“Oʻzbekiston Respublikasi Oliy Majlisining Senati toʻgʻrisida”gi Konstitutsiyaviy Qonunning 16-moddasi, “Oʻzbekiston Respublikasi Oliy Majlisi Senatining Reglamenti toʻgʻrisida”gi Qonunning 6-moddasi muvofiq Oʻzbekiston Respublikasi Oliy Majlisi Senatining Kengashi qaror qiladi:

1. Xalq deputatlari viloyat (tuman, shahar) Kengashida ish yuritish boʻyicha namunaviy yoʻriqnoma ilovaga muvofiq tasdiqlansin.

2. Xalq deputatlari viloyat, tuman, shahar Kengashlariga Xalq deputatlari viloyat (tuman, shahar) Kengashida ish yuritish boʻyicha namunaviy yoʻriqnomani oʻz sessiyalarida koʻrib chiqish va tasdiqlash tavsiya etilsin.

3. Oʻzbekiston Respublikasi Oliy Majlisi Senati devonining Hududiy vakillik organlari faoliyatini oʻrganish markazi ushbu Qaror ijrosini taʼminlashda xalq deputatlari viloyat, tuman, shahar Kengashlari kotibiyatlariga amaliy yordam koʻrsatib borsin.

4. Mazkur Qarorning ijrosini nazorat qilish Oʻzbekiston Respublikasi Oliy Majlisi Senatining Mahalliy hokimiyat vakillik organlari faoliyatini kuchaytirishga koʻmaklashuvchi komissiyasi raisi T. Madumarov zimmasiga yuklansin.

5. Ushbu Qaror qabul qilingan kundan eʼtiboran kuchga kiradi.

1. Ushbu Yoʻriqnoma xalq deputatlari viloyat (tuman, shahar) Kengashida (bundan buyon matnda mahalliy Kengash deb yuritiladi) ish yuritish (hujjatlarni tayyorlash qoidalari, uslublari va jarayonlarini hamda hujjatlar bilan ishlash) tartibini belgilaydi.

2. Ish yuritishning holati uchun javobgarlik mahalliy Kengash kotibiyati (bundan buyon matnda kotibiyat deb yuritiladi) mudirining zimmasiga yuklatiladi.

3. Kotibiyat mahalliy Kengash sessiyalari va doimiy komissiyalarida ish yuritishga tashkiliy va uslubiy jihatdan koʻmaklashadi.

4. Mahalliy Kengashda hujjatlarni roʻyxatga olish, saqlash hamda ularning ijrosini taʼminlash uchun javobgarlik kotibiyat mudiri zimmasiga yuklatiladi.

5. Mahalliy Kengashlar, doimiy komissiyalarning qarorlari, komissiyalar majlislari bayonnomalari, mahalliy Kengash va komissiyalarning boshqa tashkilotlar bilan xizmat yozishmalarini tayyorlashda va rasmiylashtirishda ushbu Yoʻriqnomaga amal qilinadi.

6. Mahalliy Kengash doimiy komissiyalari aʼzolari va kotibiyat xodimlari ushbu Yoʻriqnoma bilan imzo qoʻydirilgan holda tanishtirilishi lozim.

8. Mahalliy Kengash faoliyatiga oid hujjatlarning tarkibi mahalliy Kengash, uning doimiy komissiyalari va kotibiyatning vakolatlari va vazifalaridan kelib chiqib belgilanadi.

9. Mahalliy Kengashda qoʻllaniladigan hujjatlarning tarkibini belgilash maqsadida kotibiyat mudiri tomonidan har yili yigʻmajildlar nomenklaturasi (yigʻmajildlarning roʻyxati hamda ularni saqlash muddatlari koʻrsatilgan holda) ishlab chiqiladi va mahalliy Kengash raisi tomonidan tasdiqlanadi.

10. Mahalliy Kengash hujjatlari turiga va mazmuniga koʻra toʻgʻri keladigan tegishli blankalarda chiqariladi.

Blankalardagi doimiy rekvizitlar davlat tilida yoziladi.

11. Hujjatni mahalliy Kengash raisi, doimiy komissiyalar raislari va kotibiyat mudiri oʻz vakolatlari doirasida imzolaydi.

12. Har bir hujjatda (xatlardan tashqari) uning turi (qaror, bayonnoma, maʼlumotnoma va shu kabilar) koʻrsatilishi kerak.

Hujjatga uning mazmunini aniq va loʻnda ifodalovchi sarlavha qoʻyilishi shart (bayonnomalar va yozishmalar bundan mustasno).

Hujjatning matni mazmunli, aniq, sodda, toʻliq va shaklan ixcham hamda Oʻzbekiston Respublikasining “Davlat tili toʻgʻrisida”gi Qonuni talablariga rioya qilingan holda tuzilishi lozim.

