Oʻzbekiston Respublikasi Prezidentining 2024-yil 19-apreldagi PF-68-son “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida”gi Farmoni hamda Oʻzbekiston Respublikasi Vazirlar Mahkamasining 2024-yil 6-dekabrdagi 814-son “Oʻzbekiston Respublikasi Prezidentining “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida” 2024-yil 19-apreldagi PF-68-son Farmoni ijrosini taʼminlash chora-tadbirlari toʻgʻrisida”gi qaroriga muvofiq buyuraman:

1. Stavkalar va oʻyinchilarning yagona davlat registri toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Ushbu Nizom Stavkalar va oʻyinchilarning yagona davlat registrini yuritish tartibini belgilaydi.

1. Ushbu Nizomda quyidagi asosiy tushunchalar qoʻllaniladi:

Stavkalar va oʻyinchilarning yagona davlat registri (bundan buyon matnda Registr deb yuritiladi) — mazkur Nizomda belgilangan vazifa va funksiyalarni bajarish uchun Registr operatori tomonidan yuritiladigan axborot tizimi va (yoki) dasturiy-apparat vositalar majmui;

Registr operatori — “Davlat axborot tizimlarini yaratish va qoʻllab-quvvatlash boʻyicha yagona integrator “UZINFOCOM” MCHJ;

hisob-kitob kliring palatasi (bundan buyon matnda HKKP deb yuritiladi) — kliring, pul mablagʻlarining hisobi va kliring ishtirokchilari oʻrtasidagi hisob-kitoblarni taʼminlovchi Registr operatorining tarkibiy boʻlinmasi;

kliring — kliring ishtirokchilarining oʻzaro majburiyatlarini belgilash, aniqlashtirish va hisobga olishga doir operatsiyalar majmuasi, shuningdek ular oʻrtasidagi oʻzaro hisob-kitoblar;

oʻyinlar tashkilotchisi — Internet butunjahon axborot tarmogʻidagi tavakkalchilikka asoslangan oʻyinlarni, lotereyalarni tashkil etish va (yoki) bukmekerlik faoliyatini amalga oshirish uchun tegishli litsenziya olgan Oʻzbekiston Respublikasining rezidenti boʻlgan yuridik shaxs;

virtual hisobvaraq — kliring boʻyicha operatsiyalarni amalga oshirish uchun Registr operatorining HKKPda ochilgan maxsus hisobvaragʻi;

HKKP ikkilamchi hisobvaragʻi — Registr operatorining xizmat koʻrsatuvchi bankida ochilgan, oʻyinchilar va oʻyin tashkilotchisining mablagʻlarini saqlash hamda stavka qilish maqsadida pul mablagʻlarini qabul qilish va yutuqlarni toʻlash boʻyicha operatsiyalarni amalga oshirishga moʻljallangan Registr operatorining ikkilamchi depozit hisobvaraqlari;

kliring ishtirokchisi — mazkur Nizomda belgilangan tartibda HKKPda roʻyxatdan oʻtgan oʻyinlar tashkilotchilari va oʻyinchilar;

Roʻyxat — terrorizmga, ommaviy qirgʻin qurolini tarqatishga qarshi kurashishni amalga oshiruvchi davlat organlari va Oʻzbekiston Respublikasining boshqa vakolatli organlaridan taqdim etilayotgan maʼlumotlar, shuningdek chet davlatlarning vakolatli organlari va xalqaro tashkilotlaridan rasmiy kanallar orqali taqdim etilayotgan maʼlumotlar asosida maxsus vakolatli davlat organi tomonidan tuzilgan terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxati;

cheklovlar roʻyxati — vakolatli organ tomonidan belgilanadigan Internet tarmogʻidagi tavakkalchilikka asoslangan oʻyinlar, lotereya va bukmekerlik garovlarida qatnashishi taqiqlangan Oʻzbekiston Respublikasining fuqarolari va chet el fuqarolarining toifalari roʻyxati;

