Vazirlar Mahkamasi qaror qiladi:

1. Quyidagilar:

Oʻzbekiston Respublikasi Qishloq va suv xoʻjaligi vazirligi Mashina va asbob-uskunalarning texnikaviy holatini nazorat qilish davlat bosh inspeksiyasi toʻgʻrisidagi nizom 1-ilovaga muvofiq;

mulkchilik shakllaridan qatʼi nazar, xoʻjaliklar, korxonalar va tashkilotlardan, xususiy tadbirkorlardan, jismoniy shaxslardan traktorlarni, boshqa mashinalarni texnikaviy koʻrikdan va roʻyxatdan hamda mexanizatorlarni attestatsiyadan oʻtkazish uchun “Davtexnazorat” inspeksiyalari tomonidan undiriladigan yigʻimlar roʻyxati 2-ilovaga muvofiq tasdiqlansin.

2. Oʻzbekiston SSR Ministrlar Sovetining 1969-yil 16-apreldagi 178-son va 1976-yil 19-yanvardagi 36-son qarorlari oʻz kuchini yoʻqotgan deb hisoblansin.

1. Qishloq xoʻjaligi mashina va asbob-uskunalarining texnikaviy holatini nazorat qilish Oʻzbekiston Respublikasi Qishloq va suv xoʻjaligi vazirligi Mashina va asbob-uskunalarning texnikaviy holatini nazorat qilish davlat bosh inspeksiyasi (“Boshdav-texnazorat”) tomonidan tasarrufidagi organlar orqali amalga oshiriladi, unga quyidagilar kiradi:

Qoraqalpogʻiston Respublikasi Vazirlar Kengashi, viloyatlar hokimliklari huzuridagi “Davtexnazorat” boʻlimlari;

tuman va shahar hokimliklari huzuridagi “Davtexnazorat”ning tuman va shahar inspeksiyalari.

“Davtexnazorat” tuman inspeksiyalarining xodimlari soni belgilangan tartibda xoʻjaliklar, korxonalar va tashkilotlarda mavjud boʻlgan har 600—800 traktor, don oʻrish-yigʻish kombayni, paxta terish mashinasi, makkajoʻxori oʻrish-yigʻish kombaynlari hamda boshqa oʻzi yurar shassilar hisobiga bir nafar muhandis-inspektor hisobidan belgilanadi.

2. “Boshdavtexnazorat”, “Davtexnazorat” boʻlimlari, inspeksiyalarini:

Oʻzbekiston Respublikasi Qishloq va suv xoʻjaligi vazirligida — ayni vaqtda davlat bosh muhandis-inspektori hisoblanadigan “Boshdavtexnazorat” boshligʻi;

Qoraqalpogʻiston Respublikasida, viloyatlarda — ayni vaqtda Qoraqalpogʻiston Respublikasi Vazirlar Kengashi, viloyat hokimliklari huzuridagi ayni vaqtda davlat bosh muhandis-inspektorlari hisoblanadigan boʻlim boshliqlari;

tumanlar, shaharlarda — tuman, shahar inspeksiyalari boshliqlari — tuman, shahar hokimliklari huzuridagi davlat bosh muhandis-inspektorlari boshqaradilar.

Qoraqalpogʻiston Respublikasi va viloyatlar “Davtexnazorat” boʻlimlari boshliqlari belgilangan tartibda Oʻzbekiston Respublikasi Qishloq va suv xoʻjaligi vazirligining “Boshdavtexnazorat” bilan kelishilgan holda Qoraqalpogʻiston Respublikasi Vazirlar Kengashi va viloyatlar hokimliklari tomonidan lavozimga tayinlanadilar va lavozimdan ozod qilinadilar, “Davtexnazorat”ning tuman va shahar inspeksiyalari boshliqlari “Davtexnazorat”ning viloyat boʻlimi bilan kelishilgan holda tuman va shahar hokimliklari tomonidan lavozimga tayinlanadilar va lavozimdan ozod qilinadilar.

3. “Boshdavtexnazorat” bevosita Oʻzbekiston Respublikasi Qishloq va suv xoʻjaligi vaziriga boʻysunadi.