Alohida hollarda, hujjatlar chet tillarida ham tuzilishi mumkin.

13. Davlat organlari, jamoat tashkilotlari va muassasalarning qisqartma nomlari amalda tasdiqlangan shakllarga muvofiq qoʻllaniladi. Matnda shaxslarning familiyasi, geografik nomlar yoki ayrim maʼmuriy-hududiy birliklar sanab oʻtilayotgan boʻlsa, ular qoida tariqasida alifbo tartibida joylashtiriladi.

14. Oʻzaro uzviy bogʻliq uzun matn tarkibida bir nechta hujjatlar mavjud boʻlsa, matnning katta boʻlimlariga rim raqamlari va kichik boʻlimlariga arab raqamlari qoʻyilib, ular bandlarga boʻlinadi.

15. Hujjatlarning matnlari ikki qismga boʻlinadi:

birinchi qismda hujjatni tuzishning asosi yoki sabablari koʻrsatiladi;

ikkinchi qismda qaror, taklif va xulosa bayon etiladi.

16. Hujjatning mazmunini tushuntirish va asoslashga ehtiyoj boʻlmasa, matn bitta qismdan iborat boʻlishi mumkin.

17. Huquq va majburiyatlarni belgilovchi hujjatlarda (nizom, yoʻriqnoma va boshqalar), shuningdek, faktlarning tavsifi hamda bahosi beriladigan hujjatlarda (dalolatnoma, maʼlumotnoma va boshqalar) bayon uchinchi shaxs nomidan birlik yoki koʻplik sonda beriladi, masalan: “komissiya tarkibiga kiradi”, “komissiya quyidagilarni aniqladi”, “mudir vazifalarini amalga oshiradi”.

18. Xatlarda quyidagi bayon etish shakllaridan foydalaniladi:

birinchi shaxs nomidan koʻplik sonda (masalan: “joʻnatilishini soʻraymiz”, “koʻrib chiqish uchun joʻnatmoqdamiz”);

birinchi shaxs nomidan birlik sonda (masalan: “maqsadga muvofiq deb hisoblayman”, “ajratishingizni soʻrayman”);

uchinchi shaxs nomidan birlik sonda (masalan: “komissiya eʼtiroz bildirmaydi”).

19. Moliyaviy va raqamli maʼlumotlarda chalkashlikka yoʻl qoʻymaslik uchun raqamlar qavs ichida soʻz bilan takrorlanishi mumkin.

Masalan: “197 (bir yuz toʻqson yetti)”.

20. Hujjatning matnida qayd etilgan ilovalar boʻlsa, ular quyidagi shaklda rasmiylashtiriladi, masalan: “Ilova: 10 varaqda”.

21. Hujjatning matnida qayd etilmagan ilovalar boʻlsa, ularning nomi har bir ilovadagi varaqlar sonini koʻrsatgan holda birma-bir yozib chiqilishi kerak. Masalan:

22. Hujjat boshqa hujjat ilovasi bilan birga ilova qilinayotgan boʻlsa, u quyidagi shaklda rasmiylashtiriladi. Masalan:

23. Hujjatda koʻrsatilgan ayrim manzillarga ilova yuborilmaydigan boʻlsa, ilova borligi toʻgʻrisidagi qayd quyidagi shaklda rasmiylashtiriladi, masalan: “Ilova: 5 varaqda birinchi manzilga”.

24. Ilova muqovalangan boʻlsa, varaqlar soni koʻrsatilmaydi.

25. Hujjatlar tegishli manzillarga joʻnatilayotganda quyidagi qoidalarga rioya etilishi zarur:

a) hujjatlar tashkilotlarga, ularning tarkibiy boʻlinmalariga yoki aniq shaxs nomiga yoʻllanadi;

b) hujjatlar tashkilotlarga yoʻllanganda joʻnalish kelishigida koʻrsatiladi, masalan: “Oʻzbekiston Respublikasi Oliy Majlisining Senatiga”;

hujjatlar tashkilotlarning tarkibiy boʻlinmalariga yoʻllanganda tashkilot nomi qaratqich kelishigida, tarkibiy boʻlinma joʻnalish kelishigida koʻrsatiladi, masalan: “Oʻzbekiston Respublikasi Oliy Majlisi Senatining devoniga”;

hujjatlar tashkilot xodimi nomiga yoʻllanganda tashkilot nomi qaratqich kelishigida, tarkibiy boʻlinmalar nomi va shaxsning lavozimi bosh kelishikda, shaxs familiyasi esa joʻnalish kelishigida koʻrsatiladi, masalan: “Xalq deputatlari Andijon viloyat Kengashining Reglament va deputatlik odob-axloqi masalalari boʻyicha doimiy komissiyasi raisi A.A. Adilovga”;