tavakkalchilikka asoslangan oʻyinlarga qaram boʻlgan shaxslar roʻyxati (bundan buyon matnda qaram shaxslar roʻyxati deb yuritiladi) — vakolatli organ tomonidan oʻyinchining arizasiga binoan 6 oydan 5 yilgacha boʻlgan muddatga yoki uning yaqin qarindoshlarining arizasiga binoan sud qaroriga koʻra 5 yil muddatga kiritiladigan shaxslar roʻyxati;

foydalanuvchining individual raqami (bundan buyon matnda FIR deb yuritiladi) — kliring ishtirokchisiga beriladigan noyob kod;

vakolatli organ — Oʻzbekiston Respublikasi Istiqbolli loyihalar milliy agentligi;

masʼuliyatli oʻyin tamoyili — oʻyin tashkilotchilari tomonidan oʻyinchilarning Internet butunjahon axborot tarmogʻidagi tavakkalchilikka asoslangan oʻyinlar, lotereyalar va bukmekerlik garovlarida (bundan buyon matnda oʻyinlar deb yuritiladi) ishtirok etishining salbiy oqibatlarini oldini olish va minimallashtirish boʻyicha chora-tadbirlarni amalga oshirishni, shuningdek oʻyinchilar uchun oʻzini oʻzi cheklash va nazorat qilishga qaratilgan chora-tadbirlarni, oʻyinchilarni oʻyinlarda ishtirok etish xavflari haqida xabardor qilishni va oʻyin qaramligining oldini olish bilan bogʻliq boshqa maʼlumotlarni nazarda tutuvchi oʻyinlarni tashkil etish va oʻtkazishning asosiy tamoyillari;

oʻyinlar tashkilotchisining platformasi (bundan buyon matnda platforma deb yuritiladi) — oʻyinlar tashkilotchilarining oʻyinlarni tashkil etish va oʻtkazish uchun moʻljallangan axborot tizimi va (yoki) dasturiy-apparat vositalari majmui;

hodisa — natijasi oldindan noaniq boʻlgan, stavkalar qabul qilinadigan va oldindan belgilangan (turi, joyi, sanasi, vaqti va h.k. boʻyicha) har qanday harakat (holat, vaziyat);

stavka — maʼlum bir hodisaning va (yoki) oʻyinning natijasiga oʻyinchi tomonidan pul mablagʻlarini joylashtirishni nazarda tutuvchi moliyaviy operatsiya;

oʻyinchi — oʻyinda ishtirok etish paytida oʻn sakkiz yoshga toʻlgan, Roʻyxatga, cheklovlar roʻyxatiga va (yoki) qaram shaxslar roʻyxatiga kiritilmagan jismoniy shaxs.

2. Registrning egasi vakolatli organ hisoblanadi.

3. Registr quyidagi reyestrlardan iborat:

Oʻyinchilar yagona reyestri;

Cheklovlar (taqiqlar), shu jumladan, bukmekerlik garovlarida yoki Internet tarmogʻidagi oʻyinlarda sarflash (yutqazish) mumkin boʻlgan mablagʻlar boʻyicha limitlar yagona reyestri (bundan buyon matnda cheklovlar reyestri deb yuritiladi);

Sotib olingan lotereya chiptalari, bukmekerlik garovlari uchun qabul qilingan mablagʻlar va Internet tarmogʻidagi oʻyinlarga kiritilgan mablagʻlar bilan bogʻliq moliyaviy tranzaksiyalar reyestri (bundan buyon matnda Tranzaksiyalar reyestri deb yuritiladi);

Yutuqlar boʻyicha toʻlovlar reyestri (bundan buyon matnda Toʻlovlar reyestri deb yuritiladi).

4. Oʻyinchilar yagona reyestrida oʻyinchilarning shaxsiy maʼlumotlarini yigʻish, tizimlashtirish va saqlash amalga oshiriladi.

