“Oʻzbekkabel” ishlab chiqarish birlashmasidagi ishlarning ahvolini har tomonlama oʻrganish yakunlari shuni koʻrsatadiki, birlashmani yagona ishlab chiqarish-xoʻjalik majmui sifatida boshqarish tizimi amalda batamom vayron qilingan. Tarkibiy boʻlinmalarning faoliyati ustidan nazoratning yoʻqligi statistika hisobotini buzish, moddiy-texnika resurslarini talon-toroj qilish, moliyaviy mablagʻlarni belgilangan maqsadlarga sarflamaslik va valyuta tushumini soliqlardan yashirish kabi koʻpdan-koʻp faktlarga, qonunga xilof ravishda foyda va daromad olish maqsadida xizmat mavqeyini suiisteʼmol qilishga olib keldi.

1993-yilda birlashma ajratilgan resurslar mavjud boʻlgani holda davlat ehtiyojlari uchun mahsulot yetkazib berish topshiriqlarining bajarilishini barbod etdi, 1992-yildan boshlab ishlab chiqarish quvvatlaridan atigi 60 foiz foydalanilmoqda. Birlashma emas, balki uning boʻlinmalari tomonidan toʻgʻridan-toʻgʻri shartnomalar tuzish hollari keng ommalashdi, bunda korxonalarga taqchil kabel hamda boshqa mahsulot evaziga nazoratsiz mavoza (barter) asosida xalq isteʼmol mollari yetkazib berildi.

“Oʻzeltexsanoat” uyushmasi, Oʻzbekiston Respublikasi Davlat mulki qoʻmitasi, Davlat soliq qoʻmitasi va “Oʻzsanoatqurilishbank” tomonidan birlashmaning ishi ustidan taʼsirchan nazoratning yoʻqligi yuqorida koʻrsatib oʻtilgan va boshqa kamchiliklar yuzaga kelishiga imkoniyat yaratdi. Zavod rahbariyati tarkibiy oʻzgartirishlarga oid masalalar xususidagi qonun hujjatlarini qanday bajarayotganligi amalda nazorat qilinmagan, birlashmaning boʻlinmalari shartnomalar tuzish va hisob-kitoblar, ayniqsa, narx belgilash, soliq toʻlovlari va valyuta resurslaridan foydalanish masalalarida amaldagi tartibga qanday rioya etilayotganligi chuqur oʻrganilmagan.

Vazirlar Mahkamasi qaror qiladi:

1. Oʻtkazilgan har tomonlama taftish yakunlari va “Oʻzbekkabel” ishlab chiqarish birlashmasi tarkibiy boʻlinmalarining moliyaviy hamda ishlab chiqarish-xoʻjalik faoliyati jiddiy ravishda buzilganligi faktlari boʻyicha materiallar koʻrib chiqish va qonunga muvofiq choralar koʻrish uchun Oʻzbekiston Respublikasi Prokuraturasiga yuborilganligi maʼlumot uchun qabul qilinsin.

2. “Oʻzeltexsanoat” uyushmasining raisi X. N. Tojiyev zimmasiga Oʻzbekiston Respublikasi Davlat mulki qoʻmitasi, Moliya vazirligi, Davlat soliq qoʻmitasi va “Oʻzsanoatqurilishbank” bilan birgalikda “Oʻzbekkabel” ishlab chiqarish birlashmasida aniqlangan kamchiliklarni bartaraf etish, boshqaruv tizimini takomillashtirish, ishlab chiqarish quvvatlaridan va moddiy resurslardan foydalanish samaradorligini oshirish, birlashmaning eksport imkoniyatini kengaytirish borasidagi chora-tadbirlar majmuini ishlab chiqish va amalga oshirish majburiyati yuklansin. Amalga oshirilayotgan ishlarning borishi va ularning natijalari toʻgʻrisida 1994-yilning oktabrida respublika Hukumatiga maʼlum qilinsin.

3. Oʻzbekiston Respublikasi Adliya vazirligi va Davlat mulki qoʻmitasi “Oʻzeltexsanoat” uyushmasi, “Oʻzbekkabel” ishlab chiqarish birlashmasi bilan birgalikda oʻn kun muddatda ijara shartnomalari va qayta ijaraga berish shartnomalarining Oʻzbekiston Respublikasining amaldagi qonun hujjatlariga muvofiq ekanligini koʻrib chiqsinlar va aniqlangan qonun buzishlarni bartaraf etish choralarini koʻrsinlar.

4. Oʻzbekiston Respublikasi Davlat mulki qoʻmitasi hamda “Oʻzbekkabel” ishlab chiqarish birlashmasi Kengashining “Oʻzbekkabel” ishlab chiqarish birlashmasini 1-ilovaga muvofiq tarkibda ochiq turdagi aksionerlik jamiyati shaklidagi “Oʻzkabel” davlat-aksionerlik birlashmasiga aylantirish toʻgʻrisidagi taklifi qabul qilinsin.

5. Oʻzbekiston Respublikasi Davlat mulki qoʻmitasi:

“Oʻzeltexsanoat” uyushmasi bilan birgalikda ikki oy muddatda mol-mulkni qayta roʻyxatga olsin va baholasin, “Oʻzkabel” davlat-aksionerlik birlashmasini taʼsis etish borasidagi chora tadbirlarni amalga oshirsin;

“Oʻzbekkabel” ishlab chiqarish birlashmasini aksionerlik birlashmasiga aylantirish chogʻida chiqariladigan aksiyalarning kamida 51 foizi davlatda qolishini, 29 foiziga qadari mehnat jamoasiga tegishli boʻlishini, kamida 20 foizi oʻzbekistonlik va xorijiy yuridik hamda jismoniy shaxslarga erkin sotilishini nazarda tutsin.

6. “Oʻzkabel” davlat-aksionerlik birlashmasi ijroiya apparatining tuzilmasi 2-ilovaga muvofiq maʼqullansin. Unda birlashma tarkibiy boʻlinmalari faoliyatini boshqarish vazifalari, shuningdek, moliyaviy mablagʻlar va tovar-moddiy resurslar harakati hisobini yuritish markazlashtirilishi nazarda tutiladi.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari Yu. F. Paygin, V. A. Chjen zimmasiga yuklansin.

1. “Toshkentkabel” zavodi

2. “Paxtakabel” zavodi*

3. “Tovoqsoykabel” zavodi*

4. “Namangankabel” zavodi*

5. Mahsulotni sertifikatsiyalash sinov markazi

Rahbariyat

Marketing boʻlimi

Tahlil va prognoz boʻlimi

Markaziy buxgalteriya, audit bilan birga

Ijtimoiy masalalar, mehnat va ish haqi boʻlimi

Moliya boʻlimi

Mulkiy munosabatlar va aksiyalar boʻlimi

Tashqi iqtisodiy aloqalar boʻlimi

Moddiy-texnika taʼminoti boʻlimi

Bosh mexanik boʻlimi

Bosh energetik boʻlimi

Texnik nazorat boʻlimi

Xavfsizlik texnikasi, mehnatni muhofaza qilish va ekologiya boʻlimi

Kapital qurilish boʻlimi

Ishlab chiqarish-dispetcherlik boʻlimi

Axborot markazi

Yuridik boʻlim

Kadrlar boʻlimi

Maʼmuriy-xoʻjalik boʻlimi

Birinchi boʻlim

Ikkinchi boʻlim