Jinoyat ishlarini birinchi bosqich sudida muhokama etish jarayonida protsessual qonunchilikka rioya qilinishi boʻyicha baʼzi masalalarni muhokama qilib, Oʻzbekiston Respublikasi Oliy sudining Plenumi qaror qiladi:

Oʻzbekiston Respublikasi Oliy sudi Plenumining “Sudlar tomonidan jinoyat ishlarini birinchi bosqich sudida muhokama etish jarayonida protsessual qonunchilikka rioya qilinishi toʻgʻrisida”gi 1997-yil 22-avgustdagi 12-sonli qaroriga quyidagicha qoʻshimchalar kiritilsin:

Qayd etilgan qarorning birinchi bandi quyidagi mazmundagi xatboshilari bilan toʻldirilsin:

“Jinoyat ishlarini sud muhokamasiga tayinlash chogʻida jiddiy kamchiliklarga yoʻl qoʻyilayotganligi sudlarga uqtirilsin va ular zimmasiga Oʻzbekiston Respublikasi JPKning 396-moddasi talabidan kelib chiqib, har bir jinoyat ishi boʻyicha ayblanuvchiga nisbatan ehtiyot chorasining toʻgʻri tanlanganligini aniqlash majburiyati yuklatilsin”.

“Oʻzbekiston Respublikasi JPKning 249-moddasida belgilangan garov, yaʼni pul mablagʻi yoki qimmatbaho buyumlarni tergov organi yoki sudning depozit hisob raqamiga topshirilishi asosida ehtiyot chorasini tanlash ayblanuvchi (sudlanuvchi)ni jamiyatdan ajratmagan holda unga yuklatilgan majburiyatlarga rioya qilishini taʼminlovchi samarali usul ekanligi dastlabki tergov organlari va sudlarga tushuntirilsin. Shunga koʻra, ishlarning tergov qilishini va sudda koʻrilishi chogʻida tergov organi va sud ayblanuvchi (sudlanuvchi), ularning qarindoshlari, boshqa fuqarolar yoki huquqiy shaxslarga ularning garovga qoʻyish huquqlarini tushuntirishga majburdir”.