Mamlakat transport kommunikatsiyalarini, Qashqadaryo va Surxondaryo viloyatlarini iqtisodiy va ijtimoiy rivojlantirish uchun qulay shart-sharoitlar yaratish, tabiiy yer osti boyliklari konlarini oʻzlashtirish loyihalari amalga oshirilishini jadallashtirish, shuningdek respublika janubiy mintaqalarining ijtimoiy infratuzilmasini rivojlantirish maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi va “Oʻzbekiston temir yoʻllari” davlat-aksiyadorlik kompaniyasining “Toshguzar—Boysun—Qumqoʻrgʻon” yangi temir yoʻl liniyasining ayrim uchastkalarini:

“Toshguzar—Dehqonobod” va “Boysun—Qumqoʻrgʻon” uchastkalari boʻyicha 2003—2005-yillarda davlat budjeti mablagʻlari (20%) hamda “Oʻzbekiston temir yoʻllari” davlat-aksiyadorlik kompaniyasining oʻz mablagʻlari (80%) hisobiga;

“Dehqonobod—Boysun” uchastkasi boʻyicha 2004—2007-yillarda jalb etiladigan xorijiy investitsiyalar mablagʻlari hisobiga bosqichma-bosqich foydalanishga topshirish toʻgʻrisidagi taklifi qabul qilinsin:

2. Oʻzbekiston Respublikasi Iqtisodiyot vazirligi, Tashqi iqtisodiy aloqalar agentligi “Dehqonobod—Boysun” uchastkasi qurilishini moliyalashtirish va moddiy-texnik taʼminlash uchun Yaponiyaning tegishli Hukumat muassasalari bilan imtiyozli uzoq muddatli yenlardagi kreditlarni jalb etish masalasi ishlab chiqilishini taʼminlasinlar.

3. Quyidagilar:

2007-yil butun qurilishni tugallash muddati etib;

“Toshguzar—Boysun—Qumqoʻrgʻon” yangi temir yoʻl liniyasi qurilishi boʻyicha “Oʻzbekiston temir yoʻllari” davlat-aksiyadorlik kompaniyasi bosh buyurtmachi etib;

“Boshtransloyiha” masʼuliyati cheklangan jamiyat va “Toshtemiryoʻlloyiha” ochiq aksiyadorlik jamiyati bosh loyihalovchilar etib;

tuproq koʻtarmasi va sunʼiy inshootlarni qurish boʻyicha “Oʻzavtoyoʻl” davlat konserni bosh pudratchi etib;

yoʻlning ustki qismini qurish boʻyicha “Oʻzbekiston temir yoʻllari” davlat-aksiyadorlik kompaniyasining Yoʻl qurilishi boshqarmasi va “Oʻzbektransqurilish” davlat uyushmasi bosh pudratchilar etib belgilansin.

4. “Oʻzbekiston temir yoʻllari” davlat-aksiyadorlik kompaniyasi, bosh loyihalovchilar (“Boshtransloyiha” masʼuliyati cheklangan jamiyat va “Toshtemiryoʻlloyiha” ochiq aksiyadorlik jamiyati), Qashqadaryo va Surxondaryo viloyatlari hokimliklari yangi temir yoʻl liniyasining togʻdagi “Dehqonobod—Boysun” uchastkasi toʻliq ishga tushirilgunga qadar “Toshguzar—Dehqonobod” va “Boysun—Qumqoʻrgʻon” uchastkasidan cheklangan, yopiq siklda foydalanishni taʼminlovchi barcha zarur loyihalash ishlari va qurilish yechimlarini nazarda tutsinlar, bunda ushbu mintaqalarning tabiiy-xomashyo resurslaridan foydalanish uchun transport borishini taʼminlashni koʻzda tutsinlar.

5. “Toshguzar—Boysun—Qumqoʻrgʻon” yangi temir yoʻl liniyasini qurish masalalarini tezkorlik bilan hal qilish uchun Qurilishning borishini muvofiqlashtirish va nazorat qilish boʻyicha 1-ilovaga muvofiq tarkibda Respublika komissiyasi tuzilsin.

6. Belgilab qoʻyilsinki, yangi temir yoʻl liniyasini loyihalashtirish va qurishga subpudratchi tashkilotlarni jalb qilish, qurilish materiallari, konstruksiyalar va uskunalar xarid qilish “Oʻzbekiston temir yoʻllari” davlat-aksiyadorlik kompaniyasi tomonidan oʻtkaziladigan tender savdolari asosida amalga oshiriladi, tender savdolari natijalari keyinchalik Respublika komissiyasi bilan kelishilgandan keyin tasdiqlanadi.

“Oʻzbekiston temir yoʻllari” davlat-aksiyadorlik kompaniyasi bosh pudratchi tashkilotlar bilan birgalikda Toshguzar—Boysun—Qumqoʻrgʻon” yangi temir yoʻl liniyasi qurilishi uchun subpudrat tashkilotlarni, uskunalar va materiallar yetkazib beruvchilarni tanlab olish boʻyicha tanlov savdolari (tendyerlar)ning sifatli oʻtkazilishini taʼminlasin.