5. Cheklovlar reyestrida quyidagi maʼlumotlarni yigʻish, tizimlashtirish va saqlash amalga oshiriladi:

a) vakolatli organ tomonidan oʻyinda ishtirok etishga belgilanadigan limitlar toʻgʻrisidagi maʼlumotlar;

b) oʻyinchi tomonidan mustaqil ravishda oʻyinda ishtirok etishga belgilanadigan limitlar toʻgʻrisidagi maʼlumotlar;

s) oʻyinlardan chetlatilgan shaxslar va (yoki) shaxs toʻgʻrisidagi quyidagi maʼlumotlar:

oʻyinchining oʻzini oʻzi chetlatish toʻgʻrisida topshirgan arizalari;

sud qaroriga koʻra oʻyinlarda ishtirok etishi taqiqlangan yoki cheklangan oʻyinchilar;

Roʻyxatga, cheklovlar roʻyxatiga va qaram shaxslar roʻyxatiga kiritilgan shaxslar;

qonunchilikda belgilangan boshqa maʼlumotlar.

6. Tranzaksiyalar reyestrida oʻyinlarda ishtirok etish uchun pul mablagʻlarini qabul qilish, chiqarish va saqlash hisobi yuritiladi. Bunda, tranzaksiyalar reyestri oʻyinlar tashkilotchisining FIRsi, stavkalar, oʻyinchilarning moliyaviy operatsiyalari, shuningdek boshqa zarur maʼlumotlarni oʻz ichiga oladi.

7. Toʻlovlar reyestrida oʻyinchilarga pul mablagʻlarini chiqarish va qaytarishning hisobi yuritiladi. Bunda, toʻlovlar reyestri oʻyinlar tashkilotchisining FIRi va boshqa zarur maʼlumotlarni oʻz ichiga oladi.

8. Oʻyinlar tashkilotchilari platformalarini mazkur Nizom va Registr operatorining ichki hujjatlarida belgilangan tartibda Registr bilan integratsiya qilishlari shart.

9. Registrning asosiy vazifalari quyidagilar hisoblanadi:

oʻyinlarni tashkil etishda moliyaviy operatsiyalarni konsolidatsiyalashgan holda hisobga olish va nazorat qilish;

oʻyinlarni tashkil etishda davlat nazoratini amalga oshirish maqsadida zarur boʻlgan maʼlumotlarni yigʻish (shakllantirish), saqlash, tizimlashtirish va taqdim etish;

oʻyinlarni tashkil etishda oʻyinchilar va investorlarning huquqlari va qonuniy manfaatlarini himoya qilish;

oʻyinlarni tashkil etishda noqonuniy faoliyatning oldini olish, oʻyin qaramligi koʻrinishlarining profilaktikasi va ularni kamaytirishga koʻmaklashish.

10. Registrning funksiyalari quyidagilardan iborat:

jismoniy va yuridik shaxslarning markaziy maʼlumotlar bazalari bilan oʻzaro hamkorlik qilish;

oʻyinchilar, oʻyinlar tashkilotchilari va hodisalar toʻgʻrisidagi maʼlumotlarni yigʻish, qayta ishlash va saqlash;

barcha tranzaksiyalarni, shu jumladan mablagʻlarni qabul qilish, yutuqlarni toʻlash, stavkalar, ularning natijalari va qaytarishlarning hisobini yuritish;

oʻyinlar bozorining dinamikasi va hajmlari toʻgʻrisida hisobotlarni shakllantirish;

oʻyinchilar hamda investorlarning huquqlari va qonuniy manfaatlarini himoya qilish boʻyicha zarur choralarni koʻrish;

masʼuliyatli oʻyin tamoyili mexanizmlarini joriy etish;

Roʻyxatga, cheklovlar roʻyxatiga va qaram shaxslar roʻyxatiga kiritilgan shaxslarni platformalarga kirishining oldini olish va cheklash.

