O‘zbekiston Respublikasi Prezidentining “Pensiyalar, nafaqalar, stipendiyalar hamda respublikaning budjet muassasalari va tashkilotlarida ish haqi miqdorlarini oshirish to‘g‘risida”gi 1995-yil 16-avgustdagi PF-1213-son Farmoniga muvofiq buyuraman:

1. Budjet tashkilotlari xodimlarini moddiy rag‘batlantirish maxsus fondi to‘g‘risidagi nizom 1-ilovaga muvofiq tasdiqlansin.

2. Ayrim idoraviy normativ-huquqiy hujjatlar 2-ilovaga muvofiq o‘z kuchini yo‘qotgan deb topilsin

3. Mazkur buyruq O‘zbekiston Respublikasi Kambag‘allikni qisqartirish va bandlik vazirligi bilan kelishilgan.

4. Mazkur buyruq rasmiy e’lon qilingan kundan e’tiboran kuchga kiradi.

Ushbu Nizom Budjet tashkilotlari xodimlarini moddiy rag‘batlantirish maxsus jamg‘armasi (bundan buyon matnda Moddiy rag‘batlantirish maxsus fondi deb yuritiladi) hisobidan budjet tashkilotlarining xodimlarini moddiy rag‘batlantirish tartibini belgilaydi.

1. Moddiy rag‘batlantirish maxsus fondi respublikadagi budjet tashkilotlarida (tibbiyot muassasalari, barcha turdagi umumta’lim maktablari, o‘rta maxsus va professional ta’lim muassasalaridan tashqari) mehnat haqi fondining 15 foizi miqdorida tashkil etiladi.

“Muruvvat” internat uylari va Ijtimoiy qo‘llab-quvvatlash markazlari, urush va mehnat faxriylari sanatoriylari, nogironlar reabilitatsiya markazlari va uyda ijtimoiy yordam ko‘rsatish xizmati xodimlarining Moddiy rag‘batlantirish maxsus fondi miqdori mehnat haqi fondining 25 foizi miqdorida tashkil etiladi.

Mazkur banddagi Moddiy rag‘batlantirish maxsus fondi bo‘yicha belgilangan foiz miqdorlari alohida normativ-huquqiy hujjatlarda ko‘rsatilgan budjet tashkilotlari uchun tatbiq etilmaydi.

2. Mehnat haqi fondiga bazaviy tarif stavkasi, lavozim maoshi, mehnatni rag‘batlantirish koeffitsiyenti, alohida mehnat sharoitlari uchun to‘lov, uzoq yil xizmat qilgani uchun to‘lov, maxsus unvonlar uchun to‘lanadigan ustama, tuman koeffitsiyentlari uchun to‘lanadigan ustama, budjetdan ajratiladigan ikki oylik mehnat haqi fondi miqdoridagi mukofot, bir oylik mehnat haqi fondi miqdoridagi moddiy yordam, shuningdek ijtimoiy soliq hisoblanadigan boshqa to‘lovlar kiradi.

3. Moddiy rag‘batlantirish maxsus fondi budjet mablag‘lari hisobidan shakllantiriladi.

Moddiy rag‘batlantirish maxsus fondi mablag‘lari, muassasaning xarajatlar smetasida O‘zbekiston Respublikasi Davlat budjeti xarajatlari iqtisodiy tasnifining 41 11 100 “Asosiy ish haqi” moddasiga (toifa, modda, kichik modda va element) kiritish bilan shtatlar jadvalining “Xodimlarning moddiy rag‘batlantirish maxsus fondi” alohida satrida ajratib ko‘rsatilgan holda nazarda tutiladi.

4. Moddiy rag‘batlantirish maxsus fondi mablag‘lariga qonunchilikda belgilangan tartibda va o‘rnatilgan stavkalarda ijtimoiy soliq hisoblanadi. Moddiy rag‘batlantirish maxsus fondi mablag‘laridan amalga oshirilgan to‘lovlarga jismoniy shaxslardan olinadigan daromad solig‘i hisoblanadi, shuningdek qonunchilikka muvofiq tegishli ushlanmalar ushlab qolinadi.

5. Moddiy rag‘batlantirish maxsus fondi mablag‘lari budjet tashkilotlari xodimlari ish haqiga ustamalar belgilash va xodimlarni mukofotlashga yo‘naltiriladi hamda rejalashtirilgan mablag‘lar doirasida sarflanadi.

Budjet tashkilotlarida shtat birliklari to‘ldirilmaganligi hisobiga shakllangan moddiy rag‘batlantirish maxsus fondining mablag‘lari bo‘shab qolgan mablag‘lar hisoblanmaydi.

Moddiy rag‘batlantirish maxsus fondi mablag‘lari hisobidan ustamalar belgilash yoki mukofotlash budjet tashkilotlari xodimlarining tarif stavkasi yoki lavozim maoshiga (rag‘batlantirish koeffitsiyentini inobatga olgan holda) nisbatan amalga oshiriladi.

6. Budjet tashkilotlarida xizmat vazifalarini tashabbuskorlik va vijdonan bajargan yuqori malakali xodimlarni rag‘batlantirish maqsadida, qonunchilikda belgilangan tartibda ishda erishgan yutuqlari uchun tarif stavkasi yoki lavozim maoshining (rag‘batlantirish koeffitsiyentini inobatga olgan holda) 50 foizidan oshmagan miqdorlarda shaxsiy ustamalar belgilanadi. O‘zbekiston Respublikasi Davlat budjeti mablag‘laridan moliyalashtiriladigan budjet tashkilotlarining boshqaruv xodimlari uchun ushbu ustamalarning eng yuqori miqdorlari chegaralanmaydi.

