Oʻzbekiston paxtasining yuqori likvidli xomashyo tovarlari xalqaro bozoridagi raqobatbardoshligini oshirish, paxta tolasini joʻnatishdan oldin yuqori darajada sertifikatlashni taʼminlash va uning paxta birjalaridagi qiymat koʻrsatkichlarini koʻtarish maqsadida Vazirlar Mahkamasi qaror qiladi:

1. “Oʻzdavpaxtasanoatsotish” uyushmasi, “Oʻzdavstandart” markazi, Oʻzbekiston Respublikasi Tashqi iqtisodiy aloqalar vazirligi va Oʻzbekiston Respublikasi Vazirlar Mahkamasi huzuridagi Paxta loyihasini amalga oshirish agentligining mintaqaviy laboratoriyalar tarmoqlariga ega boʻlgan “Sifat” Oʻzbekiston paxta tolasini sertifikatlash markazi (Oʻzbekiston “Sifat” markazi)ni tashkil etish toʻgʻrisidagi takliflariga rozilik berilsin.

Maʼlumot uchun qabul qilinsinki, Oʻzbekiston “Sifat” markazi “Oʻzdavpaxtasanoatsotish” uyushmasi tarkibiga kiruvchi Paxta mahsulotini va kanop tolasini standartlash va sertifikatlash “Sifat” boshqarmasi hamda Xalqaro tiklanish va taraqqiyot banki bilan Bitim asosida faoliyat koʻrsatuvchi “Paxta” tolasini sertifikatlash va marketing” kichik loyihasini joriy etish boʻlimi negizida tashkil qilinadi va ularning huquqiy vorisi hisoblanadi.

2. Quyidagilar Oʻzbekiston “Sifat” markazining asosiy vazifalari etib belgilansin:

mamlakatda ishlab chiqariladigan paxta tolasi sifatini jahon bozori talablariga muvofiq sertifikatlash va nazorat qilishni amalga oshirish;

paxta tozalash sanoati korxonalarini, xaridorlarni va boshqa manfaatdor tashkilotlarni paxta tolasining standart namunalari bilan taʼminlash;

paxta tolasi turkumlarini joʻnatishga tayyorlash tizimini takomillashtirish va Oʻzbekiston paxta tolasining raqobatbardoshligini oshirish uchun shart-sharoitlar yaratish;

paxta tolasi va momigʻini sertifikatlash va turkumlash boʻyicha mutaxassislar tayyorlash.

3. Oʻzbekiston “Sifat” markazi toʻgʻrisidagi nizom va uning tuzilmasi 1 va 2-ilovalarga muvofiq tasdiqlansin.

4. Maʼlumot uchun qabul qilinsinki, quyidagilar Oʻzbekiston “Sifat” markazini mablagʻ bilan taʼminlash manbalari hisoblanadi:

uning paxta tolasini sertifikatlash va turkumlash boʻyicha faoliyatidan milliy hamda erkin muomaladagi valyutadan olinadigan mablagʻlar;

Oʻzbekiston Respublikasi Vazirlar Mahkamasining “Oʻzbekiston Respublikasi bilan Xalqaro tiklanish va taraqqiyot banki oʻrtasida tuzilgan Zayom toʻgʻrisidagi bitim doirasida Paxtachilikni takomillashtirish loyihasini amalga oshirish haqida” 1995-yil 31-oktabrdagi 421-son qaroriga muvofiq amalga oshiriladigan ajratmalar.

5. Oʻzbekiston Respublikasi Tashqi iqtisodiy aloqalar vazirligi Oʻzbekiston “Sifat” markazi bilan birgalikda bir oy muddatda xalqaro tashkilotlarni markazning tashkil etilganligi toʻgʻrisida xabardor qilsin va uning tegishli ixtisoslashtirilgan xalqaro tashkilotlarga aʼzo boʻlib kirishiga doir zarur tadbirlarni amalga oshirsin.

6. Vazirlar Mahkamasining “Oʻzbekiston Respublikasi bilan Xalqaro tiklanish va taraqqiyot banki oʻrtasida tuzilgan Zayom toʻgʻrisidagi bitim doirasida Paxtachilikni takomillashtirish loyihasini amalga oshirish haqida” 1995-yil 31-oktabrdagi 421-son qaroriga 6-ilovaga muvofiq respublikada paxta tolasini sertifikatlash viloyat laboratoriyalarini qurish va jihozlash amalga oshirilayotgani maʼlumot uchun qabul qilinsin.

