati va Sloveniya Respublikasi Hukumati, keyingi oʻrinlarda birgalikda “Ahdlashuvchi Tomonlar” va alohida “Ahdlashuvchi Tomon” deb ataluvchilar;

Ikki davlat oʻrtasidagi munosabatlarni oʻzarolik asosida mustahkamlash istagida;

Oʻzlarining amaldagi diplomatik pasportlarga ega fuqarolarining oʻz hududlari oʻrtasida harakatlanishini osonlashtirish niyatida,

Quyidagi toʻgʻrisida kelishib oldilar:

Mazkur Bitim qoidalariga muvofiq, amaldagi diplomatik pasportlarga ega boʻlgan har bir Ahdlashuvchi Tomon fuqarolariga istalgan bir yuz sakson (180) kunlik muddatda toʻqson (90) kundan ortiq boʻlmagan muddatga boshqa Ahdlashuvchi Tomon hududiga viza rasmiylashtirmagan holda kirishi, tranzit oʻtishi, boʻlishi va undan chiqib ketishiga ruxsat beriladi.

Mazkur Bitim quyidagi toifadagi pasportlarga nisbatan qoʻllaniladi:

1. Oʻzbekiston Respublikasi uchun: amaldagi diplomatik pasportlar;

2. Sloveniya Respublikasi uchun: amaldagi diplomatik pasportlar.

1. Amaldagi diplomatik pasportlarga ega boʻlgan Oʻzbekiston Respublikasi fuqarolari Sloveniya Respublikasi hududida har qanday bir yuz sakson (180) kunlik muddatda toʻqson (90) kundan ortiq boʻlmagan muddatda boʻlishlari mumkin.

2. Amaldagi diplomatik pasportlarga ega boʻlgan Sloveniya Respublikasi fuqarolari Oʻzbekiston Respublikasi hududida istalgan bir yuz sakson (180) kunlik muddatda toʻqson (90) kundan ortiq boʻlmagan muddatda boʻlishlari mumkin.

3. Mazkur Bitim Ahdlashuvchi Tomonlarning amaldagi milliy qonunchiligi va tartibotlariga muvofiq, boʻlish muddatini toʻqson (90) kundan ortiq muddatga uzaytirish imkoniyatiga daxl qilmaydi.

Mazkur Bitim diplomatik vakolatxonalar va konsullik muassasalarining aʼzolarini, shuningdek, boshqa Ahdlashuvchi Tomon hududida joylashgan xalqaro tashkilotlar vakillarini, shu jumladan, ularning amaldagi diplomatik pasportlarga ega boʻlgan qaramogʻidagi oila aʼzolarini qabul qiluvchi Davlat hududiga kirgunga qadar akkreditatsiya qilish uchun viza majburiyatidan ozod etmaydi.

Mazkur Bitimning 2-moddasida koʻrsatilgan pasportlarga ega boʻlgan fuqarolar xalqaro yoʻlovchi tashish uchun moʻljallangan barcha punktlar orqali, har ikki davlatda amaldagi qonunchiligi va tartibotlariga muvofiq, zarur rasmiyatchiliklar bajarilgan taqdirda, boshqa Ahdlashuvchi Tomon hududiga kirishi, tranzit oʻtishi va undan chiqishi mumkin.

Mazkur Bitim hech bir Ahdlashuvchi Tomon fuqarolarini boshqa Ahdlashuvchi Tomon Davlatining hududiga kirishda va uning hududida boʻlishda amaldagi qonunchiligi va tartibotlariga rioya qilish majburiyatidan ozod etmaydi.

Mazkur Bitim persona non grata deb eʼlon qilingan yoki jamoat tartibi yoki milliy xavfsizlik sababli Ahdlashuvchi Tomonlardan birining hududiga kirish va boʻlishning amaldagi shartlarga javob bermagan amaldagi diplomatik pasportlarga ega boʻlgan boshqa Ahdlashuvchi Tomon Davlati fuqarosining oʻz hududlariga kirishini va ularda boʻlishini rad etish yoki boʻlish muddatini qisqartirish yoxud tugatish boʻyicha Ahdlashuvchi Tomonlar huquqlariga daxl qilmaydi.

