Vazirlar Mahkamasi qayd etadiki, kartoshkachilikni rivojlantirishning ahvoli respublika aholisini oziq-ovqat bilan taʼminlash vazifalariga javob bermaydi. Har yili respublika tashqarisidan koʻp miqdorda oziq-ovqat kartoshkasi va urugʻlik kartoshka xarid qilish uchun koʻp miqdorda moliyaviy, shu jumladan, valyuta mablagʻlarini sarflash davom etmoqda.

Shu bilan birga ilgʻor jamoalarda va fermer xoʻjaliklarda kartoshka yetishtirish tajribasi shuni koʻrsatadiki, Oʻzbekiston Respublikasi aholisini oʻzimizda yetishtirilgan kartoshka bilan taʼminlash uchun barcha shart-sharoitlar mavjuddir. Bu Gollandiya seleksiyasining navli urugʻlaridan va Gollandiya texnologiyasi boʻyicha kartoshka yetishtirishning kompleks modullaridan foydalanish boʻyicha eksperiment natijalari bilan tasdiqlanmoqda.

Yuqorida bayon qilinganlarga muvofiq va kartoshka yetishtirishni koʻpaytirish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq xoʻjaligi vazirligi, “Oʻzmevasabzavotuzumsanoat” konserni, Oʻzbekiston Qishloq xoʻjaligi fanlari akademiyasi bir oy muddatda respublikaning oʻzimizda yetishtirilgan oziq-ovqat kartoshkasi va urugʻlik kartoshkaga boʻlgan ehtiyojini toʻliq taʼminlash uchun 2000-yilgacha boʻlgan davrda kartoshka yetishtirishni koʻpaytirish chora-tadbirlari toʻgʻrisidagi takliflarni ishlab chiqsinlar hamda “Oʻzistiqbolstat” davlat qoʻmitasi bilan kelishgan holda koʻrib chiqish uchun Vazirlar Mahkamasiga kiritsinlar va bunda quyidagilarni nazarda tutsinlar:

kartoshka ekish uchun ajratiladigan yer maydonlarining mahsuldorligini oshirish, urugʻlik materialni, shu jumladan, Gollandiyadan xarid qilinadigan urugʻlik materialni koʻpaytirish va undan maqsadli foydalanish;

kartoshka yetishtirish, uni yigʻishtirib olish, navlarga ajratish va kalibrovka qilishni kompleks mexanizatsiyalash;

oziq-ovqat kartoshkasini va urugʻlik kartoshkani saqlash bazasini rivojlantirish;

oʻsimliklarni himoya qilishning biologik va kimyoviy vositalarini, mineral oʻgʻitlarni qoʻllashni takomillashtirish;

mamlakatimizning oʻzining elita navli kartoshkasini yetishtirish maqsadida seleksiya-urugʻchilik bazasini yaratish, ixtisoslashtirilgan urugʻchilik xoʻjaliklari tashkil etish.

2. 1992-1993-yillarda “Oʻzmevasabzavotuzumsanoat” konserni tomonidan kartoshka yetishtirishni kompleks texnologiyasining 16 moduli sotib olinganligi hamda ular Andijon (4), Namangan (3), Samarqand (2), Toshkent (4), Fargʻona (3) viloyatlari xoʻjaliklarida joylashtirilganligi maʼlumot uchun qabul qilinsin.

3. “Oʻzmevasabzavotuzumsanoat” konserni 16 ta yangi kompleks modullar sotib olsin va 1994-yilda ilgari xarid qilingan 16 modulni ekish materiali, kimyoviy preparatlar va ehtiyot qismlar bilan butlasin, 1-ilovaga* muvofiq ularning respublika xoʻjaliklariga oʻz vaqtida berilishini taʼminlasin;

4. Quyidagi grafiklar tasdiqlansin:

kartoshka yetishtirish kompleks texnologiyasining 16 ta yangi moduli olinishi va ilgari xarid qilingan 16 modulning ekish materiali, kimyoviy preparatlar va ehtiyot qismlar bilan butlanishi 2-ilovaga* muvofiq;

kartoshkaning navli urugʻlarini olish va ekish 3-ilovaga* muvofiq.

5. “AYES” firmasining koʻrsatib oʻtilgan modullarni xarid qilishni mablagʻ bilan taʼminlashga oid quyidagi takliflariga rozilik bildirilsin:

kontrakt qiymatining 2091 ming AQSh dollari miqdoridagi 10 foizi avans tariqasida Respublika valyuta jamgʻarmasidan toʻlanadi;

kontrakt qiymatining 18823 ming AQSh dollari miqdoridagi 90 foizi bankning 1543,4 ming AQSh dollari miqdoridagi yillik foydasi 8,2 foiz boʻlgan kredit stavkasi undirilgan holda 1995-yil oxirigacha qaytarib berish sharti bilan “AYES” firmasi krediti hisobidan mablagʻ bilan taʼminlanadi. Kontrakt qiymatining 9411 ming AQSh dollari miqdoridagi 45 foiziga belgilangan tartibda Oʻzbekiston Respublikasi Tashqi iqtisodiy faoliyat milliy bankining birinchi klassli Yevropa banki tomonidan tasdiqlangan kafolati beriladi. 9412 ming AQSh dollari miqdoridagi qolgan 45 foizga va 1543,4 ming AQSh dollari miqdoridagi bankning kredit stavkasini qoplashga (hammasi boʻlib 10955,4 ming AQSh dollari) Hukumat kafolati beriladi.

