Oʻzbekiston Respublikasi Prezidentining “Import operatsiyalarini tartibga solishga doir qoʻshimcha chora-tadbirlar toʻgʻrisida” 1998-yil 18-fevraldagi PF-1930-son Farmonini bajarish yuzasidan Vazirlar Mahkamasi qaror qiladi:

1. 1998-yil 1-martdan boshlab:

Oʻzbekiston Respublikasi hududiga olib kiriladigan tovarlarga aksiz soligʻi stavkalari 2-ilovaga muvofiq;

Oʻzbekiston Respublikasi hududiga jismoniy shaxslar tomonidan olib kiriladigan tovarlardan, tijoratchilik faoliyati uchun (oʻzlari qatnab olib keladiganlar tomonidan) olib kiriladigan tovarlar bundan mustasno, yigʻimlar stavkasi tovarlarni poshlinasiz olib kirishning cheklangan normalaridan ortiq tovarlar boj qiymatining 20 foizi miqdorida;

2. Oʻzbekiston Respublikasi Moliya vazirligi, Davlat bojxona qoʻmitasi:

1998-yil 1-martgacha jismoniy shaxslar tomonidan Oʻzbekiston Respublikasi hududiga aksiz soligʻi solinmay olib kiriladigan tovarlarning cheklangan normalarini;

1998-yil 1-aprelgacha jismoniy shaxslar tomonidan Oʻzbekiston Respublikasi bojxona chegarasi orqali tovarlarni olib oʻtish qoidalari va normalarini ishlab chiqsinlar va tasdiqlasinlar.

3. Makroiqtisodiyot va statistika vazirligi Moliya vazirligi, Tashqi iqtisodiy aloqalar vazirligi va Davlat bojxona qoʻmitasi bilan birgalikda 1998-yil 15-martgacha “Tovarlar, ishlar va xizmatlar importi prognoziga kiritish uchun xoʻjalik yurituvchi subyektlar tomonidan buyurtmanomalar taqdim etish va ularni koʻrib chiqish tartibi”ni ishlab chiqsin va Pul-kredit siyosati boʻyicha respublika komissiyasi bilan kelishgan holda tasdiqlasin.

4. Oʻzbekiston Respublikasi Moliya vazirligi, Tashqi iqtisodiy aloqalar vazirligi, Davlat bojxona qoʻmitasi Markaziy bank bilan birgalikda oʻn kun muddatda haqini toʻlash uchun valyuta mablagʻlari bilan taʼminlanmagan import tovarlarning Oʻzbekiston Respublikasi hududiga olib kirilishini istisno qiluvchi hamda ularning import qiluvchi tomonidan oʻz mablagʻlari hisobiga qaytarib yuborilishini nazarda tutuvchi tartibni ishlab chiqsinlar va tasdiqlash uchun kiritsinlar.

5. Quyidagilar oʻz kuchini yoʻqotgan deb hisoblansin:

Oʻzbekiston Respublikasi Vazirlar Mahkamasining “Jismoniy shaxslar tomonidan Oʻzbekiston Respublikasi hududiga tovarlar olib kelinganligi uchun yigʻim undirishni joriy etish toʻgʻrisida” 1996-yil 13-avgustdagi 279-son qarorining 1-bandi;

Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining “Jismoniy shaxslar tomonidan Oʻzbekiston Respublikasi hududiga tovarlar olib kelinganligi uchun yigʻim undirishni joriy etish toʻgʻrisida” 1996-yil 13-avgustdagi 279-son qarorini qisman oʻzgartirish haqida” 1996-yil 25-oktabrdagi 362-son qarorining 2-bandi;

Vazirlar Mahkamasining “Tashqi savdo operatsiyalarini amalga oshirishda xorijiy valyutadagi mablagʻlardan foydalanish ustidan nazoratni takomillashtirish chora-tadbirlari toʻgʻrisida” 1996-yil 13-martdagi 95-son qarori 2-bandining 2-xatboshi;

Vazirlar Mahkamasining “1998-yilgi Oʻzbekiston Respublikasining asosiy makroiqtisodiy koʻrsatkichlari va Davlat budjeti prognozi toʻgʻrisida” 1997-yil 5-dekabrdagi 540-son qaroriga 14-2-ilova.

6. Oʻzbekiston Respublikasi vazirliklari va idoralari Adliya vazirligi bilan birgalikda oʻz meʼyoriy hujjatlarini mazkur qarorga muvofiqlashtirsinlar.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.