d) hujjat tashkilot rahbariga yoʻllanayotganda tashkilot nomi qabul qiluvchi lavozimning nomi tarkibiga kiradi, masalan: “Buxoro davlat universiteti rektori”;

tashkilot rahbarining ismi va otasi ismining bosh harflari yoziladi hamda familiyasi joʻnalish kelishigida koʻrsatiladi, masalan: “A.A. Adilovga”;

e) hujjat bir turdagi bir necha tashkilotga yuborilayotgan boʻlsa, ularning nomlari umumlashtirma tarzda koʻrsatilishi lozim, masalan: “Qoraqalpogʻiston Respublikasi Joʻqorgʻi Kengesi, viloyatlar va Toshkent shahar hokimliklariga”;

f) yuborilayotgan hujjatda hujjat oluvchilarni toʻrttadan koʻp koʻrsatish mumkin emas. Ikkinchi, uchinchi va toʻrtinchi hujjat oluvchining nomidan oldin “nusxasi” degan soʻz qayd etilmaydi;

g) hujjat toʻrttadan ortiq manzilga yuborilayotgan boʻlsa, tarqatma roʻyxat tuziladi hamda har bir xatda faqat bitta hujjat oluvchi koʻrsatiladi;

h) hujjat jismoniy shaxsga yuborilayotgan boʻlsa, avval hujjat oluvchining pochta manzili, soʻngra ismi va otasi ismining bosh harflari hamda familiyasi koʻrsatiladi, masalan:

26. Hujjatlarga sana qoʻyish quyidagi usullarda amalga oshiriladi:

koʻproq moliyaviy masalalarga doir maʼlumotlari boʻlgan hujjat matniga sana qoʻyilayotganda — 2024-yil 10-iyul;

hujjatlar, hujjatlardagi rezolyutsiyalar, vizalar, hujjat ijro etilganligi toʻgʻrisidagi qaydlar va shu singarilarning sanasi qoʻyilayotganda — 2022.10.07.;

Mahalliy Kengash sessiyalariga taalluqli hujjatlarga sana qoʻyilayotganda — 2024-yil 10-iyul yoki 2024.10.07.

27. “Imzo” rekvizitlari tarkibiga hujjatni imzolayotgan shaxsning amaldagi lavozimi nomi, uning shaxsiy imzosi, ismining bosh harfi hamda familiyasi kiradi.

28. Hujjatlarni lavozim nomidan keyin “uning oʻrniga” degan soʻz qoʻshib yoki lavozim nomidan oldin qiya chiziq qoʻyib yoki boshqa shu kabi usullarda oʻzga shaxs tomonidan imzolanishiga yoʻl qoʻyilmaydi.

29. Hujjatning mazmuni uchun javobgarlik bir necha shaxslar zimmasida boʻlsa, bunday hujjatga ikki va undan ortiq shaxslar imzolari qoʻyiladi (dalolatnomalar, moliyaviy hujjatlar va h.k.).

30. Mahalliy Kengash doimiy komissiyalari tomonidan tayyorlangan hujjatlarda, bu hujjatlarni tuzgan shaxslarning lavozimlari emas, balki komissiyalar tarkibidagi vazifalari taqsimoti koʻrsatiladi, masalan:

31. Hujjat bir necha shaxs tomonidan imzolanganda imzolar mazkur shaxslarning egallab turgan lavozimlariga muvofiq ketma-ket joylashtiriladi, masalan:

32. Kelishuv taomili hujjat loyihasini dastlabki tarzda koʻrib chiqish va baholash usuli boʻlib, qoida tariqasida, vakolatlariga qarab tegishli doimiy komissiya va kotibiyat mudiri bilan kelishib olinadi. Hujjat loyihasining ichki kelishuv taomiliga hujjat loyihasini mahalliy Kengash komissiyalariga yoʻllash hamda ulardan yozma tarzdagi fikrlari (hujjat loyihasiga doir takliflar, mulohazalar va qoʻshimchalar) va imzosini olish kiradi.

33. Tashqi kelishuv taomili kelishuv ustxati bilan kelishuv toʻgʻrisidagi maʼlumotnomani, kelishuv varaqasi yoki hujjat loyihasi muhokamasining bayonnomasini taqdim etish orqali rasmiylashtirilishi mumkin, masalan:

“Kelishilgan

Adliya boshqarmasining 2024-yil 10-apreldagi 01-4/15-sonli qarori”.

34. Kelishuv ustxatlari “imzo” rekvizitidan pastroqqa yoki alohida kelishuv varaqasiga joylashtiriladi.

35. Hujjatning mazmuni bir necha tashkilotning manfaatlariga daxldor hollarda kelishuv varaqasi tuzilib, bu haqda ustxat yoziladigan joyda qayd etiladi.