6. Oʻzbekiston Respublikasi Tashqi iqtisodiy aloqalar vazirligi:

5 kun muddatda “AYES” firmasi bilan kredit bitimi tuzsin va koʻrsatib oʻtilgan kreditga respublika viloyatlari xoʻjaliklari ixtiyorida qoldiriladigan paxta tolasini sotishdan olingan valyuta tushumi hisobidan xizmat koʻrsatishni tashkil etsin;

“Oʻzmevasabzavotuzumsanoat” konserni “Oʻzmevasabzavotim-peks” tashqi savdo firmasining “AYES” firmasi bilan kompleks modullar xarid qilishga tuzgan kontraktini belgilangan tartibda roʻyxatdan oʻtkazsin.

7. “Oʻzistiqbolstat” davlat qoʻmitasi Oʻzbekiston Respublikasi Qishloq xoʻjaligi vazirligi va “Oʻzmevasabzavotuzumsanoat” konserni bilan kelishgan holda kreditga xizmat koʻrsatish va uni toʻlash uchun 4-ilovaga* muvofiq modullar yuboriladigan viloyatlar xoʻjaliklari ixtiyorida qoldiriladigan paxta tolasi hisobidan paxta tolasini markazlashtirilgan eksport qilish prognoziga 1994-yilda — 2,04 ming tonna paxta tolasini, 1995-yil prognoziga — 1994-yil hosilidan 14,74 ming tonna va 1995-yil hosilidan 4,34 ming tonna paxta tolasini qoʻshimcha ravishda kiritsin.

8. “Oʻzmevasabzavotuzumsanoat” konserni “AYES” (Gollandiya) firmasi kreditiga xizmat koʻrsatish va uni toʻlash uchun ajratiladigan paxta tolasi hajmlari milliy valyutada toʻlanishini hamda avans toʻlovi miqdoridagi summani Respublika valyuta jamgʻarmasiga qaytarilishini taʼminlasin.

9. Toshkent viloyati hokimligi, “Oʻzmevasabzavotuzumsanoat” konserni 5 kun muddatda kartoshkaning navli urugʻligini yetishtirish boʻyicha Gollandiya fermasini tashkil etish uchun 300 ga yerni uzoq muddatli ijaraga olishga “AYES” firmasi bilan Ohangaron tumanidagi “Oʻzbekiston” jamoa xoʻjaligi oʻrtasida tuzilgan shartnomani belgilangan tartibda rasmiylashtirsinlar. “Oʻzmevasabzavotuzumsanoat” konserni Gollandiya firmasi tomonidan yetishtirilgan kartoshkaning navli urugʻini 5-ilovaga* muvofiq har yili sotib olishga “AYES” firmasi bilan kontrakt tuzsin.

Kartoshkaning xarid qilingan urugʻligi Gollandiya texnologiyasi boʻyicha kartoshka yetishtirishning kompleks modulini joriy etayotgan xoʻjaliklarga keyinchalik koʻpaytirish uchun berilsin.

10. “Oʻzmevasabzavotuzumsanoat” konserni, Oʻzbekiston Respublikasi Qishloq xoʻjaligi vazirligi “EAS” firmasi bilan birgalikda shu yil iyul oyida qishloq xoʻjaligi organlari va korxonalarning rahbarlarini, olimlarni taklif etgan holda kartoshka va sabzavot ekinlari yetishtirishning Gollandiya texnologiyasini joriy etish masalalari boʻyicha seminar oʻtkazsinlar.

11. Oʻzbekiston Respublikasi Prokuraturasi, Ichki ishlar vazirligi Gollandiyadan xarid qilinadigan kartoshkaning Navli urugʻlari va kompleks modullar saqlanishi, ulardan maqsadli foydalanilishi ustidan nazoratni kuchaytirsinlar.

12. Ommaviy axborot vositalari ilgʻor xoʻjaliklarning Gollandiya texnologiyasi boʻyicha kartoshka yetishtirishga doir yutuqlarini keng yoritsinlar.

13. “Oʻzmevasabzavotuzumsanoat” konserni, Oʻzbekiston Respublikasi Qishloq xoʻjaligi vazirligi Oʻzbekiston Respublikasi Vazirlar Mahkamasiga:

Gollandiyadan kartoshkaning navli urugʻligini va kompleks modullarni keltirish natijalari toʻgʻrisida 1994-yil 25-iyulgacha;

yetishtirilgan kartoshka hosili natijalari toʻgʻrisida — 1994-yil 1-dekabrgacha axborot bersinlar.

14. Vazirlar Mahkamasining dehqonchilik sanoati majmui boʻlimida respublika xoʻjaliklarida kartoshka yetishtirish boʻyicha Gollandiya texnologiyasini joriy etish bilan bogʻliq ishlarni nazorat qilishni va muvofiqlashtirishni taʼminlash uchun 3 mutaxassis (shoʻba mudiri, katta ekspert, ekspert)dan iborat shoʻba tashkil etilsin.

Moliya vazirligi koʻrsatib oʻtilgan maqsadlar uchun qoʻshimcha ravishda xodimlar va mablagʻ ajratsin.

Shoʻba rahbari har oyda respublika Hukumatiga mazkur qarorning qanday bajarilayotganligi va kartoshka yetishtirishning Gollandiya texnologiyasini joriy etishning ahvoli toʻgʻrisida hisobot taqdim etsin.

15. Mazkur qarorning bajarilishini nazorat qilish Bosh vazirning birinchi oʻrinbosari I. H. Joʻrabekov zimmasiga yuklansin.