11. Registr operatori:

oʻz faoliyatini qonunchilikka muvofiq amalga oshirish;

Registrni texnik qoʻllab-quvvatlash va rivojlantirishni taʼminlash;

Registrning zarur darajada ishlashini va kiberxavfsizligini taʼminlash, shuningdek Registrni himoya qilish va unga ruxsatsiz kirishning oldini olish choralarini koʻrish;

Registr funksiyalarini amalga oshirish maqsadida Registrni davlat organlarining maʼlumotlar bazalari bilan integratsiya qilinishini taʼminlash;

oʻyinchilar va oʻyinlar tashkilotchilarining arizalarini qabul qilish va koʻrib chiqish;

Registr faoliyati bilan bogʻliq xavflarni baholash va xavfsizlik auditini muntazam ravishda oʻtkazish;

Registrda amalga oshirilgan barcha operatsiyalar, shu jumladan identifikatsiya maʼlumotlari, Registr operatorining oʻyinlar tashkilotchilari, oʻyinchilar va vakolatli organ bilan oʻzaro munosabatlari haqidagi maʼlumotlarni besh yil davomida saqlanishini taʼminlash;

vakolatli organning topshirigʻi boʻyicha koʻrsatilayotgan xizmatlarni takomillashtirish, jarayonlarni optimallashtirish va samaradorlikni oshirish maqsadida Registrga oʻzgartirishlar kiritishga majbur.

Registr operatori zimmasiga qonunchilikka muvofiq boshqa majburiyatlar ham yuklatilishi mumkin.

12. Registr operatori vakolatli organga Registrda amalga oshirilayotgan operatsiyalarni doimiy ravishda nazorat va monitoring qilish uchun texnik imkoniyat yaratadi.

Registr operatori tomonidan qonunchilik, mazkur Nizom va ichki hujjatlar talablari buzilganligi aniqlangan taqdirda, ularni bartaraf etish va kelgusida yoʻl qoʻymaslik choralari koʻrilishi kerak.

Qonunchilik, mazkur Nizom va ichki hujjatlar talablari buzilishining har bir fakti toʻgʻrisidagi maʼlumot Registr operatori tomonidan ushbu fakt aniqlangan kundan boshlab kamida 5 yil davomida saqlanishi kerak.

Vakolatli organning soʻrovlariga binoan Registr operatori tegishli soʻrov olingan kundan boshlab besh ish kunidan kechiktirmasdan vakolatli organga Registr faoliyatiga oid soʻralgan maʼlumotni taqdim etishi shart.

13. Registr operatori quyidagi huquqlarga ega:

oʻyinlar tashkilotchilarining platformalarini Registrga integratsiya qilish va operatsiyalarni amalga oshirish uchun texnik talablarni belgilash;

oʻyinlar tashkilotchilaridan Registr faoliyatini amalga oshirish uchun zarur boʻlgan maʼlumotlarni soʻrab olish.

Registr operatori qonunchilikka muvofiq boshqa huquqlarga ham ega boʻlishi mumkin.

14. Registr operatori quyidagilarni nazarda tutuvchi ichki hujjatlarni ishlab chiqishi va tasdiqlashi kerak:

platformalarni Registr bilan integratsiya qilishga oid texnik talablar;

masʼuliyatli oʻyin tamoyili qoidalari va tartibi;

Registr faoliyati bilan bogʻliq soʻrovlarni koʻrib chiqish tartibi;

moliyaviy tranzaksiyalarni, shu jumladan mablagʻlarni qabul qilish, yutuqlarni toʻlash, stavkalar, ularning natijalari va qaytarishlarni hisobga olish tartibi.

15. Registr operatori oʻyinlar tashkilotchisi sifatida faoliyat yuritishga va (yoki) oʻyinlar tashkilotchilari bilan affillangan shaxs boʻlishga haqli emas.

16. Registr operatori oʻyinlar tashkilotchilari bilan munosabatlarni shartnoma asosida oʻrnatadi.

Shartnomada quyidagi shartlar nazarda tutilishi kerak:

mazkur Nizomning 12-bandida nazarda tutilgan maʼlumotlarni vakolatli organga taqdim etish;

oʻyinchilar va (yoki) oʻyinlar tashkilotchilari vakillari bilan muzokaralarni ular roziligi bilan audio yoki videoyozuvi olib borilishi, shu jumladan yozishmalarning yozib borilishi hamda ushbu maʼlumotlarning kamida besh yil davomida saqlanishi;

qonunchilik, mazkur Nizom va ichki hujjatlar bilan nazarda tutilgan boshqa shartlar.