1. Ahdlashuvchi Tomonlar diplomatik kanallar orqali mazkur Bitim imzolangan sanadan boshlab oʻttiz (30) kundan kechiktirmay, ushbu Bitimning 2-moddasida koʻrsatilgan pasportlar namunalarini diplomatik kanallar orqali almashadilar.

2. Basharti yangi diplomatik pasportlar joriy etilgan yoki amaldagilariga oʻzgartirish kiritilsa, Ahdlashuvchi Tomonlar diplomatik kanallar orqali yangi yoki oʻzgartirilgan pasportlarning namunalarini, shu jumladan, ularning himoya va qoʻllanilish xususiyatlari batafsil tavsifini ular joriy etilishidan kamida oʻttiz (30) kun oldin bir-birlariga taqdim etadilar.

3. Ahdlashuvchi Tomonlar bir-biriga Interpol orqali bevosita yoki bilvosita bekor qilingan diplomatik pasportlar toʻgʻrisidagi maʼlumotlarni taqdim etadilar.

1. Ahdlashuvchi Tomonlar milliy xavfsizlik, jamoat tartibi yoki jamoat sogʻligi sababli Bitimning amal qilishini toʻliq yoki qisman toʻxtatib turishlari mumkin. Har bir Ahdlashuvchi Tomon yetmish ikki (72.) soatdan kechiktirmay boshqa Ahdlashuvchi Tomonni diplomatik kanallar orqali bunday choralar kiritilganligi toʻgʻrisida darhol xabardor qiladi.

2. Toʻxtatib turish boshqa Ahdlashuvchi Tomon hududiga allaqachon kirib kelgan amaldagi diplomatik pasportlarga ega boʻlgan fuqarolarning huquqlariga daxl qilmaydi.

Mazkur Bitim va undan kelib chiqadigan faoliyat Ahdlashuvchi Tomonlarning xalqaro shartnomalardan yoki xalqaro tashkilotlarga aʼzoligidan kelib chiqishi mumkin boʻlgan har qanday majburiyatlarga daxl qilish sifatida talqin etilmasligi lozim.

Mazkur Bitimni talqin qilish yoki amalga oshirishdan kelib chiqadigan har qanday nizo Ahdlashuvchi Tomonlar oʻrtasida diplomatik kanallar orqali maslahatlashuvlar yoki muzokaralar yoʻli bilan doʻstona hal qilinadi.

Mazkur Bitimga Ahdlashuvchi Tomonlarning oʻzaro yozma roziligi bilan istalgan vaqtda oʻzgartirishlar kiritilishi mumkin. Bunday oʻzgartirishlar 13-moddaning 1-bandiga muvofiq kuchga kiradi.

1. Mazkur Bitim Ahdlashuvchi Tomonlar Bitimning kuchga kirishi uchun zarur boʻlgan ichki huquqiy tartib-taomillar bajarilganligi toʻgʻrisida bir-birlarini yozma va diplomatik kanallar orqali xabardor qilganliklari haqidagi bildirishnomalarning oxirgisi olingan sanadan keyingi oyning birinchi kunidan kuchga kiradi.

2. Mazkur Bitim nomuayyan muddatga tuziladi. Har bir Ahdlashuvchi Tomon istalgan vaqtda boshqa Ahdlashuvchi Tomonni yozma ravishda xabardor qilish orqali Bitimni tugatishi mumkin. Bitim bunday xabarnoma qabul qilingandan boshlab toʻqson (90) kun oʻtgach tugatiladi.

Lyublyana shahrida, 2025-yil 22-mayda, ikki asl nusxada, oʻzbek, sloven va ingliz tillarida tuzildi, bunda barcha matnlar teng autentikdir. Talqin qilishda kelishmovchiliklar yuzaga kelgan taqdirda, ingliz tilidagi matn ustuvor hisoblanadi.