Yevropa tiklanish va taraqqiyot bankining kredit mablagʻlaridan samarali foydalanish, metall quyish hajmlarini koʻpaytirish hamda yuk vagonlarining har xil turlarini yigʻish va taʼmirlash boʻyicha yangi ishlab chiqarishlarni oʻzlashtirish, “Irgidromash” ochiq aksiyadorlik jamiyatining ishlab chiqarish quvvatlaridan oqilona foydalanish maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi, Qishloq va suv xoʻjaligi vazirligi hamda “Oʻzbekiston temir yoʻllari” davlat-aksiyadorlik kompaniyasining “Irgidromash” ochiq aksiyadorlik jamiyatini “Oʻzbekiston temir yoʻllari” davlat-aksiyadorlik kompaniyasi “Oʻztemiryoʻltaʼmirmash” korxonasining shuʼba korxonasiga aylantirish, uning bazasida “Dizel lokomotivlari parkini zamonaviylashtirish” investitsiya loyihasining metall quyish qismini amalga oshirish uchun “Irgidromash” ochiq aksiyadorlik jamiyatining asosiy vositalarini mazkur korxona balansiga tekin oʻtkazish toʻgʻrisidagi taklifiga rozilik berilsin.

2. Oʻzbekiston Respublikasi Qishloq va suv xoʻjaligi vazirligi “Suvsanoatenergo” korxonasi balansidan suv olish inshooti boʻlgan bugʻqozonxonani va 18-qurilayotgan korxonalar birlashgan direksiyasi balansidan qurilishi tugallanmagan maʼmuriy korpusni qoldiq qiymati boʻyicha “Oʻzbekiston temir yoʻllari” davlat-aksiyadorlik kompaniyasining “Oʻztemiryoʻltaʼmirmash” korxonasi balansiga oʻtkazishni belgilangan tartibda amalga oshirsin.

3. “Oʻzbekiston temir yoʻllari” davlat-aksiyadorlik kompaniyasining “Oʻztemiryoʻltaʼmirmash” korxonasi oʻz mulkiga tekin oladigan asosiy vositalar boʻyicha daromad (foyda) soligʻi toʻlashdan ozod qilinsin.

4. “Oʻzbekiston temir yoʻllari” davlat-aksiyadorlik kompaniyasi Oʻzbekiston Respublikasi Qishloq va suv xoʻjaligi vazirligining foydalanish va qurilish boʻlinmalari tomonidan “Irgidromash” shuʼba korxonasiga beriladigan buyurtmalarning oʻz vaqtida va sifatli bajarilishini qonun hujjatlarida belgilangan tartibda taʼminlasin.

5. Vazirlar Mahkamasining “2003-2004-yillarda korxonalarni davlat tasarrufidan chiqarish va xususiylashtirish dasturi toʻgʻrisida” 2003-yil 17-apreldagi 185-son qaroriga 3-ilovadan 304 (“Irgidromash”) pozitsiyasi chiqarib tashlansin.

6. Vazirlar Mahkamasining “Yevropa tiklanish va taraqqiyot banki ishtirokida “Dizel lokomotivlari parkini zamonaviylashtirish” loyihasini amalga oshirish chora-tadbirlari toʻgʻrisida” 2002-yil 26-dekabrdagi 451-son qarori 2-bandining uchinchi xatboshi quyidagi tahrirda bayon qilinsin:

“Yevropa tiklanish va taraqqiyot bankining kredit mablagʻlari tender asosida kompaniya lokomotivlari uchun yordamchi asbob-uskunalar bilan dizel-generator qurilmalari, shuningdek “Irgidromash” korxonasi bazasida metall quyish uchun asbob-uskunalar sotib olishga yoʻnaltiriladi”.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov zimmasiga yuklansin.