36. Tasdiqlanishi kerak boʻlgan hujjat, agar hujjatda boshqa muddat nazarda tutilmagan boʻlsa, imzolangan va tasdiqlangan vaqtdan eʼtiboran kuchga kiradi.

37. Hujjatlar tegishli mahalliy Kengash raisi, doimiy komissiyalar raislari yoki kotibiyat mudiri tomonidan tasdiqlanadi.

38. Hujjat muayyan mansabdor shaxs tomonidan tasdiqlanadigan boʻlsa, tasdiq ustxati “Tasdiqlayman” degan soʻzdan, hujjatni tasdiqlayotgan shaxsning lavozimi, uning shaxsiy imzosi, ismining bosh harfi, familiyasi va imzolangan sanadan iborat boʻladi, masalan:

39. Hujjat qaror yoki bayonnoma bilan tasdiqlanayotgan boʻlsa, tasdiq ustxati “tasdiqlangan” degan soʻzdan oldin hujjatning bosh kelishikdagi nomi hujjat tasdiqlangan sana va tartib raqamini koʻrsatgan holda beriladi, masalan:

40. Tasdiq ustxati hujjatning yuqori oʻng burchagiga joylashtiriladi.

41. Mansabdor shaxslarning huquqlarini tasdiqlovchi, pul mablagʻlari va moddiy boyliklarning sarflanganligi faktini qayd etuvchi hujjatlar, shuningdek, meʼyoriy hujjatlar masʼul shaxsning imzosi va muhr bilan tasdiqlanadi.

42. Mahalliy Kengash faoliyatiga taalluqli hujjatlarning asl nusxalari (moliyaviy hujjatlar bundan mustasno) kotibiyatda saqlanadi.

43. Ushbu Yoʻriqnomaning 42-bandida koʻrsatilgan hujjatlardan koʻchirma nusxalar mahalliy Kengash raisi yoki kotibiyat mudirining ruxsati bilan olinadi va beriladi.

45. Ushbu Yoʻriqnomaning 42-bandida koʻrsatilgan hujjatlarning elektron yoki poligrafiya vositalarida koʻpaytirilgan koʻchirma nusxalari hujjat asl nusxasining blankadagi belgilari bilan birga toʻliq takrorlanadi.

46. Asliga toʻgʻri hisoblangan hujjatda “Asliga toʻgʻri” degan yozuv, tasdiqlovchi shaxsning lavozimi, uning shaxsiy imzosi, ismining bosh harfi, familiyasi hamda nusxa tasdiqlangan sana qayd etiladi, masalan:

47. Hujjat nusxasi boshqa tashkilotga joʻnatilayotganda imzo chekish va muhr bosish orqali tasdiqlanishi lozim.

48. Asl nusxadagi imzoni aynan aks ettira olmaydigan hujjatlarning koʻpaytirilgan koʻchirma nusxalariga tasdiqlovchi muhr bosiladi.

49. Mahalliy Kengashning doimiy komissiyalari hamda kotibiyati tomonidan ichki va boshqa hujjatlar mahalliy Kengash raisi, shuningdek, kotibiyat mudiri rezolyutsiyasiga binoan olinadi. Hujjatlarni joʻnatish “E-xat”, “edo.ijro.uz” axborot xizmati yoki pochta aloqa tarmogʻi orqali amalga oshiriladi.

50. Mahalliy Kengash qarorlari mahalliy Kengashning tegishli doimiy komissiyalari hamda kotibiyati tomonidan tayyorlanadi. Komissiyalar raislari va kotibiyat mudiri qaror loyihalari amaldagi qonun hujjatlariga muvofiq boʻlishini taʼminlashi lozim.

51. Mahalliy Kengash sessiyasi muhokamasiga kiritilishi rejalashtirilayotgan masalalar boʻyicha tayyorlangan qaror loyihalariga mahalliy Kengashning masʼul doimiy komissiyasi raisi hamda kotibiyat mudiri imzo qoʻyadi. Qaror loyihalari va ularga taalluqli hujjatlar masʼul komissiya hamda kotibiyat tomonidan koʻpaytirilib, mahalliy Kengash deputatlariga topshiriladi.

52. Mahalliy Kengash qarorlari qabul qilingandan soʻng tegishli meʼyoriy hujjatlarga muvofiq raqamlanib, kotibiyat tomonidan belgilangan shakldagi blankada chiqariladi. Mahalliy Kengash qarorlari va ularga taalluqli hujjatlarga imzo (viza) yigʻish tegishli doimiy komissiya aʼzolari hamda kotibiyat xodimlari tomonidan amalga oshiriladi.

53. Mahalliy Kengash qarorlari imzolangandan soʻng qaror loyihasini tayyorlagan masʼul ijrochiga qaror imzolanganligi haqida kotibiyat tomonidan ikki kun muddatda maʼlum qilinadi.

