«Маҳаллий давлат ҳокимияти тўғрисида»ги Ўзбекистон Республикаси Қонуни 6 , 24-моддалари, Ўзбекистон Республикаси Президентининг 2020 йил 29 сентябрдаги «Маиший ва қурилиш чиқиндилари билан боғлиқ ишларни бошқариш тизимини янада такомиллаштириш чора-тадбирлари тўғрисида»ги ПҚ-4845-сон қарори 4-банди, 2024 йил 4 январдаги «Чиқиндиларни бошқариш тизимини такомиллаштириш ва уларнинг экологик вазиятга салбий таъсирини камайтириш бўйича чора-тадбирлар тўғрисида»ги ПФ-5-сонли Фармони, вилоят ҳокимлигининг 2025 йил 23 майдаги 3/1216-01-03-сонли хати, вилоят иқтисодиёт ва молия бош бошқармасининг 2025 йил 5 майдаги (03/07-32/111, 03/07-32/112, 03/07-38/530, 03/07-38/531-сонли) хулосалари, Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Чиқиндиларни бошқариш ва циркуляр иқтисодиётни ривожлантириш агентлигининг 2025 йил 8 майдаги 03-/901-сонли хатига асосан ҳамда ҳудудларнинг экологик ва санитария ҳолатини янада яхшилаш мақсадида халқ депутатлари вилоят Кенгаши қарор қилади:

1. Чиқиндиларни бошқариш ва циркуляр иқтисодиётни ривожлантириш Агентлиги вилоят бошқармаси бошлиғи в.б. А.Мирзарахимовнинг Бухоро вилояти ҳудудида маиший чиқиндиларни тўплаш ва олиб чиқиб кетиш ҳамда қабул қилиш ва сақлаш бўйича хизмат кўрсатиш учун мажбурий тўлов тарифлари юзасидан тақдимоти маълумот учун қабул қилинсин.

2. Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Чиқиндиларни бошқариш ва циркуляр иқтисодиётни ривожлантириш агентлиги ҳамда вилоят иқтисодиёт ва молия бош бошқармасининг вилоят ҳудудида маиший чиқиндиларни тўплаш ва олиб чиқиб кетиш бўйича хизмат кўрсатиш учун мажбурий тўлов тарифлари юзасидан берилган таклифлари инобатга олинсин.

3. Бухоро вилояти ҳудудида маиший чиқиндиларни тўплаш ва олиб чиқиб кетиш бўйича хизмат кўрсатиш учун мажбурий тўлов тарифлари миқдори иловага мувофиқ тасдиқлансин.

4. Экология, атроф-муҳитни муҳофаза қилиш ва иқлим ўзгариши вазирлиги ҳузуридаги «Чиқинди полигонларини бошқариш дирекцияси» давлат муассасаси Бухоро вилояти ҳудудий бошқармаси томонидан ҳудудий полигонларда маиший чиқиндиларни қабул қилиш ва сақлаш бўйича тўловлар қуйидаги:

1 метр куб маиший чиқиндиларни қабул қилиш ва сақлаш хизмати учун 17 900 (ўн етти минг тўққиз юз ) сўм (ҚҚС билан бирга);

1 тонна маиший чиқиндиларни қабул қилиш ва сақлаш хизмати учун 40 300 (қирқ минг уч юз) сўм (ҚҚС билан бирга) миқдорда белгилансин.

5. Вилоят экология, атроф-муҳитни муҳофаза қилиш ва иқлим ўзгариши бошқармаси (Ж.Носиров), вилоят санитария-эпидемиология осойишталиги ва жамоат саломатлиги бошқармаси (А.Тўхтаев) шаҳар ва туман ҳокимликлари билан биргаликда экологик вазиятни яхшилаш, чиқиндиларнинг инсонлар соғлиғига зарарли таъсирини олдини олиш, табиий ресурслардан оқилона фойдаланиш, санитария ва экологик ҳолат сифатини ошириш чораларини кўриб борсин.

6. Чиқиндиларни бошқариш ва циркуляр иқтисодиётни ривожлантириш Агентлигининг вилоят бошқармаси (А.Мирзарахимов) туман ва шаҳар ҳокимликлари ҳамда тегишли ташкилотлар билан биргаликда:

бир ой муддатда ҳудудлар, бинолар ва иншоотлар нинг қаттиқ маиший чиқиндилар билан ифлосланишининг олдини олиш мақсадида жисмоний ва юридик шахсларнинг талабларини ўрганиб чиқиб, қўшимча қаттиқ маиший чиқиндиларни тўплаш ва вақтинча сақлаш учун мўлжалланган махсус чиқинди қутилари жойлаштирилишини;

қаттиқ маиший чиқиндиларни тўплаш ва олиб чиқиш хизматлари учун аҳоли томонидан мажбурий тўловларни тўлаш ва ҳисобини юритиш ишларини ягона электрон тизим орқали амалга оширилишини;

Ўзбекистон Республикаси Президентининг 2019 йил 17 апрелдаги «2019-2028 йиллар даврида Ўзбекистон Республикасида қаттиқ маиший чиқиндилар билан боғлиқ ишларни амалга ошириш стратегиясини тасдиқлаш тўғрисида»ги ПҚ-4291-сон қарори ижросини таъминлаш мақсадида Пешку тумани «Ўғлон» МФЙ ҳудудидаги чиқинди полигони ўрнига қаттиқ маиший чиқиндиларни қайта юклаш станцияси ташкил этилишини таъминласин.

7. Халқ депутатлари Бухоро вилоят Кенгашининг 2023 йил 14 декабрдаги VI-88-95-2-0-К/23-сонли қарори ҳамда Бухоро вилоят ҳокимининг 2024 йил 6 февралдаги 62-2-0-Қ/24-сонли қарори ўз кучини йўқотган деб ҳисоблансин.

8. Мазкур қарор «Бухоронома» ва «Бухарский вестник» газеталарида эълон қилинсин ҳамда вилоят ҳокимлигининг расмий веб-сайтига жойлаштирилсин.

9. Ушбу қарорнинг бажарилишини назорат қилиш халқ депутатлари вилоят Кенгашининг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси зиммасига юклатилсин.

10. Мазкур қарор 2025 йил 1 августдан эътиборан кучга кириши белгилансин.