Ўзбекистон Республикаси Президентининг 2024 йил 5 январдаги «Қуйи бўғинда сув ресурсларини бошқариш тизимини такомиллаштириш ҳамда сув ресурсларидан фойдаланиш самарадорлигини ошириш чора-тадбирлари тўғрисида»ги ПҚ-5-сон қарори ижросини таъминлаш мақсадида ҳамда ушбу масала юзасидан туман «Сув етказиб бериш хизмати» давлат муассасаси директори С.Шукуриллаевнинг ҳисоботини тинглаб ва атрофлича муҳокама қилиб, «Маҳаллий давлат ҳокимияти тўғрисида»ги Ўзбекистон Республикаси Қонунининг 6- ва 24-моддаларига мувофиқ халқ депутатлари туман Кенгаши қарор қилади:

1. Ўзбекистон Республикаси Президентининг 2024 йил 5 январдаги «Қуйи бўғинда сув ресурсларини бошқариш тизимини такомиллаштириш ҳамда сув ресурсларидан фойдаланиш самарадорлигини ошириш чора-тадбирлари тўғрисида»ги ПҚ-5-сон қарори Раҳбарлик ва ижро учун қабул қилинсин.

2. Туман «Сув етказиб бериш хизмати» давлат муассасаси директори С.Шукуриллаевнинг Ўзбекистон Республикаси Президентининг 2024 йил 5 январдаги ПҚ-5-сон қарори ижросини таъминлаш юзасидан берган ҳисоботи маълумот учун қабул қилинсин.

3. Туманда 2025-2026 йилларнинг куз-қиш мавсуми учун новегетасия даврида истеъмолчилар кесимида чекланган сув олиш лимитлари 1, 2, 3 ва 4-14-иловаларга мувофиқ тасдиқлансин.

Бунда, ушбу Кенгаш қарорининг 5, 6, 7, 8, 9, 10, 11, 12, 13 ва 14-иловалари муносиб равишда 4-илованинг давомий қисмлари эканлиги таъкидлаб ўтилсин ҳамда юқоридаги 4-14-иловалар белгиланган тартибда мазкур Кенгаш қарорининг 4-иловаси деб ўқилсин.

4. Туман «Сув етказиб бериш хизмати» давлат муассасаси директори С. Шукуриллаевга:

белгиланган лимитлар асосида истеъмолчиларга сув етказиб бериш;

ўзига бириктирилган ҳудудда сувнинг ҳисоби ва ҳисоботини юритиш;

суғориш тармоқлари ва улардаги гидротехник иншоотларни соз ҳолатда сақлаш, таъмирлаш-тиклаш тадбирларини амалга ошириш;

сув олиш жойларини сувни бошқариш ва ҳисобга олиш воситалари билан жиҳозлаш, сув мониторинги, ҳисоби ва ҳисоботи юритилишини рақамлаштириш;

истеъмолчилар кесимида истеъмол қилинган сув ҳажми тўғрисидаги маълумотларни солиқ органларига тақдим этиб бориш;

сув истеъмолчиларининг буюртманомаси асосида бошқа сув хўжалиги хизматларини кўрсатиш вазифалари юклатилсин.

5. Туман ҳокимининг ўринбосари А.Давронов, туман «Сув етказиб бериш хизмати» давлат муассасаси директори С.Шукуриллаев ва туман солиқ инспекцияси бошлиғи Д.Умаров биргаликда туманда истеъмол қилинган сув миқдори ҳисобини юритмаган (юритишдан бош тортган) қишлоқ хўжалиги маҳсулотлари ишлаб чиқарувчилари учун сув солиғи базаси ушбу халқ депутатлари туман Кенгаши қарорининг иловалари билан тасдиқланган лимитга нисбатан икки баробар оширилган ҳолда ҳисоблаш чораларини кўриб борсинлар.

6. Туман «Сув етказиб бериш хизмати» давлат муассасаси директорининг Ўзбекистон Республикаси Президентининг 2024 йил 5 январдаги ПҚ-5-сон қарори ижроси юзасидан амалга оширилган ишлар тўғрисида бир йилда икки марта халқ депутатлари туман Кенгашига ҳисобот бериб бориши белгилаб қўйилсин.

7. Мазкур Кенгаш қарорининг бажарилишини назорат қилиш халқ депутатлари туман Кенгашининг «Аграр, сув хўжалиги ва экология масалалари бўйича» доимий комиссияси раиси Д.Абдуразақов зиммасига юклансин.