17. Registr operatori va oʻyinlar tashkilotchisi oʻrtasida munosabatlar oʻrnatilishi natijasida Registrda oʻyinlar tashkilotchisi uchun quyidagilarni nazarda tutuvchi shaxsiy kabinet (akkaunt) yaratiladi:

oʻyinlar tashkilotchisining akkauntini boshqarish;

Registr operatori va vakolatli organ bilan oʻzaro hamkorlik qilish;

hisobotlarni shakllantirish va yuborish.

18. Vakolatli organ uchun Registrda quyidagilarni nazarda tutuvchi shaxsiy kabinet yaratiladi:

vakolatli organning akkauntini boshqarish;

vakolatli organning masʼul xodimlari uchun tegishli akkauntlarni yaratish;

Registrda amalga oshirilayotgan operatsiyalarni monitoring va nazorat qilish;

statistik va tahliliy maʼlumotlarni olish hamda kuzatib borish;

moliyaviy tranzaksiyalar, oʻyinlar va stavkalar boʻyicha olingan maʼlumotlarni tahlil qilish;

Registr operatori va oʻyinlar tashkilotchilari bilan oʻzaro hamkorlik qilish;

Registr operatori va oʻyinlar tashkilotchilaridan hisobotlarni olish.

19. Vakolatli organ shaxsiy kabineti orqali oʻyinchilar uchun limitlar belgilashi, Registr operatori va oʻyinlar tashkilotchilariga ular tomonidan bajarilishi majburiy boʻlgan soʻrovlar, ogohlantirishlar va koʻrsatmalar yuborishi mumkin.

20. HKKP Registr operatorining tarkibiy boʻlinmasi boʻlib, yuridik shaxs maqomiga ega emas va Registr operatori nomidan mazkur Nizomda nazarda tutilmagan har qanday mustaqil operatsiyalar va harakatlarni amalga oshirish huquqisiz ish olib boradi.

21. HKKP quyidagi asosiy funksiyalarni bajaradi:

kliring ishtirokchilarini roʻyxatga oladi;

kliring ishtirokchilariga hisobvaraqlarning ochilishi va yuritilishini taʼminlaydi;

bitimlar boʻyicha oʻzaro hisob-kitoblarning oʻz vaqtida va toʻliq hajmda amalga oshirilishini taʼminlaydi;

oʻzaro majburiyatlarini belgilaydi, aniqlashtiradi va hisobga oladi, shuningdek kliring ishtirokchilarining tuzilgan bitimlar boʻyicha majburiyatlari hisobini alohida-alohida yuritadi;

kliring yakunlariga koʻra, zarur axborotni shakllantiradi va kliring ishtirokchilariga taqdim etadi;

kliring amalga oshirilayotgan bitimlar, kliring natijalari toʻgʻrisidagi axborotning qonunchilik hujjatlari talablariga muvofiq saqlanishini taʼminlaydi;

tuzilgan bitimlar boʻyicha majburiyatlarning bajarilishini nazorat qiladi;

pul mablagʻlarini vakolatli organ, oʻyinlar tashkilotchisi va (yoki) oʻyinchining hisobvaragʻiga oʻtkazilishini taʼminlaydi.

22. HKKP quyidagi huquqlarga ega:

kliring oʻtkazish usulini mustaqil tanlash;

kliring ishtirokchisi bitim boʻyicha oʻz majburiyatlarini bajarmagan yoki lozim darajada bajarmagan, shuningdek qoidalar yoki shartnoma majburiyatlarini buzganligi uchun kliring ishtirokchisiga jarima solish toʻgʻrisida vakolatli organning qarori mavjud boʻlganda, aybdor kliring ishtirokchisining virtual hisobvaragʻidan jarima summasini akseptsiz tartibda hisobdan chiqarish;

bitimlar qayd etilishi bilan Registrning vositachilik yigʻimlarini hisobdan chiqarish;

kliring ishtirokchilaridan hisob-kitob-kliring operatsiyalari uchun zarur axborot olish.