4. “Boshdavtexnazorat”, Qoraqalpogʻiston Respublikasi Vazirlar Kengashining, viloyat hokimliklarining “Davtexnazorat” boʻlimlari yuridik shaxs hisoblanadilar, bank muassasalarida hisob-kitob, joriy va boshqa schyotlarga, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga hamda shtampga, “Davtexnazorat”ning tuman inspeksiyalari oʻz nomi yozilgan yumaloq muhrga ega boʻladilar.

5. “Davtexnazorat” organlari diagnostika asboblari, moslamalar va jihozlanganlik tabeliga muvofiq nomenklatura boʻyicha anjom bilan jihozlangan avtomobillar bilan taʼminlanadi.

6. Mashina va asbob-uskunalarning texnikaviy holatini nazorat qilish boʻyicha ishlarni oʻtkazishda korxona va tashkilotlar tekshirishlar vaqtida “Davtexnazorat” organlarining davlat muhandis-inspektorlariga zarur yordam koʻrsatadilar.

7. “Davtexnazorat” organlari ishlarni xoʻjaliklarning, korxonalar va tashkilotlarning keng faollariga, shuningdek shtatsiz muhandis-inspektorlarga tayangan holda, davlat organlari, jamoat tashkilotlari bilan oʻzaro hamkorlikda oʻtkazadilar.

8. “Davtexnazorat” organlari quyidagilar boʻyicha davlat nazoratini amalga oshiradilar:

idoraviy boʻysunishidan qatʼi nazar, xoʻjaliklar, korxonalar va tashkilotlardagi traktorlar, kombaynlar va boshqa qishloq xoʻjaligi mashinalari hamda texnologik asbob-uskunalarning texnikaviy holati, shuningdek texnikaviy ishlatish, saqlash va hisobdan chiqarish qoidalariga rioya etish;

xoʻjaliklar, korxonalar va tashkilotlarda, shuningdek “Oʻzqishloqxoʻjaliktaʼminottuzatish” davlat-kooperativ qoʻmitasining xoʻjaliklar bilan shartnomalar boʻyicha mashina va asbob-uskunalarni taʼmirlovchi hamda ularga texnika xizmati koʻrsatuvchi tashkilotlarida, ixtisoslashgan taʼmirlash ustaxonalari, zavodlarida traktorlar, kombaynlar, boshqa qishloq xoʻjaligi mashinalari, texnologik va chorvachilik asbob-uskunalarini (“Oʻzsanoatkontexnazorat” davlat qoʻmitasi nazoratidagi asbob-uskunalardan tashqari) taʼmirlash hamda ularga texnika xizmati koʻrsatish sifati;

xoʻjaliklar, korxonalar va tashkilotlarga sotilgan yoki shartnomalar boʻyicha ular uchun taʼmirlangan traktorlar, avtomobillar, kombaynlar hamda boshqa mashina va asbob-uskunalardagi kafolatli muddat mobaynida aniqlangan kamchiliklarni bartaraf etishning tasdiqlangan tartibiga; xususiy tadbirkorlar va jismoniy shaxslarning qishloq xoʻjaligi texnikasini roʻyxatdan oʻtkazish, texnikaviy ishlatish va xavfsizlik texnikasi qoidalariga rioya etish.

9. “Davtexnazorat” organlari oʻzlariga yuklangan vazifalarni bajarish maqsadida:

a) xoʻjaliklar, korxonalar va tashkilotlarda taʼmirlash ustaxonalarining hamda qishloq xoʻjaligi mashinalari va asbob-uskunalarini taʼmirlashga, ularga texnika xizmati koʻrsatishga moʻljallangan boshqa turgʻun va koʻchma obyektlarning holatini, shuningdek ularning zarur texnologik asbob-uskunalar, oʻlchash asboblari, anjomlar va moslamalar bilan taʼminlanganligini tekshiradilar;

b) qishloq xoʻjaligi mashinalari va asbob-uskunalarining, shu jumladan chorvachilik mashinalari va asbob-uskunalarining texnikaviy holatini, ularni texnikaviy ishlatish, ularga texnika xizmati koʻrsatish, ularni taʼmirlash, saqlash va hisobdan chiqarish qoidalariga, shuningdek kafolat muddati mobaynida mashina va asbob-uskunalarda aniqlangan kamchiliklarni bartaraf qilishning tasdiqlangan qoidasiga rioya etilishini tekshiradilar;

v) mashina va asbob-uskunalar uchun ehtiyot qismlarning saqlanish holatini tekshiradilar;