Mahalliy Kengash qarorlari hamda ularga taalluqli hujjatlar imzolanganidan keyin uch kun ichida “Joʻnatish roʻyxati” bilan birga masʼul doimiy komissiya tomonidan kotibiyatga topshiriladi.

54. Mahalliy Kengash doimiy komissiyalari majlislari olib borilishini, majlis qatnashchilarining chiqishlarini hamda ular qabul qilgan qarorlarni aniq va qisqa qayd qilish orqali bayonnoma tuziladi. Bayonnoma komissiya aʼzosi tomonidan yuritiladi.

55. Mahalliy Kengash komissiyalari majlislari va tadbirlari (konferensiyalar, seminarlar, davra suhbatlari va boshqalar) olib borilishini, majlis qatnashchilarining chiqishlarini hamda ular qabul qilgan qarorlarni aniq va qisqa qayd qilish orqali bayonnoma tuziladi.

Doimiy komissiyalar majlislari bayonnomasi komissiyaning kotibi va doimiy komissiyaga biriktirilgan kotibiyat xodimi tomonidan yuritiladi va rasmiylashtiriladi. Doimiy komissiyalar tadbirlari hamda boshqa majlislarda esa bu ishni yigʻilish jarayonida saylangan kotib bajaradi. Bayonnomadagi axborotlarning aniqligi uchun masʼuliyat va javobgarlik majlis raisi va kotibi zimmasiga yuklatiladi.

56. Mahalliy Kengashga hujjatlar qogʻoz yoki elektron shaklda kiritilishi mumkin. Hujjatlarni qabul qilib olish va ularni dastlabki ishlovdan oʻtkazish kotibiyat tomonidan amalga oshiriladi.

57. Qogʻoz nusxadagi hujjatlar solingan konvertlar, shu jumladan buyurtma xatlar ochiladi hamda ularda hujjatlar (ilovalar) bor-yoʻqligi koʻzdan kechiriladi.

58. Tashqi elektron hujjatlar bilan ishlash faqat himoyalangan E-xat, Edo.gov.uz, Ijro.gov.uz va ularning reglamentlariga asosan amalga oshiriladi.

59. Hujjatlarda kamchilik borligi yoki ularga shikast yetkazilganligi aniqlansa, bu xususida ikki nusxada dalolatnoma tuzilib, ulardan biri kotibiyatning oʻzida qoladi, ikkinchisi esa mazkur konvert qaysi tashkilotdan kelgan boʻlsa, oʻsha tashkilotga yuboriladi.

60. Yanglish yuborilgan hujjatlar yangi konvertga solinib, kelgan konvertni ham ilova qilgan holda taalluqliligi boʻyicha joʻnatiladi yoki qaysi tashkilotdan kelgan boʻlsa, oʻsha tashkilotning oʻziga qaytariladi.

61. Kelib tushgan hujjatlar konvertlari (shu jumladan jismoniy va yuridik shaxslarning murojaatlari) joʻnatuvchining manzilini, hujjatning joʻnatilgan va olingan vaqtini, shuningdek, shaxsiy yoki xizmat haqi toʻlab olinadigan hujjatlarni faqat konverti boʻyicha aniqlash mumkin boʻlgan hollarda yoʻq qilinmaydi.

62. Olingan hujjat birinchi varagʻining pastki oʻng burchagiga kotibiyatning qayd etish shtampi qoʻyiladi, unda hujjat kelib tushgan sana va uning qayd etish tartib raqami hamda varaqlar soni aks ettiriladi.

63. Mahalliy Kengash hujjatlarining loyihalari, shu jumladan, xizmat doirasida foydalanish uchun moʻljallangan hujjatlar loyihalari “E-Kengash” elektron tizimi orqali qabul qilinadi.

64. Mahalliy Kengash tomonidan qabul qilinadigan normativ-huquqiy hujjatlarni davlat hisobiga olish “E-Kengash” elektron tizimi orqali amalga oshiriladi.

65. “E-Kengash” elektron tizimini chetlab oʻtgan holda mahalliy Kengashning tegishli qarorlari va mahalliy Kengash raisining farmoyishlarini qabul qilishga (chiqarishga) yoʻl qoʻyilmaydi. Bunday hujjatlar yuridik kuchga ega emas hamda u qabul qilingan paytdan eʼtiboran hech qanday huquqiy oqibatlarni keltirib chiqarmaydi.

66. Qonunchilik hujjatlariga muvofiq davlat siri hisoblangan maʼlumotlar va maxfiy maʼlumotlarni oʻz ichiga olgan mahalliy davlat hokimiyati organlarining hujjatlari loyihalarini “E-Kengash” elektron tizimi orqali qabul qilishga (chiqarishga) yoʻl qoʻyilmaydi.

