Ўзбекистон Республикаси Президентининг 2024 йил 5 январдаги «Қуйи бўғинда сув ресурсларини бошқариш тизимини такомиллаштириш ҳамда сув ресурсларидан фойдаланиш самарадорлигини ошириш чора-тадбирлари тўғрисида»ги ПҚ-5-сонли қарорининг ижросини таъминлаш мақсадида Олот тумани «Сув етказиб бериш хизмати» давлат муассасасининг 2025 йил 22 сентябрдаги 157-сонли хатини инобатга қилиб, «Маҳаллий давлат ҳокимияти тўғрисида»ги Ўзбекистон Республикаси Қонунининг 6- ва 24-моддаларига асосланиб, халқ депутатлари Олот тумани Кенгаши қарор қилади:

1. Ўзбекистон Республикаси Президентининг 2024 йил 5 январдаги «Қуйи бўғинда сув ресурсларини бошқариш тизимини такомиллаштириш ҳамда сув ресурсларидан фойдаланиш самарадорлигини ошириш чора-тадбирлари тўғрисида»ги ПҚ-5-сонли қарори маълумот ва ижро учун қабул қилинсин.

2. Олот тумани «Сув етказиб бериш хизмати» давлат муассасаси директори Ш.Шариповнинг Олот тумани бўйича 2025 йил 1 октябрдан 2026 йил 31 мартга қадар новегетация даврида суғориш ишлари учун ажратиладиган сув лимитлари тўғрисидаги таклифи маъқуллансин ва қуйидаги иловаларга мувофиқ тасдиқлансин:

- Олот туманида 2025-2026 йилларда кузги-қишки мавсумида сув манбаларидан олинадиган чекланган сув миқдори (лимит) 1-иловага мувофиқ;

- Олот туманида 2025-2026 йилларда кузги-қишки мавсумида иқтисодиёт тармоқларида ажратилган чекланган сув миқдори (лимит) 2-иловага мувофиқ;

- Олот тумани "Сув етказиб бериш хизмати" давлат муассасаси томонидан сув истеъмолчиларига 2025-2026 йилларнинг новегетация даврида суғориш ишлари учун ажратилган сув лимитлари тўғрисидаги (октябрь-март) маълумот 3-иловага мувофиқ.

3. Олот тумани ҳокимининг қишлоқ ва сув хўжалиги масалалари бўйича ўринбосари Э.Тошев, туман «Сув етказиб бериш хизмати» давлат муассасаси (Ш.Шарипов)га:

- Ўзбекистон Республикаси Президентининг 2024 йил 5 январдаги «Қуйи бўғинда сув ресурсларини бошқариш тизимини такомиллаштириш ҳамда сув ресурсларидан фойдаланиш самарадорлигини ошириш чора-тадбирлари тўғрисида»ги ПҚ-5-сонли қарори асосида ишларни ташкил этиш;

- белгиланган лимитлар асосида истеъмолчиларга сув етказиб бериш;

- ўзига бириктирилган ҳудудда сувнинг ҳисоби ва ҳисоботини юритиш;

- суғориш тармоқлари ва улардаги гидротехник иншоотларни соз ҳолатда сақлаш, таъмирлаш-тиклаш тадбирларини амалга ошириш;

- сув олиш жойларини сувни бошқариш ва ҳисобга олиш воситалари билан жиҳозлаш, сув мониторинги, ҳисоби ва ҳисоботи юритилишини рақамлаштириш;

- истеъмолчилар кесимида истеъмол қилинган сув ҳажми тўғрисидаги маълумотларни солиқ органларига тақдим этиб бориш;

- сув истеъмолчиларининг буюртманомаси асосида бошқа сув хўжалиги хизматларини кўрсатиш;

- фермер ва деҳқон хўжаликлари ҳамда тадбиркорлик субъектларига сувни тежовчи технологияларининг устунлик тарафлари ва тартиблари бўйича тушунтириш ишларини олиб бориш;

- амалга оширилган ишлар юзасидан халқ депутатлари туман Кенгашига ҳисоботларни ўз вақтида бериб бориш вазифалари юклатилсин.

4. Ушбу қарорнинг ижросини назорат қилиш халқ депутатлари туман Кенгашининг Аграр, сув хўжалиги ва экология масалалари бўйича доимий комиссияси зиммасига юклатилсин.