Oʻzbekiston “Sifat” markazi paxta tolasini albatta sertifikatlashni taʼminlash maqsadida markaz va uning mintaqaviy laboratoriyalarini paxta tolasini sertifikatlash organi sifatida belgilangan tartibda “Oʻzdavstandart” markazida akkreditatsiya qilsin.

7. Oʻzbekiston “Sifat” markazi, paxta loyihasi qatnashchisi sifatida, daromad va mulk soliqlaridan, bojxona poshlinalaridan va yigʻimlaridan roʻyxatdan oʻtkazilgan vaqtidan boshlab 5 yil muddatga ozod qilinsin.

8. Belgilab qoʻyilsinki, Oʻzbekiston “Sifat” markaziga Oʻzbekiston Respublikasi Vazirlar Mahkamasi tomonidan tayinlanadigan bosh direktor rahbarlik qiladi.

Markaz bosh direktori moddiy-maishiy va tibbiy xizmat koʻrsatish sharoitlari boʻyicha vazir oʻrinbosariga tenglashtirilsin.

Oʻzbekiston “Sifat” markazida bosh direktorning ikki nafar, shu jumladan bir nafar birinchi oʻrinbosari boʻlishiga ruxsat etilsin.

9. Oʻzbekiston pochta va telekommunikatsiyalar agentligi belgilangan tartibda Oʻzbekiston “Sifat” markazini va uning mintaqaviy laboratoriyalarini zarur aloqa vositalari, shu jumladan hukumat aloqasi bilan taʼminlasin.

10. Oʻzbekiston “Sifat” markazi Toshkent shahar, Mannon Uygʻur koʻchasi, “Qizil Sharq” berk koʻchasi, 109-uyga joylashtirilsin.

11. Oʻzbekiston Respublikasi Vazirlar Mahkamasining “Oʻzbekiston Respublikasi bilan Xalqaro tiklanish va taraqqiyot banki oʻrtasida tuzilgan Zayom toʻgʻrisidagi bitim doirasida Paxtachilikni takomillashtirish loyihasini amalga oshirish haqida” 1995-yil 31-oktabrdagi 421-son qaroriga quyidagi oʻzgartirishlar kiritilsin:

12-bandning birinchi xatboshi oʻz kuchini yoʻqotgan deb hisoblansin;

12-bandning ikkinchi xatboshidagi va 2-ilovadagi “Sifat” boshqarmasiga” soʻzlari “Oʻzbekiston “Sifat” markaziga” soʻzlari bilan almashtirilsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. H. Joʻrabekov zimmasiga yuklansin.

1. “Sifat” Oʻzbekiston paxta tolasini sertifikatlash markazi, bundan keyingi oʻrinlarda Oʻzbekiston “Sifat” markazi deyiladi, Oʻzbekiston Respublikasida paxta tolasi sifatini sertifikatlash va nazorat qilish boʻyicha idoradan tashqari organ hisoblanadi, u oʻz faoliyatini xoʻjalik hisob-kitobi, oʻzini oʻzi mablagʻ bilan taʼminlash va oʻzini oʻzi boshqarish prinsiplari boʻyicha amalga oshiradi.

2. Oʻzbekiston “Sifat” markazi oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisining qarorlariga va boshqa hujjatlariga, Oʻzbekiston Respublikasi Prezidenti farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, “Oʻzdavstandart” markazining mahsulotni sertifikatsiyalash va standartlash boʻyicha meʼyoriy hujjatlariga, shuningdek, Xalqaro tiklanish va taraqqiyot bankining Zayom toʻgʻrisidagi bitim doirasida Oʻzbekiston “Sifat” markazi vakolatiga taalluqli shartlari va qoidalariga hamda ushbu Nizomga amal qiladi.

3. Oʻzbekiston “Sifat” markazi yuridik shaxs hisoblanadi, oʻz nomi oʻzbek va ingliz tillarida yozilgan muhriga, tovar belgisiga, shtamplariga, firma blanklariga va boshqa belgilariga, alohida mol-mulkka, binoga, transport vositalariga, mustaqil balansga, davlat va tijorat banklarida hisob-kitob va boshqa hisob raqamlariga ega boʻladi.

Oʻzbekiston “Sifat” markazi oʻz majburiyatlari boʻyicha oʻziga biriktirilgan, toʻlov undirilishi mumkin boʻlgan mol-mulki bilan javob beradi.

4. Oʻzbekiston “Sifat” markazi daromadlari uning paxta tolasi sifatini sertifikatlash, sinash, nazorat qilish, sertifikatlashga oid ilmiy-tadqiqot ishlarini oʻtkazish, marketing, kadrlar tayyorlash boʻyicha ishlarni shartnoma asosida bajarishga doir faoliyatidan hosil boʻladi.