Qonunchilik hujjatlarida nazarda tutilgan hollardan tashqari maxfiy toifaga kirmaydigan hujjatlar loyihalarini mustaqil ravishda ushbu toifaga kiritish taqiqlanadi.

67. Mahalliy Kengashga kelib tushgan hujjatlar “E-Kengash” elektron tizimida roʻyxatga olinadi.

Ushbu roʻyxatga olish rekvizitlarining quyidagi majburiy tarkiblari qayd etiladi:

hujjatning qayerdan kelganligi;

hujjatni joʻnatuvchi tashkilot nomi;

hujjatning chiqish tartib raqami va sanasi;

hujjatning nomi va qisqacha mazmuni;

hujjatning kirim tartib raqami va sanasi.

Dasturning “rezolyutsiya” qismida hujjatdagi ijro etishga doir koʻrsatmalar rezolyutsiya shaklida berilib, unda quyidagi majburiy elementlar oʻz aksini topadi:

ijrochining (ijrochilarning) familiyasi;

topshiriqning mazmuni;

topshiriqning ijro muddati (zarur hollarda);

imzo va sana.

Masalan:

“Ijrochi ismining bosh harfi hamda familiyasi;

Xalq deputatlari Xiva tumani Kengashining navbatdagi sessiyasi kun tartibi loyihasiga kiritishingizni soʻrayman.

Maxsus elektron dasturda roʻyxatga olingan hujjatlarning qogʻoz shakli kotibiyatda saqlanadi va tegishli muddatlarda arxivga topshirish choralari koʻriladi.

68. Hujjatlar elektron tizim orqali ijrochilarga yetkaziladi.

69. Mahalliy Kengash raisi tomonidan ijro etish muddatlari belgilangan hujjatlar (javob qaytarish, oʻrganib chiqib, taklif berish, maʼlumot tayyorlash va h.k.) kotibiyat mudiri tomonidan nazoratga olinadi.

70. Mahalliy Kengashning bir nechta doimiy komissiyasi tomonidan ijro etiladigan hujjatlar elektron dastur orqali ijrochilarga bir vaqtning oʻzida yetkaziladi.

71. Hujjatdagi tegishli rezolyutsiyada kimning nomi birinchi koʻrsatilgan boʻlsa, oʻsha shaxs ijro uchun masʼul hisoblanadi yoki asosiy ijrochining nomi alohida koʻrsatiladi.

72. Ustki qismiga “Shaxsan” deb yozilgan paketlar ochilmaydi va taalluqliligi boʻyicha topshiriladi. Ayrim hollarda bunday konvertlar oluvchining ruxsati bilan u vakolat bergan shaxs tomonidan ochilishi mumkin.

73. Hujjatlarni dastlabki tarzda koʻrib chiqish ularning mazmuniga qarab vakolatlar va vazifalar taqsimotining mahalliy Kengashda belgilangan tartibiga asoslangan holda amalga oshiriladi.

74. Bevosita mahalliy Kengash rahbariyati, doimiy komissiyalar, kotibiyatga yoʻllangan hujjatlar dastlabki tarzda koʻrib chiqilmaydi va taalluqliligi boʻyicha topshiriladi.

75. Jismoniy va yuridik shaxslarning murojaatlari tegishli masʼul ijrochiga yoʻnaltirish uchun kotibiyatga beriladi.

76. Jismoniy va yuridik shaxslarning murojaatlari bilan ishlashni tashkil etish tartibi, shuningdek, jismoniy va yuridik shaxslarni qabul qilish alohida tasdiqlangan meʼyoriy hujjatlar asosida amalga oshiriladi.

77. Mahalliy Kengash doimiy komissiyasining nomi koʻrsatilmagan holda kelgan hujjatlar kotibiyatda dastlabki tarzda koʻrib chiqiladi.

78. Oʻzbekiston Respublikasi Oliy Majlisining Qonunchilik palatasi, Oʻzbekiston Respublikasi Prezidenti Administratsiyasi, Oʻzbekiston Respublikasi Vazirlar Mahkamasi yoki huquqni muhofaza qiluvchi organlardan olingan, mahalliy Kengash faoliyati bilan bogʻliq masalalarga oid axborotlari boʻlgan, mahalliy Kengash rahbariyati tomonidan hal qilish talab etiladigan hujjatlar, shu jumladan deputatlarning va kotibiyat xodimlarining xatti-harakatlariga taalluqli hujjatlar mahalliy Kengash rahbariyatiga koʻrib chiqish uchun beriladi.

79. Hujjatlarni ishlovdan oʻtkazish va ijrochilarga yetkazish hujjatlar kelib tushgan kunning oʻzida, agar hujjatlar ish vaqtidan tashqari vaqtda kelgan taqdirda, keyingi ish kunida amalga oshiriladi.

