Sidqidildan va samarali ishlayotgan, oʻz faoliyatida yuksak natijalarga erishgan, ijtimoiy hayotdagi faolligi, mehnatsevarligi bilan ajralib turadigan Oʻzbekiston Respublikasi Oliy Majlisi Qonunchilik palatasining deputatlarini hamda Devoni xodimlarini maʼnaviy va moddiy ragʻbatlantirib borish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi deputatlarini va Devoni xodimlarini maʼnaviy va moddiy ragʻbatlantirish boʻyicha komissiya (bundan buyon matnda Komissiya deb yuritiladi) 1-ilovaga* muvofiq tarkibda tuzilsin.

2. Oʻzbekiston Respublikasi Oliy Majlisi Qonunchilik palatasi deputatlarini va Devoni xodimlarini maʼnaviy va moddiy ragʻbatlantirish toʻgʻrisidagi nizom 2-ilovaga* muvofiq tasdiqlansin.

3. Komissiya:

Oʻzbekiston Respublikasi Oliy Majlisi Qonunchilik palatasi deputatlari (bundan buyon matnda deputatlar deb yuritiladi) tomonidan oʻz vakolatlari va vazifalari, Oʻzbekiston Respublikasi Oliy Majlisi Qonunchilik palatasi Devoni xodimlari (bundan buyon matnda xodimlar deb yuritiladi) tomonidan oʻz mehnat majburiyatlari va vazifalarining bajarilishini muntazam ravishda tahlil qilib borish;

deputatlarga “Adolatli deputat”, “Xalqparvar deputat”, “Mehnatkash deputat” maqomlarini berish, sobiq deputatlarga “Faxriy deputat” maqomini berish boʻyicha Oʻzbekiston Respublikasi Oliy Majlisi Qonunchilik palatasining Kengashiga tavsiya kiritish;

sidqidildan va samarali ishlayotgan, oʻz faoliyatida yuksak natijalarga erishgan, ijtimoiy hayotdagi faolligi, mehnatsevarligi bilan ajralib turadigan deputatlarga hamda xodimlarga ragʻbatlantirish choralarini qoʻllash bilan bogʻliq masalalarni koʻrib chiqish;

deputatlar va xodimlar faoliyatini yanada samarali tashkil etish boʻyicha Oʻzbekiston Respublikasi Oliy Majlisi Qonunchilik palatasining rahbariyatiga takliflar kiritib borish choralarini koʻrsin.

4. Oʻzbekiston Respublikasi Oliy Majlisi Qonunchilik palatasining Devoni (M. Istamov) Komissiyaning faoliyatini tashkil etishga, uning majlislarini oʻtkazib borishga koʻmaklashsin.

5. Komissiya oʻz faoliyati toʻgʻrisida har yil yakunida Oʻzbekiston Respublikasi Oliy Majlisi Qonunchilik palatasining majlisida axborot taqdim etsin.

6. Oʻzbekiston Respublikasi Oliy Majlisi Qonunchilik palatasi Kengashining 2023-yil 26-dekabrdagi 3862-IV-sonli Qarori bilan tasdiqlangan “Oʻzbekiston Respublikasi Oliy Majlisi Qonunchilik palatasining Faxriy yorligʻi va Tashakkurnomasi bilan taqdirlash toʻgʻrisida”gi nizomning 5-bandi “Qonunchilik palatasi deputatlarini” degan soʻzlardan keyin “va Devoni xodimlarini” degan soʻzlar bilan toʻldirilsin.

7. Oʻzbekiston Respublikasi Oliy Majlisi Qonunchilik palatasi Kengashining:

2020-yil 5-avgustdagi “Karantinga oid choralarning amal qilishi davrida masofaviy ish usuliga oʻtkazilgan Oʻzbekiston Respublikasi Oliy Majlisi Qonunchilik palatasi deputatlari va Devoni xodimlarining faoliyati natijadorligini oshirish masalalari toʻgʻrisida”gi 420-IV-sonli;

2020-yil 22-dekabrdagi “Oʻzbekiston Respublikasi Oliy Majlisi Qonunchilik palatasi deputatlarini maʼnaviy va moddiy ragʻbatlantirish boʻyicha komissiyani tuzish toʻgʻrisida”gi 660-IV-sonli;

2021-yil 2-martdagi “Oʻzbekiston Respublikasi Oliy Majlisi Qonunchilik palatasi Kengashining 2020-yil 22-dekabrdagi “Oʻzbekiston Respublikasi Oliy Majlisi Qonunchilik palatasi deputatlarini maʼnaviy va moddiy ragʻbatlantirish boʻyicha komissiyani tuzish toʻgʻrisida”gi 660-IV-sonli Qaroriga oʻzgartish kiritish haqida”gi 776-IV-sonli (Oʻzbekiston Respublikasi Oliy Majlisi palatalarining Axborotnomasi, 2021-yil, № 3, 283-modda);

2022-yil 14-martdagi “Oʻzbekiston Respublikasi Oliy Majlisi Qonunchilik palatasi Kengashining 2020-yil 22-dekabrdagi “Oʻzbekiston Respublikasi Oliy Majlisi Qonunchilik palatasi deputatlarini maʼnaviy va moddiy ragʻbatlantirish boʻyicha komissiyani tuzish toʻgʻrisida”gi 660-IV-sonli Qaroriga oʻzgartish kiritish haqida”gi 1944-IV-sonli (Oʻzbekiston Respublikasi Oliy Majlisi palatalarining Axborotnomasi, 2022-yil, № 3, 312-modda) qarorlari oʻz kuchini yoʻqotgan deb topilsin.

8. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari M. Xodjayeva zimmasiga yuklatilsin.

9. Ushbu Qaror qabul qilingan kundan eʼtiboran kuchga kiradi.