5. Respublikada paxtachilikning eng koʻp iqtisodiy samara berishini taʼminlash uchun paxta tolasining va paxtani qayta ishlashdan olinadigan boshqa shu kabi mahsulotlarning sifatini respublikada hamda jahon bozorida amalda boʻlgan standartlar va qoidalarga muvofiq puxta baholashni amalga oshirish, paxta tolasining xorijiy portlar va bazalar orqali oʻtishini jadallashtirish, paxta tolasining bir xil turkumini joʻnatishga tayyorlash tizimini takomillashtirish, Oʻzbekiston paxta tolasining raqobatbardoshligini oshirish uchun sharoitlar yaratish Oʻzbekiston “Sifat” markazining asosiy maqsadi hisoblanadi.

6. Quyidagilar Oʻzbekiston “Sifat” markazining vazifalari hisoblanadi:

ishlab chiqarish va respublika hududidagi va uning tashqarisidagi saqlash joylarida paxta tolasini belgilangan standartlar, usullar, qoidalar, kontraktlar, shartnomalarga hamda paxta tolasi sifatiga talablarni nazarda tutuvchi boshqa bitimlarga muvofiq sertifikatlash va uning sifatini nazorat qilish;

ichki va jahon bozori talablariga muvofiq paxta tolasini sertifikatlash va sifatini nazorat qilish tizimini rivojlantirish va taʼminlash boʻyicha zarur amaliy hamda ilmiy faoliyatni amalga oshirish;

paxta tozalash sanoati korxonalarini, paxta tolasi va momigʻi xaridorlarini va boshqa tashkilotlarni sertifikatlanayotgan mahsulotning standart namunalari bilan taʼminlash;

Oʻzbekiston Respublikasi bilan Xalqaro tiklanish va taraqqiyot banki oʻrtasidagi bitimlarga muvofiq Paxta loyihasini amalga oshirishda qatnashish;

paxta mahsulotini sertifikatlash, turkumlash va sinash usullari boʻyicha mutaxassislar tayyorlash.

7. Oʻzbekiston “Sifat” markazi oʻz zimmasiga yuklangan vazifalarga koʻra quyidagi asosiy funksiyalarni bajaradi:

paxta tolasiga va uni qayta ishlashdan olinadigan boshqa mahsulotlarga Davlat standartlarini ishlab chiqishda qatnashadi;

sertifikatlash tartibini reglamentlovchi meʼyoriy-texnik, tashkiliy-uslubiy hujjatlarni ishlab chiqadi va yangilaydi;

sertifikatlashga buyurtmanomalar qabul qiladi va paxta tolasi sifatini nazorat qiladi;

paxta tolasi tashqi koʻrinishining standart namunalarini tayyorlaydi;

paxta tolasi sifatini aniqlash usullarini ishlab chiqadi, tasdiqlaydi hamda ularni takomillashtirish boʻyicha tegishli ilmiy-tadqiqot ishlarini amalga oshiradi;

paxta mahsulotlarini sertifikatlash, turkumlash va sinash usullari boʻyicha mutaxassislar tayyorlash ishlarini amalga oshiradi, oʻqitish shakllari va usullarini takomillashtirish tadbirlarini ishlab chiqadi;

respublikada va uning tashqarisida paxta tolasi ishlab chiqaruvchilar, savdo tashkilotlari va paxta mahsulotlari isteʼmolchilari bilan paxta mahsulotlarini sertifikatlash sohasida hamkorlik qiladi;

tashqi iqtisodiy faoliyatni amalga oshiradi.

8. Oʻzbekiston “Sifat” markazi quyidagi huquqlarga ega:

paxta tolasining respublikadagi ishlab chiqaruvchilar va foydalanuvchilar uchun majburiy boʻlgan milliy hamda xalqaro standartlarga muvofiqlik sertifikatini belgilangan tartibda berish;

xorijiy va xalqaro tashkilotlarda eksportga yetkazib berishlar, sifat masalalarini koʻrib chiqish chogʻida paxta tolasi sifatini baholashda respublika manfaatlarini ifodalash;

mehnatga haq toʻlash, uni tashkil etish va meʼyorlash shakllari va tizimlarini, ichki ish tartibi qoidalarini belgilash;

bank va tijorat kreditlaridan foydalanish;

respublikada va chet mamlakatlarda oʻz faoliyatini amalga oshirish uchun zarur boʻlgan, amaldagi qonunchilikka zid boʻlmagan, bitishuvlarni hamda boshqa yuridik hujjatlar va harakatlarni roʻyobga chiqarish;

oʻz faoliyatini amalga oshirish uchun zarur boʻlgan binolarni qurish, sotib olish, begonalashtirish, ijaraga berish, yollash va yollashga berish;