80. Mahalliy Kengash doimiy komissiyalari hamda kotibiyat oʻrtasidagi ichki yozishmalarga taalluqli hujjatlar roʻyxatga olinmaydi.

81. Hujjatlarni ishlovdan oʻtkazish va joʻnatish kotibiyat tomonidan amaldagi pochta qoidalariga muvofiq amalga oshiriladi.

82. Hujjatlarni konvertga joylashtirishdan avval ularning toʻgʻri rasmiylashtirilganligi, ilovalar bor-yoʻqligi, nusxalar sonining hujjatlarni oluvchilar soniga muvofiqligi tekshiriladi. Toʻliq rasmiylashtirilmagan yoki notoʻgʻri rasmiylashtirilgan hujjatlar belgilangan talablarga asosan qayta tayyorlab yuborish uchun ijrochiga qaytariladi.

83. Javob tariqasida tayyorlangan hujjatlarni roʻyxatga olish birlamchi hujjatning qayd etish shakllarida amalga oshiriladi. Javob tariqasida tayyorlangan hujjatlar ustiga ushbu javob qaysi hujjatga taalluqli boʻlsa, shu hujjatning tartib raqami va sanasi yozib qoʻyiladi.

84. Buyurtma, joʻnatma (reyestr) usuli bilan joʻnatilayotgan hujjat uchun tarqatma roʻyxat tuzilib, unga kotibiyat mutaxassisi oʻz familiyasini hamda joʻnatilayotgan sanani yozib qoʻyadi.

85. Axborot texnologiyalari uskunalari yordamida oʻqiladigan hujjatlar ularda yozilgan axborotlar saqlanishining texnik talablariga mos keladigan oʻramda (idishda) joʻnatiladi.

86. Axborot texnologiyalari uskunalari yordamida oʻqiladigan hujjatlarni joʻnatish ularga yozma xat ilova qilingan taqdirdagina amalga oshiriladi.

87. Joʻnatish uchun kelib tushgan hujjatlar oʻsha kunning oʻzida ishlanishi va joʻnatilishi kerak. Joʻnatish uchun kelib tushadigan hujjatlar kotibiyat tomonidan soat 16:00 ga qadar qabul qilinadi. Soat 16:00 dan keyin topshirilgan hujjatlar keyingi ish kunida joʻnatiladi.

88. Hujjatlarni joʻnatish uchun topshirish mahalliy Kengash doimiy komissiyalarida yoki kotibiyatda ish yuritishga masʼul shaxslar tomonidan amalga oshiriladi.

89. Mahalliy Kengash hujjatlarining hisobi toʻliq va saralangan tarzda (doimiy komissiyalar boʻyicha alohida yoki kotibiyat boʻyicha alohida yoxud hujjatlar guruhi boʻyicha alohida) yuritiladi. Jismoniy va yuridik shaxslarning murojaatlari alohida hisobga olinadi. Hujjatlarning sonini hisoblab chiqishda koʻpaytirilgan va kompyuterda yozilgan nusxalar hisob birligi deb qabul qilinadi.

90. Hujjatlarni hisobga olish natijalari kotibiyat tomonidan umumlashtiriladi hamda ish yuritishni takomillashtirish choralarini koʻrish uchun mahalliy Kengash rahbariyatiga taqdim etiladi.

91. Ijroni nazorat qilish — hujjatlarni ijro nazoratiga qoʻyish, ijro borishining dastlabki tekshiruvini va tahlilini, hujjatlar ijrosini nazorat qilish natijalarini hisobga olish va umumlashtirishni, mahalliy Kengash rahbariyatini xabardor qilishni, oʻz vaqtida va sifatli ijroni taʼminlamagan masʼullarga nisbatan javobgarlik choralari qoʻllashni oʻz ichiga oladi.

92. Ijro muddatlari hujjat imzolangan (tasdiqlangan) sanadan eʼtiboran kalendar kunlar bilan hisoblanadi.

93. Ijroning oxirgi sanasi hujjat matnida yoki mahalliy Kengash rahbariyati yoxud kotibiyat mudirining rezolyutsiyasida koʻrsatiladi.

94. Hujjat faqat vazifalar, topshiriqlar va soʻrovlar bajarilib, ijrosi hujjatli asosda tasdigʻini topgach, ijro etilgan hisoblanadi hamda nazoratdan chiqariladi.

95. Hujjat ijrochisining hujjatni ijroga chiqargan mahalliy Kengash rahbariyati va kotibiyat mudiri nomiga yozgan asoslantirilgan bildirgisi asosida hujjatning ijrosi nazoratdan chiqarilishi yoki ijro muddati oʻzgartirilishi mumkin.