23. HKKP quyidagilarga majbur:

faqat roʻyxatga olingan bitimlar va ular bilan bogʻliq operatsiyalar (vositachilik yigʻimlari va qonunchilikka muvofiq boshqa xarajatlar) boʻyicha hisob-kitob va oʻzaro hisob-kitoblarni amalga oshirish;

har bir kliring ishtirokchisi majburiyatlarining hisobi alohida yuritilishini taʼminlash;

bitim mazmuni toʻgʻrisidagi axborotning maxfiyligini taʼminlash va qonunchilik hujjatlarida nazarda tutilgan holatlardan tashqari, ushbu axborotni kliring ishtirokchilarining roziligisiz uchinchi shaxslarga taqdim etmaslik.

24. Registrda va (yoki) platformada amalga oshirilayotgan operatsiyalar boʻyicha barcha harakatlar, shu jumladan kliring ishtirokchilarining virtual hisobvaragʻidagi mablagʻlar hisobi HKKP tomonidan olib borilishi lozim.

25. HKKP va kliring ishtirokchilariga HKKP hisobvaraqlaridagi mablagʻlardan foydalangan holda, pul talabnomasidan boshqa shaxs foydasiga voz kechish boʻyicha operatsiyalarni amalga oshirish taqiqlanadi.

26. HKKP kliring ishtirokchilari bilan munosabatlar oʻrnatganidan soʻng kliring ishtirokchisiga FIRni shakllantiradi hamda stavkalar boʻyicha majburiyatlar va talab qilish huquqlarini amalga oshirish uchun zarur boʻlgan virtual hisobvaraq ochadi.

27. HKKP mazkur Nizomning 46-bandida nazarda tutilgan holatlarda kliring ishtirokchisiga xizmat koʻrsatishni toʻxtatadi.

28. Registr operatori oʻz faoliyati doirasida xizmat koʻrsatuvchi bankda kliring ishtirokchilarining pul mablagʻlari hisobi uchun moʻljallangan HKKP ikkilamchi hisobvaragʻini ochadi va ularning hisobi HKKPda alohida virtual hisobvaraqlarda yuritiladi.

29. HKKP kliring ishtirokchilarining virtual hisobvaraqlari hisobini yuritadi.

30. Kliring ishtirokchisining virtual hisobvaragʻini yopish HKKP tomonidan hisobvaraq egasi (yoki uning huquqiy vorisi) topshirigʻi boʻyicha amalga oshiriladi, mazkur Nizomning 48-bandidagi hollar bundan mustasno.

31. Virtual hisobvaraqni yopishdan oldin undagi qoldiq pul mablagʻlari bankdagi hisobvaraq egasining hisobvaraqlariga uning topshirigʻiga koʻra oʻtkaziladi.

Virtual hisobvaraqni yopish faqat hisobvaraqda qoldiq pul mablagʻlari boʻlmaganda amalga oshiriladi.

32. Virtual hisobvaraq egasi HKKPga virtual hisobvaraqdan oʻz bank hisobvaragʻiga pul mablagʻlarini (pul mablagʻlarining bir qismini) qaytarish toʻgʻrisida farmoyish berishga haqli, bundan qonunchilik talablari, Registr operatorining ichki hujjatlari yoki shartnomaviy majburiyatlarda belgilangan hollar mustasno.

33. HKKP faqat bitimlar tuzilishi va bajarilishi bilan bogʻliq operatsiyalar boʻyicha virtual hisobvaraqlar orqali pul mablagʻlari oʻtkazmalarini amalga oshirishi mumkin.

34. Kliring ishtirokchisi quyidagi huquqlarga ega:

Registr operatori tomonidan roʻyxatga olingan bitimlar boʻyicha kliringda ishtirok etish;

virtual hisobvaraqning holati, majburiyatlarning bajarilishi toʻgʻrisida zarur axborotni olish;

oʻz virtual hisobvaragʻidagi boʻsh pul mablagʻlarini oʻzining xizmat koʻrsatuvchi bankdagi hisobvaragʻiga chiqarish.