g) yuqori organlarga, idoralarga va shu kabilarga ular tomonidan qishloq xoʻjaligi mashina va asbob-uskunalarining texnikaviy tayyorligini oshirish, texnikaviy ishlatilishini va taʼmirlanishini yaxshilash masalalari boʻyicha tashkiliy-texnikaviy tadbirlar rejalarini, yoʻriqnomalar, tavsiyanomalar va boshqa hujjatlarni ishlab chiqish uchun belgilangan tartibda takliflar tayyorlaydilar;

d) qishloq xoʻjaligi texnikasi, mashina va asbob-uskunalarini texnikaviy ishlatish, saqlash, taʼmirlash va texnika xizmati koʻrsatishni tashkil etishdagi ilgʻor tajribani yoyishga koʻmaklashadilar;

e) boʻysunishiga koʻra “Davtexnazorat” organlari ishi toʻgʻrisida axborotlar taqdim etadilar.

10. “Davtexnazorat” organlarining davlat muhandis-inspektorlari qishloq xoʻjaligi texnikasi, mashina va asbob-uskunalarini tekshirishni tekshirilayotgan xoʻjaliklar, korxonalar va tashkilotlar, ixtisoslashtirilgan taʼmirlash ustaxonalari, taʼmirlash zavodlari, savdo bazalari va boshqa tashkilotlar vakillari ishtirokida amalga oshiradilar.

11. Qishloq xoʻjaligi mashina va asbob-uskunalarini texnikaviy ishlatish, saqlash, hisobdan chiqarish, taʼmirlash, ularga texnika xizmati koʻrsatish qoidalari buzilishlarini tekshirishda kamchiliklar aniqlangan barcha hollarda “Davtexnazorat” davlat muhandis-inspektorlari aniqlangan qoida buzilishlarini bartaraf etish toʻgʻrisida buyruq yozishga majburdirlar, biron-bir moddiy zarar yetkazilgan hollarda esa dalolatnoma ham tuziladi va aybdor shaxslardan amaldagi qonunchilikka muvofiq zarar summasi belgilangan tartibda undirib olinadi.

12. “Davtexnazorat” tuman, shahar inspeksiyalari zimmasiga bulardan tashqari quyidagilar ham yuklanadi:

a) idoraviy boʻysunishidan qatʼi nazar, xoʻjaliklar, korxonalar va tashkilotlarga, shuningdek fermerlarga, kooperativlarga, shaxsiy qishloq xoʻjaligi texnikasiga ega boʻlgan fuqarolarga traktorlar, oʻziyurar shassi va traktor tirkamalari uchun, ularni roʻyxatdan oʻtkazib, belgilangan tartibda yagona nomer belgilari, texpasportlar berish;

b) mulkchilik shakllaridan qatʼi nazar, korxonalar va tashkilotlardan, xususiy tadbirkorlardan, jismoniy shaxslardan traktorlarni, boshqa mashinalarni texnikaviy koʻrikdan va roʻyxatdan hamda mexanizatorlarni attestatsiyadan oʻtkazganlik uchun yigʻimlar undirish;

v) traktorchi-mashinistlarni attestatsiyadan oʻtkazish boʻyicha tuman malaka belgilash komissiyalari ishiga va ularga belgilangan namunadagi guvohnomalar berishga rahbarlik qilish;

g) mulkchilik shakllaridan qatʼi nazar, korxonalar va tashkilotlarning, xususiy tadbirkorlarning, jismoniy shaxslarning ular uchun sotilgan yoki taʼmirlangan qishloq xoʻjaligi texnikasi sifatining zarur darajadaligi masalasiga doir eʼtirozlarini koʻrib chiqish boʻyicha komissiyalarda qatnashish.

13. Tuman davlat bosh muhandis-inspektori xoʻjaliklar, korxonalar va tashkilotlardagi qishloq xoʻjaligi va yer qazish texnikasini koʻrikdan oʻtkazish hamda amortizatsiya muddatlari oʻtgungacha halokatlar yoki tabiiy ofatlar oqibatida yaroqsiz holga kelgan texnika va asbob-uskunalarning ishlatishga yaroqsizligi va ularni tiklab boʻlmasligi haqida xulosalar berish zimmasiga yuklanadigan komissiyaga boshchilik qiladi.