respublikada va chet mamlakatlarda mustaqil ravishda yoki vatanimizdagi yoki xorijiy sheriklar bilan pay asosida filiallar, boʻlimlar, vakolatxonalar va shu kabilarni taʼsis etish;

korxona va tashkilotlarga, ularning ishlab chiqarish binolariga, saqlash omborlariga kirish, sinash, sertifikatlash yoki sifatining standartlarga va boshqa meʼyoriy-texnik hujjatlar talablariga muvofiqligini nazorat (inspeksiya) qilish uchun tegishli paxta mahsuloti namunalarini tanlab olish;

korxona va tashkilotlardan xomashyo va paxta tolasi sifati masalalari boʻyicha axborotni belgilangan tartibda olish;

paxta mahsulotini standartlash va sertifikatsiyalash masalalarini hal qilish uchun mutaxassislarni jalb qilish;

paxta tolasi sifatini tekshirish natijalari boʻyicha hujjatlar tuzish va tegishli korxonalar va tashkilotlar rahbarlariga amaldagi standartlarning buzilishining aniqlangan hollarini bartaraf etish yuzasidan takliflar berish;

respublika va chet ellarda “nou-xau” hamda paxta mahsulotini standartlash, sertifikatsiyalash sifatini nazorat qilish boʻyicha ilmiy yutuqlarni xarid qilish va belgilangan tartibda amalga oshirish.

9. Oʻzbekiston “Sifat” markaziga Oʻzbekiston Respublikasi Vazirlar Mahkamasi tomonidan tayinlanadigan bosh direktor rahbarlik qiladi.

Bosh direktor ikki nafar, shu jumladan, bir nafar birinchi oʻrinbosarga ega boʻladi.

10. Bosh direktor:

Oʻzbekiston “Sifat” markazining barcha moliyaviy, ishlab chiqarish va xoʻjalik faoliyatiga rahbarlik qiladi hamda uning natijalari uchun toʻliq javob beradi;

Oʻzbekiston “Sifat” markazi faoliyatining barcha masalalarini mustaqil ravishda hal qiladi, oʻz vakolatlariga kiruvchi masalalar boʻyicha buyruqlar va boshqa hujjatlar chiqaradi;

Oʻzbekiston “Sifat” markazi mol-mulki va mablagʻlarini tasarruf etadi;

Oʻzbekiston “Sifat” markazi nomidan ham respublikada, ham chet ellarda barcha muassasa va tashkilotlarda vakillik qiladi;

Oʻzbekiston “Sifat” markazi nomidan bitimlar, shartnomalar va boshqa bitishuvlar tuzadi;

ishonchnomalar beradi, respublika banklarida Oʻzbekiston “Sifat” markazining hisob-kitob va boshqa schyotlarini ochadi va uning nomidan ishonchnomasiz ish koʻradi;

amaldagi qonun hujjatlariga muvofiq ham respublikadagi, ham chet ellardagi tashkilotlar va fuqarolarga Oʻzbekiston “Sifat” markazi nomidan eʼtiroz va daʼvo qoʻzgʻash haqida qarorlar qabul qiladi;

mehnat toʻgʻrisidagi qonun hujjatlariga muvofiq Oʻzbekiston “Sifat” markazi, tarkibiy boʻlinmalar va mintaqaviy laboratoriyalar xodimlarini ishga qabul qilish va ishdan boʻshatish, markaz va uning mintaqaviy laboratoriyalari tuzilmasini oʻzgartirish haqida buyruqlar chiqaradi.

11. Oʻzbekiston “Sifat” markazi va uning mintaqaviy laboratoriyalarida buxgalteriya hisobini yuritish qoidalari va hujjatlar bilan ishlashni tashkil etish amaldagi qonun hujjatlariga muvofiq belgilanadi.

12. Moliyaviy yil kalendar yilning 1-yanvaridan 31-dekabrigacha hisoblanadi. Har yil tugagandan soʻng balans hisoboti tuziladi.

13. Oʻzbekiston “Sifat” markazining yillik va choraklik balanslari statistika organlariga belgilangan tartibda taqdim etiladi.

14. Oʻzbekiston “Sifat” markazining moliyaviy-xoʻjalik faoliyatini taftish qilish amaldagi qonun hujjatlariga muvofiq oʻtkaziladi.

15. Oʻzbekiston “Sifat” markazini tugatish yoki qayta tashkil etish (qoʻshilishi, qoʻshib yuborilishi, ajralib chiqishi, qayta tashkil etilishi) amaldagi qonun hujjatlariga muvofiq amalga oshiriladi.