7. Yangi temir yoʻl liniyasini loyihalashtirish va qurish ishlarini “Oʻzbekiston temir yoʻllari” davlat-aksiyadorlik kompaniyasining oʻz mablagʻlari hisobiga bir paytda olib borishga ruxsat etilsin.

“Davarxitektqurilish” qoʻmitasi “Toshguzar—Dehqonobod”, Dehqonobod—Boysun” va “Boysun—Qumqoʻrgʻon” uchastkalari boʻyicha asosiy texnik-iqtisodiy koʻrsatkichlarni belgilangan tartibda ekspertizadan oʻtkazsin, tasdiqlash uchun Respublika komissiyasiga kiritsin.

Belgilansinki, budjet mablagʻlari hisobiga kapital mablagʻlarni moliyalashtirishni boshlash loyiha-smeta hujjatlari belgilangan tartibda tasdiqlangandan keyin “Oʻzbekiston temir yoʻllari” davlat-aksiyadorlik kompaniyasining oʻz mablagʻlari hisobiga moliyalashtirishning belgilangan hajmlariga mutanosib ravishda amalga oshiriladi.

8. Oʻzbekiston Respublikasi Iqtisodiyot vazirligi, Moliya vazirligi va “Oʻzbekiston temir yoʻllari” davlat-aksiyadorlik kompaniyasi yangi temir yoʻl liniyasi uchastkalarini oʻz vaqtida foydalanishga topshirish uchun 2003—2007-yillar investitsiya dasturlarida davlat budjeti, kompaniyaning oʻz mablagʻlari hamda 2-ilovaga* muvofiq jalb etiladigan xorijiy investitsiyalar va kreditlar hisobiga zarur kapital mablagʻlarni nazarda tutsinlar.

9. “Oʻzbekenergo” davlat-aksiyadorlik kompaniyasi, “Oʻzkommunxizmat” agentligi, “Oʻzbekneftgaz” MXK, Oʻzbekiston aloqa va axborotlashtirish agentligi loyiha-smeta hujjatlariga muvofiq buyurtmachi mablagʻlari hisobiga bosh pudratchilar huquqi bilan belgilangan muddatlarda aloqa liniyalari va boshqa muhandislik kommunikatsiyalari koʻchirilishini va qayta qurilishini taʼminlasinlar.

10. “Oʻzbekiston temir yoʻllari” davlat-aksiyadorlik kompaniyasi va “Oʻzavtoyoʻl” davlat konserni, istisno tariqasida, qurilish davrida yangi temir yoʻl liniyasi qurilishida foydalaniladigan olib kelinayotgan uskunalar va materiallar uchun bojxona toʻlovlaridan (bojxonada rasmiylashtirish yigʻimlaridan tashqari) ozod qilinsin.

“Oʻzbekiston temir yoʻllari” davlat-aksiyadorlik kompaniyasining Respublika yoʻl jamgʻarmasiga ajratmalari muddati “Oʻzavtoyoʻl” davlat konserni bilan kelishilgan jadvalga muvofiq kechiktirilsin.

11. Mintaqaning murakkab tabiiy sharoitlarini va ishlarning koʻchma xarakterini hisobga olgan holda “Toshguzar—Boysun—Qumqoʻrgʻon” temir yoʻl liniyasi qurilishida bevosita band boʻlgan xodimlarning barcha toifalari ish haqiga Qashqadaryo viloyati boʻyicha 1,4 hamda Surxondaryo viloyati boʻyicha 1,3 koeffitsiyenti belgilansin.

12. “Oʻzbekneftgaz” milliy-xolding kompaniyasi tasdiqlangan limitlar doirasida va asoslangan hisob-kitoblar boʻyicha qurilish qatnashchilarini yonilgʻi-moylash materiallari bilan muntazam ravishda uzluksiz taʼminlasin.

13. Qashqadaryo va Surxondaryo viloyatlari hokimliklari:

oʻz vaqtida yer ajratilishini va qurilish trassasidagi imoratlar buzilishini taʼminlasinlar;

pudratchi tashkilotlarni jalb qilgan holda zarur qurilish ishlarini tashkil etsinlar, qurilish-montaj ishlari hajmlari bajarilishini nazoratga olsinlar hamda qoʻyilgan vazifalarni koʻrsatilgan muddatlarda bajarish chora-tadbirlarini koʻrsinlar;

qurilish qatnashchilari uchun amaldagi normalarga muvofiq zarur maishiy shart-sharoitlar yaratilishini taʼminlasinlar.

14. Oʻzbekiston Respublikasi Vazirlar Mahkamasining “Gʻuzor—Boysun—Qumqoʻrgʻon (Qizil Oktyabr)” yangi temir yoʻl liniyasini loyihalashtirish va qurish masalalari toʻgʻrisida” 1995-yil 17-avgustdagi 323-son qarori oʻz kuchini yoʻqotgan deb hisoblansin.

15. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov va Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.