35. Kliring ishtirokchisining majburiyatlari:

HKKPga mazkur Nizomga muvofiq ishonchli axborotni berish;

shartnoma bekor qilingan taqdirda, shartnoma bekor boʻlgunga qadar yuzaga kelgan majburiyatlarni bajarish;

axborot maxfiyligi tartibiga rioya qilish;

mazkur Nizom va Registr operatorining ichki hujjatlari bilan belgilangan talablarga rioya qilish.

36. HKKPning kliring ishtirokchilari bilan oʻzaro munosabatlari mazkur Nizom va Registr operatorining ichki hujjatlari asosida amalga oshiriladi.

37. Registr operatori va kliring ishtirokchilari oʻrtasidagi kliring va hisob-kitob boʻyicha, shuningdek kliring ishtirokchilarining shartnomaviy majburiyatlari bajarilishi toʻgʻrisidagi maʼlumotlar almashinuvi axborot-kommunikatsiya texnologiyalaridan foydalanilgan holda amalga oshiriladi.

38. Oʻyinchi va oʻyinlar tashkilotchisi roʻyxatdan oʻtganidan soʻng shartnomaviy majburiyatlarini bajarish uchun HKKPning ikkilamchi hisobvaragʻiga pul mablagʻlarini oʻtkazadilar.

39. Oʻyinchi oʻyinlarda ishtirok etish maqsadida depozit sifatida virtual hisobvaraqqa kirim qilish uchun HKKPning ikkilamchi hisobvaragʻiga pul mablagʻlarini oʻtkazadi.

40. Oʻyinlar tashkilotchisi yutuqlarni toʻlash va (yoki) qaytarishlarni amalga oshirish boʻyicha oʻz majburiyatlarini bajarish maqsadida virtual hisobvaraqqa kirim qilish uchun HKKP ikkilamchi hisobvaragʻiga pul mablagʻlarini oʻtkazadi.

41. HKKP har bir kliring ishtirokchisining pul mablagʻlari va majburiyatlarini ularning virtual hisobvaraqlarida alohida-alohida hisobga oladi.

42. Kliring ishtirokchilarining HKKP virtual hisobvaraqlaridagi mablagʻlari quyidagi maqsadlarda ishlatiladi:

bitimlar boʻyicha majburiyatlarni bajarish bilan bogʻliq ular oʻrtasidagi oʻzaro hisob-kitob uchun;

oʻyinlarda ishtirok etish uchun depozit sifatida;

oʻyinchining topshirigʻiga koʻra unga xizmat koʻrsatuvchi bankdagi oʻyinchining hisobvaragʻiga qaytarish uchun;

yutuqlarni toʻlash uchun;

bitimlarni tuzish va bajarish bilan bogʻliq boshqa maqsadlar uchun.

43. Stavkalar toʻgʻrisidagi maʼlumotlar asosida Registr operatori kliring ishtirokchilarining majburiyatlarini aniqlaydi va ularni virtual hisobvaraqlarda aks ettiradi.

44. Amalga oshirilgan stavkalar toʻgʻrisidagi maʼlumot oʻyinlar tashkilotchilari tomonidan real vaqtga yaqin rejimda Registr operatoriga uzatilishi kerak.

45. Tuzilgan bitimlarni yopish quyidagi holatlarda amalga oshiriladi:

oʻyinchilar va oʻyin tashkilotchilari tomonidan bitim boʻyicha majburiyatlar lozim darajada bajarilganda;

shartnomada belgilangan majburiyatlar oʻyinlar tashkilotchisi tomonidan bajarilmaganda;

oʻyinchi va oʻyinlar tashkilotchisining bitimni yopish toʻgʻrisidagi oʻzaro roziligi mavjud boʻlganda;

vakolatli organning qarori mavjud boʻlganda;

bitim predmeti boʻlgan hodisa bekor qilingan yoki haqiqiy emas deb topilganda;

hodisa formatining oʻzgarishi bitim natijalarini aniqlash imkoniyatini yoʻqqa chiqarganda.