Mazkur ustamalar rahbarga yuqori turuvchi tashkilot tomonidan, boshqa xodimlarga muassasa yoki tashkilot rahbari tomonidan belgilanadi.

Budjet tashkilotining markaziy apparat xodimlariga ustamalar ushbu organning rahbari tomonidan belgilanadi. Budjet tashkilotlari rahbarini ustamasi yuqori turuvchi organ ruxsati bilan belgilanadi.

Ish sifati yomonlashganda, topshiriqlar o‘z vaqtida bajarilmaganda, mehnat va ijro intizomi buzilganda, ustamalar bekor qilinadi yoki kamaytiriladi.

7. Xodimlarga mukofotlar to‘lash hisobot davri yakuni bo‘yicha hamda yubiley va bayramlarda amalga oshiriladi. Mukofotlarning miqdori ishning umumiy natijalariga xodimning shaxsiy ulushiga qarab belgilanadi va mukofotning yuqori miqdorlari chegaralanmaydi.

8. Moddiy rag‘batlantirish maxsus fondi hisobidan amalga oshirilgan to‘lovlar barcha hollarda (ta’til uchun to‘lov, pensiyani tayinlashda, vaqtinchalik mehnatga qobiliyatsizlik nafaqasi va boshqalar) o‘rtacha ish haqini hisoblashda hisobga olinadi.

9. Moddiy rag‘batlantirish maxsus fondi bo‘yicha qilingan xarajatlar budjet tashkilotlarining alohida buxgalteriya hisobi registrlarida yuritiladi.

Budjet tashkilotlari xarajatlar smetasining ijrosi haqidagi hisobotda Moddiy rag‘batlantirish fondi hisobidan amalga oshirilgan xarajatlar O‘zbekiston Respublikasi Davlat budjeti xarajatlari iqtisodiy tasnifi bo‘yicha asosiy ish haqi xarajatlari tarkibida aks ettiriladi.

10. Moddiy rag‘batlantirish maxsus fondi mablag‘laridan maqsadli foydalanilishi ustidan nazoratni amalga oshirish budjet tashkilotlari rahbarlariga yuklatiladi.

1. O‘zbekiston Respublikasi Moliya vazirligi tomonidan 1995-yil 8-sentabrda 98-son bilan tasdiqlangan Budjet muassasalari va tashkilotlari xodimlarini moddiy rag‘batlantirishning maxsus jamg‘armasi to‘g‘risidagi nizom (ro‘yxat raqami 177, 1995-yil 20-sentabr).

2. O‘zbekiston Respublikasi moliya vazirining 2002-yil 19-martdagi 44-sonli “Budjet muassasalari va tashkilotlari xodimlarini moddiy rag‘batlantirishning maxsus jamg‘armasi to‘g‘risidagi nizomga o‘zgartirish kiritish to‘g‘risida”gi buyrug‘i (ro‘yxat raqami 177-1, 2002-yil 26-mart) (Me’yoriy hujjatlar axborotnomasi, 2002-yil 6-son).

3. O‘zbekiston Respublikasi moliya vazirining 2004-yil 20-yanvardagi 22-sonli “Budjet muassasalari va tashkilotlari xodimlarini moddiy rag‘batlantirishning maxsus jamg‘armasi to‘g‘risidagi nizomga o‘zgartirish kiritish to‘g‘risida”gi buyrug‘i (ro‘yxat raqami 177-2, 2004-yil 9-fevral) (O‘zbekiston Respublikasi qonun hujjatlari to‘plami, 2004-yil 6-son, 77-modda).

4. O‘zbekiston Respublikasi moliya vazirining 2007-yil 30-apreldagi 45-sonli “Budjet muassasalari va tashkilotlari xodimlarini moddiy rag‘batlantirishning maxsus jamg‘armasi to‘g‘risidagi nizomga qo‘shimcha kiritish haqida”gi buyrug‘i (ro‘yxat raqami 177-3, 2007-yil 17-maydagi) (O‘zbekiston Respublikasi qonun hujjatlari to‘plami 2007-yil 19-20-son, 209-modda).

5. O‘zbekiston Respublikasi moliya vazirining 2007-yil 20-dekabrdagi 109-sonli “Budjet muassasalari va tashkilotlari xodimlarini moddiy rag‘batlantirishning maxsus jamg‘armasi to‘g‘risidagi nizomga o‘zgartirish va qo‘shimchalar kiritish haqida”gi buyrug‘i (ro‘yxat raqami 177-4, 2008-yil 11-yanvar) (O‘zbekiston Respublikasi qonun hujjatlari to‘plami, 2008-yil 1-2-son, 9-modda)

6. O‘zbekiston Respublikasi moliya vazirining 2015-yil 7-iyuldagi 64-sonli “Budjet muassasalari va tashkilotlari xodimlarini moddiy rag‘batlantirishning maxsus jamg‘armasi to‘g‘risidagi nizomning 3.2-bandiga o‘zgartirish kiritish haqida”gi buyrug‘i (ro‘yxat raqami 177-5, 2015-yil 9-iyul) (O‘zbekiston Respublikasi qonun hujjatlari to‘plami 2015-yil 27 son, 363-modda).

7. O‘zbekiston Respublikasi moliya vazirining 2014-yil 22-apreldagi 35-sonli “Budjet muassasalari va tashkilotlari xodimlarini moddiy rag‘batlantirishning maxsus jamg‘armasi to‘g‘risidagi nizomga rasmiy sharh berish to‘g‘risida”gi buyrug‘i (ro‘yxat raqami 6-16/1-5260/6, 2014-yil 30-aprel) (O‘zbekiston Respublikasi qonun hujjatlari to‘plami 2014-yil 18-son).