96. Kotibiyat hujjatlarning doimiy komissiyalar hamda kotibiyat mutaxassislari tomonidan ijro etilishi bilan bogʻliq ishlarning ahvolini muntazam tahlil qilib boradi. Mahalliy Kengash rahbariyatiga ijro intizomining holati haqida axborot berib turish uchun kotibiyat mudiriga maʼlumotlar taqdim etib turadi.

97. Hujjatlar yigʻmajildlari nomenklaturasi — mahalliy Kengashda yuritiladigan belgilangan tartibda rasmiylashtirilgan va ularni saqlash muddatlari koʻrsatilgan holda tartibga solingan hujjatlar roʻyxatidir.

Mahalliy Kengashning doimiy komissiyalari va kotibiyatda ish yuritishda hujjatlar yigʻmajildlarini jamlash va hisobga olish tartibli boʻlishi uchun yigʻmajildlar nomenklaturasi tuziladi.

98. Doimiy komissiyalar takliflariga asosan har yili mahalliy Kengashda kotibiyat tomonidan yigʻmajildlar nomenklaturasi tuziladi hamda mahalliy Kengash Raisi tomonidan tasdiqlanadi.

99. Yigʻmajildlar nomenklaturasi tuzilayotganda turkum va namunaviy ishlar nomenklaturasiga, saqlash muddatlari koʻrsatilgan turkum va idoraviy roʻyxatlarga, idoraviy arxivlar ishining asosiy qoidalariga rioya etish lozim.

100. Xizmat zaruratiga koʻra yil davomida ish yuritishda yangi yigʻmajildlar shakllangan boʻlsa, yil tugagach, ular kelgusi yilga shakllanadigan yigʻmajildlar nomenklaturasiga kiritiladi.

101. Muayyan masalaga oid avvalgi yilda boshlangan yozishmalar qayta tiklanganda hujjatlar avvalgi yildagi yigʻmajild indeksi koʻrsatilgan tarzda joriy yildagi yigʻmajildga kiritiladi.

102. Hujjatlar yigʻmajildini shakllantirish — bu hujjatlar yigʻmajildlari nomenklaturasiga muvofiq hujjatlar yigʻmajildlaridagi ijro etilgan va boshqa hujjatlarni guruhlarga boʻlishdir.

103. Hujjatlar yigʻmajildlarini shakllantirishda quyidagi qoidalarga rioya qilish zarur:

hujjatlar yigʻmajildiga nomenklatura boʻyicha hujjatlar yigʻmajildi sarlavhalariga muvofiq faqat ijro etilgan va toʻgʻri rasmiylashtirilgan hujjatlarni joylashtirish;

hujjatlar yigʻmajildida bitta kalendar yilning hujjatlarini guruhlash, yildan-yilga oʻtuvchi hujjatlar yigʻmajildlari bundan mustasno;

hujjatlar yigʻmajildlarida doimiy va vaqtincha saqlanadigan hujjatlarni alohida guruhlash.

Hujjatlar yigʻmajildiga qaytarish lozim boʻlgan, ortiqcha nusxalar, xomaki qoʻl yozmalar joylanmasligi kerak va hujjatlar yigʻmajildi 300 varaqdan oshmasligi kerak.

104. Ijro etilgan va toʻgʻri rasmiylashtirilgan hujjatlar yigʻmajildga nomenklaturaga muvofiq joylashtiriladi.

105. Doimiy va vaqtincha saqlanadigan hujjatlar alohida-alohida yigʻmajildlarda saqlanadi.

106. Ilgari kotibiyatda ishlagan shaxslarning yigʻmajildlari va hujjatlaridan foydalanishga mahalliy Kengash raisining yozma ruxsati bilan yoʻl qoʻyiladi.

107. Hujjatlar va yigʻmajildlar kotibiyatda 3 yil muddatda saqlanadi, soʻngra tegishli hudud arxiv idorasiga topshiriladi.

108. Mahalliy Kengashda hujjatlar yigʻmajildlarining saqlanishi, ularni davlat saqloviga topshirishga tayyorlash javobgarligi kotibiyat mudirining zimmasiga yuklatiladi.

109. Kotibiyat mudiri doimiy komissiyalar hamda kotibiyat xodimlari ish yurituvida boʻlgan hujjatlarning saqlanishi uchun javobgardir.

110. Xizmat hujjatlarini egallab turgan lavozimiga koʻra ular bilan tanishishi mumkin boʻlgan shaxslardan boshqa shaxslarga berish yoki oshkor qilish, ulardan ish faoliyati bilan bogʻliq boʻlmagan boshqa holatlarda foydalanish taqiqlanadi.

111. Hujjatlar yoʻqotilgan yoki yaroqsiz holatga kelgan taqdirda, masʼul xodim darhol bu haqda kotibiyat mudiriga bildirgi orqali murojaat qilishi shart.

112. Ushbu Yoʻriqnoma talablarini buzish belgilangan tartibda javobgarlikka olib keladi.