46. Quyidagi holatlarda HKKP kliring ishtirokchisiga kliring xizmati koʻrsatishni toʻxtatadi va uning virtual hisobvaragʻini yopadi:

qonunchilik va (yoki) Registr operatorining ichki hujjatlarida belgilangan tartibda shartnoma bekor qilinganda;

kliring ishtirokchisi tugatilganda;

sud va boshqa vakolatli organlarning qaroriga koʻra;

oʻyinchi oʻzini oʻzi chetlatgan va uning virtual hisobvaragʻi balansi nolga teng boʻlganda.

47. Registr operatori quyidagi holatlarda pul mablagʻlarini oʻyinchi va (yoki) oʻyinlar tashkilotchisining xizmat koʻrsatuvchi bankidagi bank hisobvaragʻiga oʻtkazilishini taʼminlaydi:

oʻyinchining talabiga koʻra uning foydasiga yutuqlarni toʻlash va depozitni qaytarishda;

oʻyinlar tashkilotchisining talabiga asosan tushumni uning foydasiga oʻtkazishda.

48. Pul mablagʻlari oʻyinlar tashkilotchisiga tushum sifatida bitimning natijasi aniqlanguniga qadar oʻtkazilishi mumkin emas.

49. Shubhali operatsiya aniqlangan taqdirda, pul mablagʻlarini oʻtkazish Registr operatori va (yoki) oʻyinlar tashkilotchisi tomonidan firibgarlik operatsiyalari, jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirgʻin qurolini tarqatishni moliyalashtirishning oldini olish choralari koʻrilganidan keyin amalga oshiriladi.

50. Vakolatli organ oʻyinchi oʻyinda ishtirok etish uchun depozitga kiritishi mumkin boʻlgan pul mablagʻlari summasiga oylik limitlar belgilashga haqli.

Limitlar sonli ifodada va (yoki) hisoblash formulasi koʻrinishida belgilanishi mumkin.

51. Oʻzbekiston Respublikasi fuqarosi boʻlgan oʻyinchining arizasiga koʻra oylik limit oshirilishi mumkin. Bunda, limitning maksimal miqdori oʻyinchining oʻrtacha oylik daromadining 10 foizidan oshmasligi kerak.

52. Oʻyinchining daromadlari toʻgʻrisidagi maʼlumotni tekshirish Registr operatori tomonidan mustaqil ravishda “Elektron hukumat” axborot tizimidan foydalangan holda amalga oshiriladi.

53. Oʻyinchi oʻzini oʻzi chetlatganda, Registr operatori:

oʻyinchiga depozitga pul mablagʻlarini kiritish imkoniyatini cheklaydi;

oʻyinchini Cheklovlar reyestriga kiritadi;

oʻyinchining virtual hisobvaraqlari mavjud boʻlgan oʻyinlar tashkilotchilariga Cheklovlar reyestriga kiritilganligi toʻgʻrisida xabarnoma yuboradi hamda unda oʻyinlar tashkilotchisi ushbu oʻyinchidan stavkalarni qabul qilishni toʻxtatishi shart boʻlgan sana va vaqt koʻrsatiladi;

oʻyinchining soʻroviga binoan mablagʻlarni oʻyinchining xizmat koʻrsatuvchi bankidagi bank hisobvaragʻiga chiqarib berishni va oʻtkazishni amalga oshiradi.

Oʻyinchi tomonidan oʻyinlar tashkilotchisiga yuborilgan xabarnomada koʻrsatilgan sana va vaqtgacha tuzilgan bitimlar boʻyicha majburiyatlar oʻyinchi Cheklovlar reyestriga kiritilgunga qadar qabul qilingan hisoblanadi.

54. Oʻyinchi Cheklovlar reyestriga kiritilganidan keyin tuzilgan bitimlar bekor qilinishi hamda pul mablagʻlari oʻyinchining unga xizmat koʻrsatuvchi bankdagi bank hisobvaragʻiga qaytarilishi lozim.

55. Mazkur Nizom talablarini buzilishida aybdor boʻlgan shaxslar qonunchilikda belgilangan tartibda javobgar boʻladilar.