14. “Davtexnazorat” organlarining davlat muhandis-inspektorlari zimmalariga yuklangan vazifalarni bajarish maqsadida quyidagi huquqlarga egadirlar:

a) traktorlar, kombaynlar, boshqa qishloq xoʻjaligi mashinalari, asbob-uskunalarining texnikaviy holatini koʻrikdan oʻtkazish hamda ularni texnikaviy ishlatish, saqlash, hisobdan chiqarish, ularga texnika xizmati koʻrsatish va taʼmirlash qoidalariga rioya etilishini, shuningdek ularning taʼmirlash sifatini tekshirish uchun xoʻjaliklar, korxonalar va tashkilotlar, ixtisoslashtirilgan taʼmirlash ustaxonalari, taʼmirlash zavodlari, taʼmirlash-ishlab chiqarish, qayta ishlash korxonalari, savdo bazalarining ishlab chiqarish obyektlariga, shu jumladan yangi va taʼmirlangan qishloq xoʻjaligi texnikasi, taʼmirlash fondi hamda ehtiyot qismlar saqlanadigan maydonchalarga kirish va tegishli qishloq xoʻjaligi mashinalari, asbob-uskunalarini koʻrikdan oʻtkazishga koʻrsatishni talab qilish;

b) xoʻjaliklar, korxonalar va tashkilotlarning, shuningdek ushbu xoʻjaliklar bilan shartnomalar boʻyicha traktorlar, kombaynlar, boshqa qishloq xoʻjaligi mashinalari va asbob-uskunalarini taʼmirlovchi hamda ularga texnika xizmati koʻrsatuvchi tashkilotlar va korxonalarning mansabdor shaxslaridan “Davtexnazorat” organlari vakolatiga kiritilgan masalalarni hal etish uchun zarur boʻlgan maʼlumotlar va hujjatlarni olish;

v) traktorlar, kombaynlar, boshqa qishloq xoʻjaligi mashinalari, asbob-uskunalaridan, shu jumladan chorvachilikdagilardan foydalanish qoidalari buzilishlarini bartaraf etish toʻgʻrisida qishloq xoʻjaligi texnikasi va asbob-uskunalarini taʼmirlash hamda texnika xizmati koʻrsatish tashkilotlari va korxonalari rahbarlari uchun majburiy boʻlgan koʻrsatmalar berish;

g) holati texnika xizmati koʻrsatishni, taʼmirlashni talab qiladigan yoki ishlash xavfsizligini taʼminlamaydigan traktorlar, kombaynlarni hamda boshqa qishloq xoʻjaligi mashinalari va asbob-uskunalarini ishlatishni taqiqlash;

d) traktorlar, kombaynlar, boshqa qishloq xoʻjaligi mashinalari va asbob-uskunalaridan jinoyatkorona ehtiyotsizlik bilan foydalanish, ularni saqlash, hisobdan chiqarish, taʼmirlash, ularga texnika xizmati koʻrsatish faktlari toʻgʻrisidagi materiallarni, aybdor shaxslarni javobgarlikka tortish uchun, hokimliklarga, qishloq xoʻjaligi organlariga yuborish;

e) qishloq xoʻjaligi mashina va asbob-uskunalarining zarur texnikaviy holatda boʻlishini taʼminlashda, ularni texnikaviy ishlatishni yaxshilashda, qishloq xoʻjaligida neft mahsulotlarini saqlashda va tejam bilan sarflashda namuna koʻrsatgan xodimlarni ragʻbatlantirish toʻgʻrisida xoʻjaliklar va ularning yuqori organlari rahbarlariga takliflar kiritish.

15. “Boshdavtexnazorat” mansabdor shaxslari qishloq xoʻjaligi mashina va asbob-uskunalarini texnikaviy ishlatish qoidalarini qoʻpol ravishda buzganlik hamda boshqa qoida buzishlar uchun aybdor shaxslarni Oʻzbekiston Respublikasi Maʼmuriy javobgarlik toʻgʻrisidagi Kodeksning 112 va 139-moddalariga muvofiq maʼmuriy javobgarlikka tortishga haqlidirlar.

16. “Davtexnazorat” xizmati muhandis-inspektorlari oʻz zimmalariga yuklangan vazifalarni bajarmaganlik uchun amaldagi qonunchilikka muvofiq javob beradilar.